| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
39. வஸ்ஸூபனாயிகனித்³தே³ஸவண்ணனா
39. Vassūpanāyikaniddesavaṇṇanā
309-310. புரிமிகா பச்சி²மிகா இதி வஸ்ஸூபனாயிகா து³வேதி ஸம்ப³ந்தோ⁴. ஆஸாள்ஹிபுண்ணமாய அனந்தரே பாடிபத³தி³வஸே உபக³ந்தப்³பா³ பச்சி²மிகாய புரே ப⁴வாதி புரிமா, ஸா ஏவ புரிமிகா. ததோ பச்சா² ப⁴வா அபராய புண்ணமாய அனந்தரே பாடிபத³தி³வஸே உபக³ந்தப்³பா³ பச்சி²மிகா. உபனயனங் பாபுணனங் உபக³மனங் உபனாயிகா, வஸ்ஸந்தி வுட்டி², இத⁴ பன வஸ்ஸகாலங் ‘‘வஸ்ஸ’’ந்தி உபசாரேன க³ஹெத்வா தத்த² வாஸோ உபசாரேனேவ ‘‘வஸ்ஸ’’ந்தி வுச்சதி, வஸ்ஸஸ்ஸ வஸ்ஸாவாஸஸ்ஸ உபனாயிகா வசீபே⁴த³வஸேன வா ஆலயகரணவஸேன வா உபக³மனங் வஸ்ஸூபனாயிகா. தத்த² ஆலயபரிக்³கா³ஹோ ச வசீபே⁴தோ³ சாதி புரிமிகா வஸ்ஸூபனாயிகா து³வே, ஆலயபரிக்³கா³ஹோ ச வசீபே⁴தோ³ சாதி பச்சி²மிகா வஸ்ஸூபனாயிகா து³வேபி⁴ ஸம்ப³ந்தி⁴தப்³ப³ங். தத்தா²தி தாஸு த்³வீஸு. தது³ப⁴யங் த³ஸ்ஸேதுங் ‘‘ஏதி³ஸோ’’திஆதி³ வுத்தங். ஸோ ஆலயபரிக்³கா³ஹோ ச வசீபே⁴தோ³ ச ‘‘இமஸ்மிங் விஹாரே இமங் தேமாஸங் வஸ்ஸங் உபேமி, இத⁴ வஸ்ஸங் உபேமீ’’தி ஏதி³ஸோ, ஏதாதி³ஸோதி அத்தோ². எத்த² ச கமுப்பத்திஅனாத³ரா வசீபே⁴தோ³ பட²மங் வுத்தோ. உப⁴யதா² வஸ்ஸங் உபக³ந்துங் வட்டதி. தேனேவ அட்ட²கதா²யங் (வி॰ ஸங்க³॰ அட்ட²॰ 179; மஹாவ॰ அட்ட²॰ 207) ‘‘ஸசேபி ‘இத⁴ வஸ்ஸங் வஸிஸ்ஸாமீ’தி ஆலயோ அத்தி², அஸதியா பன வஸ்ஸங் ந உபேதி, க³ஹிதஸேனாஸனங் ஸுக்³க³ஹிதங், சி²ன்னவஸ்ஸோ ந ஹோதி, பவாரேதுங் லப⁴தியேவ, வினாபி ஹி வசீபே⁴த³ங் ஆலயகரணமத்தேனபி வஸ்ஸங் உபக³தமேவ ஹோதீ’’தி வுத்தங். நாவாஸத்த²வஜேஸு பன பரியேஸித்வா ஸேனாஸனங் அலப⁴ந்தேன ஆலயகரணமத்தேனேவ உபக³ந்தப்³ப³ங். உபக³ச்ச²ந்தேன ச விஹாரங் படிஜக்³கி³த்வா பானீயங் பரிபோ⁴ஜனீயங் உபட்டா²பெத்வா ஸப்³ப³ங் சேதியவந்த³னாதி³ஸாமீசிகம்மங் நிட்டா²பெத்வா உபக³ந்தப்³ப³ங். ஆலயபரிக்³க³ஹே ஆலயங் த³ஸ்ஸேதுங் ‘‘சித்துப்பாதெ³த்த² ஆலயோ’’தி ஆஹ. எத்தா²தி த்³வீஸு.
