| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๑๑๖. วสฺสํ อนุปคนฺตพฺพฎฺฐานกถา
116. Vassaṃ anupagantabbaṭṭhānakathā
๒๐๔. รุกฺขสุสีเรเยวาติ รุกฺขสฺส วิวเร เอวฯ วิวรญฺหิ สุ สํ อิรติ คจฺฉตีติ สุสีโรติ วุจฺจติฯ ปทรจฺฉทนนฺติ ผลเกหิ ฉาทิตํฯ ปวิสนทฺวารนฺติ ปวิสนนิกฺขมนทฺวารํฯ ปวิสนญฺจ นิกฺขมนญฺจ ปวิสนนฺติ วิรูเปกเสเสน กาตพฺพํฯ ขาณุมตฺถเกติ ขาณุโน อุปริฯ วิฎภีติ วิฎํ อญฺญมญฺญเวธนํ อปติ คจฺฉตีติ วิฎโป, ปการสฺส ภการํ, อิตฺถิลิงฺคโชตกอีปจฺจยญฺจ กตฺวา วิฎภีติ วุจฺจติฯ ตตฺถาติ อฎฺฎเกฯ ยสฺสาติ ภิกฺขุโน, นตฺถีติ สมฺพโนฺธฯ ปญฺจนฺนํ ฉทนานนฺติ ติณปณฺณอิฎฺฐกาสิลาสุธาสงฺขาตานํ (จูฬว. ๓๐๓) ปญฺจนฺนํ ฉทนานํฯ อิทญฺจ เยภุยฺยวเสน วุตฺตํ ปทรจฺฉทนาทีนมฺปิ คหิตตฺตาฯ ทฺวารพนฺธนนฺติ ทฺวาเรน พนฺธิตพฺพํฯ ฉวกุฎิกาติ ฉวานํ สยนฎฺฐาเน สุสาเน กตา กุฎิกา ฉวกุฎิกาติ วุจฺจติฯ ฎงฺกิตมญฺจาทีติอาทิสเทฺทน ฎงฺกิตปีฐํ สงฺคณฺหาติฯ ตตฺถาติ ฉวกุฎิยํฯ อญฺญํ กุฎิกนฺติ ฉวกุฎิโต อญฺญํ กุฎิกํฯ อาวรณนฺติ ภิตฺติํฯ ทฺวารนฺติ ปวิสนนิกฺขมนทฺวารํฯ ฉตฺตกุฎิกา นาเมสาติ เอสา ฉเตฺตน กตา กุฎิกา นามฯ มหเนฺตน กปเลฺลน กุฎิกํ กตฺวาติ สมฺพโนฺธฯ
204.Rukkhasusīreyevāti rukkhassa vivare eva. Vivarañhi su saṃ irati gacchatīti susīroti vuccati. Padaracchadananti phalakehi chāditaṃ. Pavisanadvāranti pavisananikkhamanadvāraṃ. Pavisanañca nikkhamanañca pavisananti virūpekasesena kātabbaṃ. Khāṇumatthaketi khāṇuno upari. Viṭabhīti viṭaṃ aññamaññavedhanaṃ apati gacchatīti viṭapo, pakārassa bhakāraṃ, itthiliṅgajotakaīpaccayañca katvā viṭabhīti vuccati. Tatthāti aṭṭake. Yassāti bhikkhuno, natthīti sambandho. Pañcannaṃ chadanānanti tiṇapaṇṇaiṭṭhakāsilāsudhāsaṅkhātānaṃ (cūḷava. 303) pañcannaṃ chadanānaṃ. Idañca yebhuyyavasena vuttaṃ padaracchadanādīnampi gahitattā. Dvārabandhananti dvārena bandhitabbaṃ. Chavakuṭikāti chavānaṃ sayanaṭṭhāne susāne katā kuṭikā chavakuṭikāti vuccati. Ṭaṅkitamañcādītiādisaddena ṭaṅkitapīṭhaṃ saṅgaṇhāti. Tatthāti chavakuṭiyaṃ. Aññaṃ kuṭikanti chavakuṭito aññaṃ kuṭikaṃ. Āvaraṇanti bhittiṃ. Dvāranti pavisananikkhamanadvāraṃ. Chattakuṭikā nāmesāti esā chattena katā kuṭikā nāma. Mahantena kapallena kuṭikaṃ katvāti sambandho.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๑๑๖. วสฺสํ อนุปคนฺตพฺพฎฺฐานานิ • 116. Vassaṃ anupagantabbaṭṭhānāni
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / วชาทีสุวสฺสูปคมนกถา • Vajādīsuvassūpagamanakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / วสฺสํ อนุปคนฺตพฺพฎฺฐานกถาวณฺณนา • Vassaṃ anupagantabbaṭṭhānakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / วชาทีสุ วสฺสูปคมนกถาวณฺณนา • Vajādīsu vassūpagamanakathāvaṇṇanā
