| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༣. ཝསྶཱུཔནཱཡིཀཀྑནྡྷཀོ
3. Vassūpanāyikakkhandhako
༡༠༧. ཝསྶཱུཔནཱཡིཀཱནུཛཱནནཱ
107. Vassūpanāyikānujānanā
༡༨༤. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན བྷགཝཏཱ བྷིཀྑཱུནཾ ཝསྶཱཝཱསོ ཨཔཉྙཏྟོ ཧོཏི། ཏེཨིདྷ བྷིཀྑཱུ ཧེམནྟམྤི གིམྷམྤི ཝསྶམྤི ཙཱརིཀཾ ཙརནྟི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ ཧེམནྟམྤི གིམྷམྤི ཝསྶམྤི ཙཱརིཀཾ ཙརིསྶནྟི, ཧརིཏཱནི ཏིཎཱནི སམྨདྡནྟཱ, ཨེཀིནྡྲིཡཾ ཛཱིཝཾ ཝིཧེཋེནྟཱ, བཧཱུ ཁུདྡཀེ པཱཎེ སངྒྷཱཏཾ ཨཱཔཱདེནྟཱ། ཨིམེ ཧི ནཱམ ཨཉྙཏིཏྠིཡཱ དུརཀྑཱཏདྷམྨཱ ཝསྶཱཝཱསཾ ཨལླཱིཡིསྶནྟི སངྐསཱཡིསྶནྟི། ཨིམེ ཧི ནཱམ སཀུནྟཀཱ རུཀྑགྒེསུ ཀུལཱཝཀཱནི ཀརིཏྭཱ ཝསྶཱཝཱསཾ ཨལླཱིཡིསྶནྟི སངྐསཱཡིསྶནྟི 1། ཨིམེ པན སམཎཱ སཀྱཔུཏྟིཡཱ ཧེམནྟམྤི གིམྷམྤི ཝསྶམྤི ཙཱརིཀཾ ཙརནྟི, ཧརིཏཱནི ཏིཎཱནི སམྨདྡནྟཱ, ཨེཀིནྡྲིཡཾ ཛཱིཝཾ ཝིཧེཋེནྟཱ, བཧཱུ ཁུདྡཀེ པཱཎེ སངྒྷཱཏཾ ཨཱཔཱདེནྟཱ’’ཏི། ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཨཐ ཁོ ཏེ བྷིཀྑཱུ བྷགཝཏོ ཨེཏམཏྠཾ ཨཱརོཙེསུཾ། ཨཐ ཁོ བྷགཝཱ ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཝསྶཾ ཨུཔགནྟུ’’ནྟི། ཨཐ ཁོ བྷིཀྑཱུནཾ ཨེཏདཧོསི – ‘‘ཀདཱ ནུ ཁོ ཝསྶཾ ཨུཔགནྟབྦ’’ནྟི? བྷགཝཏོ ཨེཏམཏྠཾ ཨཱརོཙེསུཾ། ཨནུཛཱནཱམི, བྷིཀྑཝེ, ཝསྶཱནེ ཝསྶཾ ཨུཔགནྟུནྟི།
184. Tena samayena buddho bhagavā rājagahe viharati veḷuvane kalandakanivāpe. Tena kho pana samayena bhagavatā bhikkhūnaṃ vassāvāso apaññatto hoti. Teidha bhikkhū hemantampi gimhampi vassampi cārikaṃ caranti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā hemantampi gimhampi vassampi cārikaṃ carissanti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā. Ime hi nāma aññatitthiyā durakkhātadhammā vassāvāsaṃ allīyissanti saṅkasāyissanti. Ime hi nāma sakuntakā rukkhaggesu kulāvakāni karitvā vassāvāsaṃ allīyissanti saṅkasāyissanti 2. Ime pana samaṇā sakyaputtiyā hemantampi gimhampi vassampi cārikaṃ caranti, haritāni tiṇāni sammaddantā, ekindriyaṃ jīvaṃ viheṭhentā, bahū khuddake pāṇe saṅghātaṃ āpādentā’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, vassaṃ upagantu’’nti. Atha kho bhikkhūnaṃ etadahosi – ‘‘kadā nu kho vassaṃ upagantabba’’nti? Bhagavato etamatthaṃ ārocesuṃ. Anujānāmi, bhikkhave, vassāne vassaṃ upagantunti.
ཨཐ ཁོ བྷིཀྑཱུནཾ ཨེཏདཧོསི – ‘‘ཀཏི ནུ ཁོ ཝསྶཱུཔནཱཡིཀཱ’’ཏི? བྷགཝཏོ ཨེཏམཏྠཾ
Atha kho bhikkhūnaṃ etadahosi – ‘‘kati nu kho vassūpanāyikā’’ti? Bhagavato etamatthaṃ
ཨཱརོཙེསུཾ། དྭེམཱ, བྷིཀྑཝེ, ཝསྶཱུཔནཱཡིཀཱ – པུརིམིཀཱ, པཙྪིམིཀཱ། ཨཔརཛྫུགཏཱཡ ཨཱསཱལ༹ྷིཡཱ པུརིམིཀཱ ཨུཔགནྟབྦཱ, མཱསགཏཱཡ ཨཱསཱལ༹ྷིཡཱ པཙྪིམིཀཱ ཨུཔགནྟབྦཱ – ཨིམཱ ཁོ, བྷིཀྑཝེ, དྭེ ཝསྶཱུཔནཱཡིཀཱཏི།
Ārocesuṃ. Dvemā, bhikkhave, vassūpanāyikā – purimikā, pacchimikā. Aparajjugatāya āsāḷhiyā purimikā upagantabbā, māsagatāya āsāḷhiyā pacchimikā upagantabbā – imā kho, bhikkhave, dve vassūpanāyikāti.
ཝསྶཱུཔནཱཡིཀཱནུཛཱནནཱ ནིཊྛིཏཱ།
Vassūpanāyikānujānanā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / ཝསྶཱུཔནཱཡིཀཱནུཛཱནནཀཐཱ • Vassūpanāyikānujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ཝསྶཱུཔནཱཡིཀཱནུཛཱནནཀཐཱཝཎྞནཱ • Vassūpanāyikānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ཝསྶཱུཔནཱཡིཀཱནུཛཱནནཀཐཱཝཎྞནཱ • Vassūpanāyikānujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ཝསྶཱུཔནཱཡིཀཨནུཛཱནནཀཐཱདིཝཎྞནཱ • Vassūpanāyikaanujānanakathādivaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༠༧. ཝསྶཱུཔནཱཡིཀཱནུཛཱནནཀཐཱ • 107. Vassūpanāyikānujānanakathā
