| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
2. ваасздтийт̇зрийг̇аат̇ааван̣н̣анаа
2. Vāseṭṭhītherīgāthāvaṇṇanā
буд̇д̇асогзнахам̣ аддаад̇иаад̣̇игаа ваасздтияаа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинанд̇ий ануггамзна самбхад̇авимогкасамбхаараа д̣̇звамануссзсу сам̣саранд̇ий имасмим̣ б̣уд̣̇д̇хуббаад̣̇з взсаалияам̣ гулаг̇зхз ниб̣б̣ад̇д̇ид̇ваа ваяаббад̇д̇аа маад̇аабид̇уухи самаанаж̇аад̇игасса гулабуд̇д̇асса д̣̇иннаа бад̇игулам̣ г̇анд̇ваа д̇зна сад̣̇д̇хим̣ сукасам̣ваасам̣ васанд̇ий згам̣ буд̇д̇ам̣ лабхид̇ваа д̇асмим̣ аад̇хаавид̇ваа барид̇хаавид̇ваа вижаран̣агаалз гаалам̣ гад̇з буд̇д̇асогзна аддид̇аа уммад̇д̇игаа ахоси. саа н̃аад̇агзсу саамигз жа д̇игижчам̣ гаронд̇зсу д̇зсам̣ аж̇аананд̇аанам̣язва балааяид̇ваа яад̇о д̇ад̇о бариб̣бхаманд̇ий мит̇илаанаг̇арам̣ самбад̇д̇аа д̇ад̇т̇ад̣̇д̣̇аса бхаг̇аванд̇ам̣ анд̇аравийт̇ияам̣ г̇ажчанд̇ам̣ д̣̇анд̇ам̣ г̇уд̇д̇ам̣ сам̣яад̇инд̣̇рияам̣ нааг̇ам̣. д̣̇исваана саха д̣̇ассанзна б̣уд̣̇д̇хаанубхаавад̇о абаг̇ад̇уммаад̣̇аа багад̇ижид̇д̇ам̣ бадилабхи. ат̇ассаа сад̇т̇аа сам̣кид̇д̇зна д̇хаммам̣ д̣̇зсзси. саа д̇ам̣ д̇хаммам̣ суд̇ваа бадилад̣̇д̇хасам̣взг̇аа сад̇т̇аарам̣ баб̣б̣аж̇ж̇ам̣ яаажид̇ваа сад̇т̇у аан̣ааяа бхигкунийсу баб̣б̣аж̇ид̇ваа гад̇абуб̣б̣агижжаа вибассанам̣ бадтабзд̇ваа гхадзнд̇ий вааяаманд̇ий барибагган̃аан̣ад̇ааяа на жирассзва саха бадисамбхид̣̇аахи арахад̇д̇ам̣ бад̇ваа ад̇д̇ано бадибад̇д̇им̣ бажжавзгкид̇ваа уд̣̇аанавасзна –
Puttasokenahaṃ aṭṭātiādikā vāseṭṭhiyā theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī anukkamena sambhatavimokkhasambhārā devamanussesu saṃsarantī imasmiṃ buddhuppāde vesāliyaṃ kulagehe nibbattitvā vayappattā mātāpitūhi samānajātikassa kulaputtassa dinnā patikulaṃ gantvā tena saddhiṃ sukhasaṃvāsaṃ vasantī ekaṃ puttaṃ labhitvā tasmiṃ ādhāvitvā paridhāvitvā vicaraṇakāle kālaṃ kate puttasokena aṭṭitā ummattikā ahosi. Sā ñātakesu sāmike ca tikicchaṃ karontesu tesaṃ ajānantānaṃyeva palāyitvā yato tato paribbhamantī mithilānagaraṃ sampattā tatthaddasa bhagavantaṃ antaravīthiyaṃ gacchantaṃ dantaṃ guttaṃ saṃyatindriyaṃ nāgaṃ. Disvāna saha dassanena buddhānubhāvato apagatummādā pakaticittaṃ paṭilabhi. Athassā satthā saṃkhittena dhammaṃ desesi. Sā taṃ dhammaṃ sutvā paṭiladdhasaṃvegā satthāraṃ pabbajjaṃ yācitvā satthu āṇāya bhikkhunīsu pabbajitvā katapubbakiccā vipassanaṃ paṭṭhapetvā ghaṭentī vāyamantī paripakkañāṇatāya na cirasseva saha paṭisambhidāhi arahattaṃ patvā attano paṭipattiṃ paccavekkhitvā udānavasena –
133.
