[118] 8. வட்டஜாதகவண்ணனா

நாசிந்தயந்தோ புரிஸோதி இத³ங் ஸத்தா² ஜேதவனே விஹரந்தோ உத்தரஸெட்டி²புத்தங் ஆரப்³ப⁴ கதே²ஸி. ஸாவத்தி²யங் கிர உத்தரஸெட்டி² நாம அஹோஸி மஹாவிப⁴வோ. தஸ்ஸ ப⁴ரியாய குச்சி²யங் ஏகோ புஞ்ஞவா ஸத்தோ ப்³ரஹ்மலோகா சவித்வா படிஸந்தி⁴ங் க³ஹெத்வா வயப்பத்தோ அபி⁴ரூபோ பாஸாதி³கோ அஹோஸி ப்³ரஹ்மவண்ணீ. அத² ஏகதி³வஸங் ஸாவத்தி²யங் கத்திகச²ணே நக்க²த்தே கு⁴ட்டே² ஸப்³போ³ லோகோ நக்க²த்தனிஸ்ஸிதோ அஹோஸி. தஸ்ஸ ஸஹாயகா அஞ்ஞே ஸெட்டி²புத்தா ஸபஜாபதிகா அஹேஸுங். உத்தரஸெட்டி²புத்தஸ்ஸ பன தீ³க⁴ரத்தங் ப்³ரஹ்மலோகே வஸிதத்தா கிலேஸேஸு சித்தங் ந அல்லீயதி. அத²ஸ்ஸ ஸஹாயகா ‘‘உத்தரஸெட்டி²புத்தஸ்ஸபி ஏகங் இத்தி²ங் ஆனெத்வா நக்க²த்தங் கீளிஸ்ஸாமா’’தி ஸம்மந்தயித்வா தங் உபஸங்கமித்வா ‘‘ஸம்ம, இமஸ்மிங் நக³ரே கத்திகச²ணோ கு⁴ட்டோ², துய்ஹம்பி ஏகங் இத்தி²ங் ஆனெத்வா நக்க²த்தங் கீளிஸ்ஸாமா’’தி ஆஹங்ஸு. ‘‘ந மே அத்தோ² இத்தி²யா’’தி ச வுத்தேபி புனப்புனங் நிப³ந்தி⁴த்வா ஸம்படிச்சா²பெத்வா ஏகங் வண்ணதா³ஸிங் ஸப்³பா³லங்காரபடிமண்டி³தங் கத்வா தஸ்ஸ க⁴ரங் நெத்வா ‘‘த்வங் ஸெட்டி²புத்தஸ்ஸ ஸந்திகங் க³ச்சா²’’தி ஸயனிக⁴ரங் பேஸெத்வா நிக்க²மிங்ஸு. தங் ஸயனிக⁴ரங் பவிட்ட²ம்பி ஸெட்டி²புத்தோ நேவ ஓலோகேதி, நாலபதி. ஸா சிந்தேஸி ‘‘அயங் ஏவங் ரூபஸோப⁴க்³க³ப்பத்தங் உத்தமவிலாஸஸம்பன்னங் மங் நேவ ஓலோகேதி, நாலபதி, இதா³னி நங் அத்தனோ இத்தி²குத்தலீலாய ஓலோகாபெஸ்ஸாமீ’’தி இத்தி²லீலங் த³ஸ்ஸெந்தீ பஹட்டா²காரேன அக்³க³த³ந்தே விவரித்வா ஹஸிதங் அகாஸி. ஸெட்டி²புத்தோ ஓலோகெத்வா த³ந்தட்டி²கே நிமித்தங் க³ண்ஹி. அத²ஸ்ஸ அட்டி²கஸஞ்ஞா உப்பஜ்ஜி, ஸகலம்பி தங் ஸரீரங் அட்டி²கஸங்க²லிகா விய பஞ்ஞாயி. ஸோ தஸ்ஸா பரிப்³ப³யங் த³த்வா ‘‘க³ச்சா²’’தி உய்யோஜேஸி.

