| Library / Tipiṭaka / ತಿಪಿಟಕ • Tipiṭaka / ಮಹಾವಗ್ಗಪಾಳಿ • Mahāvaggapāḷi |
೨೨೯. ವಸ್ಸಂವುಟ್ಠಾನಂ ಅನುಪ್ಪನ್ನಚೀವರಕಥಾ
229. Vassaṃvuṭṭhānaṃ anuppannacīvarakathā
೩೭೩. ತೇನ ಖೋ ಪನ ಸಮಯೇನ ವಸ್ಸಂವುಟ್ಠಾ ಭಿಕ್ಖೂ ಅನುಪ್ಪನ್ನೇ ಚೀವರೇ ಪಕ್ಕಮನ್ತಿಪಿ, ವಿಬ್ಭಮನ್ತಿಪಿ, ಕಾಲಮ್ಪಿ ಕರೋನ್ತಿ, ಸಾಮಣೇರಾಪಿ ಪಟಿಜಾನನ್ತಿ, ಸಿಕ್ಖಂ ಪಚ್ಚಕ್ಖಾತಕಾಪಿ ಪಟಿಜಾನನ್ತಿ, ಅನ್ತಿಮವತ್ಥುಂ ಅಜ್ಝಾಪನ್ನಕಾಪಿ ಪಟಿಜಾನನ್ತಿ, ಉಮ್ಮತ್ತಕಾಪಿ ಪಟಿಜಾನನ್ತಿ, ಖಿತ್ತಚಿತ್ತಾಪಿ ಪಟಿಜಾನನ್ತಿ, ವೇದನಾಟ್ಟಾಪಿ ಪಟಿಜಾನನ್ತಿ, ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕಾಪಿ ಪಟಿಜಾನನ್ತಿ, ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕಾಪಿ ಪಟಿಜಾನನ್ತಿ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕಾಪಿ ಪಟಿಜಾನನ್ತಿ, ಪಣ್ಡಕಾಪಿ ಪಟಿಜಾನನ್ತಿ, ಥೇಯ್ಯಸಂವಾಸಕಾಪಿ ಪಟಿಜಾನನ್ತಿ, ತಿತ್ಥಿಯಪಕ್ಕನ್ತಕಾಪಿ ಪಟಿಜಾನನ್ತಿ, ತಿರಚ್ಛಾನಗತಾಪಿ ಪಟಿಜಾನನ್ತಿ, ಮಾತುಘಾತಕಾಪಿ ಪಟಿಜಾನನ್ತಿ, ಪಿತುಘಾತಕಾಪಿ ಪಟಿಜಾನನ್ತಿ, ಅರಹನ್ತಘಾತಕಾಪಿ ಪಟಿಜಾನನ್ತಿ, ಭಿಕ್ಖುನಿದೂಸಕಾಪಿ ಪಟಿಜಾನನ್ತಿ, ಸಙ್ಘಭೇದಕಾಪಿ ಪಟಿಜಾನನ್ತಿ, ಲೋಹಿತುಪ್ಪಾದಕಾಪಿ ಪಟಿಜಾನನ್ತಿ, ಉಭತೋಬ್ಯಞ್ಜನಕಾಪಿ ಪಟಿಜಾನನ್ತಿ। ಭಗವತೋ ಏತಮತ್ಥಂ ಆರೋಚೇಸುಂ।
373. Tena kho pana samayena vassaṃvuṭṭhā bhikkhū anuppanne cīvare pakkamantipi, vibbhamantipi, kālampi karonti, sāmaṇerāpi paṭijānanti, sikkhaṃ paccakkhātakāpi paṭijānanti, antimavatthuṃ ajjhāpannakāpi paṭijānanti, ummattakāpi paṭijānanti, khittacittāpi paṭijānanti, vedanāṭṭāpi paṭijānanti, āpattiyā adassane ukkhittakāpi paṭijānanti, āpattiyā appaṭikamme ukkhittakāpi paṭijānanti, pāpikāya diṭṭhiyā appaṭinissagge ukkhittakāpi paṭijānanti, paṇḍakāpi paṭijānanti, theyyasaṃvāsakāpi paṭijānanti, titthiyapakkantakāpi paṭijānanti, tiracchānagatāpi paṭijānanti, mātughātakāpi paṭijānanti, pitughātakāpi paṭijānanti, arahantaghātakāpi paṭijānanti, bhikkhunidūsakāpi paṭijānanti, saṅghabhedakāpi paṭijānanti, lohituppādakāpi paṭijānanti, ubhatobyañjanakāpi paṭijānanti. Bhagavato etamatthaṃ ārocesuṃ.
