| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. வஸ்ஸங்வுத்த²ஸுத்தங்
2. Vassaṃvutthasuttaṃ
1048. ஏகங் ஸமயங் ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன அஞ்ஞதரோ பி⁴க்கு² ஸாவத்தி²யங் வஸ்ஸங்வுத்தோ² கபிலவத்து²ங் அனுப்பத்தோ ஹோதி கேனசிதே³வ கரணீயேன. அஸ்ஸோஸுங் கோ² காபிலவத்த²வா ஸக்யா – ‘‘அஞ்ஞதரோ கிர பி⁴க்கு² ஸாவத்தி²யங் வஸ்ஸங்வுத்தோ² கபிலவத்து²ங் அனுப்பத்தோ’’தி.
1048. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro bhikkhu sāvatthiyaṃ vassaṃvuttho kapilavatthuṃ anuppatto hoti kenacideva karaṇīyena. Assosuṃ kho kāpilavatthavā sakyā – ‘‘aññataro kira bhikkhu sāvatthiyaṃ vassaṃvuttho kapilavatthuṃ anuppatto’’ti.
அத² கோ² காபிலவத்த²வா ஸக்யா யேன ஸோ பி⁴க்கு² தேனுபஸங்கமிங்ஸு; உபஸங்கமித்வா தங் பி⁴க்கு²ங் அபி⁴வாதெ³த்வா ஏகமந்தங் நிஸீதி³ங்ஸு. ஏகமந்தங் நிஸின்னா கோ² காபிலவத்த²வா ஸக்யா தங் பி⁴க்கு²ங் ஏதத³வோசுங் – ‘‘கச்சி, ப⁴ந்தே, ப⁴க³வா அரோகோ³ சேவ ப³லவா சா’’தி? ‘‘அரோகோ³ சாவுஸோ, ப⁴க³வா ப³லவா சா’’தி. ‘‘கச்சி பன, ப⁴ந்தே, ஸாரிபுத்தமொக்³க³ல்லானா அரோகா³ சேவ ப³லவந்தோ சா’’தி? ‘‘ஸாரிபுத்தமொக்³க³ல்லானாபி கோ², ஆவுஸோ, அரோகா³ சேவ ப³லவந்தோ சா’’தி. ‘‘கச்சி பன, ப⁴ந்தே, பி⁴க்கு²ஸங்கோ⁴ அரோகோ³ ச ப³லவா சா’’தி. ‘‘பி⁴க்கு²ஸங்கோ⁴பி கோ², ஆவுஸோ, அரோகோ³ ச ப³லவா சா’’தி. ‘‘அத்தி² பன தே, ப⁴ந்தே, கிஞ்சி இமினா அந்தரவஸ்ஸேன ப⁴க³வதோ ஸம்முகா² ஸுதங் ஸம்முகா² படிக்³க³ஹித’’ந்தி? ‘‘ஸம்முகா² மேதங், ஆவுஸோ, ப⁴க³வதோ ஸுதங் ஸம்முகா² படிக்³க³ஹிதங் – ‘அப்பகா தே, பி⁴க்க²வே, பி⁴க்கூ² யே ஆஸவானங் க²யா அனாஸவங் சேதோவிமுத்திங் பஞ்ஞாவிமுத்திங் தி³ட்டே²வ த⁴ம்மே ஸயங் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. அத² கோ² ஏதேவ ப³ஹுதரா பி⁴க்கூ² யே பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா’’’தி.
Atha kho kāpilavatthavā sakyā yena so bhikkhu tenupasaṅkamiṃsu; upasaṅkamitvā taṃ bhikkhuṃ abhivādetvā ekamantaṃ nisīdiṃsu. Ekamantaṃ nisinnā kho kāpilavatthavā sakyā taṃ bhikkhuṃ etadavocuṃ – ‘‘kacci, bhante, bhagavā arogo ceva balavā cā’’ti? ‘‘Arogo cāvuso, bhagavā balavā cā’’ti. ‘‘Kacci pana, bhante, sāriputtamoggallānā arogā ceva balavanto cā’’ti? ‘‘Sāriputtamoggallānāpi kho, āvuso, arogā ceva balavanto cā’’ti. ‘‘Kacci pana, bhante, bhikkhusaṅgho arogo ca balavā cā’’ti. ‘‘Bhikkhusaṅghopi kho, āvuso, arogo ca balavā cā’’ti. ‘‘Atthi pana te, bhante, kiñci iminā antaravassena bhagavato sammukhā sutaṃ sammukhā paṭiggahita’’nti? ‘‘Sammukhā metaṃ, āvuso, bhagavato sutaṃ sammukhā paṭiggahitaṃ – ‘appakā te, bhikkhave, bhikkhū ye āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti. Atha kho eteva bahutarā bhikkhū ye pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā’’’ti.
‘‘அபரம்பி கோ² மே, ஆவுஸோ, ப⁴க³வதோ ஸம்முகா² ஸுதங் ஸம்முகா² படிக்³க³ஹிதங் – ‘அப்பகா தே, பி⁴க்க²வே, பி⁴க்கூ² யே பஞ்சன்னங் ஓரம்பா⁴கி³யானங் ஸங்யோஜனானங் பரிக்க²யா ஓபபாதிகா தத்த² பரினிப்³பா³யினோ அனாவத்தித⁴ம்மா தஸ்மா லோகா. அத² கோ² ஏதேவ ப³ஹுதரா பி⁴க்கூ² யே திண்ணங் ஸங்யோஜனானங் பரிக்க²யா ராக³தோ³ஸமோஹானங் தனுத்தா ஸகதா³கா³மினோ, ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸந்தீ’’’தி.
‘‘Aparampi kho me, āvuso, bhagavato sammukhā sutaṃ sammukhā paṭiggahitaṃ – ‘appakā te, bhikkhave, bhikkhū ye pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā. Atha kho eteva bahutarā bhikkhū ye tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino, sakideva imaṃ lokaṃ āgantvā dukkhassantaṃ karissantī’’’ti.
‘‘அபரம்பி கோ² மே, ஆவுஸோ, ப⁴க³வதோ ஸம்முகா² ஸுதங் ஸம்முகா² படிக்³க³ஹிதங் – ‘அப்பகா தே, பி⁴க்க²வே, பி⁴க்கூ² யே திண்ணங் ஸங்யோஜனானங் பரிக்க²யா ராக³தோ³ஸமோஹானங் தனுத்தா ஸகதா³கா³மினோ, ஸகிதே³வ இமங் லோகங் ஆக³ந்த்வா து³க்க²ஸ்ஸந்தங் கரிஸ்ஸந்தி. அத² கோ² ஏதேவ ப³ஹுதரா பி⁴க்கூ² யே திண்ணங் ஸங்யோஜனானங் பரிக்க²யா ஸோதாபன்னா அவினிபாதத⁴ம்மா நியதா ஸம்போ³தி⁴பராயணா’’’தி. து³தியங்.
‘‘Aparampi kho me, āvuso, bhagavato sammukhā sutaṃ sammukhā paṭiggahitaṃ – ‘appakā te, bhikkhave, bhikkhū ye tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino, sakideva imaṃ lokaṃ āgantvā dukkhassantaṃ karissanti. Atha kho eteva bahutarā bhikkhū ye tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyaṇā’’’ti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. வஸ்ஸங்வுத்தஸுத்தவண்ணனா • 2. Vassaṃvuttasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. வஸ்ஸங்வுத்த²ஸுத்தவண்ணனா • 2. Vassaṃvutthasuttavaṇṇanā
