| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
2. දුතියවග්‌ගො
2. Dutiyavaggo
1. වතපදසුත්‌තවණ්‌ණනා
1. Vatapadasuttavaṇṇanā
257. සමාදාතබ්‌බතො වතානි, අඤ්‌ඤමඤ්‌ඤං අසඞ්‌කරසභාවෙන පබ්‌බජිතබ්‌බතො පදානි, තතො එව අසංකිණ්‌ණභාගාති කත්‌වා ‘‘වතකොට්‌ඨාසානී’’ති වුත්‌තං. සමත්‌තානීති පුඤ්‌ඤවිසෙසතාය පුජ්‌ජභවඵලනිබ්‌බත්‌තනෙන කිත්‌තිසඤ්‌ඤානෙන ච සමං අත්‌තානි සමත්‌තානි. පරිපුණ්‌ණානීති අඛණ්‌ඩාදිභාවෙන සබ්‌බසො පුණ්‌ණානි. සමාදින්‌නානීති තත්‌ථ සක්‌කච්‌චකාරිතාය සම්‌මා ආදින්‌නානි. මාතුලානීති පිතුභගිනී, න යා කාචි මාතුලස්‌ස භරියා කුලජෙට්‌ඨකානං අධිප්‌පෙතත්‌තා, භරියාපි වා මාතුලසම්‌බන්‌ධතො ගහෙතබ්‌බා, තථා සති මහාපිතුභරියාදීනම්‌පි සඞ්‌ගහො දට්‌ඨබ්‌බො.
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
ආදි-සද්‌දෙන ජෙට්‌ඨභගිනීනං සඞ්‌ගහො. අපචිතිකාරකොති තෙසං පච්‌චුට්‌ඨානකරො. යො කොචි දදන්‌තොපි සාපෙක්‌ඛො දෙති, සො මුත්‌තචාගො න හොති, අයං පන න එවන්‌ති ‘‘මුත්‌තචාගො හොතී’’ති වුත්‌තං. විස්‌සට්‌ඨචාගොති නිරපෙක්‌ඛපරිච්‌චාගොති අත්‌ථො. යථා පාණාතිපාතබහුලො ‘‘ලොහිතපාණී’’ති වුච්‌චති, තථා දානබහුලො ‘‘පයතපාණී’’ති වුත්‌තොති ආහ ‘‘දෙය්‍යධම්‌මදානත්‌ථාය සදා ධොතහත්‌ථො’’ති. වොස්‌සග්‌ගරතොති දෙය්‍යධම්‌මස්‌ස පරිච්‌චජනෙ අභිරතො. පරෙහි යාචිතබ්‌බාරහොති පරෙහි යාචිතුං යුත්‌තො ඉච්‌ඡිතස්‌ස අත්‌ථස්‌ස තාවදෙව විස්‌සජ්‌ජනතො. දානෙනෙව යුත්‌තොති සබ්‌බකාලං දානෙනෙව යුත්‌තො අභිණ්‌හං පවත්‌තමහාදානත්‌තා. දානෙ ච සංවිභාගෙ චාති පරස්‌ස සම්‌පුණ්‌ණං කත්‌වා පරිච්‌චජනසඞ්‌ඛාතෙ දානෙ ච අත්‌තනා පරිභුඤ්‌ජිතබ්‌බතො සංවිභජනසඞ්‌ඛාතෙ සංවිභාගෙ ච රතො අභිරතො.
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
වතපදසුත්‌තවණ්‌ණනා නිට්‌ඨිතා.
Vatapadasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. වතපදසුත්‌තං • 1. Vatapadasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. වතපදසුත්‌තවණ්‌ණනා • 1. Vatapadasuttavaṇṇanā