309-310. Purimikā pacchimikā iti vassūpanāyikā duveti sambandho. Āsāḷhipuṇṇamāya anantare pāṭipadadivase upagantabbā pacchimikāya pure bhavāti purimā, sā eva purimikā. Tato pacchā bhavā aparāya puṇṇamāya anantare pāṭipadadivase upagantabbā pacchimikā. Upanayanaṃ pāpuṇanaṃ upagamanaṃ upanāyikā, vassanti vuṭṭhi, idha pana vassakālaṃ ‘‘vassa’’nti upacārena gahetvā tattha vāso upacāreneva ‘‘vassa’’nti vuccati, vassassa vassāvāsassa upanāyikā vacībhedavasena vā ālayakaraṇavasena vā upagamanaṃ vassūpanāyikā. Tattha ālayapariggāho ca vacībhedo cāti purimikā vassūpanāyikā duve, ālayapariggāho ca vacībhedo cāti pacchimikā vassūpanāyikā duvebhi sambandhitabbaṃ. Tatthāti tāsu dvīsu. Tadubhayaṃ dassetuṃ ‘‘ediso’’tiādi vuttaṃ. So ālayapariggāho ca vacībhedo ca ‘‘imasmiṃ vihāre imaṃ temāsaṃ vassaṃ upemi, idha vassaṃ upemī’’ti ediso, etādisoti attho. Ettha ca kamuppattianādarā vacībhedo paṭhamaṃ vutto. Ubhayathā vassaṃ upagantuṃ vaṭṭati. Teneva aṭṭhakathāyaṃ (vi. saṅga. aṭṭha. 179; mahāva. aṭṭha. 207) ‘‘sacepi ‘idha vassaṃ vasissāmī’ti ālayo atthi, asatiyā pana vassaṃ na upeti, gahitasenāsanaṃ suggahitaṃ, chinnavasso na hoti, pavāretuṃ labhatiyeva, vināpi hi vacībhedaṃ ālayakaraṇamattenapi vassaṃ upagatameva hotī’’ti vuttaṃ. Nāvāsatthavajesu pana pariyesitvā senāsanaṃ alabhantena ālayakaraṇamatteneva upagantabbaṃ. Upagacchantena ca vihāraṃ paṭijaggitvā pānīyaṃ paribhojanīyaṃ upaṭṭhāpetvā sabbaṃ cetiyavandanādisāmīcikammaṃ niṭṭhāpetvā upagantabbaṃ. Ālayapariggahe ālayaṃ dassetuṃ ‘‘cittuppādettha ālayo’’ti āha. Etthāti dvīsu.
311. தத³ஹூதி தஸ்மிங் வஸ்ஸூபனாயிகதி³வஸே. ஜானந்தி ‘‘அஜ்ஜ வஸ்ஸூபனாயிகா’’தி ஜானந்தோ, அனுபக³ச்ச²தோதிமஸ்ஸ விஸேஸனங்.
311.Tadahūti tasmiṃ vassūpanāyikadivase. Jānanti ‘‘ajja vassūpanāyikā’’ti jānanto, anupagacchatotimassa visesanaṃ.
312. து³தியந்தி பச்சி²மிகங். அனுபக³தோதி கேனசி அந்தராயேன புரிமிகங் அனுபக³தோ. தேமாஸந்தி புரிமங் வா தேமாஸங் பச்சி²மங் வா தேமாஸங். வஸ்ஸங் உபக³ந்த்வா பன அருணங் அனுட்டா²பெத்வாபி தத³ஹேவ ஸத்தாஹகரணீயேன பக்கமந்தஸ்ஸாபி அந்தோஸத்தாஹே நிவத்தெந்தஸ்ஸாபி அனாபத்தி.
312.Dutiyanti pacchimikaṃ. Anupagatoti kenaci antarāyena purimikaṃ anupagato. Temāsanti purimaṃ vā temāsaṃ pacchimaṃ vā temāsaṃ. Vassaṃ upagantvā pana aruṇaṃ anuṭṭhāpetvāpi tadaheva sattāhakaraṇīyena pakkamantassāpi antosattāhe nivattentassāpi anāpatti.