೩೭೪. ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಅನುಪ್ಪನ್ನೇ ಚೀವರೇ ಪಕ್ಕಮತಿ, ಸನ್ತೇ ಪತಿರೂಪೇ ಗಾಹಕೇ ದಾತಬ್ಬಂ।
374. Idha pana, bhikkhave, vassaṃvuṭṭho bhikkhu anuppanne cīvare pakkamati, sante patirūpe gāhake dātabbaṃ.
ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಅನುಪ್ಪನ್ನೇ ಚೀವರೇ ವಿಬ್ಭಮತಿ, ಕಾಲಂ ಕರೋತಿ, ಸಾಮಣೇರೋ ಪಟಿಜಾನಾತಿ, ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ , ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ, ಸಙ್ಘೋ ಸಾಮೀ।
Idha pana, bhikkhave, vassaṃvuṭṭho bhikkhu anuppanne cīvare vibbhamati, kālaṃ karoti, sāmaṇero paṭijānāti, sikkhaṃ paccakkhātako paṭijānāti , antimavatthuṃ ajjhāpannako paṭijānāti, saṅgho sāmī.
ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಅನುಪ್ಪನ್ನೇ ಚೀವರೇ ಉಮ್ಮತ್ತಕೋ ಪಟಿಜಾನಾತಿ, ಖಿತ್ತಚಿತ್ತೋ ಪಟಿಜಾನಾತಿ, ವೇದನಾಟ್ಟೋ ಪಟಿಜಾನಾತಿ, ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ, ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ, ಸನ್ತೇ ಪತಿರೂಪೇ ಗಾಹಕೇ ದಾತಬ್ಬಂ।
Idha pana, bhikkhave, vassaṃvuṭṭho bhikkhu anuppanne cīvare ummattako paṭijānāti, khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, sante patirūpe gāhake dātabbaṃ.
ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಅನುಪ್ಪನ್ನೇ ಚೀವರೇ ಪಣ್ಡಕೋ ಪಟಿಜಾನಾತಿ, ಥೇಯ್ಯಸಂವಾಸಕೋ ಪಟಿಜಾನಾತಿ, ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ, ತಿರಚ್ಛಾನಗತೋ ಪಟಿಜಾನಾತಿ, ಮಾತುಘಾತಕೋ ಪಟಿಜಾನಾತಿ, ಪಿತುಘಾತಕೋ ಪಟಿಜಾನಾತಿ, ಅರಹನ್ತಘಾತಕೋ ಪಟಿಜಾನಾತಿ, ಭಿಕ್ಖುನಿದೂಸಕೋ ಪಟಿಜಾನಾತಿ, ಸಙ್ಘಭೇದಕೋ ಪಟಿಜಾನಾತಿ, ಲೋಹಿತುಪ್ಪಾದಕೋ ಪಟಿಜಾನಾತಿ, ಉಭತೋಬ್ಯಞ್ಜನಕೋ ಪಟಿಜಾನಾತಿ, ಸಙ್ಘೋ ಸಾಮೀ।
Idha pana, bhikkhave, vassaṃvuṭṭho bhikkhu anuppanne cīvare paṇḍako paṭijānāti, theyyasaṃvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunidūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti, saṅgho sāmī.
