| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৪. ৰস্সিকসাটিকসিক্খাপদৰণ্ণনা
4. Vassikasāṭikasikkhāpadavaṇṇanā
৬২৬. তেন সমযেনাতি ৰস্সিকসাটিকসিক্খাপদং। তত্থ ৰস্সিকসাটিকা অনুঞ্ঞাতাতি চীৰরক্খন্ধকে ৰিসাখাৰত্থুস্মিং (মহাৰ॰ ৩৪৯ আদযো) অনুঞ্ঞাতা। পটিকচ্চেৰাতি পুরেযেৰ।
626.Tena samayenāti vassikasāṭikasikkhāpadaṃ. Tattha vassikasāṭikā anuññātāti cīvarakkhandhake visākhāvatthusmiṃ (mahāva. 349 ādayo) anuññātā. Paṭikaccevāti pureyeva.
৬২৭. মাসো সেসো গিম্হানন্তি চতুন্নং গিম্হমাসানং একো পচ্ছিমমাসো সেসো। কত্ৰাতি সিব্বনরজনকপ্পপরিযোসানেন নিট্ঠপেত্ৰা। করোন্তেন চ একমেৰ কত্ৰা সমযে অধিট্ঠাতব্বং, দ্ৰে অধিট্ঠাতুং ন ৰট্টন্তি।
627.Māso seso gimhānanti catunnaṃ gimhamāsānaṃ eko pacchimamāso seso. Katvāti sibbanarajanakappapariyosānena niṭṭhapetvā. Karontena ca ekameva katvā samaye adhiṭṭhātabbaṃ, dve adhiṭṭhātuṃ na vaṭṭanti.
অতিরেকমাসে সেসে গিম্হানেতি গিম্হাননামকে অতিরেকমাসে সেসে।
Atirekamāse sese gimhāneti gimhānanāmake atirekamāse sese.
অতিরেকদ্ধমাসে সেসে গিম্হানে কত্ৰা নিৰাসেতীতি এত্থ পন ঠত্ৰা ৰস্সিকসাটিকায পরিযেসনক্খেত্তং করণক্খেত্তং নিৰাসনক্খেত্তং অধিট্ঠানক্খেত্তন্তি চতুব্বিধং খেত্তং, কুচ্ছিসমযো পিট্ঠিসমযোতি দুৰিধো সমযো, পিট্ঠিসমযচতুক্কং কুচ্ছিসমযচতুক্কন্তি দ্ৰে চতুক্কানি চ ৰেদিতব্বানি।
Atirekaddhamāsesese gimhāne katvā nivāsetīti ettha pana ṭhatvā vassikasāṭikāya pariyesanakkhettaṃ karaṇakkhettaṃ nivāsanakkhettaṃ adhiṭṭhānakkhettanti catubbidhaṃ khettaṃ, kucchisamayo piṭṭhisamayoti duvidho samayo, piṭṭhisamayacatukkaṃ kucchisamayacatukkanti dve catukkāni ca veditabbāni.
