| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
3. வஸ்ஸூபனாயிகக்க²ந்த⁴கோ
3. Vassūpanāyikakkhandhako
107. வஸ்ஸூபனாயிகானுஜானநா
107. Vassūpanāyikānujānanā
184. தேன ஸமயேன பு³த்³தோ⁴ ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ப⁴க³வதா பி⁴க்கூ²னங் வஸ்ஸாவாஸோ அபஞ்ஞத்தோ ஹோதி. தேஇத⁴ பி⁴க்கூ² ஹேமந்தம்பி கி³ம்ஹம்பி வஸ்ஸம்பி சாரிகங் சரந்தி. மனுஸ்ஸா உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகங் சரிஸ்ஸந்தி, ஹரிதானி திணானி ஸம்மத்³த³ந்தா, ஏகிந்த்³ரியங் ஜீவங் விஹேடெ²ந்தா, ப³ஹூ கு²த்³த³கே பாணே ஸங்கா⁴தங் ஆபாதெ³ந்தா. இமே ஹி நாம அஞ்ஞதித்தி²யா து³ரக்கா²தத⁴ம்மா வஸ்ஸாவாஸங் அல்லீயிஸ்ஸந்தி ஸங்கஸாயிஸ்ஸந்தி. இமே ஹி நாம ஸகுந்தகா ருக்க²க்³கே³ஸு குலாவகானி கரித்வா வஸ்ஸாவாஸங் அல்லீயிஸ்ஸந்தி ஸங்கஸாயிஸ்ஸந்தி 1. இமே பன ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகங் சரந்தி, ஹரிதானி திணானி ஸம்மத்³த³ந்தா, ஏகிந்த்³ரியங் ஜீவங் விஹேடெ²ந்தா, ப³ஹூ கு²த்³த³கே பாணே ஸங்கா⁴தங் ஆபாதெ³ந்தா’’தி. அஸ்ஸோஸுங் கோ² பி⁴க்கூ² தேஸங் மனுஸ்ஸானங் உஜ்ஜா²யந்தானங் கி²ய்யந்தானங் விபாசெந்தானங். அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘அனுஜானாமி, பி⁴க்க²வே, வஸ்ஸங் உபக³ந்து’’ந்தி. அத² கோ² பி⁴க்கூ²னங் ஏதத³ஹோஸி – ‘‘கதா³ நு கோ² வஸ்ஸங் உபக³ந்தப்³ப³’’ந்தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, வஸ்ஸானே வஸ்ஸங் உபக³ந்துந்தி.
184. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhagavatā bhikkhūnaṃ vassāvāso apaññatto hoti. Teidha bhikkhū hemantampi gimhampi vassampi cārikaṃ caranti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hemantampi gimhampi vassampi cārikaṃ carissanti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā. Ime hi nāma aññatitthiyā durakkhātadhammā vassāvāsaṃ allīyissanti saṅkasāyissanti. Ime hi nāma sakuntakā rukkhaggesu kulāvakāni karitvā vassāvāsaṃ allīyissanti saṅkasāyissanti 2. Ime pana samaṇā sakyaputtiyā hemantampi gimhampi vassampi cārikaṃ caranti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, vassaṃ upagantu’’nti. Atha kho bhikkhūnaṃ etadahosi – ‘‘kadā nu kho vassaṃ upagantabba’’nti? Bhagavato etamatthaṃ ārocesuṃ. Anujānāmi, bhikkhave, vassāne vassaṃ upagantunti.
அத² கோ² பி⁴க்கூ²னங் ஏதத³ஹோஸி – ‘‘கதி நு கோ² வஸ்ஸூபனாயிகா’’தி? ப⁴க³வதோ ஏதமத்த²ங்
Atha kho bhikkhūnaṃ etadahosi – ‘‘kati nu kho vassūpanāyikā’’ti? Bhagavato etamatthaṃ
ஆரோசேஸுங். த்³வேமா, பி⁴க்க²வே, வஸ்ஸூபனாயிகா – புரிமிகா, பச்சி²மிகா. அபரஜ்ஜுக³தாய ஆஸாள்ஹியா புரிமிகா உபக³ந்தப்³பா³, மாஸக³தாய ஆஸாள்ஹியா பச்சி²மிகா உபக³ந்தப்³பா³ – இமா கோ², பி⁴க்க²வே, த்³வே வஸ்ஸூபனாயிகாதி.
Ārocesuṃ. Dvemā, bhikkhave, vassūpanāyikā – purimikā, pacchimikā. Aparajjugatāya āsāḷhiyā purimikā upagantabbā, māsagatāya āsāḷhiyā pacchimikā upagantabbā – imā kho, bhikkhave, dve vassūpanāyikāti.
வஸ்ஸூபனாயிகானுஜானநா நிட்டி²தா.
Vassūpanāyikānujānanā niṭṭhitā.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / வஸ்ஸூபனாயிகானுஜானநகதா² • Vassūpanāyikānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வஸ்ஸூபனாயிகானுஜானநகதா²வண்ணனா • Vassūpanāyikānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / வஸ்ஸூபனாயிகானுஜானநகதா²வண்ணனா • Vassūpanāyikānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / வஸ்ஸூபனாயிகஅனுஜானநகதா²தி³வண்ணனா • Vassūpanāyikaanujānanakathādivaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 107. வஸ்ஸூபனாயிகானுஜானநகதா² • 107. Vassūpanāyikānujānanakathā
