| Library / Tipiṭaka / তিপিটক • Tipiṭaka / ৰিনযৰিনিচ্ছয-টীকা • Vinayavinicchaya-ṭīkā |
ৰত্তক্খন্ধককথাৰণ্ণনা
Vattakkhandhakakathāvaṇṇanā
২৯১৪-৫. আগন্তুকো চ আৰাসিকো চ পিণ্ডচারিকো চ সেনাসনঞ্চ আরঞ্ঞকো চ অনুমোদনা চাতি ৰিগ্গহো, তাসু ৰত্তানি, ইতরীতরযোগদ্ৰন্দসমাসস্স উত্তরপদলিঙ্গত্তা ইত্থি লিঙ্গনিদ্দেসো। ভত্তে ভত্তগ্গে, উত্তরপদলোপো। ‘‘ভত্তে’’তিআদীহি পদেহি ‘‘ৰত্তানী’’তি পচ্চেকং যোজেতব্বং।
2914-5. Āgantuko ca āvāsiko ca piṇḍacāriko ca senāsanañca āraññako ca anumodanā cāti viggaho, tāsu vattāni, itarītarayogadvandasamāsassa uttarapadaliṅgattā itthi liṅganiddeso. Bhatte bhattagge, uttarapadalopo. ‘‘Bhatte’’tiādīhi padehi ‘‘vattānī’’ti paccekaṃ yojetabbaṃ.
আচরিযো চ উপজ্ঝাযকো চ সিস্সো চ সদ্ধিৰিহারিকো চ, তেসং ৰত্তানীতি ৰিগ্গহো। সব্বসোতি সব্বাৰযৰভেদেহি। চতুদ্দসেৰাতি অৰযৰভেদেহি বহুৰিধানিপি ৰত্তানি ৰিসযভেদেন চুদ্দস এৰ ৰুত্তানি। ৰিসুদ্ধচিত্তেনাতি সৰাসনসকলসংকিলেসপ্পহানতো অচ্চন্তপরিসুদ্ধচিত্তসন্তানেন । ৰিনাযকেনাতি সত্তে ৰিনেতীতি ৰিনাযকো, অনুত্তরপুরিসদম্মসারথিভাৰেন দম্মদেৰব্রহ্মনাগাদিকে সত্তে নানাৰিধেন ৰিনযনুপাযেন দমেতীতি অত্থো। অথ ৰা ৰিগতো নাযকো অস্সাতি ৰিনাযকো, তেন।
Ācariyo ca upajjhāyako ca sisso ca saddhivihāriko ca, tesaṃ vattānīti viggaho. Sabbasoti sabbāvayavabhedehi. Catuddasevāti avayavabhedehi bahuvidhānipi vattāni visayabhedena cuddasa eva vuttāni. Visuddhacittenāti savāsanasakalasaṃkilesappahānato accantaparisuddhacittasantānena . Vināyakenāti satte vinetīti vināyako, anuttarapurisadammasārathibhāvena dammadevabrahmanāgādike satte nānāvidhena vinayanupāyena dametīti attho. Atha vā vigato nāyako assāti vināyako, tena.
২৯১৬. আরামন্তি এত্থ তংসমীপে তব্বোহারো। যথাহ ‘‘ইদানি ‘আরামং পৰিসিস্সামী’তি ইমিনা উপচারসীমসমীপং দস্সেতি, তস্মা উপচারসীমং পত্ৰা উপাহনাওমুঞ্চনাদি সব্বং কাতব্ব’’ন্তি (চূল়ৰ॰ অট্ঠ॰ ৩৫৭)। ‘‘পন অপনেতব্ব’’ন্তি পদচ্ছেদো। মুঞ্চিতব্বাতি উপাহনা পাদতো অপনেতব্বা।
2916.Ārāmanti ettha taṃsamīpe tabbohāro. Yathāha ‘‘idāni ‘ārāmaṃ pavisissāmī’ti iminā upacārasīmasamīpaṃ dasseti, tasmā upacārasīmaṃ patvā upāhanāomuñcanādi sabbaṃ kātabba’’nti (cūḷava. aṭṭha. 357). ‘‘Pana apanetabba’’nti padacchedo. Muñcitabbāti upāhanā pādato apanetabbā.
২৯১৭. ওগুণ্ঠনন্তি সসীসপারুপনং। সীসে চীৰরমেৰ ৰা ন কাতব্বন্তি সম্বন্ধো। তেনাতি আগন্তুকেন। পানীযৰারিনাতি পাতব্বজলেন।
2917.Oguṇṭhananti sasīsapārupanaṃ. Sīse cīvarameva vā na kātabbanti sambandho. Tenāti āgantukena. Pānīyavārināti pātabbajalena.
২৯১৮. পুচ্ছিত্ৰাতি ৰস্সগণনং পুচ্ছিত্ৰা। ৰিহারে ৰুড্ঢভিক্খুনো আগন্তুকেন ভিক্খুনা ৰন্দিতব্বাৰ। কালেতি কালস্সেৰ। তেন আগন্তুকেন ভিক্খুনা সেনাসনং ‘‘ময্হং কতরং সেনাসনং পাপুণাতী’’তি পুচ্ছিতব্বঞ্চাতি যোজনা।
2918.Pucchitvāti vassagaṇanaṃ pucchitvā. Vihāre vuḍḍhabhikkhuno āgantukena bhikkhunā vanditabbāva. Kāleti kālasseva. Tena āgantukena bhikkhunā senāsanaṃ ‘‘mayhaṃ kataraṃ senāsanaṃ pāpuṇātī’’ti pucchitabbañcāti yojanā.