313-5. மாதாபிதூனங் பஞ்சன்னங் ஸஹத⁴ம்மிகானஞ்ச அத்தா²ய கி³லானதது³பட்டா²கப⁴த்தங் ஓஸத⁴ஞ்ச ஏஸிஸ்ஸங் வா புச்சி²ஸ்ஸாமி வா உபட்டி²ஸ்ஸங் வா க³ந்த்வா அஹங் நாபி⁴ரதங் வூபகாஸெஸ்ஸங் வா குக்குச்சங் வினோத³னஞ்ச தி³ட்டி²ங் விவேசனஞ்ச க³ருகாதி³கங் வுட்டா²னங் வாபி உஸ்ஸுக்கங் வாபி கரிஸ்ஸங் வாபி காரெஸ்ஸங் வாபீதி ஏவமாதி³னா ஸத்தாஹகிச்சேன பஹிதேபி வா அபஹிதேபி வா க³ந்துங் லப்³ப⁴ந்தி யோஜனா.
313-5. Mātāpitūnaṃ pañcannaṃ sahadhammikānañca atthāya gilānatadupaṭṭhākabhattaṃ osadhañca esissaṃ vā pucchissāmi vā upaṭṭhissaṃ vā gantvā ahaṃ nābhirataṃ vūpakāsessaṃ vā kukkuccaṃ vinodanañca diṭṭhiṃ vivecanañca garukādikaṃ vuṭṭhānaṃ vāpi ussukkaṃ vāpi karissaṃ vāpi kāressaṃ vāpīti evamādinā sattāhakiccena pahitepi vā apahitepi vā gantuṃ labbhanti yojanā.
எத்த² பன லப்³ப⁴மானகவஸேன யோஜெத்வா வக்க²மானநயேன அத்தோ² வேதி³தப்³போ³. மாதாதி³ஸுதியா தேயேவ கி³லான-ஸத்³தே³ன க³ய்ஹந்தி, தேஸங் உபட்டா²கா தது³பட்டா²கா, கி³லானா ச தது³பட்டா²கா ச, தேஸங் ப⁴த்தந்தி ஸமாஸோ. ஓஸத⁴ந்தி தேஸங்யேவ கி³லானானங் பே⁴ஸஜ்ஜங். ஏஸிஸ்ஸந்தி பரியேஸிஸ்ஸாமி. புச்சி²ஸ்ஸாமீதி தேயேவ ஸத்தஜனே கி³லானே புச்சி²ஸ்ஸங். உபட்டி²ஸ்ஸந்தி தேயேவ கி³லானே உபட்ட²ஹிஸ்ஸாமி. அபி⁴ரமதீதி அபி⁴ரதோ, விஸபா⁴க³ரூபாதி³த³ஸ்ஸனேன ஸாஸனே ந அபி⁴ரதோ நாபி⁴ரதோ. அபி⁴ரமணங் வா அபி⁴ரதங், நத்தி² அபி⁴ரதமஸ்ஸாதி நாபி⁴ரதோ, தங். ஸஹத⁴ம்மிகேஸு யோ நாபி⁴ரதோ, தங் வூபகாஸெஸ்ஸங் விக்கே²பஹரணத்த²ங் அஞ்ஞத்த² நயிஸ்ஸாமி. குக்குச்சந்தி பஞ்சன்னங்யேவ உப்பன்னங் வினயகுக்குச்சங். கிதகயோகே³ விகப்பேன து³தியா. தி³ட்டி²ந்தி தேஸங்யேவ மிச்சா²தி³ட்டி²யா. க³ருகமாதி³கந்தி க³ருகங் ஆதி³ யஸ்ஸாதி விக்³க³ஹோ. ஆதி³-ஸத்³தே³ன ஸாமணேரானங் வஸ்ஸபுச்ச²னங், ஸிக்கா²ஸமாத³யிதுகாமதா, தஜ்ஜனீயாதி³கம்மகரணங் ஸங்க³ஹிதங். வுட்டா²னந்தி பி⁴க்கு²னோ க³ருகாபத்தியா பரிவாஸமானத்ததா³னாதீ³ஹி வுட்டா²னங். உஸ்ஸுக்கந்தி வஸ்ஸபுச்ச²னாதி³உஸ்ஸுக்கங். ஏவமாதி³னாதி எத்த² ஆதி³-ஸத்³தே³ன தி³ட்டி²க³தாதீ³னங் த⁴ம்மகதா²கரணாதி³ங் ஸங்க³ண்ஹாதி. க³ந்துங் லப்³ப⁴ந்தி