| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
வஸ்ஸூபனாயிகக்க²ந்த⁴ககதா²வண்ணனா
Vassūpanāyikakkhandhakakathāvaṇṇanā
2608. வஸ்ஸூபனாயிகா வுத்தாதி ஸேஸோ. பச்சி²மா சாதி எத்த² இதி-ஸத்³தோ³ நித³ஸ்ஸனே. வஸ்ஸூபனாயிகாதி வஸ்ஸூபக³மனா. ஆலயோ, வசீபே⁴தோ³ வா காதப்³போ³ உபக³ச்ச²தாதி இமினா வஸ்ஸூபக³மனப்பகாரோ த³ஸ்ஸிதோ. உபக³ச்ச²தா ஆலயோ கத்தப்³போ³, வசீபே⁴தோ³ வா கத்தப்³போ³தி ஸம்ப³ந்தோ⁴. உபக³ச்ச²ந்தேன ச ஸேனாஸனே அஸதி ‘‘இத⁴ வஸ்ஸங் வஸிஸ்ஸாமீ’’தி சித்துப்பாத³மத்தங் வா காதப்³ப³ங், ஸேனாஸனே ஸதி ‘‘இமஸ்மிங் விஹாரே இமங் தேமாஸங் வஸ்ஸங் உபேமீ’’தி ச ‘‘இத⁴ வஸ்ஸங் உபேமீ’’தி ச வசீபே⁴தோ³ வா காதப்³போ³தி அத்தோ².
2608. Vassūpanāyikā vuttāti seso. Pacchimā cāti ettha iti-saddo nidassane. Vassūpanāyikāti vassūpagamanā. Ālayo, vacībhedo vā kātabbo upagacchatāti iminā vassūpagamanappakāro dassito. Upagacchatā ālayo kattabbo, vacībhedo vā kattabboti sambandho. Upagacchantena ca senāsane asati ‘‘idha vassaṃ vasissāmī’’ti cittuppādamattaṃ vā kātabbaṃ, senāsane sati ‘‘imasmiṃ vihāre imaṃ temāsaṃ vassaṃ upemī’’ti ca ‘‘idha vassaṃ upemī’’ti ca vacībhedo vā kātabboti attho.
2609. ஜானங் வஸ்ஸூபக³மனங் அனுபக³ச்ச²தோ வாபீதி யோஜனா. தேமாஸந்தி எத்த² ‘‘புரிமங் வா பச்சி²மங் வா’’தி ஸேஸோ. சரந்தஸ்ஸாபீதி எத்த² ‘‘சாரிக’’ந்தி ஸேஸோ. புரிமங் வா தேமாஸங் பச்சி²மங் வா தேமாஸங் அவஸித்வாவ சாரிகங் சரந்தஸ்ஸாபி து³க்கடந்தி யோஜனா. தேமாஸந்தி அச்சந்தஸங்யோகே³ உபயோக³வசனங். யதா²ஹ – ‘‘ந, பி⁴க்க²வே, வஸ்ஸங் உபக³ந்த்வா புரிமங் வா தேமாஸங் பச்சி²மங் வா தேமாஸங் அவஸித்வா சாரிகா பக்கமிதப்³பா³, யோ பக்கமெய்ய, ஆபத்தி து³க்கடஸ்ஸா’’தி (மஹாவ॰ 185).
2609. Jānaṃ vassūpagamanaṃ anupagacchato vāpīti yojanā. Temāsanti ettha ‘‘purimaṃ vā pacchimaṃ vā’’ti seso. Carantassāpīti ettha ‘‘cārika’’nti seso. Purimaṃ vā temāsaṃ pacchimaṃ vā temāsaṃ avasitvāva cārikaṃ carantassāpi dukkaṭanti yojanā. Temāsanti accantasaṃyoge upayogavacanaṃ. Yathāha – ‘‘na, bhikkhave, vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā, yo pakkameyya, āpatti dukkaṭassā’’ti (mahāva. 185).
2610. ருக்க²ஸ்ஸ ஸுஸிரேதி எத்த² ‘‘ஸுத்³தே⁴’’தி ஸேஸோ. யதா²ஹ – ‘‘ருக்க²ஸுஸிரேதி எத்த² ஸுத்³தே⁴ ருக்க²ஸுஸிரேயேவ ந வட்டதி, மஹந்தஸ்ஸ பன ருக்க²ஸுஸிரஸ்ஸ அந்தோ பத³ரச்ச²த³னங் குடிகங் கத்வா பவிஸனத்³வாரங் யோஜெத்வா உபக³ந்துங் வட்டதீ’’தி. ‘‘ருக்க²ஸ்ஸ ஸுஸிரே’’தி இமினா ருக்கே²கதே³ஸோ விடபோபி ஸங்க³ஹிதோ, ஸோபி ஸுத்³தோ⁴வ ந வட்டதி. யதா²ஹ – ‘‘ருக்க²விடபி⁴யாதி எத்தா²பி ஸுத்³தே⁴ விடபமத்தே ந வட்டதி, மஹாவிடபே பன அட்டகங் ப³ந்தி⁴த்வா தத்த² பத³ரச்ச²த³னங் குடிகங் கத்வா உபக³ந்துங் வட்டதீ’’தி (மஹாவ॰ அட்ட²॰ 203).
2610.Rukkhassasusireti ettha ‘‘suddhe’’ti seso. Yathāha – ‘‘rukkhasusireti ettha suddhe rukkhasusireyeva na vaṭṭati, mahantassa pana rukkhasusirassa anto padaracchadanaṃ kuṭikaṃ katvā pavisanadvāraṃ yojetvā upagantuṃ vaṭṭatī’’ti. ‘‘Rukkhassa susire’’ti iminā rukkhekadeso viṭapopi saṅgahito, sopi suddhova na vaṭṭati. Yathāha – ‘‘rukkhaviṭabhiyāti etthāpi suddhe viṭapamatte na vaṭṭati, mahāviṭape pana aṭṭakaṃ bandhitvā tattha padaracchadanaṃ kuṭikaṃ katvā upagantuṃ vaṭṭatī’’ti (mahāva. aṭṭha. 203).
‘‘ச²த்தேதி எத்தா²பி சதூஸு த²ம்பே⁴ஸு ச²த்தங் ட²பெத்வா ஆவரணங் கத்வா த்³வாரங் யோஜெத்வா உபக³ந்துங் வட்டதி, ச²த்தகுடிகா நாமேஸா ஹோதி. சாடியாதி எத்தா²பி மஹந்தேன கபல்லேன ச²த்தே வுத்தனயேன குடிங் கத்வாவ உபக³ந்துங் வட்டதீ’’தி அட்ட²கதா²வசனதோ ஏவமகதாஸு ஸுத்³த⁴ச²த்தசாடீஸு நிவாரணங் வேதி³தப்³ப³ங். ச²வகுடீதி டங்கிதமஞ்சாத³யோ வுத்தா. யதா²ஹ – ‘‘ச²வகுடிகா நாம டங்கிதமஞ்சாதி³பே⁴தா³ குடி, தத்த² உபக³ந்துங் ந வட்டதீ’’தி (மஹாவ॰ அட்ட²॰ 203).
