| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
வஸ்ஸங் அனுபக³ந்தப்³ப³ட்டா²னகதா²வண்ணனா
Vassaṃ anupagantabbaṭṭhānakathāvaṇṇanā
204. ஸெய்யதா²பி பிஸாசில்லிகாதி எத்த² பிஸாசா ஏவ பிஸாசில்லிகா, பிஸாசதா³ரகாதிபி வத³ந்தி. பவிஸனத்³வாரங் யோஜெத்வாதி ஸகவாடப³த்³த⁴மேவ யோஜெத்வா. பஞ்சன்னங் ச²த³னானந்தி திணபண்ணஇட்ட²கஸிலாஸுதா⁴ஸங்கா²தானங் பஞ்சன்னங் ச²த³னானங். இத³ஞ்ச யேபு⁴ய்யேன வுத்தந்தி வேதி³தப்³ப³ங் ருக்கா²தீ³ஸு பத³ரச்ச²த³னாயபி குடிகாய வஸ்ஸூபக³மனஸ்ஸ வுத்தத்தா. ந, பி⁴க்க²வே, அஸேனாஸனிகேன வஸ்ஸங் உபக³ந்தப்³ப³ந்தி வசீபே⁴த³ங் கத்வா வஸ்ஸூபக³மனங் ஸந்தா⁴யேவ படிக்கே²போ, ந ஆலயகரணவஸேன உபக³மனங் ஸந்தா⁴யாதி வத³ந்தி. பாளியங் பன அவிஸேஸேன வுத்தத்தா அட்ட²கதா²யஞ்ச து³தியபாராஜிகஸங்வண்ணனாயங் (பாரா॰ அட்ட²॰ 1.84) ‘‘வஸ்ஸங் உபக³ச்ச²ந்தேன ஹி நாலகபடிபத³ங் படிபன்னேனபி பஞ்சன்னங் ச²த³னானங் அஞ்ஞதரேன ச²ன்னேயேவ ஸத்³வாரப³ந்தே⁴ ஸேனாஸனே உபக³ந்தப்³ப³ங். தஸ்மா வஸ்ஸகாலே ஸசே ஸேனாஸனங் லப⁴தி, இச்சேதங் குஸலங். நோ சே லப⁴தி, ஹத்த²கம்மங் பரியேஸித்வாபி காதப்³ப³ங். ஹத்த²கம்மங் அலப⁴ந்தேன ஸாமம்பி காதப்³ப³ங், ந த்வேவ அஸேனாஸனிகேன வஸ்ஸங் உபக³ந்தப்³ப³’’ந்தி த³ள்ஹங் கத்வா வுத்தத்தா அஸேனாஸனிகஸ்ஸ நாவாதி³ங் வினா அஞ்ஞத்த² ஆலயோ ந வட்டதீதி அம்ஹாகங் க²ந்தி. நாவாஸத்த²வஜேஸுயேவ ஹி ‘‘அனுஜானாமி, பி⁴க்க²வே, நாவாய வஸ்ஸங் உபக³ந்து’’ந்திஆதி³னா ஸதி அஸதி வா ஸேனாஸனே வஸ்ஸூபக³மனஸ்ஸ விஸுங் அனுஞ்ஞாதத்தா ‘‘ந, பி⁴க்க²வே, அஸேனாஸனிகேன வஸ்ஸங் உபக³ந்தப்³ப³’’ந்தி அயங் படிக்கே²போ தத்த² ந லப்³ப⁴தீதி அஸதி ஸேனாஸனே ஆலயவஸேனபி நாவாதீ³ஸு உபக³மனங் வுத்தங். டங்கிதமஞ்சோ நாம தீ³கே⁴ மஞ்சபாதே³ மஜ்ஜே² விஜ்ஜி²த்வா அடனியோ பவேஸெத்வா கதோ மஞ்சோ. தஸ்ஸ இத³ங் உபரி இத³ங் ஹெட்டா²தி நத்தி², பரிவத்தெத்வா அத்த²தோபி தாதி³ஸோவ ஹோதி, தங் ஸுஸானே தே³வட்டா²னே ச ட²பெந்தி, சதுன்னங் பாஸாணானங் உபரி பாஸாணங் அத்த²ரித்வா கதங் கே³ஹம்பி ‘‘டங்கிதமஞ்சோ’’தி வுச்சதி.
