| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
30. வத்தனித்³தே³ஸவண்ணனா
30. Vattaniddesavaṇṇanā
213. ஸஉபாஹனோ…பே॰… சீவரங் ஸீஸே கரித்வா வா ஆக³ந்துகோ ஆராமங் ந பவிஸேதி ஸம்ப³ந்தோ⁴. ஸச²த்தோதி ஸீஸே கதச²த்தேன ஸச²த்தோ. ஓகு³ண்டி²தோதி ஸஸீஸங் பாருபிதோ. ‘‘பரிக்கி²த்தஸ்ஸ விஹாரஸ்ஸ பரிக்கே²போ, அபரிக்கி²த்தஸ்ஸ பரிக்கே²பாரஹட்டா²ன’’ந்தி வுத்தங் உபசாரஸீமாஸமீபங் பத்வா உபாஹனாஓமுஞ்சனாதி³ஸப்³ப³ங் கத்வா ஆராமோ பவிஸிதப்³போ³தி அயமெத்த² ப்³யதிரேகலத்³தோ⁴ அத்தோ².
213. Saupāhano…pe… cīvaraṃ sīse karitvā vā āgantuko ārāmaṃ na paviseti sambandho. Sachattoti sīse katachattena sachatto. Oguṇṭhitoti sasīsaṃ pārupito. ‘‘Parikkhittassa vihārassa parikkhepo, aparikkhittassa parikkhepārahaṭṭhāna’’nti vuttaṃ upacārasīmāsamīpaṃ patvā upāhanāomuñcanādisabbaṃ katvā ārāmo pavisitabboti ayamettha byatirekaladdho attho.
214. பானீயேன பாதே³ ந தோ⁴வெய்யாதி ஸம்ப³ந்தோ⁴. படிக்கமனங் பத்வா ஏகமந்தே பத்தசீவரங் நிக்கி²பித்வா பதிரூபே நிஸஜ்ஜ புச்சி²த்வா பானீயங் பாதப்³ப³ங், பரிபோ⁴ஜனீயேன யதா²வுத்தங் பாதா³ தோ⁴விதப்³பா³தி அதி⁴ப்பாயோ. வுட்³ட⁴தரே ஆவாஸிகேபி ச அபி⁴வாதெ³ய்யாதி இமினா வஸ்ஸங் புச்சி²த்வா நவகேன ஆவாஸிகேன அபி⁴வாதா³பேதப்³ப³ந்தி தீ³பேதி. புச்செ²ய்ய ஸயனாஸனந்தி ‘‘கதமங் ஸேனாஸனங் பாபுணாதி, அஜ்ஜா²வுத்த²ங் அனஜ்ஜா²வுத்த²ங் வா’’தி ஸேனாஸனங் புச்செ²ய்ய. இத³ஞ்ச புச்சா²ய லக்க²ணவசனங். தஸ்மா ஆவாஸிகவத்தே வுத்தமஜ்ஜா²வுத்தா²தி³கஞ்ச புச்சி²தப்³ப³ங். ஸசே ‘‘அனஜ்ஜா²வுத்த²’’ந்தி வத³ந்தி, கவாடங் ஆகோடெத்வா முஹுத்தங் ஆக³மெத்வா க⁴டிகங் உக்³கா⁴டெத்வா கவாடங் பணாமெத்வா ப³ஹி டி²தேன உல்லோகெத்வா பவிஸித்வா ஸப்³ப³ங் ஸேனாஸனவத்தங் காதப்³ப³ங். ஆக³ந்துகவத்தங்.
214. Pānīyena pāde na dhoveyyāti sambandho. Paṭikkamanaṃ patvā ekamante pattacīvaraṃ nikkhipitvā patirūpe nisajja pucchitvā pānīyaṃ pātabbaṃ, paribhojanīyena yathāvuttaṃ pādā dhovitabbāti adhippāyo. Vuḍḍhatare āvāsikepi ca abhivādeyyāti iminā vassaṃ pucchitvā navakena āvāsikena abhivādāpetabbanti dīpeti. Puccheyya sayanāsananti ‘‘katamaṃ senāsanaṃ pāpuṇāti, ajjhāvutthaṃ anajjhāvutthaṃ vā’’ti senāsanaṃ puccheyya. Idañca pucchāya lakkhaṇavacanaṃ. Tasmā āvāsikavatte vuttamajjhāvutthādikañca pucchitabbaṃ. Sace ‘‘anajjhāvuttha’’nti vadanti, kavāṭaṃ ākoṭetvā muhuttaṃ āgametvā ghaṭikaṃ ugghāṭetvā kavāṭaṃ paṇāmetvā bahi ṭhitena ulloketvā pavisitvā sabbaṃ senāsanavattaṃ kātabbaṃ. Āgantukavattaṃ.