২৯১৯. ‘‘পুচ্ছিতব্ব’’ন্তি ইদং ‘‘ৰচ্চট্ঠান’’ন্তিআদিকেহি সব্বেহি উপযোগন্তপদেহি পচ্চেকং যোজেতব্বং। পানীযমেৰ চাতি ‘‘কিং ইমিস্সা পোক্খরণিযা পানীযমেৰ পিৰন্তি, উদাহু নহানাদিপরিভোগম্পি করোন্তী’’তি (চূল়ৰ॰ অট্ঠ॰ ৩৫৭) অট্ঠকথাগতনযেন পানীযঞ্চ। তথা পরিভোজনীযঞ্চ। সঙ্ঘকতিকন্তি ‘‘কেসুচি ঠানেসু ৰাল়মিগা ৰা অমনুস্সা ৰা হোন্তি, তস্মা কং কালং পৰিসিতব্বং, কং কালং নিক্খমিতব্ব’’ন্তি অট্ঠকথাগতনযেন সঙ্ঘস্স কতিকসণ্ঠানঞ্চ। গোচরাদিকন্তি এত্থ চ ‘‘গোচরো পুচ্ছিতব্বোতি ‘গোচরগামো আসন্নে, উদাহু দূরে, কালস্সেৰ চ পিণ্ডায চরিতব্বং, উদাহু নো’তি এৰং ভিক্খাচারো পুচ্ছিতব্বো’’তি (চূল়ৰ॰ অট্ঠ॰ ৩৫৭) ৰুত্তনযেন গোচরঞ্চ। আদি-সদ্দেন অগোচরং গহিতং। ‘‘অগোচরো নাম মিচ্ছাদিট্ঠিকানং ৰা গামো পরিচ্ছিন্নভিক্খো ৰা গামো, যত্থ একস্স ৰা দ্ৰিন্নং ৰা ভিক্খা দিয্যতি, সোপি পুচ্ছিতব্বো’’তি (চূল়ৰ॰ অট্ঠ॰ ৩৫৭) ৰুত্তনযেন অগোচরঞ্চ।
2919. ‘‘Pucchitabba’’nti idaṃ ‘‘vaccaṭṭhāna’’ntiādikehi sabbehi upayogantapadehi paccekaṃ yojetabbaṃ. Pānīyameva cāti ‘‘kiṃ imissā pokkharaṇiyā pānīyameva pivanti, udāhu nahānādiparibhogampi karontī’’ti (cūḷava. aṭṭha. 357) aṭṭhakathāgatanayena pānīyañca. Tathā paribhojanīyañca. Saṅghakatikanti ‘‘kesuci ṭhānesu vāḷamigā vā amanussā vā honti, tasmā kaṃ kālaṃ pavisitabbaṃ, kaṃ kālaṃ nikkhamitabba’’nti aṭṭhakathāgatanayena saṅghassa katikasaṇṭhānañca. Gocarādikanti ettha ca ‘‘gocaro pucchitabboti ‘gocaragāmo āsanne, udāhu dūre, kālasseva ca piṇḍāya caritabbaṃ, udāhu no’ti evaṃ bhikkhācāro pucchitabbo’’ti (cūḷava. aṭṭha. 357) vuttanayena gocarañca. Ādi-saddena agocaraṃ gahitaṃ. ‘‘Agocaro nāma micchādiṭṭhikānaṃ vā gāmo paricchinnabhikkho vā gāmo, yattha ekassa vā dvinnaṃ vā bhikkhā diyyati, sopi pucchitabbo’’ti (cūḷava. aṭṭha. 357) vuttanayena agocarañca.
২৯২০. এৰং আগন্তুকৰত্তং দস্সেত্ৰা ইদানি আৰাসিকৰত্তং দস্সেতুমাহ ‘‘ৰুড্ঢ’’ন্তিআদি। পচ্চুগ্গন্ত্ৰা পত্তঞ্চ চীৰরঞ্চ পটিগ্গহেতব্বন্তি যোজনা। চ-সদ্দো লুত্তনিদ্দিট্ঠো।
2920. Evaṃ āgantukavattaṃ dassetvā idāni āvāsikavattaṃ dassetumāha ‘‘vuḍḍha’’ntiādi. Paccuggantvā pattañca cīvarañca paṭiggahetabbanti yojanā. Ca-saddo luttaniddiṭṭho.
২৯২১. তস্সাতি আগন্তুকস্স। পাদোদকঞ্চাতি চ-সদ্দেন ধোতাধোতপাদা যত্থ ঠপীযন্তি, তং পাদপীঠং, পাদকথলিকঞ্চ উপনিক্খিপিতব্বন্তি এতং গহিতং। পুচ্ছিতব্বঞ্চ ৰারিনাতি ‘‘পানীযেন পুচ্ছন্তেন সচে সকিং আনীতং পানীযং সব্বং পিৰতি, ‘পুন আনেমী’তি পুচ্ছিতব্বোযেৰা’’তি ৰুত্তনযেন পানীযেন পুচ্ছিতব্বো। ইধ চ-সদ্দেন –
2921.Tassāti āgantukassa. Pādodakañcāti ca-saddena dhotādhotapādā yattha ṭhapīyanti, taṃ pādapīṭhaṃ, pādakathalikañca upanikkhipitabbanti etaṃ gahitaṃ. Pucchitabbañca vārināti ‘‘pānīyena pucchantena sace sakiṃ ānītaṃ pānīyaṃ sabbaṃ pivati, ‘puna ānemī’ti pucchitabboyevā’’ti vuttanayena pānīyena pucchitabbo. Idha ca-saddena –
‘‘অপিচ বীজনেনপি বীজিতব্বো, বীজন্তেন সকিং পাদপিট্ঠিযং বীজিত্ৰা সকিং মজ্ঝে, সকিং সীসে বীজিতব্বং, ‘অলং হোতূ’তি ৰুত্তেন ততো মন্দতরং বীজিতব্বং। পুন ‘অল’ন্তি ৰুত্তেন ততো মন্দতরং বীজিতব্বং। ততিযৰারং ৰুত্তেন বীজনী ঠপেতব্বা। পাদাপিস্স ধোৰিতব্বা, ধোৰিত্ৰা সচে অত্তনো তেলং অত্থি, তেন মক্খেতব্বা। নো চে অত্থি, তস্স সন্তকেন মক্খেতব্বা’’তি (চূল়ৰ॰ অট্ঠ॰ ৩৫৯) –
‘‘Apica bījanenapi bījitabbo, bījantena sakiṃ pādapiṭṭhiyaṃ bījitvā sakiṃ majjhe, sakiṃ sīse bījitabbaṃ, ‘alaṃ hotū’ti vuttena tato mandataraṃ bījitabbaṃ. Puna ‘ala’nti vuttena tato mandataraṃ bījitabbaṃ. Tatiyavāraṃ vuttena bījanī ṭhapetabbā. Pādāpissa dhovitabbā, dhovitvā sace attano telaṃ atthi, tena makkhetabbā. No ce atthi, tassa santakena makkhetabbā’’ti (cūḷava. aṭṭha. 359) –
ৰুত্তৰত্তানি সঙ্গণ্হাতি।
Vuttavattāni saṅgaṇhāti.