எத்த² க³ச்ச²ந்தேன அந்தோஉபசாரஸீமாயங் டி²தேனேவ ‘‘அந்தோஸத்தாஹே ஆக³ச்சி²ஸ்ஸாமீ’’தி ஆபோ⁴க³ங் கத்வா க³ந்தப்³ப³ங். ஸசே ஆபோ⁴க³ங் அகத்வா உபசாரஸீமங் அதிக்கமதி, சி²ன்னவஸ்ஸோ ஹோதீதி வத³ந்தி. ஸத்தாஹகிச்சேனாதி ஸத்தாஹஸ்ஸ லப்³ப⁴மானகங் வுத்தங் வக்க²மானஞ்ச ஸங்க⁴கம்மாதி³ கிச்சங் ஸத்தாஹகிச்சங். ஸத்தமஅருணமத்தஸ்ஸேவ விஹாரே உட்டா²பனீயத்தா ஸத்தாஹஸ்ஸ ஸாகல்லேன க³ஹணங்.
Ettha pana labbhamānakavasena yojetvā vakkhamānanayena attho veditabbo. Mātādisutiyā teyeva gilāna-saddena gayhanti, tesaṃ upaṭṭhākā tadupaṭṭhākā, gilānā ca tadupaṭṭhākā ca, tesaṃ bhattanti samāso. Osadhanti tesaṃyeva gilānānaṃ bhesajjaṃ. Esissanti pariyesissāmi. Pucchissāmīti teyeva sattajane gilāne pucchissaṃ. Upaṭṭhissanti teyeva gilāne upaṭṭhahissāmi. Abhiramatīti abhirato, visabhāgarūpādidassanena sāsane na abhirato nābhirato. Abhiramaṇaṃ vā abhirataṃ, natthi abhiratamassāti nābhirato, taṃ. Sahadhammikesu yo nābhirato, taṃ vūpakāsessaṃ vikkhepaharaṇatthaṃ aññattha nayissāmi. Kukkuccanti pañcannaṃyeva uppannaṃ vinayakukkuccaṃ. Kitakayoge vikappena dutiyā. Diṭṭhinti tesaṃyeva micchādiṭṭhiyā. Garukamādikanti garukaṃ ādi yassāti viggaho. Ādi-saddena sāmaṇerānaṃ vassapucchanaṃ, sikkhāsamādayitukāmatā, tajjanīyādikammakaraṇaṃ saṅgahitaṃ. Vuṭṭhānanti bhikkhuno garukāpattiyā parivāsamānattadānādīhi vuṭṭhānaṃ. Ussukkanti vassapucchanādiussukkaṃ. Evamādināti ettha ādi-saddena diṭṭhigatādīnaṃ dhammakathākaraṇādiṃ saṅgaṇhāti. Gantuṃ labbhanti ettha gacchantena antoupacārasīmāyaṃ ṭhiteneva ‘‘antosattāhe āgacchissāmī’’ti ābhogaṃ katvā gantabbaṃ. Sace ābhogaṃ akatvā upacārasīmaṃ atikkamati, chinnavasso hotīti vadanti. Sattāhakiccenāti sattāhassa labbhamānakaṃ vuttaṃ vakkhamānañca saṅghakammādi kiccaṃ sattāhakiccaṃ. Sattamaaruṇamattasseva vihāre uṭṭhāpanīyattā sattāhassa sākallena gahaṇaṃ.