தங் தஸ்ஸ க⁴ரா ஓதிண்ணங் ஏகோ இஸ்ஸரோ அந்தரவீதி²யங் தி³ஸ்வா பரிப்³ப³யங் த³த்வா அத்தனோ க⁴ரங் நேஸி, ஸத்தாஹே வீதிவத்தே நக்க²த்தங் ஓஸிதங். வண்ணதா³ஸியா மாதா தீ⁴து ஆக³மனங் அதி³ஸ்வா ஸெட்டி²புத்தானங் ஸந்திகங் க³ந்த்வா ‘‘கஹங் ஸா’’தி புச்சி². தே உத்தரஸெட்டி²புத்தஸ்ஸ க⁴ரங் க³ந்த்வா ‘‘கஹங் ஸா’’தி புச்சி²ங்ஸு. ‘‘தங்க²ணஞ்ஞேவ தஸ்ஸா பரிப்³ப³யங் த³த்வா உய்யோஜேஸி’’ந்தி. அத²ஸ்ஸா மாதா ரோத³ந்தீ ‘‘தீ⁴தரங் மே ந பஸ்ஸாமி, தீ⁴தரங் மே ஸமானேதா²’’தி உத்தரஸெட்டி²புத்தங் ஆதா³ய ரஞ்ஞோ ஸந்திகங் அக³மாஸி. ராஜா அட்டங் வினிச்சி²னந்தோ ‘‘இமே தே ஸெட்டி²புத்தா வண்ணதா³ஸிங் ஆனெத்வா துய்ஹங் அத³ங்ஸூ’’தி புச்சி². ‘‘ஆம, தே³வா’’தி. ‘‘இதா³னி ஸா கஹ’’ந்தி? ‘‘ந ஜானாமி, தங்க²ணஞ்ஞேவ நங் உய்யோஜேஸி’’ந்தி. ‘‘இதா³னி தங் ஸமானேதுங் ஸக்கோஸீ’’தி? ‘‘ந ஸக்கோமி, தே³வா’’தி. ராஜா ‘‘ஸசே ஸமானேதுங் ந ஸக்கோதி, ராஜாணமஸ்ஸ கரோதா²’’தி ஆஹ. அத² நங் பச்சா²பா³ஹங் ப³ந்தி⁴த்வா ‘‘ராஜாணங் கரிஸ்ஸாமா’’தி க³ஹெத்வா பக்கமிங்ஸு. ‘‘ஸெட்டி²புத்தங் கிர வண்ணதா³ஸிங் ஸமானேதுங் அஸக்கொந்தங் ராஜா ராஜாணங் காரேதீ’’தி ஸகலனக³ரங் ஏககோலாஹலங் அஹோஸி. மஹாஜனோ உரே ஹத்தே² ட²பெத்வா ‘‘கிங் நாமேதங், ஸாமி, அத்தனோ தே அனநுச்ச²விகங் லத்³த⁴’’ந்தி பரிதே³வதி. ஸெட்டி²பி புத்தஸ்ஸ பச்ச²தோ பச்ச²தோ பரிதே³வந்தோ க³ச்ச²தி.

ஸெட்டி²புத்தோ சிந்தேஸி ‘‘இத³ங் மய்ஹங் ஏவரூபங் து³க்க²ங் அகா³ரே வஸனபா⁴வேன உப்பன்னங். ஸசே இதோ முச்சிஸ்ஸாமி, மஹாகோ³தமஸம்மாஸம்பு³த்³த⁴ஸ்ஸ ஸந்திகே பப்³ப³ஜிஸ்ஸாமீ’’தி. ஸாபி கோ² வண்ணதா³ஸீ தங் கோலாஹலஸத்³த³ங் ஸுத்வா ‘‘கிங்ஸத்³தோ³ நாமேஸோ’’தி புச்சி²த்வா தங் பவத்திங் ஸுத்வா வேகே³ன ஓதரித்வா ‘‘உஸ்ஸரத², உஸ்ஸரத², ஸாமீ, மங் ராஜபுரிஸானங் த³ட்டு²ங் தே³தா²’’தி அத்தானங் த³ஸ்ஸேஸி. ராஜபுரிஸா தங் தி³ஸ்வா மாதரங் படிச்சா²பெத்வா ஸெட்டி²புத்தங் முஞ்சித்வா பக்கமிங்ஸு. ஸோ ஸஹாயகபரிவுதோவ நதி³ங் க³ந்த்வா ஸஸீஸங் ந்ஹாயித்வா கே³ஹங் க³ந்த்வா பு⁴த்தபாதராஸோ மாதாபிதரோ வந்தி³த்வா பப்³ப³ஜ்ஜங் அனுஜானாபெத்வா சீவரஸாடகே ஆதா³ய மஹந்தேன பரிவாரேன ஸத்து² ஸந்திகங் க³ந்த்வா வந்தி³த்வா பப்³ப³ஜ்ஜங் யாசித்வா பப்³ப³ஜ்ஜஞ்ச உபஸம்பத³ஞ்ச லபி⁴த்வா அவிஸ்ஸட்ட²கம்மட்டா²னோ விபஸ்ஸனங் வட்³டெ⁴த்வா ந சிரஸ்ஸேவ அரஹத்தே பதிட்டா²ஸி.

அதே²கதி³வஸங் த⁴ம்மஸபா⁴யங் ஸன்னிபதிதா பி⁴க்கூ² ‘‘ஆவுஸோ, உத்தரஸெட்டி²புத்தோ அத்தனோ ப⁴யே உப்பன்னே ஸாஸனஸ்ஸ கு³ணங் ஜானித்வா ‘இமம்ஹா து³க்கா² முச்சமானோ பப்³ப³ஜிஸ்ஸாமீ’தி சிந்தெத்வா தேன ஸுசிந்திதேன மரணமுத்தோ சேவ, பப்³ப³ஜிதோ ச அக்³க³ப²லே பதிட்டி²தோ’’தி தஸ்ஸ கு³ணகத²ங் கதே²ஸுங். ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, உத்தரஸெட்டி²புத்தோவ அத்தனோ ப⁴யே உப்பன்னே ‘இமினா உபாயேன இமம்ஹா து³க்கா² முச்சிஸ்ஸாமீ’தி சிந்தெத்வா மரணப⁴யா முத்தோ, அதீதே பண்டி³தாபி அத்தனோ ப⁴யே உப்பன்னே ‘இமினா உபாயேன இமம்ஹா து³க்கா² முச்சிஸ்ஸாமா’தி சிந்தெத்வா மரணப⁴யதோ முச்சிங்ஸுயேவா’’தி வத்வா அதீதங் ஆஹரி.

அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ சுதிபடிஸந்தி⁴வஸேன பரிவத்தந்தோ வட்டகயோனியங் நிப்³ப³த்தி. ததா³ ஏகோ வட்டகலுத்³த³கோ அரஞ்ஞா ப³ஹூ வட்டகே ஆஹரித்வா கே³ஹே ட²பெத்வா கோ³சரங் த³த்வா மூலங் க³ஹெத்வா ஆக³தாக³தானங் ஹத்தே² வட்டகே விக்கிணந்தோ ஜீவிகங் கப்பேதி. ஸோ ஏகதி³வஸங் ப³ஹூஹி வட்டகேஹி ஸத்³தி⁴ங் போ³தி⁴ஸத்தம்பி க³ஹெத்வா ஆனேஸி. போ³தி⁴ஸத்தோ சிந்தேஸி ‘‘ஸசாஹங் இமினா தி³ன்னங் கோ³சரஞ்ச பானீயஞ்ச பரிபு⁴ஞ்ஜிஸ்ஸாமி, அயங் மங் க³ஹெத்வா ஆக³தானங் மனுஸ்ஸானங் த³ஸ்ஸதி. ஸசே பன ந பரிபு⁴ஞ்ஜிஸ்ஸாமி, அஹங் மிலாயிஸ்ஸாமி, அத² மங் மிலாயந்தங் தி³ஸ்வா மனுஸ்ஸா ந க³ண்ஹிஸ்ஸந்தி. ஏவங் மே ஸொத்தி² ப⁴விஸ்ஸதி, இமங் உபாயங் கரிஸ்ஸாமீ’’தி. ஸோ ததா² கரொந்தோ மிலாயித்வா அட்டி²சம்மமத்தோ அஹோஸி. மனுஸ்ஸா தங் தி³ஸ்வா ந க³ண்ஹிங்ஸு. லுத்³த³கோ போ³தி⁴ஸத்தங் ட²பெத்வா ஸேஸேஸு வட்டகேஸு பரிக்கீ²ணேஸு பச்சி²ங் நீஹரித்வா த்³வாரே ட²பெத்வா போ³தி⁴ஸத்தங் ஹத்த²தலே கத்வா ‘‘கிங் நு கோ² அயங் வட்டகோ’’தி சிந்தெத்வா ஓலோகேதுங் ஆரத்³தோ⁴. அத²ஸ்ஸ பமத்தபா⁴வங் ஞத்வா போ³தி⁴ஸத்தோ பக்கே² பஸாரெத்வா உப்பதித்வா அரஞ்ஞமேவ க³தோ. அஞ்ஞே வட்டகா தங் தி³ஸ்வா ‘‘கிங் நு கோ² ந பஞ்ஞாயஸி, கஹங் க³தோஸீ’’தி புச்சி²த்வா ‘‘லுத்³த³கேன க³ஹிதொம்ஹீ’’தி வுத்தே ‘‘கிந்தி கத்வா முத்தோஸீ’’தி புச்சி²ங்ஸு. போ³தி⁴ஸத்தோ ‘‘அஹங் தேன தி³ன்னங் கோ³சரங் அக்³க³ஹெத்வா பானீயங் அபிவித்வா உபாயசிந்தாய முத்தோ’’தி வத்வா இமங் கா³த²மாஹ –

118.

‘‘நாசிந்தயந்தோ புரிஸோ, விஸேஸமதி⁴க³ச்ச²தி;

சிந்திதஸ்ஸ ப²லங் பஸ்ஸ, முத்தொஸ்மி வத⁴ப³ந்த⁴னா’’தி.

தத்தா²யங் பிண்ட³த்தோ² – புரிஸோ து³க்க²ங் பத்வா ‘‘இமினா நாம உபாயேன இமம்ஹா து³க்கா² முச்சிஸ்ஸாமீ’’தி அசிந்தயந்தோ அத்தனோ து³க்கா² மொக்க²ஸங்கா²தங் விஸேஸங் நாதி⁴க³ச்ச²தி. இதா³னி பன மயா சிந்திதகம்மஸ்ஸ ப²லங் பஸ்ஸ. தேனேவ உபாயேன முத்தொஸ்மி வத⁴ப³ந்த⁴னா, மரணதோ ச ப³ந்த⁴னதோ ச முத்தொஸ்மி அஹந்தி. ஏவங் போ³தி⁴ஸத்தோ அத்தனா கதகாரணங் ஆசிக்கி².

ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ மரணமுத்தோ வட்டகோ அஹமேவ அஹோஸி’’ந்தி.

வட்டஜாதகவண்ணனா அட்ட²மா.