| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၁၀. ဝသ္သူပနာယိကသုတ္တဝဏ္ဏနာ
10. Vassūpanāyikasuttavaṇṇanā
၁၀. ဒသမေ အပညတ္တာတိ အနနုညာတာ, အဝိဟိတာ ဝာ။ ဝသ္သေတိ ဝသ္သာရတ္တံ သန္ဓာယ ဝဒတိ, ဥတုဝသ္သေတိ ဟေမန္တံ သန္ဓာယ။ ဧကိန္ဒ္ရိယံ ဇီဝံ ဝိဟေဌေန္တာတိ ရုက္ခလတာဒီသု ဇီဝသညိတာယ ဧဝမာဟံသု။ ဧကိန္ဒ္ရိယန္တိ စ ကာယိန္ဒ္ရိယံ အတ္ထီတိ မညမာနာ ဝဒန္တိ။ သင္ဃာတံ အာပာဒေန္တာတိ ဝိနာသံ အာပာဒေန္တာ။ သံကသာယိသ္သန္တီတိ အပ္ပောသ္သုက္ကာ နိဗဒ္ဓဝာသံ ဝသိသ္သန္တိ။ အပရဇ္ဇုဂတာယ အာသာဠ္ဟိယာ ဥပဂန္တဗ္ဗာတိ ဧတ္ထ အပရဇ္ဇု ဂတာယ အသ္သာတိ အပရဇ္ဇုဂတာ, တသ္သာ အပရဇ္ဇုဂတာယ အတိက္ကန္တာယ, အပရသ္မိံ ဒိဝသေတိ အတ္ထော, တသ္မာ အာသာဠ္ဟိပုဏ္ဏမာယ အနန္တရေ ပာဋိပဒဒိဝသေ ဥပဂန္တဗ္ဗာတိ ဧဝမေတ္ထ အတ္ထော ဒဋ္ဌဗ္ဗော။ မာသဂတာယ အာသာဠ္ဟိယာ ဥပဂန္တဗ္ဗာတိ မာသော ဂတာယ အသ္သာတိ မာသဂတာ, တသ္သာ မာသဂတာယ အတိက္ကန္တာယ, မာသေ ပရိပုဏ္ဏေတိ အတ္ထော။ တသ္မာ အာသာဠ္ဟိပုဏ္ဏမတော ပရာယ ပုဏ္ဏမာယ အနန္တရေ ပာဋိပဒဒိဝသေ ဥပဂန္တဗ္ဗာတိ အတ္ထော ဒဋ္ဌဗ္ဗော။
10. Dasame apaññattāti ananuññātā, avihitā vā. Vasseti vassārattaṃ sandhāya vadati, utuvasseti hemantaṃ sandhāya. Ekindriyaṃ jīvaṃ viheṭhentāti rukkhalatādīsu jīvasaññitāya evamāhaṃsu. Ekindriyanti ca kāyindriyaṃ atthīti maññamānā vadanti. Saṅghātaṃ āpādentāti vināsaṃ āpādentā. Saṃkasāyissantīti appossukkā nibaddhavāsaṃ vasissanti. Aparajjugatāya āsāḷhiyā upagantabbāti ettha aparajju gatāya assāti aparajjugatā, tassā aparajjugatāya atikkantāya, aparasmiṃ divaseti attho, tasmā āsāḷhipuṇṇamāya anantare pāṭipadadivase upagantabbāti evamettha attho daṭṭhabbo. Māsagatāya āsāḷhiyā upagantabbāti māso gatāya assāti māsagatā, tassā māsagatāya atikkantāya, māse paripuṇṇeti attho. Tasmā āsāḷhipuṇṇamato parāya puṇṇamāya anantare pāṭipadadivase upagantabbāti attho daṭṭhabbo.
ဝသ္သူပနာယိကသုတ္တဝဏ္ဏနာ နိဋ္ဌိတာ။
Vassūpanāyikasuttavaṇṇanā niṭṭhitā.
ကမ္မကာရဏဝဂ္ဂဝဏ္ဏနာယ လီနတ္ထပ္ပကာသနာ နိဋ္ဌိတာ။
Kammakāraṇavaggavaṇṇanāya līnatthappakāsanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. ဝသ္သူပနာယိကသုတ္တံ • 10. Vassūpanāyikasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁၀. ဝသ္သူပနာယိကသုတ္တဝဏ္ဏနာ • 10. Vassūpanāyikasuttavaṇṇanā