২৯২২-৩. ৰন্দেয্যোতি ৰুড্ঢাগন্তুকো ৰন্দিতব্বো। পঞ্ঞপেতব্বন্তি ‘‘কত্থ ময্হং সেনাসনং পাপুণাতী’’তি পুচ্ছিতেন সেনাসনং পঞ্ঞপেতব্বং, ‘‘এতং সেনাসনং তুম্হাকং পাপুণাতী’’তি এৰং আচিক্খিতব্বন্তি অত্থো। ‘‘ৰত্তব্বো’’তি ইদং ‘‘অজ্ঝাৰুত্থমৰুত্থ’’ন্তিআদীহি পদেহি তংতংলিঙ্গৰচনানুরূপেন পরিৰত্তেত্ৰা পচ্চেকং যোজেতব্বং। অজ্ঝাৰুত্থন্তি পঞ্ঞত্তসেনাসনস্স ভিক্খূহি পঠমং ৰুত্থভাৰং। অৰুত্থং ৰাতি চীৰরকালং তস্মিং ভিক্খূহি অনজ্ঝাৰুত্থভাৰং ৰা। গোচরাগোচরং ৰুত্তমেৰ।
2922-3.Vandeyyoti vuḍḍhāgantuko vanditabbo. Paññapetabbanti ‘‘kattha mayhaṃ senāsanaṃ pāpuṇātī’’ti pucchitena senāsanaṃ paññapetabbaṃ, ‘‘etaṃ senāsanaṃ tumhākaṃ pāpuṇātī’’ti evaṃ ācikkhitabbanti attho. ‘‘Vattabbo’’ti idaṃ ‘‘ajjhāvutthamavuttha’’ntiādīhi padehi taṃtaṃliṅgavacanānurūpena parivattetvā paccekaṃ yojetabbaṃ. Ajjhāvutthanti paññattasenāsanassa bhikkhūhi paṭhamaṃ vutthabhāvaṃ. Avutthaṃ vāti cīvarakālaṃ tasmiṃ bhikkhūhi anajjhāvutthabhāvaṃ vā. Gocarāgocaraṃ vuttameva.
সেক্খকুলানি চাতি লদ্ধসেক্খসম্মুতিকানি কুলানি চ ৰত্তব্বানি। ‘‘পৰেসে নিক্খমে কালো’’তি ইদং ‘‘সঙ্ঘকতিক’’ন্তি এত্থ ৰুত্তত্থমেৰ। পানীযাদিকন্তি আদি-সদ্দেন পরিভোজনীযকত্তরযট্ঠীনং আচিক্খনং সঙ্গণ্হাতি।
Sekkhakulāni cāti laddhasekkhasammutikāni kulāni ca vattabbāni. ‘‘Pavese nikkhame kālo’’ti idaṃ ‘‘saṅghakatika’’nti ettha vuttatthameva. Pānīyādikanti ādi-saddena paribhojanīyakattarayaṭṭhīnaṃ ācikkhanaṃ saṅgaṇhāti.
২৯২৪. যথানিসিন্নেনেৰাতি অত্তনা নিসিন্নট্ঠানেযেৰ নিসিন্নেন। অস্সাতি নৰকস্স।
2924.Yathānisinnenevāti attanā nisinnaṭṭhāneyeva nisinnena. Assāti navakassa.
২৯২৫. ‘‘অত্র পত্তং ঠপেহি, ইদমাসনং নিসীদাহী’’তি ইচ্চেৰং ইমিনা পকারেন সব্বং ৰত্তব্বন্তি যোজনা। দেয্যং সেনাসনম্পি চাতি সেনাসনঞ্চ দাতব্বং। চ-সদ্দেন ‘‘অৰুত্থং ৰা অজ্ঝাৰুত্থং ৰা আচিক্খিতব্ব’’ন্তিআদিনা ৰুত্তং সম্পিণ্ডেতি। মহাআৰাসেপি অত্তনো সন্তিকং সম্পত্তস্স আগন্তুকস্স ৰত্তং অকাতুং ন লব্ভতি।
2925. ‘‘Atra pattaṃ ṭhapehi, idamāsanaṃ nisīdāhī’’ti iccevaṃ iminā pakārena sabbaṃ vattabbanti yojanā. Deyyaṃ senāsanampi cāti senāsanañca dātabbaṃ. Ca-saddena ‘‘avutthaṃ vā ajjhāvutthaṃ vā ācikkhitabba’’ntiādinā vuttaṃ sampiṇḍeti. Mahāāvāsepi attano santikaṃ sampattassa āgantukassa vattaṃ akātuṃ na labbhati.
২৯২৬. ‘‘মাতিকায নিদ্দিট্ঠক্কমেনেৰ ৰত্তানি কাতব্বানি, উদাহু যথানুপ্পত্তিৰসেনা’’তি কোচি মঞ্ঞেয্যাতি মাতিকাক্কমেনেৰ কাতব্বন্তি নিযমো নত্থি, যথানুপ্পত্তৰসেনেৰ কাতব্বন্তি ৰিঞ্ঞাপেতুং মাতিকাক্কমমনাদিযিত্ৰা গমিকৰত্তং আরদ্ধং। অথ ৰা ৰত্তিচ্ছানুপুব্বকত্তা সদ্দপযোগস্স মাতিকাক্কমমনাদিযিত্ৰা যথিচ্ছং নিদ্দেসো কতোতি ৰেদিতব্বোতি। দারুমত্তিকভণ্ডানীতি মঞ্চপীঠাদীনি চেৰ রজনভাজনানি চ। পটিসামেত্ৰাতি গুত্তট্ঠানে ঠপেত্ৰা। আৰসথম্পি থকেত্ৰাতি আৰসথে দ্ৰারকৰাটাদীনি চ থকেত্ৰা।
2926. ‘‘Mātikāya niddiṭṭhakkameneva vattāni kātabbāni, udāhu yathānuppattivasenā’’ti koci maññeyyāti mātikākkameneva kātabbanti niyamo natthi, yathānuppattavaseneva kātabbanti viññāpetuṃ mātikākkamamanādiyitvā gamikavattaṃ āraddhaṃ. Atha vā vatticchānupubbakattā saddapayogassa mātikākkamamanādiyitvā yathicchaṃ niddeso katoti veditabboti. Dārumattikabhaṇḍānīti mañcapīṭhādīni ceva rajanabhājanāni ca. Paṭisāmetvāti guttaṭṭhāne ṭhapetvā. Āvasathampi thaketvāti āvasathe dvārakavāṭādīni ca thaketvā.