೩೭೫. ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಉಪ್ಪನ್ನೇ ಚೀವರೇ ಅಭಾಜಿತೇ ಪಕ್ಕಮತಿ, ಸನ್ತೇ ಪತಿರೂಪೇ ಗಾಹಕೇ ದಾತಬ್ಬಂ।
375. Idha pana, bhikkhave, vassaṃvuṭṭho bhikkhu uppanne cīvare abhājite pakkamati, sante patirūpe gāhake dātabbaṃ.
ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಉಪ್ಪನ್ನೇ ಚೀವರೇ ಅಭಾಜಿತೇ ವಿಬ್ಭಮತಿ, ಕಾಲಂ ಕರೋತಿ, ಸಾಮಣೇರೋ ಪಟಿಜಾನಾತಿ, ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ, ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ, ಸಙ್ಘೋ ಸಾಮೀ।
Idha pana, bhikkhave, vassaṃvuṭṭho bhikkhu uppanne cīvare abhājite vibbhamati, kālaṃ karoti, sāmaṇero paṭijānāti, sikkhaṃ paccakkhātako paṭijānāti, antimavatthuṃ ajjhāpannako paṭijānāti, saṅgho sāmī.
ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಉಪ್ಪನ್ನೇ ಚೀವರೇ ಅಭಾಜಿತೇ ಉಮ್ಮತ್ತಕೋ ಪಟಿಜಾನಾತಿ। ಖಿತ್ತಚಿತ್ತೋ ಪಟಿಜಾನಾತಿ, ವೇದನಾಟ್ಟೋ ಪಟಿಜಾನಾತಿ, ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ, ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ, ಸನ್ತೇ ಪತಿರೂಪೇ ಗಾಹಕೇ ದಾತಬ್ಬಂ।
Idha pana, bhikkhave, vassaṃvuṭṭho bhikkhu uppanne cīvare abhājite ummattako paṭijānāti. Khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, sante patirūpe gāhake dātabbaṃ.
ಇಧ ಪನ, ಭಿಕ್ಖವೇ, ವಸ್ಸಂವುಟ್ಠೋ ಭಿಕ್ಖು ಉಪ್ಪನ್ನೇ ಚೀವರೇ ಅಭಾಜಿತೇ ಪಣ್ಡಕೋ ಪಟಿಜಾನಾತಿ, ಥೇಯ್ಯಸಂವಾಸಕೋ ಪಟಿಜಾನಾತಿ, ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ, ತಿರಚ್ಛಾನಗತೋ ಪಟಿಜಾನಾತಿ, ಮಾತುಘಾತಕೋ ಪಟಿಜಾನಾತಿ, ಪಿತುಘಾತಕೋ ಪಟಿಜಾನಾತಿ, ಅರಹನ್ತಘಾತಕೋ ಪಟಿಜಾನಾತಿ, ಭಿಕ್ಖುನಿದೂಸಕೋ ಪಟಿಜಾನಾತಿ, ಸಙ್ಘಭೇದಕೋ ಪಟಿಜಾನಾತಿ, ಲೋಹಿತುಪ್ಪಾದಕೋ ಪಟಿಜಾನಾತಿ, ಉಭತೋಬ್ಯಞ್ಜನಕೋ ಪಟಿಜಾನಾತಿ, ಸಙ್ಘೋ ಸಾಮೀ।
Idha pana, bhikkhave, vassaṃvuṭṭho bhikkhu uppanne cīvare abhājite paṇḍako paṭijānāti, theyyasaṃvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunidūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti, saṅgho sāmī.
ವಸ್ಸಂ ವುಟ್ಠಾನಂ ಅನುಪ್ಪನ್ನಚೀವರಕಥಾ ನಿಟ್ಠಿತಾ।
Vassaṃ vuṭṭhānaṃ anuppannacīvarakathā niṭṭhitā.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಕುಸಚೀರಾದಿಪಟಿಕ್ಖೇಪಕಥಾ • Kusacīrādipaṭikkhepakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ವಸ್ಸಂವುತ್ಥಾನಂಅನುಪ್ಪನ್ನಚೀವರಕಥಾವಣ್ಣನಾ • Vassaṃvutthānaṃanuppannacīvarakathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಮತಸನ್ತಕಕಥಾದಿವಣ್ಣನಾ • Matasantakakathādivaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೨೨೭. ಕುಸಚೀರಾದಿಪಟಿಕ್ಖೇಪಕಥಾ • 227. Kusacīrādipaṭikkhepakathā
