| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. වස්‌සංවුත්‌ථසුත්‌තං
2. Vassaṃvutthasuttaṃ
1048. එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන අඤ්‌ඤතරො භික්‌ඛු සාවත්‌ථියං වස්‌සංවුත්‌ථො කපිලවත්‌ථුං අනුප්‌පත්‌තො හොති කෙනචිදෙව කරණීයෙන. අස්‌සොසුං ඛො කාපිලවත්‌ථවා සක්‍යා – ‘‘අඤ්‌ඤතරො කිර භික්‌ඛු සාවත්‌ථියං වස්‌සංවුත්‌ථො කපිලවත්‌ථුං අනුප්‌පත්‌තො’’ති.
1048. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro bhikkhu sāvatthiyaṃ vassaṃvuttho kapilavatthuṃ anuppatto hoti kenacideva karaṇīyena. Assosuṃ kho kāpilavatthavā sakyā – ‘‘aññataro kira bhikkhu sāvatthiyaṃ vassaṃvuttho kapilavatthuṃ anuppatto’’ti.
අථ ඛො කාපිලවත්‌ථවා සක්‍යා යෙන සො භික්‌ඛු තෙනුපසඞ්‌කමිංසු; උපසඞ්‌කමිත්‌වා තං භික්‌ඛුං අභිවාදෙත්‌වා එකමන්‌තං නිසීදිංසු. එකමන්‌තං නිසින්‌නා ඛො කාපිලවත්‌ථවා සක්‍යා තං භික්‌ඛුං එතදවොචුං – ‘‘කච්‌චි, භන්‌තෙ, භගවා අරොගො චෙව බලවා චා’’ති? ‘‘අරොගො චාවුසො, භගවා බලවා චා’’ති. ‘‘කච්‌චි පන, භන්‌තෙ, සාරිපුත්‌තමොග්‌ගල්‌ලානා අරොගා චෙව බලවන්‌තො චා’’ති? ‘‘සාරිපුත්‌තමොග්‌ගල්‌ලානාපි ඛො, ආවුසො, අරොගා චෙව බලවන්‌තො චා’’ති. ‘‘කච්‌චි පන, භන්‌තෙ, භික්‌ඛුසඞ්‌ඝො අරොගො ච බලවා චා’’ති. ‘‘භික්‌ඛුසඞ්‌ඝොපි ඛො, ආවුසො, අරොගො ච බලවා චා’’ති. ‘‘අත්‌ථි පන තෙ, භන්‌තෙ, කිඤ්‌චි ඉමිනා අන්‌තරවස්‌සෙන භගවතො සම්‌මුඛා සුතං සම්‌මුඛා පටිග්‌ගහිත’’න්‌ති? ‘‘සම්‌මුඛා මෙතං, ආවුසො, භගවතො සුතං සම්‌මුඛා පටිග්‌ගහිතං – ‘අප්‌පකා තෙ, භික්‌ඛවෙ, භික්‌ඛූ යෙ ආසවානං ඛයා අනාසවං චෙතොවිමුත්‌තිං පඤ්‌ඤාවිමුත්‌තිං දිට්‌ඨෙව ධම්‌මෙ සයං අභිඤ්‌ඤා සච්‌ඡිකත්‌වා උපසම්‌පජ්‌ජ විහරන්‌ති. අථ ඛො එතෙව බහුතරා භික්‌ඛූ යෙ පඤ්‌චන්‌නං ඔරම්‌භාගියානං සංයොජනානං පරික්‌ඛයා ඔපපාතිකා තත්‌ථ පරිනිබ්‌බායිනො අනාවත්‌තිධම්‌මා තස්‌මා ලොකා’’’ති.
