| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
116. வஸ்ஸங் அனுபக³ந்தப்³ப³ட்டா²னகதா²
116. Vassaṃ anupagantabbaṭṭhānakathā
204. ருக்க²ஸுஸீரேயேவாதி ருக்க²ஸ்ஸ விவரே ஏவ. விவரஞ்ஹி ஸு ஸங் இரதி க³ச்ச²தீதி ஸுஸீரோதி வுச்சதி. பத³ரச்ச²த³னந்தி ப²லகேஹி சா²தி³தங். பவிஸனத்³வாரந்தி பவிஸனநிக்க²மனத்³வாரங். பவிஸனஞ்ச நிக்க²மனஞ்ச பவிஸனந்தி விரூபேகஸேஸேன காதப்³ப³ங். கா²ணுமத்த²கேதி கா²ணுனோ உபரி. விடபீ⁴தி விடங் அஞ்ஞமஞ்ஞவேத⁴னங் அபதி க³ச்ச²தீதி விடபோ, பகாரஸ்ஸ ப⁴காரங், இத்தி²லிங்க³ஜோதகஈபச்சயஞ்ச கத்வா விடபீ⁴தி வுச்சதி. தத்தா²தி அட்டகே. யஸ்ஸாதி பி⁴க்கு²னோ, நத்தீ²தி ஸம்ப³ந்தோ⁴. பஞ்சன்னங் ச²த³னானந்தி திணபண்ணஇட்ட²காஸிலாஸுதா⁴ஸங்கா²தானங் (சூளவ॰ 303) பஞ்சன்னங் ச²த³னானங். இத³ஞ்ச யேபு⁴ய்யவஸேன வுத்தங் பத³ரச்ச²த³னாதீ³னம்பி க³ஹிதத்தா. த்³வாரப³ந்த⁴னந்தி த்³வாரேன ப³ந்தி⁴தப்³ப³ங். ச²வகுடிகாதி ச²வானங் ஸயனட்டா²னே ஸுஸானே கதா குடிகா ச²வகுடிகாதி வுச்சதி. டங்கிதமஞ்சாதீ³திஆதி³ஸத்³தே³ன டங்கிதபீட²ங் ஸங்க³ண்ஹாதி. தத்தா²தி ச²வகுடியங். அஞ்ஞங் குடிகந்தி ச²வகுடிதோ அஞ்ஞங் குடிகங். ஆவரணந்தி பி⁴த்திங். த்³வாரந்தி பவிஸனநிக்க²மனத்³வாரங். ச²த்தகுடிகா நாமேஸாதி ஏஸா ச²த்தேன கதா குடிகா நாம. மஹந்தேன கபல்லேன குடிகங் கத்வாதி ஸம்ப³ந்தோ⁴.
204.Rukkhasusīreyevāti rukkhassa vivare eva. Vivarañhi su saṃ irati gacchatīti susīroti vuccati. Padaracchadananti phalakehi chāditaṃ. Pavisanadvāranti pavisananikkhamanadvāraṃ. Pavisanañca nikkhamanañca pavisananti virūpekasesena kātabbaṃ. Khāṇumatthaketi khāṇuno upari. Viṭabhīti viṭaṃ aññamaññavedhanaṃ apati gacchatīti viṭapo, pakārassa bhakāraṃ, itthiliṅgajotakaīpaccayañca katvā viṭabhīti vuccati. Tatthāti aṭṭake. Yassāti bhikkhuno, natthīti sambandho. Pañcannaṃ chadanānanti tiṇapaṇṇaiṭṭhakāsilāsudhāsaṅkhātānaṃ (cūḷava. 303) pañcannaṃ chadanānaṃ. Idañca yebhuyyavasena vuttaṃ padaracchadanādīnampi gahitattā. Dvārabandhananti dvārena bandhitabbaṃ. Chavakuṭikāti chavānaṃ sayanaṭṭhāne susāne katā kuṭikā chavakuṭikāti vuccati. Ṭaṅkitamañcādītiādisaddena ṭaṅkitapīṭhaṃ saṅgaṇhāti. Tatthāti chavakuṭiyaṃ. Aññaṃ kuṭikanti chavakuṭito aññaṃ kuṭikaṃ. Āvaraṇanti bhittiṃ. Dvāranti pavisananikkhamanadvāraṃ. Chattakuṭikā nāmesāti esā chattena katā kuṭikā nāma. Mahantena kapallena kuṭikaṃ katvāti sambandho.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 116. வஸ்ஸங் அனுபக³ந்தப்³ப³ட்டா²னானி • 116. Vassaṃ anupagantabbaṭṭhānāni
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / வஜாதீ³ஸுவஸ்ஸூபக³மனகதா² • Vajādīsuvassūpagamanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வஸ்ஸங் அனுபக³ந்தப்³ப³ட்டா²னகதா²வண்ணனா • Vassaṃ anupagantabbaṭṭhānakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வஜாதீ³ஸு வஸ்ஸூபக³மனகதா²வண்ணனா • Vajādīsu vassūpagamanakathāvaṇṇanā