২৯২৭. আপুচ্ছিত্ৰাপীতি ভিক্খুস্স ৰা সামণেরস্স ৰা আরামিকস্স ৰা ‘‘ইমং পটিজগ্গাহী’’তি নিয্যাদেত্ৰা ৰা। পুচ্ছিতব্বে অসন্তেপীতি এত্থ পি-সদ্দো পন-সদ্দত্থো। গোপেত্ৰা ৰাপি সাধুকন্তি ‘‘চতূসু পাসাণেসু মঞ্চং পঞ্ঞপেত্ৰা মঞ্চে মঞ্চং আরোপেত্ৰা’’তিআদিনা (চূল়ৰ॰ ৩৬০) ৰুত্তনযেন সম্মা পটিসামেত্ৰা গন্তব্বন্তি যোজনা।
2927.Āpucchitvāpīti bhikkhussa vā sāmaṇerassa vā ārāmikassa vā ‘‘imaṃ paṭijaggāhī’’ti niyyādetvā vā. Pucchitabbe asantepīti ettha pi-saddo pana-saddattho. Gopetvā vāpi sādhukanti ‘‘catūsu pāsāṇesu mañcaṃ paññapetvā mañce mañcaṃ āropetvā’’tiādinā (cūḷava. 360) vuttanayena sammā paṭisāmetvā gantabbanti yojanā.
২৯২৮. পিণ্ডচারিকৰত্তং দস্সেতুমাহ ‘‘সহসা’’তিআদি। পিণ্ডচারিকো ভিক্খু অন্তরঘরং পৰিসন্তো সহসা ন পৰিসে সীঘং ন পৰিসেয্য, নিক্খমন্তো সহসা ন নিক্খমে সীঘং ন নিক্খমেয্য, ভিক্খুসারুপ্পেন পৰিসেয্য, নিক্খমেয্য চ। পিণ্ডচারিনা ভিক্খুনা গেহদ্ৰারং সম্পত্তেন অতিদূরে ন ঠাতব্বং নিব্বকোসতো অতিদূরট্ঠানে ন ঠাতব্বং। অচ্চাসন্নে ন ঠাতব্বং নিব্বকোসতো আসন্নতরে ঠানে ন ঠাতব্বং।
2928. Piṇḍacārikavattaṃ dassetumāha ‘‘sahasā’’tiādi. Piṇḍacāriko bhikkhu antaragharaṃ pavisanto sahasā na pavise sīghaṃ na paviseyya, nikkhamanto sahasā na nikkhame sīghaṃ na nikkhameyya, bhikkhusāruppena paviseyya, nikkhameyya ca. Piṇḍacārinā bhikkhunā gehadvāraṃ sampattena atidūre na ṭhātabbaṃ nibbakosato atidūraṭṭhāne na ṭhātabbaṃ. Accāsanne na ṭhātabbaṃ nibbakosato āsannatare ṭhāne na ṭhātabbaṃ.
২৯২৯. উচ্চারেত্ৰাতি উপনামেত্ৰা। ভাজনন্তি পত্তং। দক্খিণেন পণামেত্ৰাতি দক্খিণেন হত্থেন উপনামেত্ৰা। ভিক্খং গণ্হেয্যাতি এত্থ ‘‘উভোহি হত্থেহি পটিগ্গহেত্ৰা’’তি সেসো। যথাহ – ‘‘উভোহি হত্থেহি পত্তং পটিগ্গহেত্ৰা ভিক্খা গহেতব্বা’’তি (চূল়ৰ॰ ৩৬৬)।
2929.Uccāretvāti upanāmetvā. Bhājananti pattaṃ. Dakkhiṇena paṇāmetvāti dakkhiṇena hatthena upanāmetvā. Bhikkhaṃ gaṇheyyāti ettha ‘‘ubhohi hatthehi paṭiggahetvā’’ti seso. Yathāha – ‘‘ubhohi hatthehi pattaṃ paṭiggahetvā bhikkhā gahetabbā’’ti (cūḷava. 366).
২৯৩০. সূপং দাতুকামা ৰা অদাতুকামা ৰা ইতি মুহুত্তকং সল্লক্খেয্য তিট্ঠেয্য। অন্তরাতি ভিক্খাদানসমযে। ন ভিক্খাদাযিকাতি ইত্থী ৰা হোতু পুরিসো ৰা, ভিক্খাদানসমযে মুখং ন ওলোকেতব্বন্তি।
2930. Sūpaṃ dātukāmā vā adātukāmā vā iti muhuttakaṃ sallakkheyya tiṭṭheyya. Antarāti bhikkhādānasamaye. Nabhikkhādāyikāti itthī vā hotu puriso vā, bhikkhādānasamaye mukhaṃ na oloketabbanti.
২৯৩১. পিণ্ডচারিকৰত্তং দস্সেত্ৰা আরঞ্ঞিকৰত্তং দস্সেতুমাহ ‘‘পানীযাদী’’তিআদি। পানীযাদীতি আদি-সদ্দেন পরিভোজনীযঅগ্গিঅরণিসহিতকত্তরযট্ঠীনং গহণং। তত্রাযং ৰিনিচ্ছযো – পানীযং উপট্ঠাপেতব্বন্তি সচে ভাজনানি নপ্পহোন্তি, পানীযমেৰ পরিভোজনীযম্পি কত্ৰা উপট্ঠাপেতব্বং। ভাজনং অলভন্তেন ৰেল়ুনাল়িকাযপি উপট্ঠাপেতব্বং। তম্পি অলভন্তস্স যথা সমীপে খুদ্দকআৰাটো হোতি, এৰং কাতব্বং। অরণিসহিতে অসতি অগ্গিং অকাতুম্পি চ ৰট্টতি। যথা চ আরঞ্ঞিকস্স, এৰং কন্তারপটিপন্নস্সাপি অরণিসহিতং ইচ্ছিতব্বং। গণৰাসিনো পন তেন ৰিনাপি ৰট্টতীতি।
2931. Piṇḍacārikavattaṃ dassetvā āraññikavattaṃ dassetumāha ‘‘pānīyādī’’tiādi. Pānīyādīti ādi-saddena paribhojanīyaaggiaraṇisahitakattarayaṭṭhīnaṃ gahaṇaṃ. Tatrāyaṃ vinicchayo – pānīyaṃ upaṭṭhāpetabbanti sace bhājanāni nappahonti, pānīyameva paribhojanīyampi katvā upaṭṭhāpetabbaṃ. Bhājanaṃ alabhantena veḷunāḷikāyapi upaṭṭhāpetabbaṃ. Tampi alabhantassa yathā samīpe khuddakaāvāṭo hoti, evaṃ kātabbaṃ. Araṇisahite asati aggiṃ akātumpi ca vaṭṭati. Yathā ca āraññikassa, evaṃ kantārapaṭipannassāpi araṇisahitaṃ icchitabbaṃ. Gaṇavāsino pana tena vināpi vaṭṭatīti.