‘‘Chatteti etthāpi catūsu thambhesu chattaṃ ṭhapetvā āvaraṇaṃ katvā dvāraṃ yojetvā upagantuṃ vaṭṭati, chattakuṭikā nāmesā hoti. Cāṭiyāti etthāpi mahantena kapallena chatte vuttanayena kuṭiṃ katvāva upagantuṃ vaṭṭatī’’ti aṭṭhakathāvacanato evamakatāsu suddhachattacāṭīsu nivāraṇaṃ veditabbaṃ. Chavakuṭīti ṭaṅkitamañcādayo vuttā. Yathāha – ‘‘chavakuṭikā nāma ṭaṅkitamañcādibhedā kuṭi, tattha upagantuṃ na vaṭṭatī’’ti (mahāva. aṭṭha. 203).
ஸுஸானே பன அஞ்ஞங் குடிகங் கத்வா உபக³ந்துங் வட்டதி. ‘‘ச²வஸரீரங் ஜா²பெத்வா சா²ரிகாய, அட்டி²கானஞ்ச அத்தா²ய குடிகா கரீயதீ’’தி அந்த⁴கட்ட²கதா²யங் ச²வகுடி வுத்தா. ‘‘டங்கிதமஞ்சோதி கஸிகுடிகாபாஸாணக⁴ரந்தி லிகி²த’’ந்தி (வஜிர॰ டீ॰ மஹாவக்³க³ 203) வஜிரபு³த்³தி⁴த்தே²ரோ. சதுன்னங் பாஸாணானங் உபரி பாஸாணங் அத்த²ரித்வா கதோ கே³ஹோபி ‘‘டங்கிதமஞ்சோ’’தி வுச்சதி. தீ³கே⁴ மஞ்சபாதே³ மஜ்ஜே² விஜ்ஜி²த்வா அடனியோ பவேஸெத்வா மஞ்சங் கரொந்தீதி தஸ்ஸ இத³ங் உபரி, இத³ங் ஹெட்டா²தி நத்தி², பரிவத்தெத்வா அத்த²தோபி தாதி³ஸோவ ஹோதி, தங் ஸுஸானே, தே³வட்டா²னே ச ட²பெந்தி, அயம்பி டங்கிதமஞ்சோ நாம.
Susāne pana aññaṃ kuṭikaṃ katvā upagantuṃ vaṭṭati. ‘‘Chavasarīraṃ jhāpetvā chārikāya, aṭṭhikānañca atthāya kuṭikā karīyatī’’ti andhakaṭṭhakathāyaṃ chavakuṭi vuttā. ‘‘Ṭaṅkitamañcoti kasikuṭikāpāsāṇagharanti likhita’’nti (vajira. ṭī. mahāvagga 203) vajirabuddhitthero. Catunnaṃ pāsāṇānaṃ upari pāsāṇaṃ attharitvā kato gehopi ‘‘ṭaṅkitamañco’’ti vuccati. Dīghe mañcapāde majjhe vijjhitvā aṭaniyo pavesetvā mañcaṃ karontīti tassa idaṃ upari, idaṃ heṭṭhāti natthi, parivattetvā atthatopi tādisova hoti, taṃ susāne, devaṭṭhāne ca ṭhapenti, ayampi ṭaṅkitamañco nāma.
2611. ‘‘ஸதி பச்சயவேகல்லே, ஸரீராபா²ஸுதாய வா’’தி அவஸேஸந்தராயானங் வக்க²மானத்தா ‘‘அந்தராயோ’’தி இமினா ராஜந்தராயாதி³ த³ஸவிதோ⁴ க³ஹேதப்³போ³.
2611. ‘‘Sati paccayavekalle, sarīrāphāsutāya vā’’ti avasesantarāyānaṃ vakkhamānattā ‘‘antarāyo’’ti iminā rājantarāyādi dasavidho gahetabbo.
2612-4. ‘‘அனுஜானாமி , பி⁴க்க²வே, ஸத்தன்னங் ஸத்தாஹகரணீயேன அப்பஹிதேபி க³ந்துங், பகே³வ பஹிதே பி⁴க்கு²ஸ்ஸ பி⁴க்கு²னியா ஸிக்க²மானாய ஸாமணேரஸ்ஸ ஸாமணேரியா மாதுயா ச பிதுஸ்ஸ சா’’தி (மஹாவ॰ 198) வுத்தனயங் த³ஸ்ஸேதுமாஹ ‘‘மாதாபிதூன’’ந்திஆதி³.
2612-4. ‘‘Anujānāmi , bhikkhave, sattannaṃ sattāhakaraṇīyena appahitepi gantuṃ, pageva pahite bhikkhussa bhikkhuniyā sikkhamānāya sāmaṇerassa sāmaṇeriyā mātuyā ca pitussa cā’’ti (mahāva. 198) vuttanayaṃ dassetumāha ‘‘mātāpitūna’’ntiādi.
மாதாபிதூனங் த³ஸ்ஸனத்த²ங், பஞ்சன்னங் ஸஹத⁴ம்மிகானங் த³ஸ்ஸனத்த²ங் வா நேஸங் அத்தே² ஸதி வா நேஸங் அந்தரே கி³லானங் த³ட்டு²ங் வா தது³பட்டா²கானங் ப⁴த்தாதி³ங் பரியேஸனத்த²ங் வா நேஸங் ப⁴த்தாதி³ங் பரியேஸனத்த²ங் வா ததா² நேஸங் பஞ்சன்னங் ஸஹத⁴ம்மிகானங் அஞ்ஞதரங் அனபி⁴ரதங் உக்கண்டி²தங் அஹங் க³ந்த்வா வூபகாஸெஸ்ஸங் வா வூபகாஸாபெஸ்ஸாமி வா த⁴ம்மகத²மஸ்ஸ கரிஸ்ஸாமீதி வா தஸ்ஸ பஞ்சன்னங் ஸஹத⁴ம்மிகானங் அஞ்ஞதரஸ்ஸ உட்டி²தங் உப்பன்னங் தி³ட்டி²ங் விவேசெஸ்ஸாமி வா விவேசாபெஸ்ஸாமி வா த⁴ம்மகத²மஸ்ஸ கரிஸ்ஸாமீதி வா ததா² உப்பன்னங் குக்குச்சங் வினோதெ³ஸ்ஸாமீதி வா வினோதா³பெஸ்ஸாமீதி வா த⁴ம்மகத²மஸ்ஸ கரிஸ்ஸாமீதி வா ஏவங் வினயஞ்ஞுனா பி⁴க்கு²னா ஸத்தாஹகிச்சேன அபேஸிதேபி க³ந்தப்³ப³ங், பகே³வ பஹிதேதி யோஜனா.
