| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༧. ཝསྶསུཏྟཾ
7. Vassasuttaṃ
༡༩༧. ‘‘པཉྩིམེ , བྷིཀྑཝེ, ཝསྶསྶ ཨནྟརཱཡཱ, ཡཾ ནེམིཏྟཱ 1 ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏི། ཀཏམེ པཉྩ? ཨུཔརི, བྷིཀྑཝེ, ཨཱཀཱསེ ཏེཛོདྷཱཏུ པཀུཔྤཏི། ཏེན ཨུཔྤནྣཱ མེགྷཱ པཊིཝིགཙྪནྟི། ཨཡཾ, བྷིཀྑཝེ, པཋམོ ཝསྶསྶ ཨནྟརཱཡོ, ཡཾ ནེམིཏྟཱ ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏི།
197. ‘‘Pañcime , bhikkhave, vassassa antarāyā, yaṃ nemittā 2 na jānanti, yattha nemittānaṃ cakkhu na kamati. Katame pañca? Upari, bhikkhave, ākāse tejodhātu pakuppati. Tena uppannā meghā paṭivigacchanti. Ayaṃ, bhikkhave, paṭhamo vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘པུན ཙཔརཾ, བྷིཀྑཝེ, ཨུཔརི ཨཱཀཱསེ ཝཱཡོདྷཱཏུ པཀུཔྤཏི། ཏེན ཨུཔྤནྣཱ མེགྷཱ པཊིཝིགཙྪནྟི། ཨཡཾ, བྷིཀྑཝེ, དུཏིཡོ ཝསྶསྶ ཨནྟརཱཡོ, ཡཾ ནེམིཏྟཱ ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏི།
‘‘Puna caparaṃ, bhikkhave, upari ākāse vāyodhātu pakuppati. Tena uppannā meghā paṭivigacchanti. Ayaṃ, bhikkhave, dutiyo vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘པུན ཙཔརཾ, བྷིཀྑཝེ, རཱཧུ ཨསུརིནྡོ པཱཎིནཱ ཨུདཀཾ སམྤཊིཙྪིཏྭཱ མཧཱསམུདྡེ ཚཌྜེཏི། ཨཡཾ, བྷིཀྑཝེ, ཏཏིཡོ ཝསྶསྶ ཨནྟརཱཡོ, ཡཾ ནེམིཏྟཱ ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏི།
‘‘Puna caparaṃ, bhikkhave, rāhu asurindo pāṇinā udakaṃ sampaṭicchitvā mahāsamudde chaḍḍeti. Ayaṃ, bhikkhave, tatiyo vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘པུན ཙཔརཾ, བྷིཀྑཝེ, ཝསྶཝལཱཧཀཱ དེཝཱ པམཏྟཱ ཧོནྟི། ཨཡཾ, བྷིཀྑཝེ, ཙཏུཏྠོ ཝསྶསྶ ཨནྟརཱཡོ, ཡཾ ནེམིཏྟཱ ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏི།
‘‘Puna caparaṃ, bhikkhave, vassavalāhakā devā pamattā honti. Ayaṃ, bhikkhave, catuttho vassassa antarāyo, yaṃ nemittā na jānanti, yattha nemittānaṃ cakkhu na kamati.
‘‘པུན ཙཔརཾ, བྷིཀྑཝེ, མནུསྶཱ ཨདྷམྨིཀཱ ཧོནྟི། ཨཡཾ, བྷིཀྑཝེ, པཉྩམོ ཝསྶསྶ ཨནྟརཱཡོ, ཡཾ ནེམིཏྟཱ ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏི། ཨིམེ ཁོ, བྷིཀྑཝེ, པཉྩ ཝསྶསྶ ཨནྟརཱཡཱ, ཡཾ ནེམིཏྟཱ ན ཛཱནནྟི, ཡཏྠ ནེམིཏྟཱནཾ ཙཀྑུ ན ཀམཏཱི’’ཏི། སཏྟམཾ།
‘‘Puna caparaṃ, bhikkhave, manussā adhammikā honti. Ayaṃ, bhikkhave, pañcamo vassassa antarāyo, yaṃ nemittā na jānanti, yattha nemittānaṃ cakkhu na kamati. Ime kho, bhikkhave, pañca vassassa antarāyā, yaṃ nemittā na jānanti, yattha nemittānaṃ cakkhu na kamatī’’ti. Sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༧. ཝསྶསུཏྟཝཎྞནཱ • 7. Vassasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༧. ཝསྶསུཏྟཝཎྞནཱ • 7. Vassasuttavaṇṇanā
