| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. வஸ்ஸூபனாயிகஸுத்தவண்ணனா
10. Vassūpanāyikasuttavaṇṇanā
10. த³ஸமங் அட்டு²ப்பத்தியங் வுத்தங். கதரஅட்டு²ப்பத்தியங்? மனுஸ்ஸானங் உஜ்ஜா²யனே. ப⁴க³வதா ஹி பட²மபோ³தி⁴யங் வீஸதி வஸ்ஸானி வஸ்ஸூபனாயிகா அப்பஞ்ஞத்தா அஹோஸி. பி⁴க்கூ² அனிப³த்³த⁴வாஸா வஸ்ஸேபி உதுவஸ்ஸேபி யதா²ஸுக²ங் விசரிங்ஸு. தே தி³ஸ்வா மனுஸ்ஸா ‘‘கத²ஞ்ஹி நாம ஸமணா ஸக்யபுத்தியா ஹேமந்தம்பி கி³ம்ஹம்பி வஸ்ஸம்பி சாரிகங் சரிஸ்ஸந்தி ஹரிதானி திணானி ஸம்மத்³த³ந்தா ஏகிந்த்³ரியங் ஜீவங் விஹேடெ²ந்தா ப³ஹூ கு²த்³த³கே பாணே ஸங்கா⁴தங் ஆபாதெ³ந்தா. இமே ஹி நாம அஞ்ஞதித்தி²யா து³ரக்கா²தத⁴ம்மா வஸ்ஸாவாஸங் அல்லீயிஸ்ஸந்தி ஸங்கஸாயிஸ்ஸந்தி, இமே நாம ஸகுணா ருக்க²க்³கே³ஸு குலாவகானி கத்வா வஸ்ஸாவாஸங் அல்லீயிஸ்ஸந்தி ஸங்கஸாயிஸ்ஸந்தீ’’திஆதீ³னி வத்வா உஜ்ஜா²யிங்ஸு. தமத்த²ங் பி⁴க்கூ² ப⁴க³வதோ ஆரோசேஸுங். ப⁴க³வா தங் அட்டு²ப்பத்திங் கத்வா இமங் ஸுத்தங் தே³ஸெந்தோ பட²மங் தாவ ‘‘அனுஜானாமி, பி⁴க்க²வே, வஸ்ஸங் உபக³ந்து’’ந்தி (மஹாவ॰ 184) எத்தகமேவாஹ. அத² பி⁴க்கூ²னங் ‘‘கதா³ நு கோ² வஸ்ஸங் உபக³ந்தப்³ப³’’ந்தி உப்பன்னங் விதக்கங் ஸுத்வா ‘‘அனுஜானாமி, பி⁴க்க²வே, வஸ்ஸானே வஸ்ஸங் உபக³ந்து’’ந்தி ஆஹ. அத² கோ² பி⁴க்கூ²னங் ஏதத³ஹோஸி – ‘‘கதி நு கோ² வஸ்ஸூபனாயிகா’’தி. ப⁴க³வதோ ஏதமத்த²ங் ஆரோசேஸுங். தங் ஸுத்வா ஸகலம்பி இத³ங் ஸுத்தங் தே³ஸெந்தோ த்³வேமா, பி⁴க்க²வேதிஆதி³மாஹ. தத்த² வஸ்ஸூபனாயிகாதி வஸ்ஸூபக³மனானி. புரிமிகாதி அபரஜ்ஜுக³தாய ஆஸாள்ஹியா உபக³ந்தப்³பா³ புரிமகத்திகபுண்ணமிபரியோஸானா பட²மா தேமாஸீ. பச்சி²மிகாதி மாஸக³தாய ஆஸாள்ஹியா உபக³ந்தப்³பா³ பச்சி²மகத்திகபரியோஸானா பச்சி²மா தேமாஸீதி. த³ஸமங்.
10. Dasamaṃ aṭṭhuppattiyaṃ vuttaṃ. Kataraaṭṭhuppattiyaṃ? Manussānaṃ ujjhāyane. Bhagavatā hi paṭhamabodhiyaṃ vīsati vassāni vassūpanāyikā appaññattā ahosi. Bhikkhū anibaddhavāsā vassepi utuvassepi yathāsukhaṃ vicariṃsu. Te disvā manussā ‘‘kathañhi nāma samaṇā sakyaputtiyā hemantampi gimhampi vassampi cārikaṃ carissanti haritāni tiṇāni sammaddantā ekindriyaṃ jīvaṃ viheṭhentā bahū khuddake pāṇe saṅghātaṃ āpādentā. Ime hi nāma aññatitthiyā durakkhātadhammā vassāvāsaṃ allīyissanti saṃkasāyissanti, ime nāma sakuṇā rukkhaggesu kulāvakāni katvā vassāvāsaṃ allīyissanti saṃkasāyissantī’’tiādīni vatvā ujjhāyiṃsu. Tamatthaṃ bhikkhū bhagavato ārocesuṃ. Bhagavā taṃ aṭṭhuppattiṃ katvā imaṃ suttaṃ desento paṭhamaṃ tāva ‘‘anujānāmi, bhikkhave, vassaṃ upagantu’’nti (mahāva. 184) ettakamevāha. Atha bhikkhūnaṃ ‘‘kadā nu kho vassaṃ upagantabba’’nti uppannaṃ vitakkaṃ sutvā ‘‘anujānāmi, bhikkhave, vassāne vassaṃ upagantu’’nti āha. Atha kho bhikkhūnaṃ etadahosi – ‘‘kati nu kho vassūpanāyikā’’ti. Bhagavato etamatthaṃ ārocesuṃ. Taṃ sutvā sakalampi idaṃ suttaṃ desento dvemā, bhikkhavetiādimāha. Tattha vassūpanāyikāti vassūpagamanāni. Purimikāti aparajjugatāya āsāḷhiyā upagantabbā purimakattikapuṇṇamipariyosānā paṭhamā temāsī. Pacchimikāti māsagatāya āsāḷhiyā upagantabbā pacchimakattikapariyosānā pacchimā temāsīti. Dasamaṃ.
கம்மகாரணவக்³கோ³ பட²மோ.
Kammakāraṇavaggo paṭhamo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. வஸ்ஸூபனாயிகஸுத்தங் • 10. Vassūpanāyikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. வஸ்ஸூபனாயிகஸுத்தவண்ணனா • 10. Vassūpanāyikasuttavaṇṇanā
