| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. ទុតិយវគ្គោ
2. Dutiyavaggo
១. វតបទសុត្តវណ្ណនា
1. Vatapadasuttavaṇṇanā
២៥៧. សមាទាតព្ពតោ វតានិ, អញ្ញមញ្ញំ អសង្ករសភាវេន បព្ពជិតព្ពតោ បទានិ, តតោ ឯវ អសំកិណ្ណភាគាតិ កត្វា ‘‘វតកោដ្ឋាសានី’’តិ វុត្តំ។ សមត្តានីតិ បុញ្ញវិសេសតាយ បុជ្ជភវផលនិព្ពត្តនេន កិត្តិសញ្ញានេន ច សមំ អត្តានិ សមត្តានិ។ បរិបុណ្ណានីតិ អខណ្ឌាទិភាវេន សព្ពសោ បុណ្ណានិ។ សមាទិន្នានីតិ តត្ថ សក្កច្ចការិតាយ សម្មា អាទិន្នានិ។ មាតុលានីតិ បិតុភគិនី, ន យា កាចិ មាតុលស្ស ភរិយា កុលជេដ្ឋកានំ អធិប្បេតត្តា, ភរិយាបិ វា មាតុលសម្ពន្ធតោ គហេតព្ពា, តថា សតិ មហាបិតុភរិយាទីនម្បិ សង្គហោ ទដ្ឋព្ពោ។
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
អាទិ-សទ្ទេន ជេដ្ឋភគិនីនំ សង្គហោ។ អបចិតិការកោតិ តេសំ បច្ចុដ្ឋានករោ។ យោ កោចិ ទទន្តោបិ សាបេក្ខោ ទេតិ, សោ មុត្តចាគោ ន ហោតិ, អយំ បន ន ឯវន្តិ ‘‘មុត្តចាគោ ហោតី’’តិ វុត្តំ។ វិស្សដ្ឋចាគោតិ និរបេក្ខបរិច្ចាគោតិ អត្ថោ។ យថា បាណាតិបាតពហុលោ ‘‘លោហិតបាណី’’តិ វុច្ចតិ, តថា ទានពហុលោ ‘‘បយតបាណី’’តិ វុត្តោតិ អាហ ‘‘ទេយ្យធម្មទានត្ថាយ សទា ធោតហត្ថោ’’តិ។ វោស្សគ្គរតោតិ ទេយ្យធម្មស្ស បរិច្ចជនេ អភិរតោ។ បរេហិ យាចិតព្ពារហោតិ បរេហិ យាចិតុំ យុត្តោ ឥច្ឆិតស្ស អត្ថស្ស តាវទេវ វិស្សជ្ជនតោ។ ទានេនេវ យុត្តោតិ សព្ពកាលំ ទានេនេវ យុត្តោ អភិណ្ហំ បវត្តមហាទានត្តា។ ទានេ ច សំវិភាគេ ចាតិ បរស្ស សម្បុណ្ណំ កត្វា បរិច្ចជនសង្ខាតេ ទានេ ច អត្តនា បរិភុញ្ជិតព្ពតោ សំវិភជនសង្ខាតេ សំវិភាគេ ច រតោ អភិរតោ។
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
វតបទសុត្តវណ្ណនា និដ្ឋិតា។
Vatapadasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. វតបទសុត្តំ • 1. Vatapadasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. វតបទសុត្តវណ្ណនា • 1. Vatapadasuttavaṇṇanā