Mātāpitūnaṃ dassanatthaṃ, pañcannaṃ sahadhammikānaṃ dassanatthaṃ vā nesaṃ atthe sati vā nesaṃ antare gilānaṃ daṭṭhuṃ vā tadupaṭṭhākānaṃ bhattādiṃ pariyesanatthaṃ vā nesaṃ bhattādiṃ pariyesanatthaṃ vā tathā nesaṃ pañcannaṃ sahadhammikānaṃ aññataraṃ anabhirataṃ ukkaṇṭhitaṃ ahaṃ gantvā vūpakāsessaṃ vā vūpakāsāpessāmi vā dhammakathamassa karissāmīti vā tassa pañcannaṃ sahadhammikānaṃ aññatarassa uṭṭhitaṃ uppannaṃ diṭṭhiṃ vivecessāmi vā vivecāpessāmi vā dhammakathamassa karissāmīti vā tathā uppannaṃ kukkuccaṃ vinodessāmīti vā vinodāpessāmīti vā dhammakathamassa karissāmīti vā evaṃ vinayaññunā bhikkhunā sattāhakiccena apesitepi gantabbaṃ, pageva pahiteti yojanā.
ப⁴த்தாதீ³தி எத்த² ஆதி³-ஸத்³தே³ன பே⁴ஸஜ்ஜபரியேஸனாதி³ங் ஸங்க³ண்ஹாதி. யதா²ஹ – ‘‘கி³லானப⁴த்தங் வா பரியேஸிஸ்ஸாமி, கி³லானுபட்டா²கப⁴த்தங் வா பரியேஸிஸ்ஸாமி, கி³லானபே⁴ஸஜ்ஜங் வா பரியேஸிஸ்ஸாமி, புச்சி²ஸ்ஸாமி வா உபட்ட²ஹிஸ்ஸாமி வா’’தி. வூபகாஸெஸ்ஸந்தி யத்த² அனபி⁴ரதி உப்பன்னா, ததோ அஞ்ஞத்த² க³ஹெத்வா க³மிஸ்ஸாமீதி அத்தோ².
Bhattādīti ettha ādi-saddena bhesajjapariyesanādiṃ saṅgaṇhāti. Yathāha – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā upaṭṭhahissāmi vā’’ti. Vūpakāsessanti yattha anabhirati uppannā, tato aññattha gahetvā gamissāmīti attho.
வினோதெ³ஸ்ஸாமஹந்தி வாதி எத்த² வா-ஸத்³தே³ன ‘‘இத⁴ பன, பி⁴க்க²வே, பி⁴க்கு² க³ருத⁴ம்மங் அஜ்ஜா²பன்னோ ஹோதி பரிவாஸாரஹோ, ஸோ சே பி⁴க்கூ²னங் ஸந்திகே தூ³தங் பஹிணெய்ய ‘அஹஞ்ஹி க³ருத⁴ம்மங் அஜ்ஜா²பன்னோ பரிவாஸாரஹோ, ஆக³ச்ச²ந்து பி⁴க்கூ², இச்சா²மி பி⁴க்கூ²னங் ஆக³த’ந்தி. க³ந்தப்³ப³ங், பி⁴க்க²வே, ஸத்தாஹகரணீயேன அப்பஹிதேபி, பகே³வ பஹிதே ‘பரிவாஸதா³னங் உஸ்ஸுக்கங் கரிஸ்ஸாமி வா அனுஸ்ஸாவெஸ்ஸாமி வா க³ணபூரகோ வா ப⁴விஸ்ஸாமீ’’திஆதி³னயங் (மஹாவ॰ 193) ஸங்க³ண்ஹாதி. ஏவங் ஸத்தாஹகிச்சேன க³ச்ச²ந்தேன அந்தோஉபசாரஸீமாய டி²தேனேவ ‘‘அந்தோஸத்தாஹே ஆக³ச்சி²ஸ்ஸாமீ’’தி ஆபோ⁴க³ங் கத்வா க³ந்தப்³ப³ங். ஸசே ஆபோ⁴க³ங் அகத்வா உபசாரஸீமங் அதிக்கமதி, சி²ன்னவஸ்ஸோ ஹோதீதி வத³ந்தி.
Vinodessāmahanti vāti ettha vā-saddena ‘‘idha pana, bhikkhave, bhikkhu garudhammaṃ ajjhāpanno hoti parivāsāraho, so ce bhikkhūnaṃ santike dūtaṃ pahiṇeyya ‘ahañhi garudhammaṃ ajjhāpanno parivāsāraho, āgacchantu bhikkhū, icchāmi bhikkhūnaṃ āgata’nti. Gantabbaṃ, bhikkhave, sattāhakaraṇīyena appahitepi, pageva pahite ‘parivāsadānaṃ ussukkaṃ karissāmi vā anussāvessāmi vā gaṇapūrako vā bhavissāmī’’tiādinayaṃ (mahāva. 193) saṅgaṇhāti. Evaṃ sattāhakiccena gacchantena antoupacārasīmāya ṭhiteneva ‘‘antosattāhe āgacchissāmī’’ti ābhogaṃ katvā gantabbaṃ. Sace ābhogaṃ akatvā upacārasīmaṃ atikkamati, chinnavasso hotīti vadanti.
2615. ‘‘அயங் பனெத்த² பாளிமுத்தகரத்திச்சே²த³வினிச்ச²யோ’’தி அட்ட²கதா²க³தங் ரத்திச்சே²த³வினிச்ச²யங் த³ஸ்ஸேதுமாஹ ‘‘வஸ்ஸங் உபக³தேனெத்தா²’’திஆதி³. எத்தா²தி இமஸ்மிங் ஸத்தாஹகிச்சாதி⁴காரே. அயங் பாளிமுத்தகவினிச்ச²யோ த³ட்ட²ப்³போ³தி அத்தோ².
2615. ‘‘Ayaṃ panettha pāḷimuttakaratticchedavinicchayo’’ti aṭṭhakathāgataṃ ratticchedavinicchayaṃ dassetumāha ‘‘vassaṃ upagatenetthā’’tiādi. Etthāti imasmiṃ sattāhakiccādhikāre. Ayaṃ pāḷimuttakavinicchayo daṭṭhabboti attho.
