| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၁၁၆. ဝသ္သံ အနုပဂန္တဗ္ဗဋ္ဌာနကထာ
116. Vassaṃ anupagantabbaṭṭhānakathā
၂၀၄. ရုက္ခသုသီရေယေဝာတိ ရုက္ခသ္သ ဝိဝရေ ဧဝ။ ဝိဝရဉ္ဟိ သု သံ ဣရတိ ဂစ္ဆတီတိ သုသီရောတိ ဝုစ္စတိ။ ပဒရစ္ဆဒနန္တိ ဖလကေဟိ ဆာဒိတံ။ ပဝိသနဒ္ဝာရန္တိ ပဝိသနနိက္ခမနဒ္ဝာရံ။ ပဝိသနဉ္စ နိက္ခမနဉ္စ ပဝိသနန္တိ ဝိရူပေကသေသေန ကာတဗ္ဗံ။ ခာဏုမတ္ထကေတိ ခာဏုနော ဥပရိ။ ဝိဋဘီတိ ဝိဋံ အညမညဝေဓနံ အပတိ ဂစ္ဆတီတိ ဝိဋပော, ပကာရသ္သ ဘကာရံ, ဣတ္ထိလိင္ဂဇောတကဤပစ္စယဉ္စ ကတ္ဝာ ဝိဋဘီတိ ဝုစ္စတိ။ တတ္ထာတိ အဋ္ဋကေ။ ယသ္သာတိ ဘိက္ခုနော, နတ္ထီတိ သမ္ဗန္ဓော။ ပဉ္စန္နံ ဆဒနာနန္တိ တိဏပဏ္ဏဣဋ္ဌကာသိလာသုဓာသင္ခာတာနံ (စူဠဝ. ၃၀၃) ပဉ္စန္နံ ဆဒနာနံ။ ဣဒဉ္စ ယေဘုယ္ယဝသေန ဝုတ္တံ ပဒရစ္ဆဒနာဒီနမ္ပိ ဂဟိတတ္တာ။ ဒ္ဝာရဗန္ဓနန္တိ ဒ္ဝာရေန ဗန္ဓိတဗ္ဗံ။ ဆဝကုဋိကာတိ ဆဝာနံ သယနဋ္ဌာနေ သုသာနေ ကတာ ကုဋိကာ ဆဝကုဋိကာတိ ဝုစ္စတိ။ ဋင္ကိတမဉ္စာဒီတိအာဒိသဒ္ဒေန ဋင္ကိတပီဌံ သင္ဂဏ္ဟာတိ။ တတ္ထာတိ ဆဝကုဋိယံ။ အညံ ကုဋိကန္တိ ဆဝကုဋိတော အညံ ကုဋိကံ။ အာဝရဏန္တိ ဘိတ္တိံ။ ဒ္ဝာရန္တိ ပဝိသနနိက္ခမနဒ္ဝာရံ။ ဆတ္တကုဋိကာ နာမေသာတိ ဧသာ ဆတ္တေန ကတာ ကုဋိကာ နာမ။ မဟန္တေန ကပလ္လေန ကုဋိကံ ကတ္ဝာတိ သမ္ဗန္ဓော။
204.Rukkhasusīreyevāti rukkhassa vivare eva. Vivarañhi su saṃ irati gacchatīti susīroti vuccati. Padaracchadananti phalakehi chāditaṃ. Pavisanadvāranti pavisananikkhamanadvāraṃ. Pavisanañca nikkhamanañca pavisananti virūpekasesena kātabbaṃ. Khāṇumatthaketi khāṇuno upari. Viṭabhīti viṭaṃ aññamaññavedhanaṃ apati gacchatīti viṭapo, pakārassa bhakāraṃ, itthiliṅgajotakaīpaccayañca katvā viṭabhīti vuccati. Tatthāti aṭṭake. Yassāti bhikkhuno, natthīti sambandho. Pañcannaṃ chadanānanti tiṇapaṇṇaiṭṭhakāsilāsudhāsaṅkhātānaṃ (cūḷava. 303) pañcannaṃ chadanānaṃ. Idañca yebhuyyavasena vuttaṃ padaracchadanādīnampi gahitattā. Dvārabandhananti dvārena bandhitabbaṃ. Chavakuṭikāti chavānaṃ sayanaṭṭhāne susāne katā kuṭikā chavakuṭikāti vuccati. Ṭaṅkitamañcādītiādisaddena ṭaṅkitapīṭhaṃ saṅgaṇhāti. Tatthāti chavakuṭiyaṃ. Aññaṃ kuṭikanti chavakuṭito aññaṃ kuṭikaṃ. Āvaraṇanti bhittiṃ. Dvāranti pavisananikkhamanadvāraṃ. Chattakuṭikā nāmesāti esā chattena katā kuṭikā nāma. Mahantena kapallena kuṭikaṃ katvāti sambandho.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၁၆. ဝသ္သံ အနုပဂန္တဗ္ဗဋ္ဌာနာနိ • 116. Vassaṃ anupagantabbaṭṭhānāni
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ဝဇာဒီသုဝသ္သူပဂမနကထာ • Vajādīsuvassūpagamanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဝသ္သံ အနုပဂန္တဗ္ဗဋ္ဌာနကထာဝဏ္ဏနာ • Vassaṃ anupagantabbaṭṭhānakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဝဇာဒီသု ဝသ္သူပဂမနကထာဝဏ္ဏနာ • Vajādīsu vassūpagamanakathāvaṇṇanā
