| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. வஸ்ஸகாரஸுத்தவண்ணனா
7. Vassakārasuttavaṇṇanā
187. ஸத்தமே தோதெ³ய்யஸ்ஸாதி துதி³கா³மவாஸிகஸ்ஸ. பரிஸதீதி ஸன்னிபதிதாய பரிஸாய. பரூபாரம்ப⁴ங் வத்தெந்தீதி பரக³ரஹங் பவத்தெந்தி கதெ²ந்தி. பா³லோ அயங் ராஜாதிஆதி³ யங் தே உபாரம்ப⁴ங் வத்தெந்தி, தஸ்ஸ த³ஸ்ஸனத்த²ங் வுத்தங். ஸமணே ராமபுத்தேதி உத³கே ராமபுத்தே. அபி⁴ப்பஸன்னோதி அதிக்கம்ம பஸன்னோ. பரமனிபச்சகாரந்தி உத்தமனிபாதகிரியங் நீசவுத்திங். பரிஹாரகாதி பரிசாரகா. யமகோதிஆதீ³னி தேஸங் நாமானி. தேஸு ஹி ஏகோ யமகோ நாம, ஏகோ மொக்³க³ல்லோ நாம, ஏகோ உக்³கோ³ நாம, ஏகோ நாவிந்த³கீ நாம, ஏகோ க³ந்த⁴ப்³போ³ நாம, ஏகோ அக்³கி³வெஸ்ஸோ நாம. த்யாஸ்ஸுத³ந்தி எத்த² அஸ்ஸுத³ந்தி நிபாதமத்தங், தே அத்தனோ பரிஸதி நிஸின்னேதி அத்தோ². இமினா நயேன நேதீதி இமினா காரணேன அனுனேதி ஜானாபேதி. கரணீயாதி⁴கரணீயேஸூதி பண்டி³தேஹி கத்தப்³ப³கிச்சேஸு ச அதிரேககத்தப்³ப³கிச்சேஸு ச. வசனீயாதி⁴வசனீயேஸூதி வத்தப்³பே³ஸு ச அதிரேகவத்தப்³பே³ஸு ச. அலமத்த²த³ஸதரேஹீதி எத்த² அத்தே² பஸ்ஸிதுங் ஸமத்தா² அலமத்த²த³ஸா, தே அதிஸித்வா டி²தா அலமத்த²த³ஸதரா, தேஹி அலமத்த²த³ஸதரேஹி. அலமத்த²த³ஸதரோதி அலமத்த²த³ஸதாய உத்தரிதரோ, சே²கேஹி சே²கதரோ பண்டி³தேஹி பண்டி³ததரோதி புச்ச²ந்தோ ஏவமாஹ. அத²ஸ்ஸ தே படிபுச்ச²ந்தா ஏவங் போ⁴திஆதி³மாஹங்ஸு. இதி ப்³ராஹ்மணோ அத்தனோ ஸப்புரிஸதாய தங் ஏளெய்யராஜானம்பி தஸ்ஸ பரிவாரிகேபி உத³கம்பி ராமபுத்தங் பஸங்ஸி. அந்தோ⁴ விய ஹி அஸப்புரிஸோ, சக்கு²மா விய ஸப்புரிஸோ. யதா² அந்தோ⁴ நேவ அனந்த⁴ங் ந அந்த⁴ங் பஸ்ஸதி, ஏவங் அஸப்புரிஸோ நேவ ஸப்புரிஸங் ந அஸப்புரிஸங் ஜானாதி. யதா² சக்கு²மா அந்த⁴ம்பி அனந்த⁴ம்பி பஸ்ஸதி, ஏவங் ஸப்புரிஸோ ஸப்புரிஸம்பி அஸப்புரிஸம்பி ஜானாதி. தோதெ³ய்யோபி ஸப்புரிஸதாய அஸப்புரிஸே அஞ்ஞாஸீதி இமமத்த²வஸங் படிச்ச துட்ட²மானஸோ ப்³ராஹ்மணோ அச்ச²ரியங் போ⁴, கோ³தமாதிஆதீ³னி வத்வா ததா²க³தஸ்ஸ பா⁴ஸிதங் அனுமோதி³த்வா பக்காமி.
187. Sattame todeyyassāti tudigāmavāsikassa. Parisatīti sannipatitāya parisāya. Parūpārambhaṃ vattentīti paragarahaṃ pavattenti kathenti. Bālo ayaṃ rājātiādi yaṃ te upārambhaṃ vattenti, tassa dassanatthaṃ vuttaṃ. Samaṇe rāmaputteti udake rāmaputte. Abhippasannoti atikkamma pasanno. Paramanipaccakāranti uttamanipātakiriyaṃ nīcavuttiṃ. Parihārakāti paricārakā. Yamakotiādīni tesaṃ nāmāni. Tesu hi eko yamako nāma, eko moggallo nāma, eko uggo nāma, eko nāvindakī nāma, eko gandhabbo nāma, eko aggivesso nāma. Tyāssudanti ettha assudanti nipātamattaṃ, te attano parisati nisinneti attho. Iminā nayena netīti iminā kāraṇena anuneti jānāpeti. Karaṇīyādhikaraṇīyesūti paṇḍitehi kattabbakiccesu ca atirekakattabbakiccesu ca. Vacanīyādhivacanīyesūti vattabbesu ca atirekavattabbesu ca. Alamatthadasatarehīti ettha atthe passituṃ samatthā alamatthadasā, te atisitvā ṭhitā alamatthadasatarā, tehi alamatthadasatarehi. Alamatthadasataroti alamatthadasatāya uttaritaro, chekehi chekataro paṇḍitehi paṇḍitataroti pucchanto evamāha. Athassa te paṭipucchantā evaṃ bhotiādimāhaṃsu. Iti brāhmaṇo attano sappurisatāya taṃ eḷeyyarājānampi tassa parivārikepi udakampi rāmaputtaṃ pasaṃsi. Andho viya hi asappuriso, cakkhumā viya sappuriso. Yathā andho neva anandhaṃ na andhaṃ passati, evaṃ asappuriso neva sappurisaṃ na asappurisaṃ jānāti. Yathā cakkhumā andhampi anandhampi passati, evaṃ sappuriso sappurisampi asappurisampi jānāti. Todeyyopi sappurisatāya asappurise aññāsīti imamatthavasaṃ paṭicca tuṭṭhamānaso brāhmaṇo acchariyaṃ bho, gotamātiādīni vatvā tathāgatassa bhāsitaṃ anumoditvā pakkāmi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. வஸ்ஸகாரஸுத்தங் • 7. Vassakārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. வஸ்ஸகாரஸுத்தவண்ணனா • 7. Vassakārasuttavaṇṇanā