Atha kho kāpilavatthavā sakyā yena so bhikkhu tenupasaṅkamiṃsu; upasaṅkamitvā taṃ bhikkhuṃ abhivādetvā ekamantaṃ nisīdiṃsu. Ekamantaṃ nisinnā kho kāpilavatthavā sakyā taṃ bhikkhuṃ etadavocuṃ – ‘‘kacci, bhante, bhagavā arogo ceva balavā cā’’ti? ‘‘Arogo cāvuso, bhagavā balavā cā’’ti. ‘‘Kacci pana, bhante, sāriputtamoggallānā arogā ceva balavanto cā’’ti? ‘‘Sāriputtamoggallānāpi kho, āvuso, arogā ceva balavanto cā’’ti. ‘‘Kacci pana, bhante, bhikkhusaṅgho arogo ca balavā cā’’ti. ‘‘Bhikkhusaṅghopi kho, āvuso, arogo ca balavā cā’’ti. ‘‘Atthi pana te, bhante, kiñci iminā antaravassena bhagavato sammukhā sutaṃ sammukhā paṭiggahita’’nti? ‘‘Sammukhā metaṃ, āvuso, bhagavato sutaṃ sammukhā paṭiggahitaṃ – ‘appakā te, bhikkhave, bhikkhū ye āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharanti. Atha kho eteva bahutarā bhikkhū ye pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā’’’ti.
‘‘අපරම්‌පි ඛො මෙ, ආවුසො, භගවතො සම්‌මුඛා සුතං සම්‌මුඛා පටිග්‌ගහිතං – ‘අප්‌පකා තෙ, භික්‌ඛවෙ, භික්‌ඛූ යෙ පඤ්‌චන්‌නං ඔරම්‌භාගියානං සංයොජනානං පරික්‌ඛයා ඔපපාතිකා තත්‌ථ පරිනිබ්‌බායිනො අනාවත්‌තිධම්‌මා තස්‌මා ලොකා. අථ ඛො එතෙව බහුතරා භික්‌ඛූ යෙ තිණ්‌ණං සංයොජනානං පරික්‌ඛයා රාගදොසමොහානං තනුත්‌තා සකදාගාමිනො, සකිදෙව ඉමං ලොකං ආගන්‌ත්‌වා දුක්‌ඛස්‌සන්‌තං කරිස්‌සන්‌තී’’’ති.
‘‘Aparampi kho me, āvuso, bhagavato sammukhā sutaṃ sammukhā paṭiggahitaṃ – ‘appakā te, bhikkhave, bhikkhū ye pañcannaṃ orambhāgiyānaṃ saṃyojanānaṃ parikkhayā opapātikā tattha parinibbāyino anāvattidhammā tasmā lokā. Atha kho eteva bahutarā bhikkhū ye tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino, sakideva imaṃ lokaṃ āgantvā dukkhassantaṃ karissantī’’’ti.
‘‘අපරම්‌පි ඛො මෙ, ආවුසො, භගවතො සම්‌මුඛා සුතං සම්‌මුඛා පටිග්‌ගහිතං – ‘අප්‌පකා තෙ, භික්‌ඛවෙ, භික්‌ඛූ යෙ තිණ්‌ණං සංයොජනානං පරික්‌ඛයා රාගදොසමොහානං තනුත්‌තා සකදාගාමිනො, සකිදෙව ඉමං ලොකං ආගන්‌ත්‌වා දුක්‌ඛස්‌සන්‌තං කරිස්‌සන්‌ති. අථ ඛො එතෙව බහුතරා භික්‌ඛූ යෙ තිණ්‌ණං සංයොජනානං පරික්‌ඛයා සොතාපන්‌නා අවිනිපාතධම්‌මා නියතා සම්‌බොධිපරායණා’’’ති. දුතියං.
‘‘Aparampi kho me, āvuso, bhagavato sammukhā sutaṃ sammukhā paṭiggahitaṃ – ‘appakā te, bhikkhave, bhikkhū ye tiṇṇaṃ saṃyojanānaṃ parikkhayā rāgadosamohānaṃ tanuttā sakadāgāmino, sakideva imaṃ lokaṃ āgantvā dukkhassantaṃ karissanti. Atha kho eteva bahutarā bhikkhū ye tiṇṇaṃ saṃyojanānaṃ parikkhayā sotāpannā avinipātadhammā niyatā sambodhiparāyaṇā’’’ti. Dutiyaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2. වස්‌සංවුත්‌තසුත්‌තවණ්‌ණනා • 2. Vassaṃvuttasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. වස්‌සංවුත්‌ථසුත්‌තවණ්‌ණනා • 2. Vassaṃvutthasuttavaṇṇanā