2616. ‘‘அஸுகங் நாம தி³வஸ’’ந்திஆதி³னா நிமந்தனாகாரங் வக்க²தி. புப்³ப³ந்தி பட²மங். வட்டதீதி ஸத்தாஹகிச்சேன க³ந்துங் வட்டதி. யதா²ஹ – ‘‘ஸசே ஏகஸ்மிங் மஹாவாஸே பட²மங்யேவ கதிகா கதா ஹோதி ‘அஸுகதி³வஸங் நாம ஸன்னிபதிதப்³ப³’ந்தி, நிமந்திதோயேவ நாம ஹோதி, க³ந்துங் வட்டதீ’’தி (மஹாவ॰ அட்ட²॰ 199). ‘‘உபாஸகேஹி ‘இமஸ்மிங் நாம தி³வஸே தா³னாதீ³னி கரோம, ஸப்³பே³ ஏவ ஸன்னிபதந்தூ’தி கதிகாயபி கதாய க³ந்துங் வட்டதி, நிமந்திதோயேவ நாம ஹோதீ’’தி கேசி.
2616.‘‘Asukaṃ nāma divasa’’ntiādinā nimantanākāraṃ vakkhati. Pubbanti paṭhamaṃ. Vaṭṭatīti sattāhakiccena gantuṃ vaṭṭati. Yathāha – ‘‘sace ekasmiṃ mahāvāse paṭhamaṃyeva katikā katā hoti ‘asukadivasaṃ nāma sannipatitabba’nti, nimantitoyeva nāma hoti, gantuṃ vaṭṭatī’’ti (mahāva. aṭṭha. 199). ‘‘Upāsakehi ‘imasmiṃ nāma divase dānādīni karoma, sabbe eva sannipatantū’ti katikāyapi katāya gantuṃ vaṭṭati, nimantitoyeva nāma hotī’’ti keci.
2617. ப⁴ண்ட³கந்தி அத்தனோ சீவரப⁴ண்ட³ங். ந வட்டதீதி ஸத்தாஹகிச்சேன க³ந்துங் ந வட்டதி. பஹிணந்தீதி சீவரதோ⁴வனாதி³கம்மேன பஹிணந்தி. ஆசரியுபஜ்ஜா²யானங் ஆணத்தியேன கேனசி அனவஜ்ஜகிச்சேன ஸத்தாஹகரணீயேன க³ந்துங் வட்டதீதி இமினாவ தீ³பிதங் ஹோதி.
2617.Bhaṇḍakanti attano cīvarabhaṇḍaṃ. Na vaṭṭatīti sattāhakiccena gantuṃ na vaṭṭati. Pahiṇantīti cīvaradhovanādikammena pahiṇanti. Ācariyupajjhāyānaṃ āṇattiyena kenaci anavajjakiccena sattāhakaraṇīyena gantuṃ vaṭṭatīti imināva dīpitaṃ hoti.
2618. உத்³தே³ஸாதீ³னமத்தா²யாதி பாளிவாசனானி ஸந்தா⁴ய. ஆதி³-ஸத்³தே³ன பரிபுச்சா²தி³ங் ஸங்க³ண்ஹாதி. க³ரூனந்தி அகி³லானானம்பி ஆசரியுபஜ்ஜா²யானங். க³ந்துங் லப⁴தீதி ஸத்தாஹகரணீயேன க³ந்துங் லப⁴தி. புக்³க³லோதி பகரணதோ பி⁴க்கு²ங்யேவ க³ண்ஹாதி.
2618.Uddesādīnamatthāyāti pāḷivācanāni sandhāya. Ādi-saddena paripucchādiṃ saṅgaṇhāti. Garūnanti agilānānampi ācariyupajjhāyānaṃ. Gantuṃ labhatīti sattāhakaraṇīyena gantuṃ labhati. Puggaloti pakaraṇato bhikkhuṃyeva gaṇhāti.
2619. ஆசரியோதி நித³ஸ்ஸனமத்தங், உபஜ்ஜா²யேன நிவாரிதேபி ஏஸேவ நயோ. ‘‘ஸசே பன நங் ஆசரியோ ‘அஜ்ஜ மா க³ச்சா²’தி வத³தி, வட்டதீ’’தி (மஹாவ॰ அட்ட²॰ 199) அட்ட²கதா²நயங் த³ஸ்ஸேதுமாஹ ‘‘ரத்திச்சே²தே³ அனாபத்தி, ஹோதீதி பரிதீ³பிதா’’தி. ரத்திச்சே²தே³தி வஸ்ஸச்சே²த³னிமித்தங். ‘‘ரத்திச்சே²தே³’’தி ஸப்³ப³த்த² வஸ்ஸச்சே²தோ³தி ஸன்னிட்டா²னங் கத்வா வத³ந்தி, ஏவங் ஸத்தாஹகரணீயேன க³தங் நங் அந்தோஸத்தாஹேயேவ புன ஆக³ச்ச²ந்தங் ஸசே ஆசரியோ வா உபஜ்ஜா²யோ வா ‘‘அஜ்ஜ மா க³ச்சா²’’தி வத³தி, ஸத்தாஹாதிக்கமேபி அனாபத்தீதி அதி⁴ப்பாயோ, வஸ்ஸச்சே²தோ³ பன ஹோதியேவாதி த³ட்ட²ப்³ப³ங் ஸத்தாஹஸ்ஸ ப³ஹித்³தா⁴ வீதினாமிதத்தா.
2619.Ācariyoti nidassanamattaṃ, upajjhāyena nivāritepi eseva nayo. ‘‘Sace pana naṃ ācariyo ‘ajja mā gacchā’ti vadati, vaṭṭatī’’ti (mahāva. aṭṭha. 199) aṭṭhakathānayaṃ dassetumāha ‘‘ratticchede anāpatti, hotīti paridīpitā’’ti. Ratticchedeti vassacchedanimittaṃ. ‘‘Ratticchede’’ti sabbattha vassacchedoti sanniṭṭhānaṃ katvā vadanti, evaṃ sattāhakaraṇīyena gataṃ naṃ antosattāheyeva puna āgacchantaṃ sace ācariyo vā upajjhāyo vā ‘‘ajja mā gacchā’’ti vadati, sattāhātikkamepi anāpattīti adhippāyo, vassacchedo pana hotiyevāti daṭṭhabbaṃ sattāhassa bahiddhā vītināmitattā.