316. ஸங்க⁴கம்மே வஜேதி ஸங்க⁴ஸ்ஸ கிச்சே உபோஸதா²கா³ராதீ³ஸு ஸேனாஸனேஸு வா சேதியச²த்தவேதி³காதீ³ஸு வா அந்தமஸோ புக்³க³லிகஸேனாஸனேஸு வாபி கத்தப்³ப³னிமித்தே வஜெய்யாதி அத்தோ². த⁴ம்மஸவனத்த²ங் நிமந்திதோ வாபி வஜே, க³ரூஹி பேஸிதோ வாபி வஜே, க³ரூனங் பஸ்ஸிதுங் வாபி வஜேதி யோஜேதப்³ப³ங். நிமந்திதோதி எத்த² ஸசே பட²மங்யேவ கதிகா கதா ஹோதி, ‘‘அஸுகதி³வஸங் நாம ஸன்னிபதிதப்³ப³’’ந்தி நிமந்திதோயேவ நாம ஹோதி. க³ரூஹீதி ஆசரியுபஜ்ஜா²யேஹி. பஹிதோதி ப⁴ண்ட³தோ⁴வனாதி³அத்தா²ய பேஸிதோ. பஸ்ஸிதுந்தி அகி³லானேபி.
316.Saṅghakamme vajeti saṅghassa kicce uposathāgārādīsu senāsanesu vā cetiyachattavedikādīsu vā antamaso puggalikasenāsanesu vāpi kattabbanimitte vajeyyāti attho. Dhammasavanatthaṃ nimantito vāpi vaje, garūhi pesito vāpi vaje, garūnaṃ passituṃ vāpi vajeti yojetabbaṃ. Nimantitoti ettha sace paṭhamaṃyeva katikā katā hoti, ‘‘asukadivasaṃ nāma sannipatitabba’’nti nimantitoyeva nāma hoti. Garūhīti ācariyupajjhāyehi. Pahitoti bhaṇḍadhovanādiatthāya pesito. Passitunti agilānepi.
317. ப⁴ண்ட³…பே॰… த³ஸ்ஸனே ந வஜேதி யோஜனீயங். எத்தா²பி நிமித்தத்தே² ஸத்தமீ. ப⁴ண்ட³ங் நாம சீவரங். ஞாதீ மாதாபிதூஹி அஞ்ஞே. உபட்டா²கா உபாஸகா. ‘‘அஜ்ஜேவ ஆக³மிஸ்ஸ’’ந்தி அதூ³ரகோ³ ந பாபுணெய்ய, லப்³ப⁴ந்தி ஸம்ப³ந்தோ⁴. லப்³ப⁴ந்தி இமஸ்ஸ அபாபுணனங் வுத்தகம்மங். அஜ்ஜேவாக³மிஸ்ஸந்தி ஸாமந்தவிஹாரங் க³ந்த்வா புன ஆக³ச்ச²ந்தஸ்ஸ அந்தராமக்³கே³ ஸசே அருணுக்³க³மனங் ஹோதி, வஸ்ஸச்சே²தோ³பி ந ஹோதி, ரத்திச்சே²த³து³க்கடஞ்ச நத்தீ²தி வத³ந்தி.
317. Bhaṇḍa…pe… dassane na vajeti yojanīyaṃ. Etthāpi nimittatthe sattamī. Bhaṇḍaṃ nāma cīvaraṃ. Ñātī mātāpitūhi aññe. Upaṭṭhākā upāsakā. ‘‘Ajjeva āgamissa’’nti adūrago na pāpuṇeyya, labbhanti sambandho. Labbhanti imassa apāpuṇanaṃ vuttakammaṃ. Ajjevāgamissanti sāmantavihāraṃ gantvā puna āgacchantassa antarāmagge sace aruṇuggamanaṃ hoti, vassacchedopi na hoti, ratticchedadukkaṭañca natthīti vadanti.
318. ஸேஸஞாதீஹீதி மாதாபிதூஹி அவஸேஸஞாதீஹி. நித்³தி³ஸித்வாவாதி தா³னத⁴ம்மஸவனாதீ³னி. ‘‘பஹிதே பேஸிதே’’தி செத்த² ‘‘லப்³ப⁴’’ந்தி அனுவத்தனீயங்.
318.Sesañātīhīti mātāpitūhi avasesañātīhi. Niddisitvāvāti dānadhammasavanādīni. ‘‘Pahite pesite’’ti cettha ‘‘labbha’’nti anuvattanīyaṃ.
