| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
229. වස්‌සංවුට්‌ඨානං අනුප්‌පන්‌නචීවරකථා
229. Vassaṃvuṭṭhānaṃ anuppannacīvarakathā
373. තෙන ඛො පන සමයෙන වස්‌සංවුට්‌ඨා භික්‌ඛූ අනුප්‌පන්‌නෙ චීවරෙ පක්‌කමන්‌තිපි, විබ්‌භමන්‌තිපි, කාලම්‌පි කරොන්‌ති, සාමණෙරාපි පටිජානන්‌ති, සික්‌ඛං පච්‌චක්‌ඛාතකාපි පටිජානන්‌ති, අන්‌තිමවත්‌ථුං අජ්‌ඣාපන්‌නකාපි පටිජානන්‌ති, උම්‌මත්‌තකාපි පටිජානන්‌ති, ඛිත්‌තචිත්‌තාපි පටිජානන්‌ති, වෙදනාට්‌ටාපි පටිජානන්‌ති, ආපත්‌තියා අදස්‌සනෙ උක්‌ඛිත්‌තකාපි පටිජානන්‌ති, ආපත්‌තියා අප්‌පටිකම්‌මෙ උක්‌ඛිත්‌තකාපි පටිජානන්‌ති, පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිත්‌තකාපි පටිජානන්‌ති, පණ්‌ඩකාපි පටිජානන්‌ති, ථෙය්‍යසංවාසකාපි පටිජානන්‌ති, තිත්‌ථියපක්‌කන්‌තකාපි පටිජානන්‌ති, තිරච්‌ඡානගතාපි පටිජානන්‌ති, මාතුඝාතකාපි පටිජානන්‌ති, පිතුඝාතකාපි පටිජානන්‌ති, අරහන්‌තඝාතකාපි පටිජානන්‌ති, භික්‌ඛුනිදූසකාපි පටිජානන්‌ති, සඞ්‌ඝභෙදකාපි පටිජානන්‌ති, ලොහිතුප්‌පාදකාපි පටිජානන්‌ති, උභතොබ්‍යඤ්‌ජනකාපි පටිජානන්‌ති. භගවතො එතමත්‌ථං ආරොචෙසුං.
373. Tena kho pana samayena vassaṃvuṭṭhā bhikkhū anuppanne cīvare pakkamantipi, vibbhamantipi, kālampi karonti, sāmaṇerāpi paṭijānanti, sikkhaṃ paccakkhātakāpi paṭijānanti, antimavatthuṃ ajjhāpannakāpi paṭijānanti, ummattakāpi paṭijānanti, khittacittāpi paṭijānanti, vedanāṭṭāpi paṭijānanti, āpattiyā adassane ukkhittakāpi paṭijānanti, āpattiyā appaṭikamme ukkhittakāpi paṭijānanti, pāpikāya diṭṭhiyā appaṭinissagge ukkhittakāpi paṭijānanti, paṇḍakāpi paṭijānanti, theyyasaṃvāsakāpi paṭijānanti, titthiyapakkantakāpi paṭijānanti, tiracchānagatāpi paṭijānanti, mātughātakāpi paṭijānanti, pitughātakāpi paṭijānanti, arahantaghātakāpi paṭijānanti, bhikkhunidūsakāpi paṭijānanti, saṅghabhedakāpi paṭijānanti, lohituppādakāpi paṭijānanti, ubhatobyañjanakāpi paṭijānanti. Bhagavato etamatthaṃ ārocesuṃ.
374. ඉධ පන, භික්‌ඛවෙ, වස්‌සංවුට්‌ඨො භික්‌ඛු අනුප්‌පන්‌නෙ චීවරෙ පක්‌කමති, සන්‌තෙ පතිරූපෙ ගාහකෙ දාතබ්‌බං.