2620. யஸ்ஸ கஸ்ஸசி ஞாதிஸ்ஸாதி மாதாபிதூஹி அஞ்ஞஸ்ஸ ஞாதிஜனஸ்ஸ. ‘‘க³ச்ச²தோ த³ஸ்ஸனத்தா²யா’’தி இமினா ஸேஸஞாதிகேஹி ‘‘மயங் கி³லானா ப⁴த³ந்தானங் ஆக³மனங் இச்சா²மா’’தி ச ‘‘உபட்டா²ககுலேஹி தா³னங் த³ஸ்ஸாம, த⁴ம்மங் ஸொஸ்ஸாம, பி⁴க்கூ²னங் த³ஸ்ஸனங் இச்சா²மா’’தி ச ஏவங் கத்தப்³ப³ங் நித்³தி³ஸித்வா தூ³தே வா பேஸிதே ஸத்தாஹகரணீயேன க³ச்ச²தோ ரத்திச்சே²தோ³ ச து³க்கடஞ்ச ந ஹோதீதி வுத்தங் ஹோதி. யதா²ஹ ‘‘இத⁴ பன, பி⁴க்க²வே, பி⁴க்கு²ஸ்ஸ ஞாதகோ கி³லானோ ஹோதி…பே॰… க³ந்தப்³ப³ங், பி⁴க்க²வே, ஸத்தாஹகரணீயேன பஹிதே, ந த்வேவ அப்பஹிதே’’தி (மஹாவ॰ 199) ச ‘‘இத⁴ பன, பி⁴க்க²வே, உபாஸகேன ஸங்க⁴ங் உத்³தி³ஸ்ஸ விஹாரோ காராபிதோ ஹோதி…பே॰… இச்சா²மி தா³னஞ்ச தா³துங் த⁴ம்மஞ்ச ஸோதுங் பி⁴க்கூ² ச பஸ்ஸிதுந்தி. க³ந்தப்³ப³ங், பி⁴க்க²வே, ஸத்தாஹகரணீயேன பஹிதே, ந த்வேவ அப்பஹிதே’’தி (மஹாவ॰ 188) ச.
2620.Yassa kassaci ñātissāti mātāpitūhi aññassa ñātijanassa. ‘‘Gacchato dassanatthāyā’’ti iminā sesañātikehi ‘‘mayaṃ gilānā bhadantānaṃ āgamanaṃ icchāmā’’ti ca ‘‘upaṭṭhākakulehi dānaṃ dassāma, dhammaṃ sossāma, bhikkhūnaṃ dassanaṃ icchāmā’’ti ca evaṃ kattabbaṃ niddisitvā dūte vā pesite sattāhakaraṇīyena gacchato ratticchedo ca dukkaṭañca na hotīti vuttaṃ hoti. Yathāha ‘‘idha pana, bhikkhave, bhikkhussa ñātako gilāno hoti…pe… gantabbaṃ, bhikkhave, sattāhakaraṇīyena pahite, na tveva appahite’’ti (mahāva. 199) ca ‘‘idha pana, bhikkhave, upāsakena saṅghaṃ uddissa vihāro kārāpito hoti…pe… icchāmi dānañca dātuṃ dhammañca sotuṃ bhikkhū ca passitunti. Gantabbaṃ, bhikkhave, sattāhakaraṇīyena pahite, na tveva appahite’’ti (mahāva. 188) ca.
2621. ‘‘அஹங் கா³மகங் க³ந்த்வா அஜ்ஜேவ ஆக³மிஸ்ஸாமீ’’தி ஆக³ச்ச²ங் ஆக³ச்ச²ந்தோ ஸசே பாபுணிதுங் ந ஸக்கோதேவ, வட்டதீதி யோஜனா. வட்டதீதி எத்த² ‘‘அஜ்ஜேவ ஆக³மிஸ்ஸாமீ’’தி க³ந்த்வா ஆக³ச்ச²ந்தஸ்ஸ அந்தராமக்³கே³ ஸசே அருணுக்³க³மனங் ஹோதி, வஸ்ஸச்சே²தோ³பி ந ஹோதி, ரத்திச்சே²த³து³க்கடஞ்ச நத்தீ²தி அதி⁴ப்பாயோ.
2621. ‘‘Ahaṃ gāmakaṃ gantvā ajjeva āgamissāmī’’ti āgacchaṃ āgacchanto sace pāpuṇituṃ na sakkoteva, vaṭṭatīti yojanā. Vaṭṭatīti ettha ‘‘ajjeva āgamissāmī’’ti gantvā āgacchantassa antarāmagge sace aruṇuggamanaṃ hoti, vassacchedopi na hoti, ratticchedadukkaṭañca natthīti adhippāyo.
2622. வஜேதி (மஹாவ॰ அட்ட²॰ 203) கோ³பாலகானங் நிவாஸனட்டா²னே. ஸத்தே²தி ஜங்க⁴ஸத்த²ஸகடஸத்தா²னங் ஸன்னிவிட்டோ²காஸே. தீஸு டா²னேஸு பி⁴க்கு²னோ, வஸ்ஸச்சே²தே³ அனாபத்தீதி தேஹி ஸத்³தி⁴ங் க³ச்ச²ந்தஸ்ஸேவ நத்தி² ஆபத்தி, தேஹி வியுஞ்ஜித்வா க³மனே பன ஆபத்தியேவ, பவாரேதுஞ்ச ந லப⁴தி.
2622.Vajeti (mahāva. aṭṭha. 203) gopālakānaṃ nivāsanaṭṭhāne. Sattheti jaṅghasatthasakaṭasatthānaṃ sanniviṭṭhokāse. Tīsu ṭhānesu bhikkhuno, vassacchede anāpattīti tehi saddhiṃ gacchantasseva natthi āpatti, tehi viyuñjitvā gamane pana āpattiyeva, pavāretuñca na labhati.
வஜாதீ³ஸு வஸ்ஸங் உபக³ச்ச²ந்தேன வஸ்ஸூபனாயிகதி³வஸே தேன பி⁴க்கு²னா உபாஸகா வத்தப்³பா³ ‘‘குடிகா லத்³து⁴ங் வட்டதீ’’தி. ஸசே கரித்வா தெ³ந்தி, தத்த² பவிஸித்வா ‘‘இத⁴ வஸ்ஸங் உபேமீ’’தி திக்க²த்துங் வத்தப்³ப³ங். நோ சே தெ³ந்தி, ஸாலாஸங்கே²பேன டி²தஸகடஸ்ஸ ஹெட்டா² உபக³ந்தப்³ப³ங். தம்பி அலப⁴ந்தேன ஆலயோ காதப்³போ³. ஸத்தே² பன குடிகாதீ³னங் அபா⁴வே ‘‘இத⁴ வஸ்ஸங் உபேமீ’’தி வசீபே⁴த³ங் கத்வா உபக³ந்துங் ந வட்டதி, ஆலயகரணமத்தமேவ வட்டதி. ஆலயோ நாம ‘‘இத⁴ வஸ்ஸங் வஸிஸ்ஸாமீ’’தி சித்துப்பாத³மத்தங்.
Vajādīsu vassaṃ upagacchantena vassūpanāyikadivase tena bhikkhunā upāsakā vattabbā ‘‘kuṭikā laddhuṃ vaṭṭatī’’ti. Sace karitvā denti, tattha pavisitvā ‘‘idha vassaṃ upemī’’ti tikkhattuṃ vattabbaṃ. No ce denti, sālāsaṅkhepena ṭhitasakaṭassa heṭṭhā upagantabbaṃ. Tampi alabhantena ālayo kātabbo. Satthe pana kuṭikādīnaṃ abhāve ‘‘idha vassaṃ upemī’’ti vacībhedaṃ katvā upagantuṃ na vaṭṭati, ālayakaraṇamattameva vaṭṭati. Ālayo nāma ‘‘idha vassaṃ vasissāmī’’ti cittuppādamattaṃ.
