| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. வஸ்ஸகாரஸுத்தவண்ணனா
7. Vassakārasuttavaṇṇanā
187. ஸத்தமே வஸ்ஸகாரோ ப்³ராஹ்மணோ மக³த⁴மஹாமத்தோதி எத்த² வஸ்ஸகாரோதி தஸ்ஸ ப்³ராஹ்மணஸ்ஸ நாமங். மஹதியா இஸ்ஸரியமத்தாய ஸமன்னாக³தோ மஹாமத்தோ. இஸ்ஸரியமத்தாயாதி ச இஸ்ஸரியப்பமாணேனாதி அத்தோ², இஸ்ஸரியேன சேவ வித்தூபகரணேன சாதி ஏவங் வா எத்த² அத்தோ² த³ட்ட²ப்³போ³, உபபோ⁴கூ³பகரணானிபி ஹி லோகே ‘‘மத்தா’’தி வுச்சந்தி. மக³த⁴ரஞ்ஞோ, மக³த⁴ரட்டே² வா மஹாமத்தோதி மக³த⁴மஹாமத்தோ. துதி³ஸஞ்ஞிதோ கா³மோ நிவாஸோ ஏதஸ்ஸாதி தோதெ³ய்யோ. தேனேவாஹ ‘‘துதி³கா³மவாஸிகஸ்ஸா’’தி. துதி³கா³மவாஸிதா சஸ்ஸ தத்த² அதி⁴பதிபா⁴வேனாதி த³ட்ட²ப்³பா³. ஸோ ஹி தங் கா³மங் ஸோணத³ண்டோ³ விய, சம்பங் கூடத³ந்தோ விய, கா²ணுமதங் அதி⁴பதிபா⁴வேன அஜ்ஜா²வஸதி. மஹத்³த⁴னோ ஹோதி பஞ்சசத்தாலீஸகோடிவிப⁴வோ. பரிஸதீதி பரிஸாயங், ஜனஸமூஹேதி அத்தோ². தேனாஹ ‘‘ஸன்னிபதிதாய பரிஸாயா’’தி. அபி⁴ப்பஸன்னோதி எத்த² அபி⁴க்கமனத்தோ² அபி⁴-ஸத்³தோ³தி ஆஹ ‘‘அதிக்கம்ம பஸன்னோ’’தி, பஸாத³னீயங் டா²னங் அதிக்கமித்வா அப்பஸாத³னீயட்டா²னே பஸன்னோதி அதி⁴ப்பாயோ. தங் தங் கிச்சங் அத்த²ங் பஸ்ஸதீதி அத்த²த³ஸா, அலங் ஸமத்தா² படிப³லா அத்த²த³ஸா அலமத்த²த³ஸா, அலமத்த²த³ஸே அதிஸயந்தீதி அலமத்த²த³ஸதரா. தேனாஹ ‘‘அத்தே² பஸ்ஸிதுங் ஸமத்தா²’’திஆதி³. நேவ ஸப்புரிஸங் ந அஸப்புரிஸங் ஜானாதி ஸப்புரிஸத⁴ம்மானங் அஸப்புரிஸத⁴ம்மானஞ்ச யாதா²வதோ அஜானநதோ. ஸேஸமெத்த² உத்தானமேவ.
187. Sattame vassakāro brāhmaṇo magadhamahāmattoti ettha vassakāroti tassa brāhmaṇassa nāmaṃ. Mahatiyā issariyamattāya samannāgato mahāmatto. Issariyamattāyāti ca issariyappamāṇenāti attho, issariyena ceva vittūpakaraṇena cāti evaṃ vā ettha attho daṭṭhabbo, upabhogūpakaraṇānipi hi loke ‘‘mattā’’ti vuccanti. Magadharañño, magadharaṭṭhe vā mahāmattoti magadhamahāmatto. Tudisaññito gāmo nivāso etassāti todeyyo. Tenevāha ‘‘tudigāmavāsikassā’’ti. Tudigāmavāsitā cassa tattha adhipatibhāvenāti daṭṭhabbā. So hi taṃ gāmaṃ soṇadaṇḍo viya, campaṃ kūṭadanto viya, khāṇumataṃ adhipatibhāvena ajjhāvasati. Mahaddhano hoti pañcacattālīsakoṭivibhavo. Parisatīti parisāyaṃ, janasamūheti attho. Tenāha ‘‘sannipatitāya parisāyā’’ti. Abhippasannoti ettha abhikkamanattho abhi-saddoti āha ‘‘atikkamma pasanno’’ti, pasādanīyaṃ ṭhānaṃ atikkamitvā appasādanīyaṭṭhāne pasannoti adhippāyo. Taṃ taṃ kiccaṃ atthaṃ passatīti atthadasā, alaṃ samatthā paṭibalā atthadasā alamatthadasā, alamatthadase atisayantīti alamatthadasatarā. Tenāha ‘‘atthe passituṃ samatthā’’tiādi. Neva sappurisaṃ na asappurisaṃ jānāti sappurisadhammānaṃ asappurisadhammānañca yāthāvato ajānanato. Sesamettha uttānameva.
வஸ்ஸகாரஸுத்தவண்ணனா நிட்டி²தா.
Vassakārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. வஸ்ஸகாரஸுத்தங் • 7. Vassakārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7. வஸ்ஸகாரஸுத்தவண்ணனா • 7. Vassakārasuttavaṇṇanā
