| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
30. வத்தனித்³தே³ஸவண்ணனா
30. Vattaniddesavaṇṇanā
213. இதா³னி ஆக³ந்துகவத்தாதீ³னி த³ஸ்ஸேதுங் ‘‘வத்த’’ந்தி மாதிகாபத³ங் உத்³த⁴டங். பரிக்கி²த்தஸ்ஸ (சூளவ॰ 356 ஆத³யோ; சூளவ॰ அட்ட²॰ 357 ஆத³யோ) விஹாரஸ்ஸ பரிக்கே²பங், அபரிக்கி²த்தஸ்ஸ த்³வீஹி லெட்³டு³பாதேஹி பரிச்சி²ன்னட்டா²னங் பத்வா உபாஹனங் ஓமுஞ்சித்வா நீசங் கத்வா பப்போ²டெத்வா உபாஹனங் த³ண்ட³கேன க³ஹெத்வா ச²த்தங் அபனாமெத்வா ஸீஸங் விவரித்வா ஸீஸே சீவரங் க²ந்தே⁴ கரித்வா ஸாது⁴கங் அதரமானேன ஆராமோ பவிஸிதப்³போ³தி அத்தோ².
213. Idāni āgantukavattādīni dassetuṃ ‘‘vatta’’nti mātikāpadaṃ uddhaṭaṃ. Parikkhittassa (cūḷava. 356 ādayo; cūḷava. aṭṭha. 357 ādayo) vihārassa parikkhepaṃ, aparikkhittassa dvīhi leḍḍupātehi paricchinnaṭṭhānaṃ patvā upāhanaṃ omuñcitvā nīcaṃ katvā papphoṭetvā upāhanaṃ daṇḍakena gahetvā chattaṃ apanāmetvā sīsaṃ vivaritvā sīse cīvaraṃ khandhe karitvā sādhukaṃ ataramānena ārāmo pavisitabboti attho.
214. புச்செ²ய்ய ஸயனாஸனந்தி ‘‘கதமங் மே ஸேனாஸனங் பாபுணாதி, கிங் அஜ்ஜா²வுத்த²ங் வா அனஜ்ஜா²வுத்த²ங் வா’’தி ஏவங் புச்சி²தப்³ப³ந்தி அத்தோ².
214.Puccheyyasayanāsananti ‘‘katamaṃ me senāsanaṃ pāpuṇāti, kiṃ ajjhāvutthaṃ vā anajjhāvutthaṃ vā’’ti evaṃ pucchitabbanti attho.
215-6. மஞ்சபீடா²தி³தா³ருப⁴ண்ட³ஞ்ச (சூளவ॰ 360; சூளவ॰ அட்ட²॰ 360) ரஜனபா⁴ஜனாதி³மத்திகாப⁴ண்ட³ஞ்ச. ஆபுச்சா²தி பி⁴க்கு²ஸ்ஸ வா ஸாமணேரஸ்ஸ வா ஆராமிகஸ்ஸ வா ‘‘ஆவுஸோ இமங் ஜக்³கா³ஹீ’’தி ஆரோசெத்வாதி அத்தோ². அஞ்ஞதா²தி ஏவங் அகத்வாதி அத்தோ².
215-6. Mañcapīṭhādidārubhaṇḍañca (cūḷava. 360; cūḷava. aṭṭha. 360) rajanabhājanādimattikābhaṇḍañca. Āpucchāti bhikkhussa vā sāmaṇerassa vā ārāmikassa vā ‘‘āvuso imaṃ jaggāhī’’ti ārocetvāti attho. Aññathāti evaṃ akatvāti attho.
217-8. வுட்³டா⁴க³ந்துகஸ்ஸாதி எத்த² (சூளவ॰ 358 ஆத³யோ; சூளவ॰ அட்ட²॰ 359 ஆத³யோ) தூ³ரதோவ தி³ஸ்வா யதி³ ‘‘வுட்³டோ⁴’’தி ஜானாதி, தஸ்மிங் அனாக³தே ஏவ ஆஸனபஞ்ஞாபனாதி³வத்தங் காதப்³ப³ந்தி அத்தோ². பாதோ³த³ப்பபு⁴திந்தி பாதோ³த³கங் பாத³பீட²ங் பாத³கத²லிகங் உபனிக்கி²பிதப்³ப³ந்தி அத்தோ². பானீயேன ஆபுச்ச²ந்தேன ஸசே ஸகிங் ஆனீதங் பானீயங் ஸப்³ப³ங் பிவதி, புனபி ஆபுச்சி²தப்³போ³ ஏவ. பஞ்ஞபேதி ‘‘ஏதங் தும்ஹாகங் ஸேனாஸனங் பாபுணாதீ’’தி ஏவங் ஆசிக்கி²தப்³ப³ந்தி அத்தோ².
