| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൨. ദുതിയവഗ്ഗോ
2. Dutiyavaggo
൧. വതപദസുത്തവണ്ണനാ
1. Vatapadasuttavaṇṇanā
൨൫൭. സമാദാതബ്ബതോ വതാനി, അഞ്ഞമഞ്ഞം അസങ്കരസഭാവേന പബ്ബജിതബ്ബതോ പദാനി, തതോ ഏവ അസംകിണ്ണഭാഗാതി കത്വാ ‘‘വതകോട്ഠാസാനീ’’തി വുത്തം. സമത്താനീതി പുഞ്ഞവിസേസതായ പുജ്ജഭവഫലനിബ്ബത്തനേന കിത്തിസഞ്ഞാനേന ച സമം അത്താനി സമത്താനി. പരിപുണ്ണാനീതി അഖണ്ഡാദിഭാവേന സബ്ബസോ പുണ്ണാനി. സമാദിന്നാനീതി തത്ഥ സക്കച്ചകാരിതായ സമ്മാ ആദിന്നാനി. മാതുലാനീതി പിതുഭഗിനീ, ന യാ കാചി മാതുലസ്സ ഭരിയാ കുലജേട്ഠകാനം അധിപ്പേതത്താ, ഭരിയാപി വാ മാതുലസമ്ബന്ധതോ ഗഹേതബ്ബാ, തഥാ സതി മഹാപിതുഭരിയാദീനമ്പി സങ്ഗഹോ ദട്ഠബ്ബോ.
257. Samādātabbato vatāni, aññamaññaṃ asaṅkarasabhāvena pabbajitabbato padāni, tato eva asaṃkiṇṇabhāgāti katvā ‘‘vatakoṭṭhāsānī’’ti vuttaṃ. Samattānīti puññavisesatāya pujjabhavaphalanibbattanena kittisaññānena ca samaṃ attāni samattāni. Paripuṇṇānīti akhaṇḍādibhāvena sabbaso puṇṇāni. Samādinnānīti tattha sakkaccakāritāya sammā ādinnāni. Mātulānīti pitubhaginī, na yā kāci mātulassa bhariyā kulajeṭṭhakānaṃ adhippetattā, bhariyāpi vā mātulasambandhato gahetabbā, tathā sati mahāpitubhariyādīnampi saṅgaho daṭṭhabbo.
ആദി-സദ്ദേന ജേട്ഠഭഗിനീനം സങ്ഗഹോ. അപചിതികാരകോതി തേസം പച്ചുട്ഠാനകരോ. യോ കോചി ദദന്തോപി സാപേക്ഖോ ദേതി, സോ മുത്തചാഗോ ന ഹോതി, അയം പന ന ഏവന്തി ‘‘മുത്തചാഗോ ഹോതീ’’തി വുത്തം. വിസ്സട്ഠചാഗോതി നിരപേക്ഖപരിച്ചാഗോതി അത്ഥോ. യഥാ പാണാതിപാതബഹുലോ ‘‘ലോഹിതപാണീ’’തി വുച്ചതി, തഥാ ദാനബഹുലോ ‘‘പയതപാണീ’’തി വുത്തോതി ആഹ ‘‘ദേയ്യധമ്മദാനത്ഥായ സദാ ധോതഹത്ഥോ’’തി. വോസ്സഗ്ഗരതോതി ദേയ്യധമ്മസ്സ പരിച്ചജനേ അഭിരതോ. പരേഹി യാചിതബ്ബാരഹോതി പരേഹി യാചിതും യുത്തോ ഇച്ഛിതസ്സ അത്ഥസ്സ താവദേവ വിസ്സജ്ജനതോ. ദാനേനേവ യുത്തോതി സബ്ബകാലം ദാനേനേവ യുത്തോ അഭിണ്ഹം പവത്തമഹാദാനത്താ. ദാനേ ച സംവിഭാഗേ ചാതി പരസ്സ സമ്പുണ്ണം കത്വാ പരിച്ചജനസങ്ഖാതേ ദാനേ ച അത്തനാ പരിഭുഞ്ജിതബ്ബതോ സംവിഭജനസങ്ഖാതേ സംവിഭാഗേ ച രതോ അഭിരതോ.
Ādi-saddena jeṭṭhabhaginīnaṃ saṅgaho. Apacitikārakoti tesaṃ paccuṭṭhānakaro. Yo koci dadantopi sāpekkho deti, so muttacāgo na hoti, ayaṃ pana na evanti ‘‘muttacāgo hotī’’ti vuttaṃ. Vissaṭṭhacāgoti nirapekkhapariccāgoti attho. Yathā pāṇātipātabahulo ‘‘lohitapāṇī’’ti vuccati, tathā dānabahulo ‘‘payatapāṇī’’ti vuttoti āha ‘‘deyyadhammadānatthāya sadā dhotahattho’’ti. Vossaggaratoti deyyadhammassa pariccajane abhirato. Parehi yācitabbārahoti parehi yācituṃ yutto icchitassa atthassa tāvadeva vissajjanato. Dāneneva yuttoti sabbakālaṃ dāneneva yutto abhiṇhaṃ pavattamahādānattā. Dāne ca saṃvibhāge cāti parassa sampuṇṇaṃ katvā pariccajanasaṅkhāte dāne ca attanā paribhuñjitabbato saṃvibhajanasaṅkhāte saṃvibhāge ca rato abhirato.
വതപദസുത്തവണ്ണനാ നിട്ഠിതാ.
Vatapadasuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൧. വതപദസുത്തം • 1. Vatapadasuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൧. വതപദസുത്തവണ്ണനാ • 1. Vatapadasuttavaṇṇanā
