| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၂. ဝသ္သဂဏနပဉ္ဟော
2. Vassagaṇanapañho
၂. ‘‘ကတိဝသ္သောသိ တ္ဝံ, ဘန္တေ နာဂသေနာ’’တိ? ‘‘သတ္တဝသ္သောဟံ, မဟာရာဇာ’’တိ။ ‘‘ကေ တေ, ဘန္တေ, သတ္တ, တ္ဝံ ဝာ သတ္တ, ဂဏနာ ဝာ သတ္တာ’’တိ?
2. ‘‘Kativassosi tvaṃ, bhante nāgasenā’’ti? ‘‘Sattavassohaṃ, mahārājā’’ti. ‘‘Ke te, bhante, satta, tvaṃ vā satta, gaṇanā vā sattā’’ti?
တေန ခော ပန သမယေန မိလိန္ဒသ္သ ရညော သဗ္ဗာဘရဏပဋိမဏ္ဍိတသ္သ အလင္ကတပဋိယတ္တသ္သ ပထဝိယံ ဆာယာ ဒိသ္သတိ, ဥဒကမဏိကေ စ ဆာယာ ဒိသ္သတိ။ အထ ခော အာယသ္မာ နာဂသေနော မိလိန္ဒံ ရာဇာနံ ဧတဒဝောစ ‘‘အယံ တေ, မဟာရာဇ, ဆာယာ ပထဝိယံ ဥဒကမဏိကေ စ ဒိသ္သတိ, ကိံ ပန, မဟာရာဇ, တ္ဝံ ဝာ ရာဇာ, ဆာယာ ဝာ ရာဇာ’’တိ? ‘‘အဟံ, ဘန္တေ နာဂသေန, ရာဇာ, နာယံ ဆာယာ ရာဇာ, မံ ပန နိသ္သာယ ဆာယာ ပဝတ္တတီ’’တိ။ ‘‘ဧဝမေဝ ခော, မဟာရာဇ, ဝသ္သာနံ ဂဏနာ သတ္တ, န ပနာဟံ သတ္တ, မံ ပန နိသ္သာယ သတ္တ ပဝတ္တတိ, ဆာယူပမံ မဟာရာဇာ’’တိ။ ‘‘အစ္ဆရိယံ, ဘန္တေ နာဂသေန, အဗ္ဘုတံ, ဘန္တေ နာဂသေန, အတိစိတ္ရာနိ ပဉ္ဟပဋိဘာနာနိ ဝိသဇ္ဇိတာနီ’’တိ။
Tena kho pana samayena milindassa rañño sabbābharaṇapaṭimaṇḍitassa alaṅkatapaṭiyattassa pathaviyaṃ chāyā dissati, udakamaṇike ca chāyā dissati. Atha kho āyasmā nāgaseno milindaṃ rājānaṃ etadavoca ‘‘ayaṃ te, mahārāja, chāyā pathaviyaṃ udakamaṇike ca dissati, kiṃ pana, mahārāja, tvaṃ vā rājā, chāyā vā rājā’’ti? ‘‘Ahaṃ, bhante nāgasena, rājā, nāyaṃ chāyā rājā, maṃ pana nissāya chāyā pavattatī’’ti. ‘‘Evameva kho, mahārāja, vassānaṃ gaṇanā satta, na panāhaṃ satta, maṃ pana nissāya satta pavattati, chāyūpamaṃ mahārājā’’ti. ‘‘Acchariyaṃ, bhante nāgasena, abbhutaṃ, bhante nāgasena, aticitrāni pañhapaṭibhānāni visajjitānī’’ti.
ဝသ္သဂဏနပဉ္ဟော ဒုတိယော။
Vassagaṇanapañho dutiyo.