তত্থ জেট্ঠমূলপুণ্ণমাসিযা পচ্ছিমপাটিপদদিৰসতো পট্ঠায যাৰ কাল়পক্খুপোসথা, অযমেকো অদ্ধমাসো পরিযেসনক্খেত্তঞ্চেৰ করণক্খেত্তঞ্চ। এতস্মিঞ্হি অন্তরে ৰস্সিকসাটিকং অলদ্ধং পরিযেসিতুং লদ্ধং কাতুঞ্চ ৰট্টতি, নিৰাসেতুং অধিট্ঠাতুঞ্চ ন ৰট্টতি। কাল়পক্খুপোসথস্স পচ্ছিমপাটিপদদিৰসতো পট্ঠায যাৰ আসাল়্হীপুণ্ণমা, অযমেকো অদ্ধমাসো পরিযেসনকরণনিৰাসনানং তিণ্ণম্পি খেত্তং। এতস্মিঞ্হি অন্তরে পরিযেসিতুং কাতুং নিৰাসেতুঞ্চ ৰট্টতি, অধিট্ঠাতুংযেৰ ন ৰট্টতি। আসাল়্হীপুণ্ণমাসিযা পচ্ছিমপাটিপদদিৰসতো পট্ঠায যাৰ কত্তিকপুণ্ণমা, ইমে চত্তারো মাসা পরিযেসনকরণনিৰাসনাধিট্ঠানানং চতুন্নং খেত্তং। এতস্মিঞ্হি অন্তরে অলদ্ধং পরিযেসিতুং লদ্ধং কাতুং নিৰাসেতুং অধিট্ঠাতুঞ্চ ৰট্টতি। ইদং তাৰ চতুব্বিধং খেত্তং ৰেদিতব্বং।
Tattha jeṭṭhamūlapuṇṇamāsiyā pacchimapāṭipadadivasato paṭṭhāya yāva kāḷapakkhuposathā, ayameko addhamāso pariyesanakkhettañceva karaṇakkhettañca. Etasmiñhi antare vassikasāṭikaṃ aladdhaṃ pariyesituṃ laddhaṃ kātuñca vaṭṭati, nivāsetuṃ adhiṭṭhātuñca na vaṭṭati. Kāḷapakkhuposathassa pacchimapāṭipadadivasato paṭṭhāya yāva āsāḷhīpuṇṇamā, ayameko addhamāso pariyesanakaraṇanivāsanānaṃ tiṇṇampi khettaṃ. Etasmiñhi antare pariyesituṃ kātuṃ nivāsetuñca vaṭṭati, adhiṭṭhātuṃyeva na vaṭṭati. Āsāḷhīpuṇṇamāsiyā pacchimapāṭipadadivasato paṭṭhāya yāva kattikapuṇṇamā, ime cattāro māsā pariyesanakaraṇanivāsanādhiṭṭhānānaṃ catunnaṃ khettaṃ. Etasmiñhi antare aladdhaṃ pariyesituṃ laddhaṃ kātuṃ nivāsetuṃ adhiṭṭhātuñca vaṭṭati. Idaṃ tāva catubbidhaṃ khettaṃ veditabbaṃ.
কত্তিকপুণ্ণমাসিযা পন পচ্ছিমপাটিপদদিৰসতো পট্ঠায যাৰ জেট্ঠমূলপুণ্ণমা, ইমে সত্ত মাসা পিট্ঠিসমযো নাম। এতস্মিঞ্হি অন্তরে ‘‘কালো ৰস্সিকসাটিকাযা’’তিআদিনা নযেন সতুপ্পাদং কত্ৰা অঞ্ঞাতকঅপ্পৰারিতট্ঠানতো ৰস্সিকসাটিকচীৰরং নিপ্ফাদেন্তস্স ইমিনা সিক্খাপদেন নিস্সগ্গিযং পাচিত্তিযং। ‘‘দেথ মে ৰস্সিকসাটিকচীৰর’’ন্তিআদিনা নযেন ৰিঞ্ঞত্তিং কত্ৰা নিপ্ফাদেন্তস্স অঞ্ঞাতকৰিঞ্ঞত্তিসিক্খাপদেন নিস্সগ্গিযং পাচিত্তিযং। ৰুত্তনযেনেৰ সতুপ্পাদং কত্ৰা ঞাতকপৰারিতট্ঠানতো নিপ্ফাদেন্তস্স ইমিনাৰ সিক্খাপদেন নিস্সগ্গিযং পাচিত্তিযং । ৰিঞ্ঞত্তিং কত্ৰা নিপ্ফাদেন্তস্স অঞ্ঞাতকৰিঞ্ঞত্তিসিক্খাপদেন অনাপত্তি। ৰুত্তঞ্হেতং পরিৰারে –