215-6. க³மிகோ பக்கமெய்யாதி ஸம்ப³ந்தோ⁴. ‘‘படிஸாமெத்வா’’திஆதீ³னிமஸ்ஸ புப்³ப³கிரியாபதா³னி. தா³ருமத்திகப⁴ண்ட³கந்தி எத்த² மஞ்சபீடா²தி³தா³ருப⁴ண்ட³ங் ரஜனபா⁴ஜனாதி³மத்திகாப⁴ண்ட³ங். படிஸாமெத்வாதி அத்தி² சே அனோவஸ்ஸகே ஸண்ட²பெத்வா. த²கெத்வானாதி த்³வாரவாதபானேஹி பிதா⁴ய . ஸாது⁴கங் ஸங்கோ³பெத்வானாதி சதூஸு பாஸாணேஸு மஞ்சங் பஞ்ஞபெத்வா மஞ்சே மஞ்சஸ்ஸ, பீடே² பீட²ஸ்ஸ ஆரோபனேன ஸேனாஸனஸ்ஸ உபரூபரி புஞ்ஜகரணேன ஸாது⁴கங் ஸங்கோ³பனங் கத்வா. ந சாதி நேவ. க³மிகவத்தங்.
215-6. Gamiko pakkameyyāti sambandho. ‘‘Paṭisāmetvā’’tiādīnimassa pubbakiriyāpadāni. Dārumattikabhaṇḍakanti ettha mañcapīṭhādidārubhaṇḍaṃ rajanabhājanādimattikābhaṇḍaṃ. Paṭisāmetvāti atthi ce anovassake saṇṭhapetvā. Thaketvānāti dvāravātapānehi pidhāya . Sādhukaṃ saṅgopetvānāti catūsu pāsāṇesu mañcaṃ paññapetvā mañce mañcassa, pīṭhe pīṭhassa āropanena senāsanassa uparūpari puñjakaraṇena sādhukaṃ saṅgopanaṃ katvā. Na cāti neva. Gamikavattaṃ.
217-8. ஆவாஸிகோதி இத³ங் ‘‘பஞ்ஞபெய்யா’’திஆதீ³னங் கத்துபத³ங். நவகம்மகரணாதி³பா⁴ரனித்த²ரணதாய ஆவாஸோ விஹாரோ அஸ்ஸ அத்தீ²தி ஆவாஸிகோ. யஸ்ஸ பன கேவலங் விஹாரே நிவாஸனமத்தங் அத்தி², ஸோ நேவாஸிகோ. உபோ⁴பி தே இத⁴ ஆவாஸிக-ஸத்³தே³ன ஸங்க³ஹிதா. பாதோ³த³ப்பபு⁴திந்தி எத்த² பபு⁴தி-ஸத்³தே³ன பாத³பீட²பாத³கத²லிகானங் க³ஹணங். பச்சுக்³க³ந்த்வான பத்தசீவரங் க³ண்ஹெய்யாதி யோஜனா. பஞ்ஞபே ஸயனாஸனந்தி ‘‘ஏதங் தும்ஹாகங் ஸேனாஸனங் பாபுணாதீ’’தி ஏவங் ஸயனாஸனங் பஞ்ஞபெய்ய, பகாஸெய்யாதி வுத்தங் ஹோதி.