নক্খত্তন্তি অস্সযুজাদিসত্তৰীসতিৰিধং নক্খত্তং জানিতব্বন্তি সম্বন্ধো। কথং জানিতব্বন্তি আহ ‘‘তেন যোগো চা’’তি, তেন নক্খত্তেন চন্দস্স যোগো ঞাতব্বোতি অত্থো। জানিতব্বা দিসাপি চাতি অরঞ্ঞে ৰিহরন্তেন অট্ঠপি দিসা অসম্মোহতো জানিতব্বা।
Nakkhattanti assayujādisattavīsatividhaṃ nakkhattaṃ jānitabbanti sambandho. Kathaṃ jānitabbanti āha ‘‘tena yogo cā’’ti, tena nakkhattena candassa yogo ñātabboti attho. Jānitabbā disāpi cāti araññe viharantena aṭṭhapi disā asammohato jānitabbā.
২৯৩২. অঞ্ঞৰত্তং দস্সেতুমাহ ‘‘ৰচ্চপস্সাৰতিত্থানী’’তিআদি। পটিপাটিযা ভৰন্তীতি গতানুক্কমেন সেৰিতব্বা ভৰন্তি। যথাহ – ‘‘ৰচ্চকুটিযং, পস্সাৰট্ঠানে, ন্হানতিত্থেতি তীসুপি আগতপটিপাটিযেৰ পমাণ’’ন্তি (চূল়ৰ॰ অট্ঠ॰ ৩৭৩)। যথাৰুড্ঢং করোন্তস্সাতি গতপটিপাটিং ৰিনা ৰুড্ঢপটিপাটিযা করোন্তস্স।
2932. Aññavattaṃ dassetumāha ‘‘vaccapassāvatitthānī’’tiādi. Paṭipāṭiyā bhavantīti gatānukkamena sevitabbā bhavanti. Yathāha – ‘‘vaccakuṭiyaṃ, passāvaṭṭhāne, nhānatittheti tīsupi āgatapaṭipāṭiyeva pamāṇa’’nti (cūḷava. aṭṭha. 373). Yathāvuḍḍhaṃ karontassāti gatapaṭipāṭiṃ vinā vuḍḍhapaṭipāṭiyā karontassa.
২৯৩৩. ৰচ্চকুটিং পৰিসন্তো সহসা ন পৰিসেয্য। উব্ভজিত্ৰাতি চীৰরং উক্খিপিত্ৰা।
2933. Vaccakuṭiṃ pavisanto sahasā na paviseyya. Ubbhajitvāti cīvaraṃ ukkhipitvā.
২৯৩৪. নিত্থুনন্তেন ভিক্খুনা ৰচ্চং ন কাতব্বন্তি যোজনা। ‘‘ৰচ্চস্স দুন্নিগ্গমনেন উপহতো হুত্ৰা নিত্থুনতি চে, ন দোসো’’তি সিক্খাভাজনৰিনিচ্ছযে ৰুত্তং। দণ্ডকট্ঠং খাদতো ৰচ্চং করোতো ভিক্খুনো দুক্কটং হোতীতি যোজনা।
2934. Nitthunantena bhikkhunā vaccaṃ na kātabbanti yojanā. ‘‘Vaccassa dunniggamanena upahato hutvā nitthunati ce, na doso’’ti sikkhābhājanavinicchaye vuttaṃ. Daṇḍakaṭṭhaṃ khādato vaccaṃ karoto bhikkhuno dukkaṭaṃ hotīti yojanā.
২৯৩৬. খরেনাতি ফরুসেন ৰা ফালিতকট্ঠেন ৰা গণ্ঠিকেন ৰা কণ্টকেন ৰা সুসিরেন ৰা পূতিনা ৰা দণ্ডেন ন অৰলেখেয্য ন পুঞ্ছেয্য। ন কট্ঠং ৰচ্চকূপকে ছড্ডেয্যাতি তং কট্ঠং ৰচ্চকূপে ন ছড্ডেয্য। পস্সাৰদোণিযা খেল়ং ন পাতেয্যাতি যোজনা।
2936.Kharenāti pharusena vā phālitakaṭṭhena vā gaṇṭhikena vā kaṇṭakena vā susirena vā pūtinā vā daṇḍena na avalekheyya na puñcheyya. Na kaṭṭhaṃ vaccakūpake chaḍḍeyyāti taṃ kaṭṭhaṃ vaccakūpe na chaḍḍeyya. Passāvadoṇiyā kheḷaṃ na pāteyyāti yojanā.
২৯৩৭. পাদুকাসূতি ৰচ্চপস্সাৰপাদুকাসু। নিক্খমনে নিক্খমনকালে। তত্থেৰাতি ৰচ্চপস্সাৰপাদুকাস্ৰেৰ। পটিচ্ছাদেয্যাতি উক্খিত্তং চীৰরং ওতারেত্ৰা সরীরং পটিচ্ছাদেয্য।
2937.Pādukāsūti vaccapassāvapādukāsu. Nikkhamane nikkhamanakāle. Tatthevāti vaccapassāvapādukāsveva. Paṭicchādeyyāti ukkhittaṃ cīvaraṃ otāretvā sarīraṃ paṭicchādeyya.