Kattikapuṇṇamāsiyā pana pacchimapāṭipadadivasato paṭṭhāya yāva jeṭṭhamūlapuṇṇamā, ime satta māsā piṭṭhisamayo nāma. Etasmiñhi antare ‘‘kālo vassikasāṭikāyā’’tiādinā nayena satuppādaṃ katvā aññātakaappavāritaṭṭhānato vassikasāṭikacīvaraṃ nipphādentassa iminā sikkhāpadena nissaggiyaṃ pācittiyaṃ. ‘‘Detha me vassikasāṭikacīvara’’ntiādinā nayena viññattiṃ katvā nipphādentassa aññātakaviññattisikkhāpadena nissaggiyaṃ pācittiyaṃ. Vuttanayeneva satuppādaṃ katvā ñātakapavāritaṭṭhānato nipphādentassa imināva sikkhāpadena nissaggiyaṃ pācittiyaṃ . Viññattiṃ katvā nipphādentassa aññātakaviññattisikkhāpadena anāpatti. Vuttañhetaṃ parivāre –
‘‘মাতরং চীৰরং যাচে, নো চ সঙ্ঘে পরিণতং।
‘‘Mātaraṃ cīvaraṃ yāce, no ca saṅghe pariṇataṃ;
কেনস্স হোতি আপত্তি, অনাপত্তি চ ঞাতকে।
Kenassa hoti āpatti, anāpatti ca ñātake;
পঞ্হা মেসা কুসলেহি চিন্তিতা’’তি॥ (পরি॰ ৪৮১)।
Pañhā mesā kusalehi cintitā’’ti. (pari. 481);
অযঞ্হি পঞ্হো ইমমত্থং সন্ধায ৰুত্তোতি। এৰং পিট্ঠিসমযচতুক্কং ৰেদিতব্বং।
Ayañhi pañho imamatthaṃ sandhāya vuttoti. Evaṃ piṭṭhisamayacatukkaṃ veditabbaṃ.
জেট্ঠমূলপুণ্ণমাসিযা পন পচ্ছিমপাটিপদদিৰসতো পট্ঠায যাৰ কত্তিকপুণ্ণমা, ইমে পঞ্চ মাসা কুচ্ছিসমযো নাম। এতস্মিঞ্হি অন্তরে ৰুত্তনযেন সতুপ্পাদং কত্ৰা অঞ্ঞাতকঅপ্পৰারিতট্ঠানতো ৰস্সিকসাটিকচীৰরং নিপ্ফাদেন্তস্স ৰত্তভেদে দুক্কটং। যে মনুস্সা পুব্বেপি ৰস্সিকসাটিকচীৰরং দেন্তি, ইমে পন সচেপি অত্তনো অঞ্ঞাতকঅপ্পৰারিতা হোন্তি, ৰত্তভেদো নত্থি, তেসু সতুপ্পাদকরণস্স অনুঞ্ঞাতত্তা। ৰিঞ্ঞতিং কত্ৰা নিপ্ফাদেন্তস্স অঞ্ঞাতকৰিঞ্ঞত্তিসিক্খাপদেন নিস্সগ্গিযং পাচিত্তিযং। ইদং পন পকতিযা ৰস্সিকসাটিকদাযকেসুপি হোতিযেৰ। ৰুত্তনযেনেৰ সতুপ্পাদং কত্ৰা ঞাতকপৰারিতট্ঠানতো নিপ্ফাদেন্তস্স ইমিনা সিক্খাপদেন অনাপত্তি। ৰিঞ্ঞত্তিং কত্ৰা নিপ্ফাদেন্তস্স অঞ্ঞাতকৰিঞ্ঞত্তিসিক্খাপদেন অনাপত্তি। ‘‘ন ৰত্তব্বা দেথ মে’’তি ইদঞ্হি পরিযেসনকালে অঞ্ঞাতকঅপ্পৰারিতেযেৰ সন্ধায ৰুত্তং। এৰং কুচ্ছিসমযচতুক্কং ৰেদিতব্বং।
Jeṭṭhamūlapuṇṇamāsiyā pana pacchimapāṭipadadivasato paṭṭhāya yāva kattikapuṇṇamā, ime pañca māsā kucchisamayo nāma. Etasmiñhi antare vuttanayena satuppādaṃ katvā aññātakaappavāritaṭṭhānato vassikasāṭikacīvaraṃ nipphādentassa vattabhede dukkaṭaṃ. Ye manussā pubbepi vassikasāṭikacīvaraṃ denti, ime pana sacepi attano aññātakaappavāritā honti, vattabhedo natthi, tesu satuppādakaraṇassa anuññātattā. Viññatiṃ katvā nipphādentassa aññātakaviññattisikkhāpadena nissaggiyaṃ pācittiyaṃ. Idaṃ pana pakatiyā vassikasāṭikadāyakesupi hotiyeva. Vuttanayeneva satuppādaṃ katvā ñātakapavāritaṭṭhānato nipphādentassa iminā sikkhāpadena anāpatti. Viññattiṃ katvā nipphādentassa aññātakaviññattisikkhāpadena anāpatti. ‘‘Na vattabbā detha me’’ti idañhi pariyesanakāle aññātakaappavāriteyeva sandhāya vuttaṃ. Evaṃ kucchisamayacatukkaṃ veditabbaṃ.
