| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. ဒိဋ္ဌိသံယုတ္တံ
3. Diṭṭhisaṃyuttaṃ
၁. သောတာပတ္တိဝဂ္ဂော
1. Sotāpattivaggo
၁. ဝာတသုတ္တဝဏ္ဏနာ
1. Vātasuttavaṇṇanā
၂၀၆. န ဧတေ ဝာတာတိ ယေ ဣမေ ရုက္ခသာခာဒိဘဉ္ဇနကရာ, ဧတေ သတ္တကာယတ္တာ ဝာတာ နာမ န ဟောန္တိ။ တေ ဟိ နိစ္စာ ဓုဝာ သသ္သတာ။ တေနာဟ ‘‘ဝာတော ပနာ’’တိအာဒိ။ တေန သတ္တသု ကာယေသု စတုတ္ထံ ကာယမာဟ။ ရုက္ခသာခာဒိဘဉ္ဇနကော ဧသော ဝာတလေသော နာမ, ဝာတသဒိသောတိ အတ္ထော။ ဧသိကတ္ထမ္ဘော ဝိယာတိ ဣမိနာ နိစ္စလဘာဝမေဝ ဒသ္သေတိ, ပဗ္ဗတကူဋံ ဝိယာတိ ဣမိနာ ပန သသ္သတိသမံဝာပိ။ အယဉ္ဟိ ဝာယု ကာယသ္သ နိစ္စတံ အဘိနိဝိသ္သ ဌိတော ‘‘မာ စ အနိစ္စတာ ပရော ဟောတူ’’တိ န ဝာတာ ဝာယန္တီတိ ဗာဓတိ။ ဧသ နယော နဒိယော သန္ဒန္တီတိအာဒီသု။ ဥဒကံ ပနာတိ ဒုတိယံ ကာယံ သန္ဓာယာဟ။ ဂဗ္ဘော ပန န နိက္ခမတိ ကူဋဋ္ဌာဒိဘာဝေနေဝ တသ္သ လဗ္ဘနတော။ နေဝ တေ ဥဒေန္တိ ယထာ ဝာတာ, ဧဝံ တိဋ္ဌနတော လောကသ္သ ပန တထာ မတိမတ္တန္တိ အဓိပ္ပာယော။
206.Naete vātāti ye ime rukkhasākhādibhañjanakarā, ete sattakāyattā vātā nāma na honti. Te hi niccā dhuvā sassatā. Tenāha ‘‘vāto panā’’tiādi. Tena sattasu kāyesu catutthaṃ kāyamāha. Rukkhasākhādibhañjanako eso vātaleso nāma, vātasadisoti attho. Esikatthambho viyāti iminā niccalabhāvameva dasseti, pabbatakūṭaṃ viyāti iminā pana sassatisamaṃvāpi. Ayañhi vāyu kāyassa niccataṃ abhinivissa ṭhito ‘‘mā ca aniccatā paro hotū’’ti na vātā vāyantīti bādhati. Esa nayo nadiyo sandantītiādīsu. Udakaṃ panāti dutiyaṃ kāyaṃ sandhāyāha. Gabbho pana na nikkhamati kūṭaṭṭhādibhāveneva tassa labbhanato. Neva te udenti yathā vātā, evaṃ tiṭṭhanato lokassa pana tathā matimattanti adhippāyo.
ဝာတသုတ္တဝဏ္ဏနာ နိဋ္ဌိတာ။
Vātasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ဝာတသုတ္တံ • 1. Vātasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ဝာတသုတ္တဝဏ္ဏနာ • 1. Vātasuttavaṇṇanā