217-8.Āvāsikoti idaṃ ‘‘paññapeyyā’’tiādīnaṃ kattupadaṃ. Navakammakaraṇādibhāranittharaṇatāya āvāso vihāro assa atthīti āvāsiko. Yassa pana kevalaṃ vihāre nivāsanamattaṃ atthi, so nevāsiko. Ubhopi te idha āvāsika-saddena saṅgahitā. Pādodappabhutinti ettha pabhuti-saddena pādapīṭhapādakathalikānaṃ gahaṇaṃ. Paccuggantvāna pattacīvaraṃ gaṇheyyāti yojanā. Paññape sayanāsananti ‘‘etaṃ tumhākaṃ senāsanaṃ pāpuṇātī’’ti evaṃ sayanāsanaṃ paññapeyya, pakāseyyāti vuttaṃ hoti.
219. அஜ்ஜா²வுத்த²ந்தி புப்³பே³ பி⁴க்கூ²ஹி நிவுத்த²ங். கோ³சராகோ³சரங் வதே³தி ‘‘பி⁴க்கா²சாரகா³மோ தூ³ரோ, ஆஸன்னோ’’தி வா, ‘‘காலஸ்ஸேவ பிண்டா³ய சரிதப்³ப³ங், தி³வா வா’’தி ஏவங் கோ³சரஞ்ச, ‘‘மிச்சா²தி³ட்டி²கானங் வா கா³மோ, பரிச்சி²ன்னபி⁴க்கோ² வா’’திஆதி³னா அகோ³சரஞ்ச வதெ³ய்யாதி அத்தோ². வச்சபஸ்ஸாவட்டா²னானீதிஆதீ³னிபி ‘‘வதே³’’தி இமஸ்ஸேவ கம்மவசனானி. ஸேக²ஸம்முதிந்தி யஸ்ஸ ஸத்³த⁴ஸ்ஸ குலஸ்ஸ ஸங்கோ⁴ ஸேக²ஸம்முதிங் தே³தி, தங் குலஞ்ச.
219.Ajjhāvutthanti pubbe bhikkhūhi nivutthaṃ. Gocarāgocaraṃ vadeti ‘‘bhikkhācāragāmo dūro, āsanno’’ti vā, ‘‘kālasseva piṇḍāya caritabbaṃ, divā vā’’ti evaṃ gocarañca, ‘‘micchādiṭṭhikānaṃ vā gāmo, paricchinnabhikkho vā’’tiādinā agocarañca vadeyyāti attho. Vaccapassāvaṭṭhānānītiādīnipi ‘‘vade’’ti imasseva kammavacanāni. Sekhasammutinti yassa saddhassa kulassa saṅgho sekhasammutiṃ deti, taṃ kulañca.
220. பவேஸனிக்க²மே காலந்தி ‘‘கேஸுசி டா²னேஸு வாளமிகா³ வா அமனுஸ்ஸா வா ஹொந்தி, இமங் காலங் பவிஸிதப்³ப³ங் நிக்க²மிதப்³ப³ஞ்சா’’தி ஏவங் பவேஸனிக்க²மே ச காலங். ஏதங் பன ஆஸனபஞ்ஞபனாதி³கங் ஸப்³ப³ங் வத்தங் வுட்³ட⁴தரே ஆக³தே சீவரகம்மாதி³ங் வா நாதிகி³லானஸ்ஸ பே⁴ஸஜ்ஜங் வா ட²பெத்வாபி காதப்³ப³ங். மஹாகி³லானஸ்ஸ பன பே⁴ஸஜ்ஜமேவ காதப்³ப³ங். சேதியங்க³ணவத்தங் கரொந்தேனாபி தஸ்ஸ வத்தங் காதுங் ஆரபி⁴தப்³ப³ங். பண்டி³தோ ஹி ஆக³ந்துகோ ‘‘கரோஹி தாவ பே⁴ஸஜ்ஜங், சேதியங்க³ணங் ஸம்மஜ்ஜாஹீ’’தி ச வதெ³ய்ய. அபிச பீ³ஜனேன பீ³ஜிதப்³போ³, பாதா³பிஸ்ஸ தோ⁴விதப்³பா³, தேலேன மக்கி²தப்³பா³. பிட்டி² சே ஆகி³லாயதி, ஸம்பா³தே⁴தப்³பா³. நவகஸ்ஸ பன ஆக³ந்துகஸ்ஸ ‘‘இத³மாஸனங், எத்த² நிஸீதா³’’திஆதி³னா ஆசிக்கி²தப்³ப³ந்தி த³ஸ்ஸெந்தோ ‘‘நிஸின்னோயேவா’’திஆதி³மாஹ. நிஸின்னோயேவாதி இமினா ‘‘டி²தோயேவா’’திஆதி³ங் உபலக்கே²தி. ஸமுத்³தி³ஸேதி ஆத³ரேன வதெ³ய்ய. ஆவாஸிகவத்தங்.