133.
‘‘буд̇д̇асогзнахам̣ аддаа, кид̇д̇ажид̇д̇аа висан̃н̃иний;
‘‘Puttasokenahaṃ aṭṭā, khittacittā visaññinī;
наг̇г̇аа багин̣н̣агзсий жа, д̇зна д̇зна вижаарихам̣.
Naggā pakiṇṇakesī ca, tena tena vicārihaṃ.
134.
134.
‘‘вийт̇исан̇гаарагуудзсу, сусаанз рат̇ияаасу жа;
‘‘Vīthisaṅkārakūṭesu, susāne rathiyāsu ca;
ажарим̣ д̇ийн̣и вассаани, куббибаасаа самаббид̇аа.
Acariṃ tīṇi vassāni, khuppipāsā samappitā.
135.
135.
‘‘ат̇ад̣̇д̣̇асаасим̣ суг̇ад̇ам̣, наг̇арам̣ мит̇илам̣ бад̇и;
‘‘Athaddasāsiṃ sugataṃ, nagaraṃ mithilaṃ pati;
ад̣̇анд̇аанам̣ д̣̇амзд̇аарам̣, самб̣уд̣̇д̇хамагуд̇обхаяам̣.
Adantānaṃ dametāraṃ, sambuddhamakutobhayaṃ.
136.
136.
‘‘сажид̇д̇ам̣ бадилад̣̇д̇хаана, ванд̣̇ид̇ваана убаависим̣;
‘‘Sacittaṃ paṭiladdhāna, vanditvāna upāvisiṃ;
со мз д̇хаммамад̣̇зсзси, анугамбааяа г̇од̇амо.
So me dhammamadesesi, anukampāya gotamo.
137.
137.
‘‘д̇асса д̇хаммам̣ сун̣ид̇ваана, баб̣б̣аж̇им̣ анаг̇аарияам̣;
‘‘Tassa dhammaṃ suṇitvāna, pabbajiṃ anagāriyaṃ;
яун̃ж̇анд̇ий сад̇т̇уважанз, сажчаагаасим̣ бад̣̇ам̣ сивам̣.
Yuñjantī satthuvacane, sacchākāsiṃ padaṃ sivaṃ.
138.
138.
‘‘саб̣б̣з согаа самужчиннаа, бахийнаа зд̇ад̣̇анд̇игаа;
‘‘Sabbe sokā samucchinnā, pahīnā etadantikā;
барин̃н̃аад̇аа хи мз вад̇т̇уу, яад̇о согаана самбхаво’’д̇и. –
Pariññātā hi me vatthū, yato sokāna sambhavo’’ti. –
имаа г̇аат̇аа абхааси.
Imā gāthā abhāsi.
д̇ад̇т̇а аддаад̇и аддид̇аа. аяамзва ваа баато, аддид̇аа бийл̣ид̇аад̇и ад̇т̇о. кид̇д̇ажид̇д̇аад̇и согуммаад̣̇зна кид̇д̇ахад̣̇аяаа. д̇ад̇о зва багад̇исан̃н̃ааяа виг̇амзна висан̃н̃иний. хирод̇д̇аббаабхаавад̇о абаг̇ад̇авад̇т̇ад̇ааяа наг̇г̇аа. вид̇худ̇агзсад̇ааяа багин̣н̣агзсий. д̇зна д̇знаад̇и г̇аамзна г̇аамам̣ наг̇арзна наг̇арам̣ вийт̇ияаа вийт̇им̣ вижарим̣ ахам̣.
Tattha aṭṭāti aṭṭitā. Ayameva vā pāṭho, aṭṭitā pīḷitāti attho. Khittacittāti sokummādena khittahadayā. Tato eva pakatisaññāya vigamena visaññinī. Hirottappābhāvato apagatavatthatāya naggā. Vidhutakesatāya pakiṇṇakesī. Tena tenāti gāmena gāmaṃ nagarena nagaraṃ vīthiyā vīthiṃ vicariṃ ahaṃ.