217-8.Vuḍḍhāgantukassāti ettha (cūḷava. 358 ādayo; cūḷava. aṭṭha. 359 ādayo) dūratova disvā yadi ‘‘vuḍḍho’’ti jānāti, tasmiṃ anāgate eva āsanapaññāpanādivattaṃ kātabbanti attho. Pādodappabhutinti pādodakaṃ pādapīṭhaṃ pādakathalikaṃ upanikkhipitabbanti attho. Pānīyena āpucchantena sace sakiṃ ānītaṃ pānīyaṃ sabbaṃ pivati, punapi āpucchitabbo eva. Paññapeti ‘‘etaṃ tumhākaṃ senāsanaṃ pāpuṇātī’’ti evaṃ ācikkhitabbanti attho.
219-20. ‘‘பி⁴க்கா²சாரகா³மோ இதோ தூ³ரே’’தி வா ‘‘ஸந்திகே’’தி வா ‘‘காலஸ்ஸேவ பிண்டா³ய சரிதப்³ப³’’ந்தி வா ‘‘உபட்டா²கே சரிதப்³ப³’’ந்தி வா கோ³சரோ ஆசிக்கி²தப்³போ³. அகோ³சரோதி மிச்சா²தி³ட்டி²கானங் வா கா³மோ, பரிச்சி²ன்னபி⁴க்க²கோ வா கா³மோ, யத்த² ஏகஸ்ஸ வா த்³வின்னங் வா பி⁴க்கா² தீ³யதி, ஸோ ஆசிக்கி²தப்³போ³தி அத்தோ². கதிகந்தி ஸங்க⁴ஸ்ஸ கதிகட்டா²னங். ‘‘இமங் காலங் பவிஸிதப்³ப³ங், இமங் காலங் நிக்க²மிதப்³ப³’’ந்தி ஏவங் பவேஸனநிக்க²மனகாலங் ஆசிக்கி²தப்³ப³ங். கேஸுசி டா²னேஸு அமனுஸ்ஸா வா வாளா வா ஹொந்தி, தஸ்மா ஏவங் ஆசிக்கி²தப்³ப³மேவ. நிஸின்னோவாதி இத³ங் ஆபத்திஅபா⁴வமத்ததீ³பகங், உட்ட²ஹித்வாபி ஸப்³ப³ங் காதுங் வட்டதேவ. வத்தவினிச்ச²யோ.
219-20. ‘‘Bhikkhācāragāmo ito dūre’’ti vā ‘‘santike’’ti vā ‘‘kālasseva piṇḍāya caritabba’’nti vā ‘‘upaṭṭhāke caritabba’’nti vā gocaro ācikkhitabbo. Agocaroti micchādiṭṭhikānaṃ vā gāmo, paricchinnabhikkhako vā gāmo, yattha ekassa vā dvinnaṃ vā bhikkhā dīyati, so ācikkhitabboti attho. Katikanti saṅghassa katikaṭṭhānaṃ. ‘‘Imaṃ kālaṃ pavisitabbaṃ, imaṃ kālaṃ nikkhamitabba’’nti evaṃ pavesananikkhamanakālaṃ ācikkhitabbaṃ. Kesuci ṭhānesu amanussā vā vāḷā vā honti, tasmā evaṃ ācikkhitabbameva. Nisinnovāti idaṃ āpattiabhāvamattadīpakaṃ, uṭṭhahitvāpi sabbaṃ kātuṃ vaṭṭateva. Vattavinicchayo.
வத்தனித்³தே³ஸவண்ணனா நிட்டி²தா.
Vattaniddesavaṇṇanā niṭṭhitā.