২৯৩৮. যো ৰচ্চং কত্ৰা সলিলে সতি সচে নাচমেয্য উদককিচ্চং ন করেয্য, তস্স দুক্কটং উদ্দিট্ঠন্তি যোজনা। মোহনাসিনাতি সৰাসনস্স মোহস্স, তেন সহজেকট্ঠপহানেকট্ঠানং সকলসংকিলেসানঞ্চ পহাযিনা আসৰক্খযঞাণেন সমুচ্ছিন্দতা মুনিনা সব্বঞ্ঞুনা সম্মাসম্বুদ্ধেন। ‘‘সলিলে সতী’’তি ইমিনা অসতি নিদ্দোসতং দীপেতি। যথাহ –
2938. Yo vaccaṃ katvā salile sati sace nācameyya udakakiccaṃ na kareyya, tassa dukkaṭaṃ uddiṭṭhanti yojanā. Mohanāsināti savāsanassa mohassa, tena sahajekaṭṭhapahānekaṭṭhānaṃ sakalasaṃkilesānañca pahāyinā āsavakkhayañāṇena samucchindatā muninā sabbaññunā sammāsambuddhena. ‘‘Salile satī’’ti iminā asati niddosataṃ dīpeti. Yathāha –
‘‘সতি উদকেতি এত্থ সচে উদকং অত্থি, পটিচ্ছন্নট্ঠানং পন নত্থি, ভাজনেন নীহরিত্ৰা আচমিতব্বং। ভাজনে অসতি পত্তেন নীহরিতব্বং। পত্তেপি অসতি অসন্তং নাম হোতি। ‘ইদং অতিৰিৰটং, পুরতো অঞ্ঞং উদকং ভৰিস্সতী’তি গতস্স উদকং অলভন্তস্সেৰ ভিক্খাচারৰেলা হোতি, কট্ঠেন ৰা কেনচি ৰা পুঞ্ছিত্ৰা গন্তব্বং, ভুঞ্জিতুম্পি অনুমোদনম্পি কাতুং ৰট্টতী’’তি (চূল়ৰ॰ অট্ঠ॰ ৩৭৩)।
‘‘Sati udaketi ettha sace udakaṃ atthi, paṭicchannaṭṭhānaṃ pana natthi, bhājanena nīharitvā ācamitabbaṃ. Bhājane asati pattena nīharitabbaṃ. Pattepi asati asantaṃ nāma hoti. ‘Idaṃ ativivaṭaṃ, purato aññaṃ udakaṃ bhavissatī’ti gatassa udakaṃ alabhantasseva bhikkhācāravelā hoti, kaṭṭhena vā kenaci vā puñchitvā gantabbaṃ, bhuñjitumpi anumodanampi kātuṃ vaṭṭatī’’ti (cūḷava. aṭṭha. 373).
২৯৩৯. সসদ্দন্তি উদকসদ্দং কত্ৰা। ‘‘পাসাণাদিট্ঠানে পহরিত্ৰা উদকং সদ্দাযতি চে, ন দোসো’’তি সিক্খাভাজনৰিনিচ্ছযে ৰুত্তং। চপু চপূতি চাতি তাদিসং অনুকরণং কত্ৰা নাচমেতব্বন্তি যোজনা। আচমিত্ৰাতি উদককিচ্চং কত্ৰা। সরাৰে আচমনভাজনে উদকং ন সেসেতব্বন্তি যোজনা, ইদং পন সব্বসাধারণট্ঠানং সন্ধায ৰুত্তং। যথাহ অট্ঠকথাযং –
2939.Sasaddanti udakasaddaṃ katvā. ‘‘Pāsāṇādiṭṭhāne paharitvā udakaṃ saddāyati ce, na doso’’ti sikkhābhājanavinicchaye vuttaṃ. Capu capūti cāti tādisaṃ anukaraṇaṃ katvā nācametabbanti yojanā. Ācamitvāti udakakiccaṃ katvā. Sarāve ācamanabhājane udakaṃ na sesetabbanti yojanā, idaṃ pana sabbasādhāraṇaṭṭhānaṃ sandhāya vuttaṃ. Yathāha aṭṭhakathāyaṃ –
‘‘আচমনসরাৰকেতি সব্বসাধারণট্ঠানং সন্ধাযেতং ৰুত্তং। তত্র হি অঞ্ঞে অঞ্ঞে আগচ্ছন্তি, তস্মা উদকং ন সেসেতব্বং। যং পন সঙ্ঘিকেপি ৰিহারে একদেসে নিবদ্ধগমনত্থায কতং ঠানং হোতি পুগ্গলিকট্ঠানং ৰা, তস্মিং ৰট্টতি। ৰিরেচনং পিৰিত্ৰা পুনপ্পুনং পৰিসন্তস্সাপি ৰট্টতিযেৰা’’তি (চূল়ৰ॰ অট্ঠ॰ ৩৭৪)।
‘‘Ācamanasarāvaketi sabbasādhāraṇaṭṭhānaṃ sandhāyetaṃ vuttaṃ. Tatra hi aññe aññe āgacchanti, tasmā udakaṃ na sesetabbaṃ. Yaṃ pana saṅghikepi vihāre ekadese nibaddhagamanatthāya kataṃ ṭhānaṃ hoti puggalikaṭṭhānaṃ vā, tasmiṃ vaṭṭati. Virecanaṃ pivitvā punappunaṃ pavisantassāpi vaṭṭatiyevā’’ti (cūḷava. aṭṭha. 374).
২৯৪০. ঊহতম্পীতি অঞ্ঞেন ৰা অত্তনা ৰা অসঞ্চিচ্চ ঊহতং মলেন দূসিতট্ঠানং। অধোৰিত্ৰাতি জলে সতি অসোধেত্ৰা জলে অসতি কট্ঠেন ৰা কেনচি ৰা পুঞ্ছিত্ৰা গন্তব্বং। যথাহ – ‘‘উদকং অত্থি ভাজনং নত্থি, অসন্তং নাম হোতি, ভাজনং অত্থি উদকং নত্থি, এতম্পি অসন্তং, উভযে পন অসতি অসন্তমেৰ, কট্ঠেন ৰা কেনচি ৰা পুঞ্ছিত্ৰা গন্তব্ব’’ন্তি (চূল়ৰ॰ অট্ঠ॰ ৩৭৪)। উক্লাপাপি সচে হোন্তীতি ৰচ্চপস্সাৰট্ঠানানি সচে কচৰরাকিণ্ণানি হোন্তি। ‘‘অসেসতো সোধেতব্ব’’ন্তি ইমিনা ততো কস্সচি কচৰরস্স অপনযনং সোধনং নাম ন হোতি, নিস্সেসকচৰরাপনযনমেৰ সোধনন্তি দীপেতি।
2940.Ūhatampīti aññena vā attanā vā asañcicca ūhataṃ malena dūsitaṭṭhānaṃ. Adhovitvāti jale sati asodhetvā jale asati kaṭṭhena vā kenaci vā puñchitvā gantabbaṃ. Yathāha – ‘‘udakaṃ atthi bhājanaṃ natthi, asantaṃ nāma hoti, bhājanaṃ atthi udakaṃ natthi, etampi asantaṃ, ubhaye pana asati asantameva, kaṭṭhena vā kenaci vā puñchitvā gantabba’’nti (cūḷava. aṭṭha. 374). Uklāpāpi sace hontīti vaccapassāvaṭṭhānāni sace kacavarākiṇṇāni honti. ‘‘Asesato sodhetabba’’nti iminā tato kassaci kacavarassa apanayanaṃ sodhanaṃ nāma na hoti, nissesakacavarāpanayanameva sodhananti dīpeti.