ат̇аад̇и бажчаа уммаад̣̇асам̣вад̇д̇анияасса гаммасса баригкаяз. суг̇ад̇анд̇и собханаг̇аманад̇д̇аа сунд̣̇арам̣ таанам̣ г̇ад̇ад̇д̇аа саммаа г̇ад̣̇ад̇д̇аа саммаа жа г̇ад̇ад̇д̇аа суг̇ад̇ам̣ бхаг̇аванд̇ам̣. мит̇илам̣ бад̇ийд̇и мит̇илаабхимукам̣, мит̇илаанаг̇араабхимукам̣ г̇ажчанд̇анд̇и ад̇т̇о.
Athāti pacchā ummādasaṃvattaniyassa kammassa parikkhaye. Sugatanti sobhanagamanattā sundaraṃ ṭhānaṃ gatattā sammā gadattā sammā ca gatattā sugataṃ bhagavantaṃ. Mithilaṃ patīti mithilābhimukhaṃ, mithilānagarābhimukhaṃ gacchantanti attho.
сажид̇д̇ам̣ бадилад̣̇д̇хаанаад̇и б̣уд̣̇д̇хаанубхаавзна уммаад̣̇ам̣ бахааяа ад̇д̇ано багад̇ижид̇д̇ам̣ бадилабхид̇ваа.
Sacittaṃ paṭiladdhānāti buddhānubhāvena ummādaṃ pahāya attano pakaticittaṃ paṭilabhitvā.
яун̃ж̇анд̇ий сад̇т̇уважанзд̇и сад̇т̇у саммаасамб̣уд̣̇д̇хасса саасанз яог̇ам̣ гаронд̇ий бхааванам̣ ануяун̃ж̇анд̇ий. сажчаагаасим̣ бад̣̇ам̣ сиванд̇и сивам̣ кзмам̣ жад̇уухи яог̇зхи анубад̣̇д̣̇уд̇ам̣ ниб̣б̣аанам̣ бад̣̇ам̣ сажчиагаасим̣.
Yuñjantī satthuvacaneti satthu sammāsambuddhassa sāsane yogaṃ karontī bhāvanaṃ anuyuñjantī. Sacchākāsiṃ padaṃ sivanti sivaṃ khemaṃ catūhi yogehi anupaddutaṃ nibbānaṃ padaṃ sacchiakāsiṃ.
зд̇ад̣̇анд̇игаад̇и зд̇ам̣ ид̣̇аани маяаа ад̇хиг̇ад̇ам̣ арахад̇д̇ам̣ анд̇о барияосаанам̣ зд̇зсанд̇и зд̇ад̣̇анд̇игаа, согаа. на д̣̇аани д̇зсам̣ самбхаво ад̇т̇ийд̇и ад̇т̇о. яад̇о согаана самбхавод̇и яад̇о анд̇ониж̇жхааналагкан̣аанам̣ согаанам̣ самбхаво, д̇зсам̣ согаанам̣ бан̃жубаад̣̇аанагканд̇хасан̇каад̇аа вад̇т̇уу ад̇хидтаанаани н̃аад̇ад̇ийран̣абахаанабарин̃н̃аахи барин̃н̃аад̇аа. д̇асмаа согаа зд̇ад̣̇анд̇игаад̇и яож̇анаа.
Etadantikāti etaṃ idāni mayā adhigataṃ arahattaṃ anto pariyosānaṃ etesanti etadantikā, sokā. Na dāni tesaṃ sambhavo atthīti attho. Yato sokāna sambhavoti yato antonijjhānalakkhaṇānaṃ sokānaṃ sambhavo, tesaṃ sokānaṃ pañcupādānakkhandhasaṅkhātā vatthū adhiṭṭhānāni ñātatīraṇapahānapariññāhi pariññātā. Tasmā sokā etadantikāti yojanā.
ваасздтийт̇зрийг̇аат̇ааван̣н̣анаа нидтид̇аа.
Vāseṭṭhītherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 2. ваасздтийт̇зрийг̇аат̇аа • 2. Vāseṭṭhītherīgāthā
