| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. வஸ்ஸகாரஸுத்தவண்ணனா
5. Vassakārasuttavaṇṇanā
35. பஞ்சமே அனுஸ்ஸரிதாதி அனுக³ந்த்வா ஸரிதா, அபராபரங் ஸரிதுங் ஸமத்தோ²தி அத்தோ². த³க்கோ²தி சே²கோ. தத்ருபாயாயாதி ‘‘இமஸ்மிங் காலே இமங் நாம கத்தப்³ப³’’ந்தி ஏவங் தத்த² தத்த² உபாயபூ⁴தாய பஞ்ஞாய ஸமன்னாக³தோ. அனுமோதி³தப்³ப³ந்தி அபி⁴னந்தி³தப்³ப³ங். படிக்கோஸிதப்³ப³ந்தி படிக்கி²பிதப்³ப³ங். நேவ கோ² த்யாஹந்தி நேவ கோ² தே அஹங். கஸ்மா பனேதங் ப⁴க³வா நாபி⁴னந்த³தி, நப்படிக்கி²பதீதி? லோகியத்தா நாபி⁴னந்த³தி , லோகியங் அத்த²ங் க³ஹெத்வா டி²தத்தா நப்படிக்கோஸதி. ப³ஹுஸ்ஸ ஜனதாதி ப³ஹு அஸ்ஸ ஜனதா. இத³ஞ்ச கரணத்தே² ஸாமிவசனங் வேதி³தப்³ப³ங். அரியே ஞாயேதி ஸஹவிபஸ்ஸனகே மக்³கே³. கல்யாணத⁴ம்மதா குஸலத⁴ம்மதாதிபி தஸ்ஸேவ நாமானி. யங் விதக்கந்தி நெக்க²ம்மவிதக்காதீ³ஸு அஞ்ஞதரங். ந தங் விதக்கங் விதக்கேதீதி காமவிதக்காதீ³ஸு ஏகம்பி ந விதக்கேதி. இதரங் தஸ்ஸேவ வேவசனங். விதக்கபதே²தி எத்த² விதக்கோயேவ விதக்கபதோ². அஹஞ்ஹி ப்³ராஹ்மணாதிஆதீ³ஸு பட²மனயேன கீ²ணாஸவஸ்ஸ ஸீலஞ்சேவ பா³ஹுஸச்சஞ்ச கதி²தங், து³தியததியேஹி கீ²ணாஸவஸ்ஸ கிரியவிதக்கானி சேவ கிரியஜ்ஜா²னானி ச, சதுத்தே²ன கீ²ணாஸவபா⁴வோ கதி²தோதி வேதி³தப்³போ³.
35. Pañcame anussaritāti anugantvā saritā, aparāparaṃ sarituṃ samatthoti attho. Dakkhoti cheko. Tatrupāyāyāti ‘‘imasmiṃ kāle imaṃ nāma kattabba’’nti evaṃ tattha tattha upāyabhūtāya paññāya samannāgato. Anumoditabbanti abhinanditabbaṃ. Paṭikkositabbanti paṭikkhipitabbaṃ. Neva kho tyāhanti neva kho te ahaṃ. Kasmā panetaṃ bhagavā nābhinandati, nappaṭikkhipatīti? Lokiyattā nābhinandati , lokiyaṃ atthaṃ gahetvā ṭhitattā nappaṭikkosati. Bahussa janatāti bahu assa janatā. Idañca karaṇatthe sāmivacanaṃ veditabbaṃ. Ariye ñāyeti sahavipassanake magge. Kalyāṇadhammatā kusaladhammatātipi tasseva nāmāni. Yaṃ vitakkanti nekkhammavitakkādīsu aññataraṃ. Na taṃ vitakkaṃ vitakketīti kāmavitakkādīsu ekampi na vitakketi. Itaraṃ tasseva vevacanaṃ. Vitakkapatheti ettha vitakkoyeva vitakkapatho. Ahañhi brāhmaṇātiādīsu paṭhamanayena khīṇāsavassa sīlañceva bāhusaccañca kathitaṃ, dutiyatatiyehi khīṇāsavassa kiriyavitakkāni ceva kiriyajjhānāni ca, catutthena khīṇāsavabhāvo kathitoti veditabbo.
மச்சுபாஸப்பமோசனந்தி மச்சுபாஸா பமோசனகங் மக்³க³ங். ஞாயங் த⁴ம்மந்தி ஸஹவிபஸ்ஸனகங் மக்³க³ங். தி³ஸ்வா ச ஸுத்வா சாதி ஞாணேனேவ பஸ்ஸித்வா ச ஸுணித்வா ச. ஸேஸமெத்த² உத்தானமேவ.
Maccupāsappamocananti maccupāsā pamocanakaṃ maggaṃ. Ñāyaṃ dhammanti sahavipassanakaṃ maggaṃ. Disvā ca sutvā cāti ñāṇeneva passitvā ca suṇitvā ca. Sesamettha uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. வஸ்ஸகாரஸுத்தங் • 5. Vassakārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. வஸ்ஸகாரஸுத்தவண்ணனா • 5. Vassakārasuttavaṇṇanā