২৯৪১. পিঠরোতি অৰলেখনকট্ঠনিক্খেপনভাজনং। কুম্ভী চে রিত্তাতি আচমনকুম্ভী সচে তুচ্ছা।
2941.Piṭharoti avalekhanakaṭṭhanikkhepanabhājanaṃ. Kumbhī ce rittāti ācamanakumbhī sace tucchā.
২৯৪২. এৰং ৰচ্চকুটিৰত্তং দস্সেত্ৰা সেনাসনৰত্তং দস্সেতুমাহ ‘‘অনজ্ঝিট্ঠো’’তিআদি। অনজ্ঝিট্ঠোতি অননুঞ্ঞাতো।
2942. Evaṃ vaccakuṭivattaṃ dassetvā senāsanavattaṃ dassetumāha ‘‘anajjhiṭṭho’’tiādi. Anajjhiṭṭhoti ananuññāto.
২৯৪৩. ৰুড্ঢং আপুচ্ছিত্ৰা কথেন্তস্সাতি যোজনা। ৰুড্ঢতরাগমেতি যং আপুচ্ছিত্ৰা কথেতুমারদ্ধো, ততোপি ৰুড্ঢতরস্স ভিক্খুনো আগমে সতি।
2943. Vuḍḍhaṃ āpucchitvā kathentassāti yojanā. Vuḍḍhatarāgameti yaṃ āpucchitvā kathetumāraddho, tatopi vuḍḍhatarassa bhikkhuno āgame sati.
২৯৪৪. একৰিহারস্মিন্তি একস্মিং গেহে। ‘‘অনাপুচ্ছা’’তি ইদং ৰক্খমানেহি যথারহং যোজেতব্বং।
2944.Ekavihārasminti ekasmiṃ gehe. ‘‘Anāpucchā’’ti idaṃ vakkhamānehi yathārahaṃ yojetabbaṃ.
২৯৪৫. পঠমং যত্থ কত্থচি ৰুড্ঢানং সন্নিধানে কত্তব্বৰত্তং নিদ্দিট্ঠন্তি ইদানি একৰিহারে ৰসন্তেনাপি তস্স কাতব্বতং দস্সেতুং পুনপি ‘‘ন চ ধম্মো কথেতব্বো’’তি আহ। ধম্মচক্খুনাতি ধম্মলোচনেন ধম্মগরুকেন, ইমিনা অতাদিসস্স কতো ৰারো নিরত্থকোতি দীপেতি।
2945. Paṭhamaṃ yattha katthaci vuḍḍhānaṃ sannidhāne kattabbavattaṃ niddiṭṭhanti idāni ekavihāre vasantenāpi tassa kātabbataṃ dassetuṃ punapi ‘‘na ca dhammo kathetabbo’’ti āha. Dhammacakkhunāti dhammalocanena dhammagarukena, iminā atādisassa kato vāro niratthakoti dīpeti.
২৯৪৬. কাতব্বোতি জালেতব্বো। সোতি দীপো। ‘‘দ্ৰারং নাম যস্মা মহাৰল়ঞ্জং, তস্মা তত্থ আপুচ্ছনকিচ্চং নত্থী’’তি (চূল়ৰ॰ অট্ঠ॰ ৩৬৯) ৰচনতো তং অৰত্ৰা আপত্তিক্খেত্তমেৰ দস্সেতুমাহ ‘‘ৰাতপানকৰাটানি, থকেয্য ৰিৰরেয্য নো’’তি।
2946.Kātabboti jāletabbo. Soti dīpo. ‘‘Dvāraṃ nāma yasmā mahāvaḷañjaṃ, tasmā tattha āpucchanakiccaṃ natthī’’ti (cūḷava. aṭṭha. 369) vacanato taṃ avatvā āpattikkhettameva dassetumāha ‘‘vātapānakavāṭāni, thakeyya vivareyya no’’ti.
২৯৪৭. ৰুড্ঢতো পরিৰত্তযেতি যেন ৰুড্ঢো, ততো পরিৰত্তযে, পিট্ঠিং অদস্সেত্ৰা ৰুড্ঢাভিমুখো তেন পরিৰত্তযেতি অত্থো। চীৰরকণ্ণেন ৰা কাযেন ৰা তং ৰুড্ঢং ন চ ঘট্টযে।
2947.Vuḍḍhatoparivattayeti yena vuḍḍho, tato parivattaye, piṭṭhiṃ adassetvā vuḍḍhābhimukho tena parivattayeti attho. Cīvarakaṇṇena vā kāyena vā taṃ vuḍḍhaṃ na ca ghaṭṭaye.
২৯৪৮. এৰং সেনাসনৰত্তং দস্সেত্ৰা জন্তাঘরৰত্তং দস্সেতুমাহ ‘‘পুরতো’’তিআদি। থেরানং পুরতো নেৰ ন্হাযেয্য, উপরি পটিসোতে ন চ ন্হাযেয্য, ওতরন্তানং ৰুড্ঢানং উত্তরং উত্তরন্তো মগ্গং দদেয্য, ন ঘট্টযে কাযেন ৰা চীৰরেন ৰা ন ঘট্টযেয্যাতি যোজনা।
2948. Evaṃ senāsanavattaṃ dassetvā jantāgharavattaṃ dassetumāha ‘‘purato’’tiādi. Therānaṃ purato neva nhāyeyya, upari paṭisote na ca nhāyeyya, otarantānaṃ vuḍḍhānaṃ uttaraṃ uttaranto maggaṃ dadeyya, na ghaṭṭaye kāyena vā cīvarena vā na ghaṭṭayeyyāti yojanā.
