| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. வஸ்ஸஸுத்தங்
8. Vassasuttaṃ
1034. ‘‘ஸெய்யதா²பி , பி⁴க்க²வே, உபரிபப்³ப³தே து²ல்லபு²ஸிதகே தே³வே வஸ்ஸந்தே தங் உத³கங் யதா²னின்னங் பவத்தமானங் பப்³ப³தகந்த³ரபத³ரஸாகா² பரிபூரேதி, பப்³ப³தகந்த³ரபத³ரஸாகா² பரிபூரா குஸொப்³பே⁴ பரிபூரெந்தி, குஸொப்³பா⁴ பரிபூரா மஹாஸொப்³பே⁴ பரிபூரெந்தி, மஹாஸொப்³பா⁴ பரிபூரா குன்னதி³யோ பரிபூரெந்தி, குன்னதி³யோ பரிபூரா மஹானதி³யோ பரிபூரெந்தி, மஹானதி³யோ பரிபூரா மஹாஸமுத்³த³ங் 1 பரிபூரெந்தி; ஏவமேவ கோ², பி⁴க்க²வே, அரியஸாவகஸ்ஸ யோ ச பு³த்³தே⁴ அவேச்சப்பஸாதோ³, யோ ச த⁴ம்மே அவேச்சப்பஸாதோ³, யோ ச ஸங்கே⁴ அவேச்சப்பஸாதோ³, யானி ச அரியகந்தானி ஸீலானி – இமே த⁴ம்மா ஸந்த³மானா பாரங் க³ந்த்வா ஆஸவானங் க²யாய ஸங்வத்தந்தீ’’தி. அட்ட²மங்.
1034. ‘‘Seyyathāpi , bhikkhave, uparipabbate thullaphusitake deve vassante taṃ udakaṃ yathāninnaṃ pavattamānaṃ pabbatakandarapadarasākhā paripūreti, pabbatakandarapadarasākhā paripūrā kusobbhe paripūrenti, kusobbhā paripūrā mahāsobbhe paripūrenti, mahāsobbhā paripūrā kunnadiyo paripūrenti, kunnadiyo paripūrā mahānadiyo paripūrenti, mahānadiyo paripūrā mahāsamuddaṃ 2 paripūrenti; evameva kho, bhikkhave, ariyasāvakassa yo ca buddhe aveccappasādo, yo ca dhamme aveccappasādo, yo ca saṅghe aveccappasādo, yāni ca ariyakantāni sīlāni – ime dhammā sandamānā pāraṃ gantvā āsavānaṃ khayāya saṃvattantī’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. வஸ்ஸஸுத்தவண்ணனா • 8. Vassasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 8. வஸ்ஸஸுத்தவண்ணனா • 8. Vassasuttavaṇṇanā
