| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
108. වස්‌සානෙ චාරිකාපටික්‌ඛෙපාදි
108. Vassāne cārikāpaṭikkhepādi
185. තෙන ඛො පන සමයෙන ඡබ්‌බග්‌ගියා භික්‌ඛූ වස්‌සං උපගන්‌ත්‌වා අන්‌තරාවස්‌සං චාරිකං චරන්‌ති. මනුස්‌සා තථෙව උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම සමණා සක්‍යපුත්‌තියා හෙමන්‌තම්‌පි ගිම්‌හම්‌පි වස්‌සම්‌පි චාරිකං චරිස්‌සන්‌ති, හරිතානි තිණානි සම්‌මද්‌දන්‌තා, එකින්‌ද්‍රියං ජීවං විහෙඨෙන්‌තා, බහූ ඛුද්‌දකෙ පාණෙ සඞ්‌ඝාතං ආපාදෙන්‌තා. ඉමෙ හි නාම අඤ්‌ඤතිත්‌ථියා දුරක්‌ඛාතධම්‌මා වස්‌සාවාසං අල්‌ලීයිස්‌සන්‌ති සඞ්‌කසායිස්‌සන්‌ති. ඉමෙ හි නාම සකුන්‌තකා රුක්‌ඛග්‌ගෙසු කුලාවකානි කරිත්‌වා වස්‌සාවාසං අල්‌ලීයිස්‌සන්‌ති සඞ්‌කසායිස්‌සන්‌ති. ඉමෙ පන සමණා සක්‍යපුත්‌තියා හෙමන්‌තම්‌පි ගිම්‌හම්‌පි වස්‌සම්‌පි චාරිකං චරන්‌ති, හරිතානි තිණානි සම්‌මද්‌දන්‌තා, එකින්‌ද්‍රියං ජීවං විහෙඨෙන්‌තා, බහූ ඛුද්‌දකෙ පාණෙ සඞ්‌ඝාතං ආපාදෙන්‌තා’’ති. අස්‌සොසුං ඛො භික්‌ඛූ තෙසං මනුස්‌සානං උජ්‌ඣායන්‌තානං ඛිය්‍යන්‌තානං විපාචෙන්‌තානං. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම ඡබ්‌බග්‌ගියා භික්‌ඛූ වස්‌සං උපගන්‌ත්‌වා අන්‌තරාවස්‌සං චාරිකං චරිස්‌සන්‌තී’’ති? අථ ඛො තෙ භික්‌ඛූ භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ ධම්‌මිං කථං කත්‌වා භික්‌ඛූ ආමන්‌තෙසි – ‘‘න, භික්‌ඛවෙ, වස්‌සං උපගන්‌ත්‌වා පුරිමං වා තෙමාසං පච්‌ඡිමං වා තෙමාසං අවසිත්‌වා චාරිකා පක්‌කමිතබ්‌බා. යො පක්‌කමෙය්‍ය, ආපත්‌ති දුක්‌කටස්‌සා’’ති.
185. Tena kho pana samayena chabbaggiyā bhikkhū vassaṃ upagantvā antarāvassaṃ cārikaṃ caranti. Manussā tatheva ujjhāyanti khiyyanti vipācenti – ‘‘kathañhi nāma samaṇā sakyaputtiyā hemantampi gimhampi vassampi cārikaṃ carissanti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā. Ime hi nāma aññatitthiyā durakkhātadhammā vassāvāsaṃ allīyissanti saṅkasāyissanti. Ime hi nāma sakuntakā rukkhaggesu kulāvakāni karitvā vassāvāsaṃ allīyissanti saṅkasāyissanti. Ime pana samaṇā sakyaputtiyā hemantampi gimhampi vassampi cārikaṃ caranti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū vassaṃ upagantvā antarāvassaṃ cārikaṃ carissantī’’ti? Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘na, bhikkhave, vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā. Yo pakkameyya, āpatti dukkaṭassā’’ti.
186. තෙන ඛො පන සමයෙන ඡබ්‌බග්‌ගියා භික්‌ඛූ න ඉච්‌ඡන්‌ති වස්‌සං උපගන්‌තුං. භගවතො එතමත්‌ථං ආරොචෙසුං. න, භික්‌ඛවෙ, වස්‌සං න උපගන්‌තබ්‌බං. යො න උපගච්‌ඡෙය්‍ය, ආපත්‌ති දුක්‌කටස්‌සාති.
186. Tena kho pana samayena chabbaggiyā bhikkhū na icchanti vassaṃ upagantuṃ. Bhagavato etamatthaṃ ārocesuṃ. Na, bhikkhave, vassaṃ na upagantabbaṃ. Yo na upagaccheyya, āpatti dukkaṭassāti.
තෙන ඛො පන සමයෙන ඡබ්‌බග්‌ගියා භික්‌ඛූ තදහු වස්‌සූපනායිකාය වස්‌සං අනුපගන්‌තුකාමා සඤ්‌චිච්‌ච ආවාසං අතික්‌කමන්‌ති. භගවතො එතමත්‌ථං ආරොචෙසුං. න, භික්‌ඛවෙ, තදහු වස්‌සූපනායිකාය වස්‌සං අනුපගන්‌තුකාමෙන සඤ්‌චිච්‌ච ආවාසො අතික්‌කමිතබ්‌බො. යො අතික්‌කමෙය්‍ය, ආපත්‌ති දුක්‌කටස්‌සාති.
Tena kho pana samayena chabbaggiyā bhikkhū tadahu vassūpanāyikāya vassaṃ anupagantukāmā sañcicca āvāsaṃ atikkamanti. Bhagavato etamatthaṃ ārocesuṃ. Na, bhikkhave, tadahu vassūpanāyikāya vassaṃ anupagantukāmena sañcicca āvāso atikkamitabbo. Yo atikkameyya, āpatti dukkaṭassāti.
තෙන ඛො පන සමයෙන රාජා මාගධො සෙනියො බිම්‌බිසාරො වස්‌සං උක්‌කඩ්‌ඪිතුකාමො
Tena kho pana samayena rājā māgadho seniyo bimbisāro vassaṃ ukkaḍḍhitukāmo
භික්‌ඛූනං සන්‌තිකෙ දූතං පාහෙසි – යදි පනාය්‍යා ආගමෙ ජුණ්‌හෙ වස්‌සං උපගච්‌ඡෙය්‍යුන්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, රාජූනං අනුවත්‌තිතුන්‌ති.
Bhikkhūnaṃ santike dūtaṃ pāhesi – yadi panāyyā āgame juṇhe vassaṃ upagaccheyyunti. Bhagavato etamatthaṃ ārocesuṃ. Anujānāmi, bhikkhave, rājūnaṃ anuvattitunti.
වස්‌සානෙ චාරිකාපටික්‌ඛෙපාදි නිට්‌ඨිතා.
Vassāne cārikāpaṭikkhepādi niṭṭhitā.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / වස්‌සානෙචාරිකාපටික්‌ඛෙපාදිකථා • Vassānecārikāpaṭikkhepādikathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / වස්‌සානෙ චාරිකාපටික්‌ඛෙපාදිකථාවණ්‌ණනා • Vassāne cārikāpaṭikkhepādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / වස්‌සානෙචාරිකාපටික්‌ඛෙපාදිකථාවණ්‌ණනා • Vassānecārikāpaṭikkhepādikathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / වස්‌සූපනායිකඅනුජානනකථාදිවණ්‌ණනා • Vassūpanāyikaanujānanakathādivaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 108. වස්‌සානෙචාරිකාපටික්‌ඛෙපාදිකථා • 108. Vassānecārikāpaṭikkhepādikathā