204.Seyyathāpipisācillikāti ettha pisācā eva pisācillikā, pisācadārakātipi vadanti. Pavisanadvāraṃ yojetvāti sakavāṭabaddhameva yojetvā. Pañcannaṃ chadanānanti tiṇapaṇṇaiṭṭhakasilāsudhāsaṅkhātānaṃ pañcannaṃ chadanānaṃ. Idañca yebhuyyena vuttanti veditabbaṃ rukkhādīsu padaracchadanāyapi kuṭikāya vassūpagamanassa vuttattā. Na, bhikkhave, asenāsanikena vassaṃ upagantabbanti vacībhedaṃ katvā vassūpagamanaṃ sandhāyeva paṭikkhepo, na ālayakaraṇavasena upagamanaṃ sandhāyāti vadanti. Pāḷiyaṃ pana avisesena vuttattā aṭṭhakathāyañca dutiyapārājikasaṃvaṇṇanāyaṃ (pārā. aṭṭha. 1.84) ‘‘vassaṃ upagacchantena hi nālakapaṭipadaṃ paṭipannenapi pañcannaṃ chadanānaṃ aññatarena channeyeva sadvārabandhe senāsane upagantabbaṃ. Tasmā vassakāle sace senāsanaṃ labhati, iccetaṃ kusalaṃ. No ce labhati, hatthakammaṃ pariyesitvāpi kātabbaṃ. Hatthakammaṃ alabhantena sāmampi kātabbaṃ, na tveva asenāsanikena vassaṃ upagantabba’’nti daḷhaṃ katvā vuttattā asenāsanikassa nāvādiṃ vinā aññattha ālayo na vaṭṭatīti amhākaṃ khanti. Nāvāsatthavajesuyeva hi ‘‘anujānāmi, bhikkhave, nāvāya vassaṃ upagantu’’ntiādinā sati asati vā senāsane vassūpagamanassa visuṃ anuññātattā ‘‘na, bhikkhave, asenāsanikena vassaṃ upagantabba’’nti ayaṃ paṭikkhepo tattha na labbhatīti asati senāsane ālayavasenapi nāvādīsu upagamanaṃ vuttaṃ. Ṭaṅkitamañco nāma dīghe mañcapāde majjhe vijjhitvā aṭaniyo pavesetvā kato mañco. Tassa idaṃ upari idaṃ heṭṭhāti natthi, parivattetvā atthatopi tādisova hoti, taṃ susāne devaṭṭhāne ca ṭhapenti, catunnaṃ pāsāṇānaṃ upari pāsāṇaṃ attharitvā kataṃ gehampi ‘‘ṭaṅkitamañco’’ti vuccati.
வஸ்ஸங் அனுபக³ந்தப்³ப³ட்டா²னகதா²வண்ணனா நிட்டி²தா.
Vassaṃ anupagantabbaṭṭhānakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 116. வஸ்ஸங் அனுபக³ந்தப்³ப³ட்டா²னானி • 116. Vassaṃ anupagantabbaṭṭhānāni
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / வஜாதீ³ஸுவஸ்ஸூபக³மனகதா² • Vajādīsuvassūpagamanakathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வஜாதீ³ஸு வஸ்ஸூபக³மனகதா²வண்ணனா • Vajādīsu vassūpagamanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 116. வஸ்ஸங் அனுபக³ந்தப்³ப³ட்டா²னகதா² • 116. Vassaṃ anupagantabbaṭṭhānakathā