374. Idha pana, bhikkhave, vassaṃvuṭṭho bhikkhu anuppanne cīvare pakkamati, sante patirūpe gāhake dātabbaṃ.
ඉධ පන, භික්‌ඛවෙ, වස්‌සංවුට්‌ඨො භික්‌ඛු අනුප්‌පන්‌නෙ චීවරෙ විබ්‌භමති, කාලං කරොති, සාමණෙරො පටිජානාති, සික්‌ඛං පච්‌චක්‌ඛාතකො පටිජානාති , අන්‌තිමවත්‌ථුං අජ්‌ඣාපන්‌නකො පටිජානාති, සඞ්‌ඝො සාමී.
Idha pana, bhikkhave, vassaṃvuṭṭho bhikkhu anuppanne cīvare vibbhamati, kālaṃ karoti, sāmaṇero paṭijānāti, sikkhaṃ paccakkhātako paṭijānāti , antimavatthuṃ ajjhāpannako paṭijānāti, saṅgho sāmī.
ඉධ පන, භික්‌ඛවෙ, වස්‌සංවුට්‌ඨො භික්‌ඛු අනුප්‌පන්‌නෙ චීවරෙ උම්‌මත්‌තකො පටිජානාති, ඛිත්‌තචිත්‌තො පටිජානාති, වෙදනාට්‌ටො පටිජානාති, ආපත්‌තියා අදස්‌සනෙ උක්‌ඛිත්‌තකො පටිජානාති, ආපත්‌තියා අප්‌පටිකම්‌මෙ උක්‌ඛිත්‌තකො පටිජානාති, පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිත්‌තකො පටිජානාති, සන්‌තෙ පතිරූපෙ ගාහකෙ දාතබ්‌බං.
Idha pana, bhikkhave, vassaṃvuṭṭho bhikkhu anuppanne cīvare ummattako paṭijānāti, khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, sante patirūpe gāhake dātabbaṃ.
ඉධ පන, භික්‌ඛවෙ, වස්‌සංවුට්‌ඨො භික්‌ඛු අනුප්‌පන්‌නෙ චීවරෙ පණ්‌ඩකො පටිජානාති, ථෙය්‍යසංවාසකො පටිජානාති, තිත්‌ථියපක්‌කන්‌තකො පටිජානාති, තිරච්‌ඡානගතො පටිජානාති, මාතුඝාතකො පටිජානාති, පිතුඝාතකො පටිජානාති, අරහන්‌තඝාතකො පටිජානාති, භික්‌ඛුනිදූසකො පටිජානාති, සඞ්‌ඝභෙදකො පටිජානාති, ලොහිතුප්‌පාදකො පටිජානාති, උභතොබ්‍යඤ්‌ජනකො පටිජානාති, සඞ්‌ඝො සාමී.
Idha pana, bhikkhave, vassaṃvuṭṭho bhikkhu anuppanne cīvare paṇḍako paṭijānāti, theyyasaṃvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunidūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti, saṅgho sāmī.
375. ඉධ පන, භික්‌ඛවෙ, වස්‌සංවුට්‌ඨො භික්‌ඛු උප්‌පන්‌නෙ චීවරෙ අභාජිතෙ පක්‌කමති, සන්‌තෙ පතිරූපෙ ගාහකෙ දාතබ්‌බං.
375. Idha pana, bhikkhave, vassaṃvuṭṭho bhikkhu uppanne cīvare abhājite pakkamati, sante patirūpe gāhake dātabbaṃ.
ඉධ පන, භික්‌ඛවෙ, වස්‌සංවුට්‌ඨො භික්‌ඛු උප්‌පන්‌නෙ චීවරෙ අභාජිතෙ විබ්‌භමති, කාලං කරොති, සාමණෙරො පටිජානාති, සික්‌ඛං පච්‌චක්‌ඛාතකො පටිජානාති, අන්‌තිමවත්‌ථුං අජ්‌ඣාපන්‌නකො පටිජානාති, සඞ්‌ඝො සාමී.
