| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. வடங்ஸகியத்தே²ரஅபதா³னவண்ணனா
9. Vaṭaṃsakiyattheraapadānavaṇṇanā
ஸுமேதோ⁴ நாம நாமேனாதிஆதி³கங் ஆயஸ்மதோ வடங்ஸகியத்தே²ரஸ்ஸ அபதா³னங். அயம்பி புரிமமுனிந்தே³ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸுமேத⁴ஸ்ஸ ப⁴க³வதோ காலே குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா தத்த² ஆதீ³னவங் தி³ஸ்வா கே³ஹங் பஹாய தாபஸபப்³ப³ஜ்ஜங் பப்³ப³ஜித்வா மஹாவனே விஹாஸி. தஸ்மிங் ஸமயே ஸுமேதோ⁴ ப⁴க³வா விவேககாமதாய தங் வனங் ஸம்பாபுணி. அத² ஸோ தாபஸோ ப⁴க³வந்தங் தி³ஸ்வா பஸன்னமானஸோ விகஸிதங் ஸளலபுப்ப²ங் க³ஹெத்வா வடங்ஸகாகாரேன க³ந்தெ²த்வா ப⁴க³வதோ பாத³மூலே ட²பெத்வா பூஜேஸி. ப⁴க³வா தஸ்ஸ சித்தப்பஸாத³த்தா²ய அனுமோத³னமகாஸி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே குலே ஜாதோ வுத்³தி⁴மன்வாய ஸத்³தோ⁴ பஸன்னோ பப்³ப³ஜித்வா நசிரஸ்ஸேவ அரஹா அஹோஸி.
Sumedho nāma nāmenātiādikaṃ āyasmato vaṭaṃsakiyattherassa apadānaṃ. Ayampi purimamunindesu katādhikāro tattha tattha bhave vivaṭṭūpanissayāni puññāni upacinanto sumedhassa bhagavato kāle kulagehe nibbatto viññutaṃ patto gharāvāsaṃ saṇṭhapetvā tattha ādīnavaṃ disvā gehaṃ pahāya tāpasapabbajjaṃ pabbajitvā mahāvane vihāsi. Tasmiṃ samaye sumedho bhagavā vivekakāmatāya taṃ vanaṃ sampāpuṇi. Atha so tāpaso bhagavantaṃ disvā pasannamānaso vikasitaṃ saḷalapupphaṃ gahetvā vaṭaṃsakākārena ganthetvā bhagavato pādamūle ṭhapetvā pūjesi. Bhagavā tassa cittappasādatthāya anumodanamakāsi. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde vibhavasampanne kule jāto vuddhimanvāya saddho pasanno pabbajitvā nacirasseva arahā ahosi.
43. ஸோ அபரபா⁴கே³ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுமேதோ⁴ நாம நாமேனாதிஆதி³ வுத்தங். விவேகமனுப்³ரூஹந்தோதி ஜனாகிண்ணதங் பஹாய ஜனவிவேகங் சித்தவிவேகஞ்ச அனுப்³ரூஹந்தோ வட்³டெ⁴ந்தோ ப³ஹுலீகரொந்தோ மஹாவனங் அஜ்ஜோ²கா³ஹி பாவிஸீதி அத்தோ². ஸேஸங் உத்தானத்த²மேவாதி.
43. So aparabhāge pubbakammaṃ saritvā somanassajāto pubbacaritāpadānaṃ pakāsento sumedho nāma nāmenātiādi vuttaṃ. Vivekamanubrūhantoti janākiṇṇataṃ pahāya janavivekaṃ cittavivekañca anubrūhanto vaḍḍhento bahulīkaronto mahāvanaṃ ajjhogāhi pāvisīti attho. Sesaṃ uttānatthamevāti.
வடங்ஸகியத்தே²ரஅபதா³னவண்ணனா ஸமத்தா.
Vaṭaṃsakiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. வடங்ஸகியத்தே²ரஅபதா³னங் • 9. Vaṭaṃsakiyattheraapadānaṃ