নগ্গো কাযং ওৰস্সাপেতি, আপত্তি দুক্কটস্সাতি এত্থ উদকফুসিতগণনায অকত্ৰা ন্হানপরিযোসানৰসেন পযোগে পযোগে দুক্কটেন কারেতব্বো। সো চ খো ৰিৰটঙ্গণে আকাসতো পতিতউদকেনেৰ ন্হাযন্তো। ন্হানকোট্ঠকৰাপিআদীসু ঘটেহি আসিত্তউদকেন ৰা ন্হাযন্তস্স অনাপত্তি।
Naggo kāyaṃ ovassāpeti, āpatti dukkaṭassāti ettha udakaphusitagaṇanāya akatvā nhānapariyosānavasena payoge payoge dukkaṭena kāretabbo. So ca kho vivaṭaṅgaṇe ākāsato patitaudakeneva nhāyanto. Nhānakoṭṭhakavāpiādīsu ghaṭehi āsittaudakena vā nhāyantassa anāpatti.
ৰস্সং উক্কড্ঢিযতীতি এত্থ সচে কতপরিযেসিতায ৰস্সিকসাটিকায গিম্হানং পচ্ছিম মাসং খেপেত্ৰা পুন ৰস্সানস্স পঠমমাসং উক্কড্ঢিত্ৰা গিম্হানং পচ্ছিমমাসমেৰ করোন্তি, ৰস্সিকসাটিকা ধোৰিত্ৰা নিক্খিপিতব্বা। অনধিট্ঠিতা অৰিকপ্পিতা দ্ৰে মাসে পরিহারং লভতি, ৰস্সূপনাযিকদিৰসে অধিট্ঠাতব্বা। সচে সতিসম্মোসেন ৰা অপ্পহোনকভাৰেন ৰা অকতা হোতি, তে চ দ্ৰে মাসে ৰস্সানস্স চ চাতুমাসন্তি ছ মাসে পরিহারং লভতি। সচে পন কত্তিকমাসে কথিনং অত্থরীযতি, অপরেপি চত্তারো মাসে লভতি, এৰং দস মাসা হোন্তি। ততো পরম্পি সতিযা পচ্চাসায মূলচীৰরং কত্ৰা ঠপেন্তস্স একমাসন্তি এৰং একাদস মাসে পরিহারং লভতি। সচে পন একাহদ্ৰীহাদিৰসেন যাৰ দসাহানাগতায ৰস্সূপনাযিকায অন্তোৰস্সে ৰা লদ্ধা চেৰ নিট্ঠিতা চ, কদা অধিট্ঠাতব্বাতি এতং অট্ঠকথাসু ন ৰিচারিতং। লদ্ধদিৰসতো পট্ঠায অন্তোদসাহে নিট্ঠিতা পন তস্মিংযেৰ অন্তোদসাহে অধিট্ঠাতব্বা। দসাহাতিক্কমে নিট্ঠিতা তদহেৰ অধিট্ঠাতব্বা। দসাহে অপ্পহোন্তে চীৰরকালং নাতিক্কমেতব্বাতি অযং নো অত্তনোমতি। কস্মা? ‘‘অনুজানামি, ভিক্খৰে, তিচীৰরং অধিট্ঠাতুং ন ৰিকপ্পেতুং; ৰস্সিকসাটিকং ৰস্সানং চাতুমাসং অধিট্ঠাতুং, ততো পরং ৰিকপ্পেতু’’ন্তি (মহাৰ॰ ৩৫৮) হি ৰুত্তং। তস্মা ৰস্সূপনাযিকতো পুব্বে দসাহাতিক্কমেপি অনাপত্তি। ‘‘দসাহপরমং অতিরেকচীৰরং ধারেতব্ব’’ন্তি (পারা॰ ৪৬২) চ ৰুত্তং। তস্মা একাহদ্ৰীহাদিৰসেন যাৰ দসাহানাগতায ৰস্সূপনাযিকায অন্তোৰস্সে ৰা লদ্ধা চেৰ নিট্ঠিতা চ ৰুত্তনযেনেৰ অন্তোদসাহে ৰা তদহু ৰা অধিট্ঠাতব্বা, দসাহে অপ্পহোন্তে চীৰরকালং নাতিক্কমেতব্বা।