ஸசே மக்³க³ப்படிபன்னேயேவ ஸத்தே² பவாரணதி³வஸோ ஹோதி, தத்தே²வ பவாரேதப்³ப³ங். அத² ஸத்தோ² அந்தோவஸ்ஸேயேவ பி⁴க்கு²னா பத்தி²தட்டா²னங் பத்வா அதிக்கமதி. பத்தி²தட்டா²னே வஸித்வா தத்த² பி⁴க்கூ²ஹி ஸத்³தி⁴ங் பவாரேதப்³ப³ங். அதா²பி ஸத்தோ² அந்தோவஸ்ஸேயேவ அந்தரா ஏகஸ்மிங் கா³மே திட்ட²தி வா விப்பகிரதி வா, தஸ்மிங்யேவ கா³மே பி⁴க்கூ²ஹி ஸத்³தி⁴ங் வஸித்வா பவாரேதப்³ப³ங், அப்பவாரெத்வா ததோ பரங் க³ந்துங் ந வட்டதி.
Sace maggappaṭipanneyeva satthe pavāraṇadivaso hoti, tattheva pavāretabbaṃ. Atha sattho antovasseyeva bhikkhunā patthitaṭṭhānaṃ patvā atikkamati. Patthitaṭṭhāne vasitvā tattha bhikkhūhi saddhiṃ pavāretabbaṃ. Athāpi sattho antovasseyeva antarā ekasmiṃ gāme tiṭṭhati vā vippakirati vā, tasmiṃyeva gāme bhikkhūhi saddhiṃ vasitvā pavāretabbaṃ, appavāretvā tato paraṃ gantuṃ na vaṭṭati.
நாவாய வஸ்ஸங் உபக³ச்ச²ந்தேனாபி குடியங்யேவ உபக³ந்தப்³ப³ங். பரியேஸித்வா அலப⁴ந்தே ஆலயோ காதப்³போ³ . ஸசே அந்தோதேமாஸங் நாவா ஸமுத்³தே³யேவ ஹோதி, தத்தே²வ பவாரேதப்³ப³ங். அத² நாவா கூலங் லப⁴தி, ஸயஞ்ச பரதோ க³ந்துகாமோ ஹோதி, க³ந்துங் ந வட்டதி. நாவாய லத்³த⁴கா³மேயேவ வஸித்வா பி⁴க்கூ²ஹி ஸத்³தி⁴ங் பவாரேதப்³ப³ங். ஸசேபி நாவா அனுதீரமேவ அஞ்ஞத்த² க³ச்ச²தி, பி⁴க்கு² ச பட²மங் லத்³த⁴கா³மேயேவ வஸிதுகாமோ, நாவா க³ச்ச²து, பி⁴க்கு²னா தத்தே²வ வஸித்வா பி⁴க்கூ²ஹி ஸத்³தி⁴ங் பவாரேதப்³ப³ங்.
Nāvāya vassaṃ upagacchantenāpi kuṭiyaṃyeva upagantabbaṃ. Pariyesitvā alabhante ālayo kātabbo . Sace antotemāsaṃ nāvā samuddeyeva hoti, tattheva pavāretabbaṃ. Atha nāvā kūlaṃ labhati, sayañca parato gantukāmo hoti, gantuṃ na vaṭṭati. Nāvāya laddhagāmeyeva vasitvā bhikkhūhi saddhiṃ pavāretabbaṃ. Sacepi nāvā anutīrameva aññattha gacchati, bhikkhu ca paṭhamaṃ laddhagāmeyeva vasitukāmo, nāvā gacchatu, bhikkhunā tattheva vasitvā bhikkhūhi saddhiṃ pavāretabbaṃ.
இதி வஜே, ஸத்தே², நாவாயந்தி தீஸு டா²னேஸு நத்தி² வஸ்ஸச்சே²தே³ ஆபத்தி, பவாரேதுஞ்ச லப⁴தி.
Iti vaje, satthe, nāvāyanti tīsu ṭhānesu natthi vassacchede āpatti, pavāretuñca labhati.
2623. ஸதி பச்சயவேகல்லேதி பிண்ட³பாதாதீ³னங் பச்சயானங் ஊனத்தே ஸதி. ஸரீராபா²ஸுதாய வாதி ஸரீரஸ்ஸ அபா²ஸுதாய ஆபா³தே⁴ வா ஸதி. வஸ்ஸங் செ²த்வாபி பக்கமேதி வஸ்ஸச்சே²த³ங் கத்வாபி யதா²பா²ஸுகட்டா²னங் க³ச்செ²ய்ய. அபி-ஸத்³தே³ன வஸ்ஸங் அசெ²த்வா வஸ்ஸச்சே²த³காரணே ஸதி ஸத்தாஹகரணீயேன க³ந்தும்பி வட்டதீதி தீ³பேதி.
2623.Sati paccayavekalleti piṇḍapātādīnaṃ paccayānaṃ ūnatte sati. Sarīrāphāsutāya vāti sarīrassa aphāsutāya ābādhe vā sati. Vassaṃ chetvāpi pakkameti vassacchedaṃ katvāpi yathāphāsukaṭṭhānaṃ gaccheyya. Api-saddena vassaṃ achetvā vassacchedakāraṇe sati sattāhakaraṇīyena gantumpi vaṭṭatīti dīpeti.
2624. யேன கேனந்தராயேனாதி ராஜந்தராயாதீ³ஸு யேன கேனசி அந்தராயேன. யோ பி⁴க்கு² வஸ்ஸங் நோபக³தோ, தேனாபி சி²ன்னவஸ்ஸேன வாபி து³தியா வஸ்ஸூபனாயிகா உபக³ந்தப்³பா³தி யோஜனா.
2624.Yena kenantarāyenāti rājantarāyādīsu yena kenaci antarāyena. Yo bhikkhu vassaṃ nopagato, tenāpi chinnavassena vāpi dutiyā vassūpanāyikā upagantabbāti yojanā.
2625-6. ஸத்தாஹந்தி அச்சந்தஸங்யோகே³ உபயோக³வசனங். ‘‘வீதினாமேதீ’’தி இமினா ஸம்ப³ந்தோ⁴. உபக³ந்த்வாபி வா ப³ஹித்³தா⁴ ஏவ ஸத்தாஹங் வீதினாமேதி சே. யோ க³ச்ச²தி, யோ ச வீதினாமேதி, தஸ்ஸ பி⁴க்கு²ஸ்ஸ. புரிமாபி ந விஜ்ஜதீதி அனுபக³தத்தா, சி²ன்னவஸ்ஸத்தா ச புரிமாபி வஸ்ஸூபனாயிகா ந விஜ்ஜதி ந லப⁴தி. இமேஸங் த்³வின்னங் யதா²க்கமங் உபசாராதிக்கமே, ஸத்தாஹாதிக்கமே ச ஆபத்தி வேதி³தப்³பா³.
