| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๕. วสฺสการสุตฺตวณฺณนา
5. Vassakārasuttavaṇṇanā
๓๕. ปญฺจเม อนุสฺสริตาติ อนุคนฺตฺวา สริตา, อปราปรํ สริตุํ สมโตฺถติ อโตฺถฯ ทโกฺขติ เฉโกฯ ตตฺรุปายายาติ ‘‘อิมสฺมิํ กาเล อิมํ นาม กตฺตพฺพ’’นฺติ เอวํ ตตฺถ ตตฺถ อุปายภูตาย ปญฺญาย สมนฺนาคโตฯ อนุโมทิตพฺพนฺติ อภินนฺทิตพฺพํฯ ปฎิโกฺกสิตพฺพนฺติ ปฎิกฺขิปิตพฺพํฯ เนว โข ตฺยาหนฺติ เนว โข เต อหํฯ กสฺมา ปเนตํ ภควา นาภินนฺทติ, นปฺปฎิกฺขิปตีติ? โลกิยตฺตา นาภินนฺทติ , โลกิยํ อตฺถํ คเหตฺวา ฐิตตฺตา นปฺปฎิโกฺกสติฯ พหุสฺส ชนตาติ พหุ อสฺส ชนตาฯ อิทญฺจ กรณเตฺถ สามิวจนํ เวทิตพฺพํฯ อริเย ญาเยติ สหวิปสฺสนเก มเคฺคฯ กลฺยาณธมฺมตา กุสลธมฺมตาติปิ ตเสฺสว นามานิฯ ยํ วิตกฺกนฺติ เนกฺขมฺมวิตกฺกาทีสุ อญฺญตรํฯ น ตํ วิตกฺกํ วิตเกฺกตีติ กามวิตกฺกาทีสุ เอกมฺปิ น วิตเกฺกติฯ อิตรํ ตเสฺสว เววจนํฯ วิตกฺกปเถติ เอตฺถ วิตโกฺกเยว วิตกฺกปโถฯ อหญฺหิ พฺราหฺมณาติอาทีสุ ปฐมนเยน ขีณาสวสฺส สีลเญฺจว พาหุสจฺจญฺจ กถิตํ, ทุติยตติเยหิ ขีณาสวสฺส กิริยวิตกฺกานิ เจว กิริยชฺฌานานิ จ, จตุเตฺถน ขีณาสวภาโว กถิโตติ เวทิตโพฺพฯ
35. Pañcame anussaritāti anugantvā saritā, aparāparaṃ sarituṃ samatthoti attho. Dakkhoti cheko. Tatrupāyāyāti ‘‘imasmiṃ kāle imaṃ nāma kattabba’’nti evaṃ tattha tattha upāyabhūtāya paññāya samannāgato. Anumoditabbanti abhinanditabbaṃ. Paṭikkositabbanti paṭikkhipitabbaṃ. Neva kho tyāhanti neva kho te ahaṃ. Kasmā panetaṃ bhagavā nābhinandati, nappaṭikkhipatīti? Lokiyattā nābhinandati , lokiyaṃ atthaṃ gahetvā ṭhitattā nappaṭikkosati. Bahussa janatāti bahu assa janatā. Idañca karaṇatthe sāmivacanaṃ veditabbaṃ. Ariye ñāyeti sahavipassanake magge. Kalyāṇadhammatā kusaladhammatātipi tasseva nāmāni. Yaṃ vitakkanti nekkhammavitakkādīsu aññataraṃ. Na taṃ vitakkaṃ vitakketīti kāmavitakkādīsu ekampi na vitakketi. Itaraṃ tasseva vevacanaṃ. Vitakkapatheti ettha vitakkoyeva vitakkapatho. Ahañhi brāhmaṇātiādīsu paṭhamanayena khīṇāsavassa sīlañceva bāhusaccañca kathitaṃ, dutiyatatiyehi khīṇāsavassa kiriyavitakkāni ceva kiriyajjhānāni ca, catutthena khīṇāsavabhāvo kathitoti veditabbo.
มจฺจุปาสปฺปโมจนนฺติ มจฺจุปาสา ปโมจนกํ มคฺคํฯ ญายํ ธมฺมนฺติ สหวิปสฺสนกํ มคฺคํฯ ทิสฺวา จ สุตฺวา จาติ ญาเณเนว ปสฺสิตฺวา จ สุณิตฺวา จฯ เสสเมตฺถ อุตฺตานเมวฯ
Maccupāsappamocananti maccupāsā pamocanakaṃ maggaṃ. Ñāyaṃ dhammanti sahavipassanakaṃ maggaṃ. Disvā ca sutvā cāti ñāṇeneva passitvā ca suṇitvā ca. Sesamettha uttānameva.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๕. วสฺสการสุตฺตํ • 5. Vassakārasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๕. วสฺสการสุตฺตวณฺณนา • 5. Vassakārasuttavaṇṇanā