319. அத்தனோ அந்தராயே ஸதீதி சோரஸரீஸபவாளஜீவிதப்³ரஹ்மசரியந்தராயே, அந்தமஸோ பே⁴ஸஜ்ஜாலாப⁴பதிரூபஉபட்டா²காலாபே⁴பி. ‘‘வஸ்ஸச்சே²த³காரணம்பி ஸத்தாஹகரணீயங் ஸியா’’தி கேசி போராணா வத³ந்தி, தங் யுத்தங் விய தி³ஸ்ஸதி, ஸப்³ப³தா² வஸ்ஸச்சே²தே³ன ப³ஹி வாஸாய அனுஞ்ஞாதகாரணங் ஸத்தாஹமத்தங் ப³ஹி வீதினாமெத்வா அந்தோவிஹாரேயேவ வாஸேன வஸ்ஸச்சே²தா³காரணங் கத²ங் நாம ந ஸியாதி. சி²ன்னவஸ்ஸோ நோ பவாரயேதி ஸம்ப³ந்தோ⁴.
319.Attano antarāye satīti corasarīsapavāḷajīvitabrahmacariyantarāye, antamaso bhesajjālābhapatirūpaupaṭṭhākālābhepi. ‘‘Vassacchedakāraṇampi sattāhakaraṇīyaṃ siyā’’ti keci porāṇā vadanti, taṃ yuttaṃ viya dissati, sabbathā vassacchedena bahi vāsāya anuññātakāraṇaṃ sattāhamattaṃ bahi vītināmetvā antovihāreyeva vāsena vassacchedākāraṇaṃ kathaṃ nāma na siyāti. Chinnavasso no pavārayeti sambandho.
320. ‘‘அஸேனாஸனிகேனா’’தி இமினாவ விஞ்ஞாயமானத்த²த்தேபி ‘‘அஜ்ஜோ²காஸே சா’’தி வசனங் ‘‘அஹங் அப்³போ⁴காஸிகோ, கிங் மே ஸேனாஸனேனா’’தி வாஸானிவத்தனத்த²ங் வுத்தங். ருக்க²ஸ்ஸ ஸுஸிரேதி ஸுத்³தே⁴ ருக்க²ஸுஸிரே. மஹந்தஸ்ஸ பன ஸுஸிரஸ்ஸ அந்தோ பத³ரச்ச²த³னகுடிகங் கத்வா பவிஸனத்³வாரங் யோஜெத்வா உபக³ந்துங் வட்டதி. ‘‘விடபேபி அட்டகங் ப³ந்தி⁴த்வா’’திஆதி³ வுத்தனயமேவ. ததா² ச²த்தசாடீஸுபி தத³னுரூபேன வேதி³தப்³ப³ங். ச²வகுடி நாம டங்கிதமஞ்சாதி³பே⁴தா³ குடி. தத்த² டங்கிதமஞ்சோ நாம தீ³கே⁴ மஞ்சபாதே³ மஜ்ஜே² விஜ்ஜி²த்வா அடனியோ பவேஸெத்வா கதோ, சதுன்னங் பாஸாணானங் உபரி பாஸாணங் அத்த²ரித்வா கதம்பி டங்கிதமஞ்சோ.
320. ‘‘Asenāsanikenā’’ti imināva viññāyamānatthattepi ‘‘ajjhokāse cā’’ti vacanaṃ ‘‘ahaṃ abbhokāsiko, kiṃ me senāsanenā’’ti vāsānivattanatthaṃ vuttaṃ. Rukkhassa susireti suddhe rukkhasusire. Mahantassa pana susirassa anto padaracchadanakuṭikaṃ katvā pavisanadvāraṃ yojetvā upagantuṃ vaṭṭati. ‘‘Viṭapepi aṭṭakaṃ bandhitvā’’tiādi vuttanayameva. Tathā chattacāṭīsupi tadanurūpena veditabbaṃ. Chavakuṭi nāma ṭaṅkitamañcādibhedā kuṭi. Tattha ṭaṅkitamañco nāma dīghe mañcapāde majjhe vijjhitvā aṭaniyo pavesetvā kato, catunnaṃ pāsāṇānaṃ upari pāsāṇaṃ attharitvā katampi ṭaṅkitamañco.