Vassaṃ ukkaḍḍhiyatīti ettha sace katapariyesitāya vassikasāṭikāya gimhānaṃ pacchima māsaṃ khepetvā puna vassānassa paṭhamamāsaṃ ukkaḍḍhitvā gimhānaṃ pacchimamāsameva karonti, vassikasāṭikā dhovitvā nikkhipitabbā. Anadhiṭṭhitā avikappitā dve māse parihāraṃ labhati, vassūpanāyikadivase adhiṭṭhātabbā. Sace satisammosena vā appahonakabhāvena vā akatā hoti, te ca dve māse vassānassa ca cātumāsanti cha māse parihāraṃ labhati. Sace pana kattikamāse kathinaṃ attharīyati, aparepi cattāro māse labhati, evaṃ dasa māsā honti. Tato parampi satiyā paccāsāya mūlacīvaraṃ katvā ṭhapentassa ekamāsanti evaṃ ekādasa māse parihāraṃ labhati. Sace pana ekāhadvīhādivasena yāva dasāhānāgatāya vassūpanāyikāya antovasse vā laddhā ceva niṭṭhitā ca, kadā adhiṭṭhātabbāti etaṃ aṭṭhakathāsu na vicāritaṃ. Laddhadivasato paṭṭhāya antodasāhe niṭṭhitā pana tasmiṃyeva antodasāhe adhiṭṭhātabbā. Dasāhātikkame niṭṭhitā tadaheva adhiṭṭhātabbā. Dasāhe appahonte cīvarakālaṃ nātikkametabbāti ayaṃ no attanomati. Kasmā? ‘‘Anujānāmi, bhikkhave, ticīvaraṃ adhiṭṭhātuṃ na vikappetuṃ; vassikasāṭikaṃ vassānaṃ cātumāsaṃ adhiṭṭhātuṃ, tato paraṃ vikappetu’’nti (mahāva. 358) hi vuttaṃ. Tasmā vassūpanāyikato pubbe dasāhātikkamepi anāpatti. ‘‘Dasāhaparamaṃ atirekacīvaraṃ dhāretabba’’nti (pārā. 462) ca vuttaṃ. Tasmā ekāhadvīhādivasena yāva dasāhānāgatāya vassūpanāyikāya antovasse vā laddhā ceva niṭṭhitā ca vuttanayeneva antodasāhe vā tadahu vā adhiṭṭhātabbā, dasāhe appahonte cīvarakālaṃ nātikkametabbā.
