| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. ৰস্সংৰুত্থসুত্তং
2. Vassaṃvutthasuttaṃ
১০৪৮. একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরো ভিক্খু সাৰত্থিযং ৰস্সংৰুত্থো কপিলৰত্থুং অনুপ্পত্তো হোতি কেনচিদেৰ করণীযেন। অস্সোসুং খো কাপিলৰত্থৰা সক্যা – ‘‘অঞ্ঞতরো কির ভিক্খু সাৰত্থিযং ৰস্সংৰুত্থো কপিলৰত্থুং অনুপ্পত্তো’’তি।
1048. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro bhikkhu sāvatthiyaṃ vassaṃvuttho kapilavatthuṃ anuppatto hoti kenacideva karaṇīyena. Assosuṃ kho kāpilavatthavā sakyā – ‘‘aññataro kira bhikkhu sāvatthiyaṃ vassaṃvuttho kapilavatthuṃ anuppatto’’ti.
অথ খো কাপিলৰত্থৰা সক্যা যেন সো ভিক্খু তেনুপসঙ্কমিংসু; উপসঙ্কমিত্ৰা তং ভিক্খুং অভিৰাদেত্ৰা একমন্তং নিসীদিংসু। একমন্তং নিসিন্না খো কাপিলৰত্থৰা সক্যা তং ভিক্খুং এতদৰোচুং – ‘‘কচ্চি, ভন্তে, ভগৰা অরোগো চেৰ বলৰা চা’’তি? ‘‘অরোগো চাৰুসো, ভগৰা বলৰা চা’’তি। ‘‘কচ্চি পন, ভন্তে, সারিপুত্তমোগ্গল্লানা অরোগা চেৰ বলৰন্তো চা’’তি? ‘‘সারিপুত্তমোগ্গল্লানাপি খো, আৰুসো, অরোগা চেৰ বলৰন্তো চা’’তি। ‘‘কচ্চি পন, ভন্তে, ভিক্খুসঙ্ঘো অরোগো চ বলৰা চা’’তি। ‘‘ভিক্খুসঙ্ঘোপি খো, আৰুসো, অরোগো চ বলৰা চা’’তি। ‘‘অত্থি পন তে, ভন্তে, কিঞ্চি ইমিনা অন্তরৰস্সেন ভগৰতো সম্মুখা সুতং সম্মুখা পটিগ্গহিত’’ন্তি? ‘‘সম্মুখা মেতং, আৰুসো, ভগৰতো সুতং সম্মুখা পটিগ্গহিতং – ‘অপ্পকা তে, ভিক্খৰে, ভিক্খূ যে আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরন্তি। অথ খো এতেৰ বহুতরা ভিক্খূ যে পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনো অনাৰত্তিধম্মা তস্মা লোকা’’’তি।
Atha kho kāpilavatthavā sakyā yena so bhikkhu tenupasaṅkamiṃsu; upasaṅkamitvā taṃ bhikkhuṃ abhivādetvā ekamantaṃ nisīdiṃsu. Ekamantaṃ nisinnā kho kāpilavatthavā sakyā taṃ bhikkhuṃ etadavocuṃ – ‘‘kacci, bhante, bhagavā arogo ceva balavā cā’’ti? ‘‘Arogo cāvuso, bhagavā balavā cā’’ti. ‘‘Kacci pana, bhante, sāriputtamoggallānā arogā ceva balavanto cā’’ti? ‘‘Sāriputtamoggallānāpi kho, āvuso, arogā ceva balavanto cā’’ti. ‘‘Kacci pana, bhante, bhikkhusaṅgho arogo ca balavā cā’’ti. ‘‘Bhikkhusaṅghopi kho, āvuso, arogo ca balavā cā’’ti. ‘‘Atthi pana te, bhante, kiñci iminā antaravassena bhagavato sammukhā sutaṃ sammukhā paṭiggahita’’nti? ‘‘Sammukhā metaṃ, āvuso, bhagavato sutaṃ sammukhā paṭiggahitaṃ – ‘appakā te, bhikkhave, bhikkhū ye āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti. Atha kho eteva bahutarā bhikkhū ye pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā’’’ti.
‘‘অপরম্পি খো মে, আৰুসো, ভগৰতো সম্মুখা সুতং সম্মুখা পটিগ্গহিতং – ‘অপ্পকা তে, ভিক্খৰে, ভিক্খূ যে পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনো অনাৰত্তিধম্মা তস্মা লোকা। অথ খো এতেৰ বহুতরা ভিক্খূ যে তিণ্ণং সংযোজনানং পরিক্খযা রাগদোসমোহানং তনুত্তা সকদাগামিনো, সকিদেৰ ইমং লোকং আগন্ত্ৰা দুক্খস্সন্তং করিস্সন্তী’’’তি।
‘‘Aparampi kho me, āvuso, bhagavato sammukhā sutaṃ sammukhā paṭiggahitaṃ – ‘appakā te, bhikkhave, bhikkhū ye pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā. Atha kho eteva bahutarā bhikkhū ye tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino, sakideva imaṃ lokaṃ āgantvā dukkhassantaṃ karissantī’’’ti.
‘‘অপরম্পি খো মে, আৰুসো, ভগৰতো সম্মুখা সুতং সম্মুখা পটিগ্গহিতং – ‘অপ্পকা তে, ভিক্খৰে, ভিক্খূ যে তিণ্ণং সংযোজনানং পরিক্খযা রাগদোসমোহানং তনুত্তা সকদাগামিনো, সকিদেৰ ইমং লোকং আগন্ত্ৰা দুক্খস্সন্তং করিস্সন্তি। অথ খো এতেৰ বহুতরা ভিক্খূ যে তিণ্ণং সংযোজনানং পরিক্খযা সোতাপন্না অৰিনিপাতধম্মা নিযতা সম্বোধিপরাযণা’’’তি। দুতিযং।
‘‘Aparampi kho me, āvuso, bhagavato sammukhā sutaṃ sammukhā paṭiggahitaṃ – ‘appakā te, bhikkhave, bhikkhū ye tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino, sakideva imaṃ lokaṃ āgantvā dukkhassantaṃ karissanti. Atha kho eteva bahutarā bhikkhū ye tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyaṇā’’’ti. Dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. ৰস্সংৰুত্তসুত্তৰণ্ণনা • 2. Vassaṃvuttasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. ৰস্সংৰুত্থসুত্তৰণ্ণনা • 2. Vassaṃvutthasuttavaṇṇanā