2625-6.Sattāhanti accantasaṃyoge upayogavacanaṃ. ‘‘Vītināmetī’’ti iminā sambandho. Upagantvāpi vā bahiddhā eva sattāhaṃ vītināmeti ce. Yo gacchati, yo ca vītināmeti, tassa bhikkhussa. Purimāpi na vijjatīti anupagatattā, chinnavassattā ca purimāpi vassūpanāyikā na vijjati na labhati. Imesaṃ dvinnaṃ yathākkamaṃ upacārātikkame, sattāhātikkame ca āpatti veditabbā.
படிஸ்ஸவே ச பி⁴க்கு²ஸ்ஸ, ஹோதி ஆபத்தி து³க்கடந்தி ‘‘இத⁴ வஸ்ஸங் வஸதா²’’தி வுத்தே ‘‘ஸாதூ⁴’’தி படிஸ்ஸுணித்வா தஸ்ஸ விஸங்வாதே³ அஸச்சாபனே ஆபத்தி ஹோதி. கதமாதி ஆஹ ‘‘து³க்கட’’ந்தி. ந கேவலங் ஏதஸ்ஸேவ விஸங்வாதே³ ஆபத்தி ஹோதி, அத² கோ² இதரேஸம்பி படிஸ்ஸவானங் விஸங்வாதே³ ஆபத்தி வேதி³தப்³பா³. யதா²ஹ – ‘‘படிஸ்ஸவே ச ஆபத்தி து³க்கடஸ்ஸாதி எத்த² ந கேவலங் ‘இமங் தேமாஸங் இத⁴ வஸ்ஸங் வஸதா²’தி ஏதஸ்ஸேவ படிஸ்ஸவஸ்ஸ விஸங்வாதே³ ஆபத்தி, ‘இமங் தேமாஸங் பி⁴க்க²ங் க³ண்ஹத², உபோ⁴பி மயங் இத⁴ வஸ்ஸங் வஸிஸ்ஸாம, ஏகதோவ உத்³தி³ஸாபெஸ்ஸாமா’தி ஏவமாதி³னாபி தஸ்ஸ தஸ்ஸ படிஸ்ஸவஸ்ஸ விஸங்வாதே³ து³க்கட’’ந்தி (மஹாவ॰ அட்ட²॰ 207). தஞ்ச கோ² படிஸ்ஸவகாலே ஸுத்³த⁴சித்தஸ்ஸ பச்சா² விஸங்வாத³னபச்சயா ஹோதி. பட²மங் அஸுத்³த⁴சித்தஸ்ஸ பன படிஸ்ஸவே பாசித்தியங், விஸங்வாதே³ன து³க்கடந்தி பாசித்தியேன ஸத்³தி⁴ங் து³க்கடங் யுஜ்ஜதி.
Paṭissave ca bhikkhussa, hoti āpatti dukkaṭanti ‘‘idha vassaṃ vasathā’’ti vutte ‘‘sādhū’’ti paṭissuṇitvā tassa visaṃvāde asaccāpane āpatti hoti. Katamāti āha ‘‘dukkaṭa’’nti. Na kevalaṃ etasseva visaṃvāde āpatti hoti, atha kho itaresampi paṭissavānaṃ visaṃvāde āpatti veditabbā. Yathāha – ‘‘paṭissave ca āpatti dukkaṭassāti ettha na kevalaṃ ‘imaṃ temāsaṃ idha vassaṃ vasathā’ti etasseva paṭissavassa visaṃvāde āpatti, ‘imaṃ temāsaṃ bhikkhaṃ gaṇhatha, ubhopi mayaṃ idha vassaṃ vasissāma, ekatova uddisāpessāmā’ti evamādināpi tassa tassa paṭissavassa visaṃvāde dukkaṭa’’nti (mahāva. aṭṭha. 207). Tañca kho paṭissavakāle suddhacittassa pacchā visaṃvādanapaccayā hoti. Paṭhamaṃ asuddhacittassa pana paṭissave pācittiyaṃ, visaṃvādena dukkaṭanti pācittiyena saddhiṃ dukkaṭaṃ yujjati.
2627. ‘‘வஸ்ஸங் உபக³ந்த்வா பன அருணங் அனுட்டா²பெத்வா தத³ஹேவ ஸத்தாஹகரணீயேன பக்கமந்தஸ்ஸாபி அந்தோஸத்தாஹே நிவத்தந்தஸ்ஸ அனாபத்தீ’’தி (மஹாவ॰ அட்ட²॰ 207) அட்ட²கதா²வசனதோ, ‘‘கோ வாதோ³ வஸித்வா ப³ஹி க³ச்ச²தோ’’தி வக்க²மானத்தா ச ‘‘நுட்டா²பெத்வா பனாருண’’ந்தி பாடோ² க³ஹேதப்³போ³. கத்த²சி பொத்த²கேஸு ‘‘உட்டா²பெத்வா பனாருண’’ந்தி பாடோ² தி³ஸ்ஸதி, ஸோ ந க³ஹேதப்³போ³.
2627. ‘‘Vassaṃ upagantvā pana aruṇaṃ anuṭṭhāpetvā tadaheva sattāhakaraṇīyena pakkamantassāpi antosattāhe nivattantassa anāpattī’’ti (mahāva. aṭṭha. 207) aṭṭhakathāvacanato, ‘‘ko vādo vasitvā bahi gacchato’’ti vakkhamānattā ca ‘‘nuṭṭhāpetvā panāruṇa’’nti pāṭho gahetabbo. Katthaci potthakesu ‘‘uṭṭhāpetvā panāruṇa’’nti pāṭho dissati, so na gahetabbo.
2628. வஸித்வாதி த்³வீஹதீஹங் வஸித்வா. யதா² வஸ்ஸங் வஸித்வா அருணங் அனுட்டா²பெத்வாவ ஸத்தாஹகரணீயேன க³ச்ச²தோ அனாபத்தி, ததா² க³தட்டா²னதோ அந்தோஸத்தாஹே ஆக³ந்த்வா புனபி அருணங் அனுட்டா²பெத்வாவ ஸத்தாஹகரணீயேன க³ச்ச²தோ அனாபத்தி. ‘‘ஸத்தாஹவாரேன அருணோ உட்டா²பேதப்³போ³’’தி (மஹாவ॰ அட்ட²॰ 201) அட்ட²கதா²வசனங் ஸத்தமாருணேன படிப³த்³த⁴தி³வஸங் ஸத்தமேன அருணேனேவ ஸங்க³ஹெத்வா ஸத்தமஅருணப்³ப⁴ந்தரே அனாக³ந்த்வா அட்ட²மங் அருணங் ப³ஹி உட்டா²பெந்தஸ்ஸ ரத்திச்சே²த³த³ஸ்ஸனபரங், ந ஸத்தமஅருணஸ்ஸேவ தத்த² உட்டா²பேதப்³ப³பா⁴வத³ஸ்ஸனபரந்தி க³ஹேதப்³ப³ங் ஸிக்கா²பா⁴ஜனஅட்ட²கதா²ய, ஸீஹளக³ண்டி²பதே³ஸு ச ததா² வினிச்சி²தத்தா.
