| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
4. වාසෙට්‌ඨසුත්‌තං
4. Vāseṭṭhasuttaṃ
44. එකං සමයං භගවා වෙසාලියං විහරති මහාවනෙ කූටාගාරසාලායං. අථ ඛො වාසෙට්‌ඨො උපාසකො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො වාසෙට්‌ඨං උපාසකං භගවා එතදවොච – ‘‘අට්‌ඨඞ්‌ගසමන්‌නාගතො, වාසෙට්‌ඨ, උපොසථො උපවුත්‌ථො මහප්‌ඵලො හොති…පෙ.… අනින්‌දිතා සග්‌ගමුපෙන්‌ති ඨාන’’න්‌ති.
44. Ekaṃ samayaṃ bhagavā vesāliyaṃ viharati mahāvane kūṭāgārasālāyaṃ. Atha kho vāseṭṭho upāsako yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho vāseṭṭhaṃ upāsakaṃ bhagavā etadavoca – ‘‘aṭṭhaṅgasamannāgato, vāseṭṭha, uposatho upavuttho mahapphalo hoti…pe… aninditā saggamupenti ṭhāna’’nti.
එවං වුත්‌තෙ වාසෙට්‌ඨො උපාසකො භගවන්‌තං එතදවොච – ‘‘පියා මෙ, භන්‌තෙ, ඤාතිසාලොහිතා අට්‌ඨඞ්‌ගසමන්‌නාගතං උපොසථං උපවසෙය්‍යුං, පියානම්‌පි මෙ අස්‌ස ඤාතිසාලොහිතානං දීඝරත්‌තං හිතාය සුඛාය. සබ්‌බෙ චෙපි, භන්‌තෙ, ඛත්‌තියා අට්‌ඨඞ්‌ගසමන්‌නාගතං උපොසථං උපවසෙය්‍යුං, සබ්‌බෙසම්‌පිස්‌ස ඛත්‌තියානං දීඝරත්‌තං හිතාය සුඛාය. සබ්‌බෙ චෙපි, භන්‌තෙ, බ්‍රාහ්‌මණා…පෙ.… වෙස්‌සා … සුද්‌දා අට්‌ඨඞ්‌ගසමන්‌නාගතං උපොසථං උපවසෙය්‍යුං, සබ්‌බෙසම්‌පිස්‌ස සුද්‌දානං දීඝරත්‌තං හිතාය සුඛායා’’ති.
Evaṃ vutte vāseṭṭho upāsako bhagavantaṃ etadavoca – ‘‘piyā me, bhante, ñātisālohitā aṭṭhaṅgasamannāgataṃ uposathaṃ upavaseyyuṃ, piyānampi me assa ñātisālohitānaṃ dīgharattaṃ hitāya sukhāya. Sabbe cepi, bhante, khattiyā aṭṭhaṅgasamannāgataṃ uposathaṃ upavaseyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, bhante, brāhmaṇā…pe… vessā … suddā aṭṭhaṅgasamannāgataṃ uposathaṃ upavaseyyuṃ, sabbesampissa suddānaṃ dīgharattaṃ hitāya sukhāyā’’ti.
‘‘එවමෙතං, වාසෙට්‌ඨ, එවමෙතං, වාසෙට්‌ඨ! සබ්‌බෙ චෙපි, වාසෙට්‌ඨ, ඛත්‌තියා අට්‌ඨඞ්‌ගසමන්‌නාගතං උපොසථං උපවසෙය්‍යුං, සබ්‌බෙසම්‌පිස්‌ස ඛත්‌තියානං දීඝරත්‌තං හිතාය සුඛාය. සබ්‌බෙ චෙපි, වාසෙට්‌ඨ, බ්‍රාහ්‌මණා…පෙ.… වෙස්‌සා… සුද්‌දා අට්‌ඨඞ්‌ගසමන්‌නාගතං උපොසථං උපවසෙය්‍යුං, සබ්‌බෙසම්‌පිස්‌ස සුද්‌දානං දීඝරත්‌තං හිතාය සුඛාය. සදෙවකො චෙපි, වාසෙට්‌ඨ, ලොකො සමාරකො සබ්‍රහ්‌මකො සස්‌සමණබ්‍රාහ්‌මණී පජා සදෙවමනුස්‌සා අට්‌ඨඞ්‌ගසමන්‌නාගතං උපොසථං උපවසෙය්‍යුං 1, සදෙවකස්‌සපිස්‌ස 2 ලොකස්‌ස සමාරකස්‌ස සබ්‍රහ්‌මකස්‌ස සස්‌සමණබ්‍රාහ්‌මණියා පජාය සදෙවමනුස්‌සාය දීඝරත්‌තං හිතාය සුඛාය. ඉමෙ චෙපි, වාසෙට්‌ඨ, මහාසාලා අට්‌ඨඞ්‌ගසමන්‌නාගතං උපොසථං උපවසෙය්‍යුං, ඉමෙසම්‌පිස්‌ස මහාසාලානං දීඝරත්‌තං හිතාය සුඛාය ( ) 3. කො පන වාදො මනුස්‌සභූතස්‌සා’’ති! චතුත්‌ථං.
‘‘Evametaṃ, vāseṭṭha, evametaṃ, vāseṭṭha! Sabbe cepi, vāseṭṭha, khattiyā aṭṭhaṅgasamannāgataṃ uposathaṃ upavaseyyuṃ, sabbesampissa khattiyānaṃ dīgharattaṃ hitāya sukhāya. Sabbe cepi, vāseṭṭha, brāhmaṇā…pe… vessā… suddā aṭṭhaṅgasamannāgataṃ uposathaṃ upavaseyyuṃ, sabbesampissa suddānaṃ dīgharattaṃ hitāya sukhāya. Sadevako cepi, vāseṭṭha, loko samārako sabrahmako sassamaṇabrāhmaṇī pajā sadevamanussā aṭṭhaṅgasamannāgataṃ uposathaṃ upavaseyyuṃ 4, sadevakassapissa 5 lokassa samārakassa sabrahmakassa sassamaṇabrāhmaṇiyā pajāya sadevamanussāya dīgharattaṃ hitāya sukhāya. Ime cepi, vāseṭṭha, mahāsālā aṭṭhaṅgasamannāgataṃ uposathaṃ upavaseyyuṃ, imesampissa mahāsālānaṃ dīgharattaṃ hitāya sukhāya ( ) 6. Ko pana vādo manussabhūtassā’’ti! Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 4. වාසෙට්‌ඨසුත්‌තවණ්‌ණනා • 4. Vāseṭṭhasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-8. සංඛිත්‌තූපොසථසුත්‌තාදිවණ්‌ණනා • 1-8. Saṃkhittūposathasuttādivaṇṇanā