তত্থ সিযা ‘‘ৰস্সানং চাতুমাসং অধিট্ঠাতু’’ন্তি ৰচনতো ‘‘চাতুমাসব্ভন্তরে যদা ৰা তদা ৰা অধিট্ঠাতুং ৰট্টতী’’তি। যদি এৰং, ‘‘কণ্ডুপ্পটিচ্ছাদিং যাৰ আবাধা অধিট্ঠাতু’’ন্তি ৰুত্তং সাপি, চ দসাহং অতিক্কামেতব্বা সিযা। এৰঞ্চ সতি ‘‘দসাহপরমং অতিরেকচীৰরং ধারেতব্ব’’ন্তি ইদং ৰিরুজ্ঝতি। তস্মা যথাৰুত্তমেৰ গহেতব্বং, অঞ্ঞং ৰা অচলং কারণং লভিত্ৰা ছড্ডেতব্বং। অপিচ কুরুন্দিযম্পি নিস্সগ্গিযাৰসানে ৰুত্তং – ‘‘কদা অধিট্ঠাতব্বা? লদ্ধদিৰসতো পট্ঠায অন্তোদসাহে নিট্ঠিতা পন তস্মিংযেৰ অন্তোদসাহে অধিট্ঠাতব্বা। যদি নপ্পহোতি যাৰ কত্তিকপুণ্ণমা পরিহারং লভতী’’তি।
Tattha siyā ‘‘vassānaṃ cātumāsaṃ adhiṭṭhātu’’nti vacanato ‘‘cātumāsabbhantare yadā vā tadā vā adhiṭṭhātuṃ vaṭṭatī’’ti. Yadi evaṃ, ‘‘kaṇḍuppaṭicchādiṃ yāva ābādhā adhiṭṭhātu’’nti vuttaṃ sāpi, ca dasāhaṃ atikkāmetabbā siyā. Evañca sati ‘‘dasāhaparamaṃ atirekacīvaraṃ dhāretabba’’nti idaṃ virujjhati. Tasmā yathāvuttameva gahetabbaṃ, aññaṃ vā acalaṃ kāraṇaṃ labhitvā chaḍḍetabbaṃ. Apica kurundiyampi nissaggiyāvasāne vuttaṃ – ‘‘kadā adhiṭṭhātabbā? Laddhadivasato paṭṭhāya antodasāhe niṭṭhitā pana tasmiṃyeva antodasāhe adhiṭṭhātabbā. Yadi nappahoti yāva kattikapuṇṇamā parihāraṃ labhatī’’ti.
৬৩০. অচ্ছিন্নচীৰরস্সাতি এতং ৰস্সিকসাটিকমেৰ সন্ধায ৰুত্তং। তেসঞ্হি নগ্গানং কাযোৰস্সাপনে অনাপত্তি। এত্থ চ মহগ্ঘৰস্সিকসাটিকং নিৰাসেত্ৰা ন্হাযন্তস্স চোরুপদ্দৰো আপদা নাম। সেসমেত্থ উত্তানমেৰ।
630.Acchinnacīvarassāti etaṃ vassikasāṭikameva sandhāya vuttaṃ. Tesañhi naggānaṃ kāyovassāpane anāpatti. Ettha ca mahagghavassikasāṭikaṃ nivāsetvā nhāyantassa corupaddavo āpadā nāma. Sesamettha uttānameva.
ছসমুট্ঠানং , কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মৰচীকম্মং, তিচিত্তং, তিৰেদনন্তি।
Chasamuṭṭhānaṃ , kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ৰস্সিকসাটিকসিক্খাপদৰণ্ণনা নিট্ঠিতা।
Vassikasāṭikasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. ৰস্সিকসাটিকসিক্খাপদং • 4. Vassikasāṭikasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. ৰস্সিকসাটিকসিক্খাপদৰণ্ণনা • 4. Vassikasāṭikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. ৰস্সিকসাটিকসিক্খাপদৰণ্ণনা • 4. Vassikasāṭikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. ৰস্সিকসাটিকসিক্খাপদৰণ্ণনা • 4. Vassikasāṭikasikkhāpadavaṇṇanā
