| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၃. ဝသ္သူပနာယိကက္ခန္ဓကော
3. Vassūpanāyikakkhandhako
၁၀၇. ဝသ္သူပနာယိကာနုဇာနနာ
107. Vassūpanāyikānujānanā
၁၈၄. တေန သမယေန ဗုဒ္ဓော ဘဂဝာ ရာဇဂဟေ ဝိဟရတိ ဝေဠုဝနေ ကလန္ဒကနိဝာပေ။ တေန ခော ပန သမယေန ဘဂဝတာ ဘိက္ခူနံ ဝသ္သာဝာသော အပညတ္တော ဟောတိ။ တေဣဓ ဘိက္ခူ ဟေမန္တမ္ပိ ဂိမ္ဟမ္ပိ ဝသ္သမ္ပိ စာရိကံ စရန္တိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ ဟေမန္တမ္ပိ ဂိမ္ဟမ္ပိ ဝသ္သမ္ပိ စာရိကံ စရိသ္သန္တိ, ဟရိတာနိ တိဏာနိ သမ္မဒ္ဒန္တာ, ဧကိန္ဒ္ရိယံ ဇီဝံ ဝိဟေဌေန္တာ, ဗဟူ ခုဒ္ဒကေ ပာဏေ သင္ဃာတံ အာပာဒေန္တာ။ ဣမေ ဟိ နာမ အညတိတ္ထိယာ ဒုရက္ခာတဓမ္မာ ဝသ္သာဝာသံ အလ္လီယိသ္သန္တိ သင္ကသာယိသ္သန္တိ။ ဣမေ ဟိ နာမ သကုန္တကာ ရုက္ခဂ္ဂေသု ကုလာဝကာနိ ကရိတ္ဝာ ဝသ္သာဝာသံ အလ္လီယိသ္သန္တိ သင္ကသာယိသ္သန္တိ 1။ ဣမေ ပန သမဏာ သက္ယပုတ္တိယာ ဟေမန္တမ္ပိ ဂိမ္ဟမ္ပိ ဝသ္သမ္ပိ စာရိကံ စရန္တိ, ဟရိတာနိ တိဏာနိ သမ္မဒ္ဒန္တာ, ဧကိန္ဒ္ရိယံ ဇီဝံ ဝိဟေဌေန္တာ, ဗဟူ ခုဒ္ဒကေ ပာဏေ သင္ဃာတံ အာပာဒေန္တာ’’တိ။ အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, ဝသ္သံ ဥပဂန္တု’’န္တိ။ အထ ခော ဘိက္ခူနံ ဧတဒဟောသိ – ‘‘ကဒာ နု ခော ဝသ္သံ ဥပဂန္တဗ္ဗ’’န္တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, ဝသ္သာနေ ဝသ္သံ ဥပဂန္တုန္တိ။
184. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhagavatā bhikkhūnaṃ vassāvāso apaññatto hoti. Teidha bhikkhū hemantampi gimhampi vassampi cārikaṃ caranti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hemantampi gimhampi vassampi cārikaṃ carissanti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā. Ime hi nāma aññatitthiyā durakkhātadhammā vassāvāsaṃ allīyissanti saṅkasāyissanti. Ime hi nāma sakuntakā rukkhaggesu kulāvakāni karitvā vassāvāsaṃ allīyissanti saṅkasāyissanti 2. Ime pana samaṇā sakyaputtiyā hemantampi gimhampi vassampi cārikaṃ caranti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, vassaṃ upagantu’’nti. Atha kho bhikkhūnaṃ etadahosi – ‘‘kadā nu kho vassaṃ upagantabba’’nti? Bhagavato etamatthaṃ ārocesuṃ. Anujānāmi, bhikkhave, vassāne vassaṃ upagantunti.
အထ ခော ဘိက္ခူနံ ဧတဒဟောသိ – ‘‘ကတိ နု ခော ဝသ္သူပနာယိကာ’’တိ? ဘဂဝတော ဧတမတ္ထံ
Atha kho bhikkhūnaṃ etadahosi – ‘‘kati nu kho vassūpanāyikā’’ti? Bhagavato etamatthaṃ
အာရောစေသုံ။ ဒ္ဝေမာ, ဘိက္ခဝေ, ဝသ္သူပနာယိကာ – ပုရိမိကာ, ပစ္ဆိမိကာ။ အပရဇ္ဇုဂတာယ အာသာဠ္ဟိယာ ပုရိမိကာ ဥပဂန္တဗ္ဗာ, မာသဂတာယ အာသာဠ္ဟိယာ ပစ္ဆိမိကာ ဥပဂန္တဗ္ဗာ – ဣမာ ခော, ဘိက္ခဝေ, ဒ္ဝေ ဝသ္သူပနာယိကာတိ။
Ārocesuṃ. Dvemā, bhikkhave, vassūpanāyikā – purimikā, pacchimikā. Aparajjugatāya āsāḷhiyā purimikā upagantabbā, māsagatāya āsāḷhiyā pacchimikā upagantabbā – imā kho, bhikkhave, dve vassūpanāyikāti.
ဝသ္သူပနာယိကာနုဇာနနာ နိဋ္ဌိတာ။
Vassūpanāyikānujānanā niṭṭhitā.
Footnotes:
Related texts:
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ဝသ္သူပနာယိကာနုဇာနနကထာ • Vassūpanāyikānujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဝသ္သူပနာယိကာနုဇာနနကထာဝဏ္ဏနာ • Vassūpanāyikānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဝသ္သူပနာယိကာနုဇာနနကထာဝဏ္ဏနာ • Vassūpanāyikānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဝသ္သူပနာယိကအနုဇာနနကထာဒိဝဏ္ဏနာ • Vassūpanāyikaanujānanakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၀၇. ဝသ္သူပနာယိကာနုဇာနနကထာ • 107. Vassūpanāyikānujānanakathā