‘‘তিমণ্ডলং পটিচ্ছাদেন্তেন পরিমণ্ডলং নিৰাসেত্ৰা কাযবন্ধনং বন্ধিত্ৰা’’তিআদিনা (চূল়ৰ॰ ৩৬৪) নযেন ৰুত্তানং ভত্তগ্গৰত্তানং সেখিযকথায ৰুত্তত্তা চ উপজ্ঝাযৰত্তাদীনং মহাখন্ধককথায ৰুত্তত্তা চ অনুমোদনৰত্তানং ‘‘অনুজানামি, ভিক্খৰে, ভত্তগ্গে চতূহি পঞ্চহি থেরানুথেরেহি ভিক্খূহি আগমেতু’’ন্তিআদিনা (চূল়ৰ॰ ৩৬২) নযেন ভত্তগ্গৰত্তেযেৰ অন্তোগধভাৰেন ৰুত্তত্তা চ নিদ্দেসে তানি ন ৰুত্তানি, তথাপি তেসু অনুমোদনৰত্তং এৰং ৰেদিতব্বং (চূল়ৰ॰ অট্ঠ॰ ৩৬২) – সঙ্ঘত্থেরে অনুমোদনত্থায নিসিন্নে হেট্ঠা পটিপাটিযা চতূহি নিসীদিতব্বং। অনুথেরে নিসিন্নে মহাথেরেন চ হেট্ঠা চ তীহি নিসীদিতব্বং। পঞ্চমে নিসিন্নে উপরি চতূহি নিসীদিতব্বং। সঙ্ঘত্থেরেন হেট্ঠা দহরভিক্খুস্মিং অজ্ঝিট্ঠেপি সঙ্ঘত্থেরতো পট্ঠায চতূহি নিসীদিতব্বমেৰ। সচে পন অনুমোদকো ভিক্খু ‘‘গচ্ছথ, ভন্তে, আগমেতব্বকিচ্চং নত্থী’’তি ৰদতি, গন্তুং ৰট্টতি। মহাথেরেন ‘‘গচ্ছাম, আৰুসো’’তি ৰুত্তে ‘‘গচ্ছথা’’তি ৰদতি, এৰম্পি ৰট্টতি। ‘‘বহিগামে আগমেস্সামা’’তি আভোগং কত্ৰাপি বহিগামং গন্ত্ৰা অত্তনো নিস্সিতকে ‘‘তুম্হে তস্স আগমনং আগমেথা’’তি ৰত্ৰাপি গন্তুং ৰট্টতিযেৰ। সচে পন মনুস্সা অত্তনো রুচিতেন একেন অনুমোদনং কারেন্তি, নেৰ তস্স অনুমোদতো আপত্তি, ন চ মহাথেরস্স ভারো হোতি। উপনিসিন্নকথাযমেৰ হি মনুস্সেসু কথাপেন্তেসু মহাথেরো আপুচ্ছিতব্বো, মহাথেরেন চ অনুমোদনায অজ্ঝিট্ঠোৰ আগমেতব্বোতি ইদমেত্থ লক্খণন্তি।
‘‘Timaṇḍalaṃ paṭicchādentena parimaṇḍalaṃ nivāsetvā kāyabandhanaṃ bandhitvā’’tiādinā (cūḷava. 364) nayena vuttānaṃ bhattaggavattānaṃ sekhiyakathāya vuttattā ca upajjhāyavattādīnaṃ mahākhandhakakathāya vuttattā ca anumodanavattānaṃ ‘‘anujānāmi, bhikkhave, bhattagge catūhi pañcahi therānutherehi bhikkhūhi āgametu’’ntiādinā (cūḷava. 362) nayena bhattaggavatteyeva antogadhabhāvena vuttattā ca niddese tāni na vuttāni, tathāpi tesu anumodanavattaṃ evaṃ veditabbaṃ (cūḷava. aṭṭha. 362) – saṅghatthere anumodanatthāya nisinne heṭṭhā paṭipāṭiyā catūhi nisīditabbaṃ. Anuthere nisinne mahātherena ca heṭṭhā ca tīhi nisīditabbaṃ. Pañcame nisinne upari catūhi nisīditabbaṃ. Saṅghattherena heṭṭhā daharabhikkhusmiṃ ajjhiṭṭhepi saṅghattherato paṭṭhāya catūhi nisīditabbameva. Sace pana anumodako bhikkhu ‘‘gacchatha, bhante, āgametabbakiccaṃ natthī’’ti vadati, gantuṃ vaṭṭati. Mahātherena ‘‘gacchāma, āvuso’’ti vutte ‘‘gacchathā’’ti vadati, evampi vaṭṭati. ‘‘Bahigāme āgamessāmā’’ti ābhogaṃ katvāpi bahigāmaṃ gantvā attano nissitake ‘‘tumhe tassa āgamanaṃ āgamethā’’ti vatvāpi gantuṃ vaṭṭatiyeva. Sace pana manussā attano rucitena ekena anumodanaṃ kārenti, neva tassa anumodato āpatti, na ca mahātherassa bhāro hoti. Upanisinnakathāyameva hi manussesu kathāpentesu mahāthero āpucchitabbo, mahātherena ca anumodanāya ajjhiṭṭhova āgametabboti idamettha lakkhaṇanti.
২৯৪৯. ৰত্তন্তি যথাৰুত্তং আভিসমাচারিকৰত্তং। যথাহ – ‘‘আভিসমাচারিকং অপরিপূরেত্ৰা সীলং পরিপূরেস্সতীতি নেতং ঠানং ৰিজ্জতী’’তি। ন ৰিন্দতীতি ন লভতি।
2949.Vattanti yathāvuttaṃ ābhisamācārikavattaṃ. Yathāha – ‘‘ābhisamācārikaṃ aparipūretvā sīlaṃ paripūressatīti netaṃ ṭhānaṃ vijjatī’’ti. Na vindatīti na labhati.
২৯৫০. অনেকগ্গোতি ৰিক্খিত্তত্তাযেৰ অসমাহিতচিত্তো। ন চ পস্সতীতি ঞাণচক্খুনা ন পস্সতি, দট্ঠুং সমত্থো ন হোতীতি অত্থো। দুক্খাতি জাতিদুক্খাদিদুক্খতো।
2950.Anekaggoti vikkhittattāyeva asamāhitacitto. Na ca passatīti ñāṇacakkhunā na passati, daṭṭhuṃ samattho na hotīti attho. Dukkhāti jātidukkhādidukkhato.
২৯৫১. তস্মাতি যস্মা দুক্খা ন পরিমুচ্চতি, তস্মা। ওৰাদং কত্ৰা কিং ৰিসেসং পাপুণাতীতি আহ ‘‘ওৰাদং বুদ্ধসেট্ঠস্স, কত্ৰা নিব্বানমেহিতী’’তি। এহিতি পাপুণিস্সতি।
2951.Tasmāti yasmā dukkhā na parimuccati, tasmā. Ovādaṃ katvā kiṃ visesaṃ pāpuṇātīti āha ‘‘ovādaṃ buddhaseṭṭhassa, katvā nibbānamehitī’’ti. Ehiti pāpuṇissati.
ৰত্তক্খন্ধককথাৰণ্ণনা।
Vattakkhandhakakathāvaṇṇanā.