Idha pana, bhikkhave, vassaṃvuṭṭho bhikkhu uppanne cīvare abhājite vibbhamati, kālaṃ karoti, sāmaṇero paṭijānāti, sikkhaṃ paccakkhātako paṭijānāti, antimavatthuṃ ajjhāpannako paṭijānāti, saṅgho sāmī.
ඉධ පන, භික්‌ඛවෙ, වස්‌සංවුට්‌ඨො භික්‌ඛු උප්‌පන්‌නෙ චීවරෙ අභාජිතෙ උම්‌මත්‌තකො පටිජානාති. ඛිත්‌තචිත්‌තො පටිජානාති, වෙදනාට්‌ටො පටිජානාති, ආපත්‌තියා අදස්‌සනෙ උක්‌ඛිත්‌තකො පටිජානාති, ආපත්‌තියා අප්‌පටිකම්‌මෙ උක්‌ඛිත්‌තකො පටිජානාති, පාපිකාය දිට්‌ඨියා අප්‌පටිනිස්‌සග්‌ගෙ උක්‌ඛිත්‌තකො පටිජානාති, සන්‌තෙ පතිරූපෙ ගාහකෙ දාතබ්‌බං.
Idha pana, bhikkhave, vassaṃvuṭṭho bhikkhu uppanne cīvare abhājite ummattako paṭijānāti. Khittacitto paṭijānāti, vedanāṭṭo paṭijānāti, āpattiyā adassane ukkhittako paṭijānāti, āpattiyā appaṭikamme ukkhittako paṭijānāti, pāpikāya diṭṭhiyā appaṭinissagge ukkhittako paṭijānāti, sante patirūpe gāhake dātabbaṃ.
ඉධ පන, භික්‌ඛවෙ, වස්‌සංවුට්‌ඨො භික්‌ඛු උප්‌පන්‌නෙ චීවරෙ අභාජිතෙ පණ්‌ඩකො පටිජානාති, ථෙය්‍යසංවාසකො පටිජානාති, තිත්‌ථියපක්‌කන්‌තකො පටිජානාති, තිරච්‌ඡානගතො පටිජානාති, මාතුඝාතකො පටිජානාති, පිතුඝාතකො පටිජානාති, අරහන්‌තඝාතකො පටිජානාති, භික්‌ඛුනිදූසකො පටිජානාති, සඞ්‌ඝභෙදකො පටිජානාති, ලොහිතුප්‌පාදකො පටිජානාති, උභතොබ්‍යඤ්‌ජනකො පටිජානාති, සඞ්‌ඝො සාමී.
Idha pana, bhikkhave, vassaṃvuṭṭho bhikkhu uppanne cīvare abhājite paṇḍako paṭijānāti, theyyasaṃvāsako paṭijānāti, titthiyapakkantako paṭijānāti, tiracchānagato paṭijānāti, mātughātako paṭijānāti, pitughātako paṭijānāti, arahantaghātako paṭijānāti, bhikkhunidūsako paṭijānāti, saṅghabhedako paṭijānāti, lohituppādako paṭijānāti, ubhatobyañjanako paṭijānāti, saṅgho sāmī.
වස්‌සං වුට්‌ඨානං අනුප්‌පන්‌නචීවරකථා නිට්‌ඨිතා.
Vassaṃ vuṭṭhānaṃ anuppannacīvarakathā niṭṭhitā.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / කුසචීරාදිපටික්‌ඛෙපකථා • Kusacīrādipaṭikkhepakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / වස්‌සංවුත්‌ථානංඅනුප්‌පන්‌නචීවරකථාවණ්‌ණනා • Vassaṃvutthānaṃanuppannacīvarakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / මතසන්‌තකකථාදිවණ්‌ණනා • Matasantakakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 227. කුසචීරාදිපටික්‌ඛෙපකථා • 227. Kusacīrādipaṭikkhepakathā