321. அஸேனாஸனிகேனாதி யஸ்ஸ திணபண்ணஇட்ட²கஸிலாஸுதா⁴ஸங்கா²தானங் பஞ்சன்னங் ச²த³னானங் அஞ்ஞதரேன ச²ன்னங் யோஜிதத்³வாரப³ந்த⁴னங் ஸேனாஸனங் நத்தி², தேன. இத³ங் பன வசீபே⁴த³ங் கத்வா அதி⁴ட்டா²னங் ஸந்தா⁴ய வுத்தந்தி வத³ந்தி, தத³யுத்தங், ததா² ச ஸதி நாவாதீ³ஸு விய விஸுங் விதா⁴னேன ப⁴விதப்³ப³ந்தி. நாவாஸத்த²வஜூபகோ³தி இமினா அஸேனாஸனிகேன நாவாதீ³ஸு வஸ்ஸங் உபக³ந்துங் வட்டதீதி தீ³பேதி. தத்த² ச குடிகங் பரியேஸித்வா லப⁴ந்தேன தத்த² பவிஸித்வா விஹாராபா⁴வதோ ‘‘விஹாரே’’தி அவத்வா ‘‘இத⁴ வஸ்ஸங் உபேமீ’’தி திக்க²த்துங் வத்தப்³ப³ங், அலப⁴ந்தேன ஆலயோ காதப்³போ³. பவாரேதுஞ்சாதி ச-ஸத்³தே³ன வஸ்ஸச்சே²த³னிமித்தாய ஆபத்தியா அபா⁴வங் ஸம்பிண்டே³தி. ‘‘வஜே ஸத்தே² நாவாயந்தி தீஸு டா²னேஸு நத்தி² வஸ்ஸச்சே²தே³ ஆபத்தி, பவாரேதுஞ்ச லப்³ப⁴தீ’’தி (மஹாவ॰ அட்ட²॰ 203) அட்ட²கதா²யங் வுத்தங். வஸ்ஸச்சே²தே³தி ச ‘‘அனுஜானாமி, பி⁴க்க²வே, யேன வஜோ தேன க³ந்து’’ந்தி (மஹாவ॰ 203) வுத்தத்தா, ஸத்த²ஸ்ஸ நாவாய ச க³மனஸபா⁴வேனேவ டி²தத்தா ச வஸ்ஸூபக³தட்டா²னே அவஸித்வா அஞ்ஞத்த² க³மனமத்தங் ஸந்தா⁴ய வுத்தந்தி வேதி³தப்³ப³ங்.
321.Asenāsanikenāti yassa tiṇapaṇṇaiṭṭhakasilāsudhāsaṅkhātānaṃ pañcannaṃ chadanānaṃ aññatarena channaṃ yojitadvārabandhanaṃ senāsanaṃ natthi, tena. Idaṃ pana vacībhedaṃ katvā adhiṭṭhānaṃ sandhāya vuttanti vadanti, tadayuttaṃ, tathā ca sati nāvādīsu viya visuṃ vidhānena bhavitabbanti. Nāvāsatthavajūpagoti iminā asenāsanikena nāvādīsu vassaṃ upagantuṃ vaṭṭatīti dīpeti. Tattha ca kuṭikaṃ pariyesitvā labhantena tattha pavisitvā vihārābhāvato ‘‘vihāre’’ti avatvā ‘‘idha vassaṃ upemī’’ti tikkhattuṃ vattabbaṃ, alabhantena ālayo kātabbo. Pavāretuñcāti ca-saddena vassacchedanimittāya āpattiyā abhāvaṃ sampiṇḍeti. ‘‘Vaje satthe nāvāyanti tīsu ṭhānesu natthi vassacchede āpatti, pavāretuñca labbhatī’’ti (mahāva. aṭṭha. 203) aṭṭhakathāyaṃ vuttaṃ. Vassacchedeti ca ‘‘anujānāmi, bhikkhave, yena vajo tena gantu’’nti (mahāva. 203) vuttattā, satthassa nāvāya ca gamanasabhāveneva ṭhitattā ca vassūpagataṭṭhāne avasitvā aññattha gamanamattaṃ sandhāya vuttanti veditabbaṃ.
வஸ்ஸூபனாயிகனித்³தே³ஸவண்ணனா நிட்டி²தா.
Vassūpanāyikaniddesavaṇṇanā niṭṭhitā.