2628.Vasitvāti dvīhatīhaṃ vasitvā. Yathā vassaṃ vasitvā aruṇaṃ anuṭṭhāpetvāva sattāhakaraṇīyena gacchato anāpatti, tathā gataṭṭhānato antosattāhe āgantvā punapi aruṇaṃ anuṭṭhāpetvāva sattāhakaraṇīyena gacchato anāpatti. ‘‘Sattāhavārena aruṇo uṭṭhāpetabbo’’ti (mahāva. aṭṭha. 201) aṭṭhakathāvacanaṃ sattamāruṇena paṭibaddhadivasaṃ sattamena aruṇeneva saṅgahetvā sattamaaruṇabbhantare anāgantvā aṭṭhamaṃ aruṇaṃ bahi uṭṭhāpentassa ratticchedadassanaparaṃ, na sattamaaruṇasseva tattha uṭṭhāpetabbabhāvadassanaparanti gahetabbaṃ sikkhābhājanaaṭṭhakathāya, sīhaḷagaṇṭhipadesu ca tathā vinicchitattā.
2629. ‘‘நோபேதி அஸதியா’’தி பத³ச்சே²தோ³, நோபேதீதி ‘‘இமஸ்மிங் விஹாரே இமங் தேமாஸங் வஸ்ஸங் உபேமீ’’தி வசீபே⁴தே³ன ந உபக³ச்ச²தி.
2629. ‘‘Nopeti asatiyā’’ti padacchedo, nopetīti ‘‘imasmiṃ vihāre imaṃ temāsaṃ vassaṃ upemī’’ti vacībhedena na upagacchati.
2630. வுத்தமேவத்த²ங் ஸமத்தே²துமாஹ ‘‘ந தோ³ஸோ கோசி விஜ்ஜதீ’’தி.
2630. Vuttamevatthaṃ samatthetumāha ‘‘na doso koci vijjatī’’ti.
2631. ‘‘இமஸ்மிங் விஹாரே இமங் தேமாஸங் வஸ்ஸங் உபேமீ’’தி திக்க²த்துங் வசனே நிச்சா²ரிதே ஏவ வஸ்ஸங் உபக³தோ ஸியாதி யோஜனா. ‘‘நிச்சா²ரிதேவ திக்க²த்து’’ந்தி இத³ங் உக்கங்ஸவஸேன வுத்தங், ஸகிங், த்³விக்க²த்துங் வா நிச்சா²ரிதேபி வஸ்ஸூபக³தோ நாம ஹோதீதி. யதா²ஹ – ‘‘இமஸ்மிங் விஹாரே இமங் தேமாஸங் வஸ்ஸங் உபேமீதி ஸகிங் வா த்³வத்திக்க²த்துங் வா வாசங் நிச்சா²ரெத்வாவ வஸ்ஸங் உபக³ந்தப்³ப³’’ந்தி (மஹாவ॰ அட்ட²॰ 184).
2631. ‘‘Imasmiṃ vihāre imaṃ temāsaṃ vassaṃ upemī’’ti tikkhattuṃ vacane nicchārite eva vassaṃ upagato siyāti yojanā. ‘‘Nicchāriteva tikkhattu’’nti idaṃ ukkaṃsavasena vuttaṃ, sakiṃ, dvikkhattuṃ vā nicchāritepi vassūpagato nāma hotīti. Yathāha – ‘‘imasmiṃ vihāre imaṃ temāsaṃ vassaṃ upemīti sakiṃ vā dvattikkhattuṃ vā vācaṃ nicchāretvāva vassaṃ upagantabba’’nti (mahāva. aṭṭha. 184).
2632. நவமிதோ பட்டா²ய க³ந்துங் வட்டதி, ஆக³ச்ச²து வா மா வா, அனாபத்தீ’’தி (மஹாவ॰ அட்ட²॰ 207) அட்ட²கதா²நயங் த³ஸ்ஸேதுமாஹ ‘‘ஆதி³ங் து நவமிங் கத்வா’’திஆதி³. நவமிங் பபு⁴தி ஆதி³ங் கத்வா, நவமிதோ பட்டா²யாதி வுத்தங் ஹோதி. க³ந்துங் வட்டதீதி ஸத்தாஹகரணீயேனேவ க³ந்துங் வட்டதி, தஸ்மா பவாரணதி³வஸேபி தத³ஹேவ ஆக³ந்துங் அஸக்குணெய்யட்டா²னங் பவாரணத்தா²ய க³ச்ச²ந்தேன லப்³ப⁴மானேன ஸத்தாஹகரணீயேன க³ந்துங் வட்டதி. ‘‘பவாரெத்வா பன க³ந்துங் வட்டதி பவாரணாய தங்தி³வஸஸன்னிஸ்ஸிதத்தா’’தி (வஜிர॰ டீ॰ மஹாவக்³க³ 207) ஹி வஜிரபு³த்³தி⁴த்தே²ரோ. ஸோ பச்சா² ஆக³ச்ச²து வா மா வா, தோ³ஸோ ந விஜ்ஜதீதி யோஜனா.
2632. Navamito paṭṭhāya gantuṃ vaṭṭati, āgacchatu vā mā vā, anāpattī’’ti (mahāva. aṭṭha. 207) aṭṭhakathānayaṃ dassetumāha ‘‘ādiṃ tu navamiṃ katvā’’tiādi. Navamiṃ pabhuti ādiṃ katvā, navamito paṭṭhāyāti vuttaṃ hoti. Gantuṃ vaṭṭatīti sattāhakaraṇīyeneva gantuṃ vaṭṭati, tasmā pavāraṇadivasepi tadaheva āgantuṃ asakkuṇeyyaṭṭhānaṃ pavāraṇatthāya gacchantena labbhamānena sattāhakaraṇīyena gantuṃ vaṭṭati. ‘‘Pavāretvā pana gantuṃ vaṭṭati pavāraṇāya taṃdivasasannissitattā’’ti (vajira. ṭī. mahāvagga 207) hi vajirabuddhitthero. So pacchā āgacchatu vā mā vā, doso na vijjatīti yojanā.
வஸ்ஸூபனாயிகக்க²ந்த⁴ககதா²வண்ணனா.
Vassūpanāyikakkhandhakakathāvaṇṇanā.
