| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
2. වස්‌සගණනපඤ්‌හො
2. Vassagaṇanapañho
2. ‘‘කතිවස්‌සොසි ත්‌වං, භන්‌තෙ නාගසෙනා’’ති? ‘‘සත්‌තවස්‌සොහං, මහාරාජා’’ති. ‘‘කෙ තෙ, භන්‌තෙ, සත්‌ත, ත්‌වං වා සත්‌ත, ගණනා වා සත්‌තා’’ති?
2. ‘‘Kativassosi tvaṃ, bhante nāgasenā’’ti? ‘‘Sattavassohaṃ, mahārājā’’ti. ‘‘Ke te, bhante, satta, tvaṃ vā satta, gaṇanā vā sattā’’ti?
තෙන ඛො පන සමයෙන මිලින්‌දස්‌ස රඤ්‌ඤො සබ්‌බාභරණපටිමණ්‌ඩිතස්‌ස අලඞ්‌කතපටියත්‌තස්‌ස පථවියං ඡායා දිස්‌සති, උදකමණිකෙ ච ඡායා දිස්‌සති. අථ ඛො ආයස්‌මා නාගසෙනො මිලින්‌දං රාජානං එතදවොච ‘‘අයං තෙ, මහාරාජ, ඡායා පථවියං උදකමණිකෙ ච දිස්‌සති, කිං පන, මහාරාජ, ත්‌වං වා රාජා, ඡායා වා රාජා’’ති? ‘‘අහං, භන්‌තෙ නාගසෙන, රාජා, නායං ඡායා රාජා, මං පන නිස්‌සාය ඡායා පවත්‌තතී’’ති. ‘‘එවමෙව ඛො, මහාරාජ, වස්‌සානං ගණනා සත්‌ත, න පනාහං සත්‌ත, මං පන නිස්‌සාය සත්‌ත පවත්‌තති, ඡායූපමං මහාරාජා’’ති. ‘‘අච්‌ඡරියං, භන්‌තෙ නාගසෙන, අබ්‌භුතං, භන්‌තෙ නාගසෙන, අතිචිත්‍රානි පඤ්‌හපටිභානානි විසජ්‌ජිතානී’’ති.
Tena kho pana samayena milindassa rañño sabbābharaṇapaṭimaṇḍitassa alaṅkatapaṭiyattassa pathaviyaṃ chāyā dissati, udakamaṇike ca chāyā dissati. Atha kho āyasmā nāgaseno milindaṃ rājānaṃ etadavoca ‘‘ayaṃ te, mahārāja, chāyā pathaviyaṃ udakamaṇike ca dissati, kiṃ pana, mahārāja, tvaṃ vā rājā, chāyā vā rājā’’ti? ‘‘Ahaṃ, bhante nāgasena, rājā, nāyaṃ chāyā rājā, maṃ pana nissāya chāyā pavattatī’’ti. ‘‘Evameva kho, mahārāja, vassānaṃ gaṇanā satta, na panāhaṃ satta, maṃ pana nissāya satta pavattati, chāyūpamaṃ mahārājā’’ti. ‘‘Acchariyaṃ, bhante nāgasena, abbhutaṃ, bhante nāgasena, aticitrāni pañhapaṭibhānāni visajjitānī’’ti.
වස්‌සගණනපඤ්‌හො දුතියො.
Vassagaṇanapañho dutiyo.
