| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১০৮. ৰস্সানেচারিকাপটিক্খেপাদিকথা
108. Vassānecārikāpaṭikkhepādikathā
১৮৫. আপত্তি ৰেদিতব্বাতি অনপেক্খগমনেন উপচারাতিক্কমে সাপেক্খগমনেন অঞ্ঞত্থ অরুণুট্ঠাপনে আপত্তি ৰেদিতব্বা। ৰিহারগণনায আপত্তিযো ৰেদিতব্বাতি এত্থ ৰস্সূপনাযিকদিৰসে ৰস্সং অনুপগন্তুকামতাচিত্তেন ৰিহারং অতিক্কমেয্য, ৰিহারগণনায আপত্তিযো ৰেদিতব্বা। তমেৰত্থং ৰিত্থারেন্তো আহ ‘‘সচে হী’’তিআদি। তং দিৰসন্তি তস্মিং ৰস্সূপগমনদিৰসে। সতং আপত্তিযোতি এত্থ সতন্তি সঙ্খ্যাপধানত্তা একৰচনন্তি সদ্দসত্থেসু ৰুত্তং । একা এৰ আপত্তীতি অত্তনো ৰিহারস্স অতিক্কমনেযেৰ একা এৰ আপত্তি। কেনচি অন্তরাযেন অনুপগতেনাতি সম্বন্ধো।
185.Āpatti veditabbāti anapekkhagamanena upacārātikkame sāpekkhagamanena aññattha aruṇuṭṭhāpane āpatti veditabbā. Vihāragaṇanāya āpattiyo veditabbāti ettha vassūpanāyikadivase vassaṃ anupagantukāmatācittena vihāraṃ atikkameyya, vihāragaṇanāya āpattiyo veditabbā. Tamevatthaṃ vitthārento āha ‘‘sace hī’’tiādi. Taṃ divasanti tasmiṃ vassūpagamanadivase. Sataṃ āpattiyoti ettha satanti saṅkhyāpadhānattā ekavacananti saddasatthesu vuttaṃ . Ekā eva āpattīti attano vihārassa atikkamaneyeva ekā eva āpatti. Kenaci antarāyena anupagatenāti sambandho.
ৰস্সনামো ইমস্সত্থীতি ৰস্সোতি ৰচনত্থং দস্সেন্তো আহ ‘‘ৰস্সনামক’’ন্তি। ‘‘পঠমং মাস’’ন্তি ইমিনা অঞ্ঞপদস্স সরূপং দস্সেতি। পঠমং মাসন্তি চতূসু ৰস্সমাসেসু পঠমং মাসং। উক্কড্ঢিতুকামোতি উপরি কড্ঢিতুকামো। আসল়্হীমাসমেৰ, ন সাৰণমাসন্তি অত্থো। জুণ্হসদ্দো চন্দপভাযুত্তো মাসোতি আহ ‘‘মাসে’’তি। চন্দপভাযুত্তো মাসোতি আহ ‘‘মাসে’’তি। চন্দপভাযুত্তো হি মাসো জোততি দিপ্পতীতি জুণ্হোতি ৰুচ্চতি। তস্মা ‘‘মাসে’’তি সামঞ্ঞতো ৰুত্তেপি পুণ্ণমিযুত্তো মাসোৰ গহেতব্বো। কাচি পরিহানি নামাতি কিঞ্চি সীলাদীনং হাযনং নাম। অঞ্ঞস্মিম্পীতি ৰস্সূপগমনতো অঞ্ঞস্মিম্পি। ধম্মিকেতি ধম্মেন যুত্তে।
Vassanāmo imassatthīti vassoti vacanatthaṃ dassento āha ‘‘vassanāmaka’’nti. ‘‘Paṭhamaṃ māsa’’nti iminā aññapadassa sarūpaṃ dasseti. Paṭhamaṃ māsanti catūsu vassamāsesu paṭhamaṃ māsaṃ. Ukkaḍḍhitukāmoti upari kaḍḍhitukāmo. Āsaḷhīmāsameva, na sāvaṇamāsanti attho. Juṇhasaddo candapabhāyutto māsoti āha ‘‘māse’’ti. Candapabhāyutto māsoti āha ‘‘māse’’ti. Candapabhāyutto hi māso jotati dippatīti juṇhoti vuccati. Tasmā ‘‘māse’’ti sāmaññato vuttepi puṇṇamiyutto māsova gahetabbo. Kāci parihāni nāmāti kiñci sīlādīnaṃ hāyanaṃ nāma. Aññasmimpīti vassūpagamanato aññasmimpi. Dhammiketi dhammena yutte.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১০৮. ৰস্সানে চারিকাপটিক্খেপাদি • 108. Vassāne cārikāpaṭikkhepādi
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ৰস্সানেচারিকাপটিক্খেপাদিকথা • Vassānecārikāpaṭikkhepādikathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৰস্সানে চারিকাপটিক্খেপাদিকথাৰণ্ণনা • Vassāne cārikāpaṭikkhepādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৰস্সানেচারিকাপটিক্খেপাদিকথাৰণ্ণনা • Vassānecārikāpaṭikkhepādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৰস্সূপনাযিকঅনুজাননকথাদিৰণ্ণনা • Vassūpanāyikaanujānanakathādivaṇṇanā
