| Library / Tipiṭaka / တိပိဋက • Tipiṭaka / မဟာဝဂ္ဂ-အဋ္ဌကထာ • Mahāvagga-aṭṭhakathā |
၃. ဝသ္သူပနာယိကက္ခန္ဓကံ
3. Vassūpanāyikakkhandhakaṃ
ဝသ္သူပနာယိကာနုဇာနနကထာ
Vassūpanāyikānujānanakathā
၁၈၄. ဝသ္သူပနာယိကက္ခန္ဓကေ – အပညတ္တောတိ အနနုညာတော အသံဝိဟိတော ဝာ။ တေ ဣဓ ဘိက္ခူတိ တေ ဘိက္ခူ, ဣဓသဒ္ဒော နိပာတမတ္တော။ သင္ဃာတံ အာပာဒေန္တာတိ ဝိနာသံ အာပာဒေန္တာ။ သင္ကသာယိသ္သန္တီတိ အပ္ပောသ္သုက္ကာ နိဗဒ္ဓဝာသံ ဝသိသ္သန္တိ။ သကုန္တကာတိ သကုဏာ။ ဝသ္သာနေ ဝသ္သံ ဥပဂန္တုန္တိ ဝသ္သာနနာမကေ တေမာသေ ဝသ္သံ ဥပဂန္တဗ္ဗန္တိ အတ္ထော။ ကတိ နု ခော ဝသ္သူပနာယိကာတိ ကတိ နု ခော ဝသ္သူပဂမနာနိ။ အပရဇ္ဇုဂတာယာတိ ဧတ္ထ အပရဇ္ဇုဂတာယ အသ္သာတိ အပရဇ္ဇုဂတာ, တသ္သာ အပရဇ္ဇုဂတာယ; အတိက္ကန္တာယ အပရသ္မိံ ဒိဝသေတိ အတ္ထော။ ဒုတိယနယေပိ မာသော ဂတာယ အသ္သာတိ မာသဂတာ, တသ္သာ မာသဂတာယ; အတိက္ကန္တာယ မာသေ ပရိပုဏ္ဏေတိ အတ္ထော။ တသ္မာ အာသာဠ္ဟီပုဏ္ဏမာယ အနန္တရေ ပာဋိပဒဒိဝသေ, အာသာဠ္ဟီပုဏ္ဏမိတော ဝာ အပရာယ ပုဏ္ဏမာယ အနန္တရေ ပာဋိပဒဒိဝသေယေဝ ဝိဟာရံ ပဋိဇဂ္ဂိတ္ဝာ ပာနီယံ ပရိဘောဇနီယံ ဥပဋ္ဌပေတ္ဝာ သဗ္ဗံ စေတိယဝန္ဒနာဒိသာမီစိကမ္မံ နိဋ္ဌာပေတ္ဝာ ‘‘ဣမသ္မိံ ဝိဟာရေ ဣမံ တေမာသံ ဝသ္သံ ဥပေမီ’’တိ သကိံ ဝာ ဒ္ဝတ္တိက္ခတ္တုံ ဝာ ဝာစံ နိစ္ဆာရေတ္ဝာ ဝသ္သံ ဥပဂန္တဗ္ဗံ။
184. Vassūpanāyikakkhandhake – apaññattoti ananuññāto asaṃvihito vā. Te idha bhikkhūti te bhikkhū, idhasaddo nipātamatto. Saṅghātaṃ āpādentāti vināsaṃ āpādentā. Saṅkasāyissantīti appossukkā nibaddhavāsaṃ vasissanti. Sakuntakāti sakuṇā. Vassāne vassaṃ upagantunti vassānanāmake temāse vassaṃ upagantabbanti attho. Kati nu kho vassūpanāyikāti kati nu kho vassūpagamanāni. Aparajjugatāyāti ettha aparajjugatāya assāti aparajjugatā, tassā aparajjugatāya; atikkantāya aparasmiṃ divaseti attho. Dutiyanayepi māso gatāya assāti māsagatā, tassā māsagatāya; atikkantāya māse paripuṇṇeti attho. Tasmā āsāḷhīpuṇṇamāya anantare pāṭipadadivase, āsāḷhīpuṇṇamito vā aparāya puṇṇamāya anantare pāṭipadadivaseyeva vihāraṃ paṭijaggitvā pānīyaṃ paribhojanīyaṃ upaṭṭhapetvā sabbaṃ cetiyavandanādisāmīcikammaṃ niṭṭhāpetvā ‘‘imasmiṃ vihāre imaṃ temāsaṃ vassaṃ upemī’’ti sakiṃ vā dvattikkhattuṃ vā vācaṃ nicchāretvā vassaṃ upagantabbaṃ.
ဝာစံ နိစ္ဆာရေတ္ဝာ ဝသ္သံ ဥပဂန္တဗ္ဗံ။
Vācaṃ nicchāretvā vassaṃ upagantabbaṃ.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၀၇. ဝသ္သူပနာယိကာနုဇာနနာ • 107. Vassūpanāyikānujānanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ဝသ္သူပနာယိကာနုဇာနနကထာဝဏ္ဏနာ • Vassūpanāyikānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ဝသ္သူပနာယိကာနုဇာနနကထာဝဏ္ဏနာ • Vassūpanāyikānujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ဝသ္သူပနာယိကအနုဇာနနကထာဒိဝဏ္ဏနာ • Vassūpanāyikaanujānanakathādivaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၀၇. ဝသ္သူပနာယိကာနုဇာနနကထာ • 107. Vassūpanāyikānujānanakathā