220.Pavesanikkhame kālanti ‘‘kesuci ṭhānesu vāḷamigā vā amanussā vā honti, imaṃ kālaṃ pavisitabbaṃ nikkhamitabbañcā’’ti evaṃ pavesanikkhame ca kālaṃ. Etaṃ pana āsanapaññapanādikaṃ sabbaṃ vattaṃ vuḍḍhatare āgate cīvarakammādiṃ vā nātigilānassa bhesajjaṃ vā ṭhapetvāpi kātabbaṃ. Mahāgilānassa pana bhesajjameva kātabbaṃ. Cetiyaṅgaṇavattaṃ karontenāpi tassa vattaṃ kātuṃ ārabhitabbaṃ. Paṇḍito hi āgantuko ‘‘karohi tāva bhesajjaṃ, cetiyaṅgaṇaṃ sammajjāhī’’ti ca vadeyya. Apica bījanena bījitabbo, pādāpissa dhovitabbā, telena makkhitabbā. Piṭṭhi ce āgilāyati, sambādhetabbā. Navakassa pana āgantukassa ‘‘idamāsanaṃ, ettha nisīdā’’tiādinā ācikkhitabbanti dassento ‘‘nisinnoyevā’’tiādimāha. Nisinnoyevāti iminā ‘‘ṭhitoyevā’’tiādiṃ upalakkheti. Samuddiseti ādarena vadeyya. Āvāsikavattaṃ.
‘‘வத்த’’ந்தி பன ஸாமஞ்ஞேன நித்³தி³ட்ட²த்தா ந தே²ரே பி⁴க்கூ² அதிஅல்லீயித்வா நிஸீதி³தப்³ப³ங், மஹாதே²ரஸ்ஸ நிஸின்னாஸனதோ ஏகங் த்³வே ஆஸனானி ட²பெத்வா ‘‘நிஸீதா³’’தி வுத்தே நிஸீதி³தப்³ப³ங், ந நவாபி பி⁴க்கூ² ஆஸனேன படிபா³ஹிதப்³பா³, ந ஸங்கா⁴டிங் ஒத்த²ரித்வா நிஸீதி³தப்³ப³ங், ஸத்³த³ங் அகத்வா உத³ககிச்சங் காதப்³ப³ங், யதா² ஸூபஸ்ஸ ஓகாஸோ ஹோதி, ஏவமத்தாய ஓத³னோ க³ண்ஹிதப்³போ³, தே²ரேன பி⁴க்கு²னா ‘‘ட²பெத்வா அப்பகங் ஓத³னாதி³கங் ஸப்³ப³ங் ஸப்³பே³ஸங் ஸமகங் ஸம்பாதே³ஹீ’’தி வத்தப்³ப³ங், ந தாவ தே²ரேன பு⁴ஞ்ஜிதப்³ப³ங், பு⁴த்தாவினா ந தாவ உத³கங் படிக்³க³ஹேதப்³ப³ங், ப⁴த்தக்³க³தோ நிவத்தந்தேஹி யதா²னுரூபங் நிக்க²மித்வா விரளாய பாளியா க³ந்தப்³ப³ந்தி ஏவமாதி³கஞ்ச தத³னுரூபங் ஸேகி²யவத்தஞ்ச ஸம்பாதே³தப்³ப³ந்தி இத³ங் ப⁴த்தக்³க³வத்தஞ்ச ஸாது⁴கங் அதரமானேன கா³மோ பவிஸிதப்³போ³, ‘‘இமினா பவிஸிஸ்ஸாமி, இமினா நிக்க²மிஸ்ஸாமீ’’தி நிவேஸனங் பவிஸந்தேன ஸல்லக்கே²தப்³ப³ங், நாதிஸஹஸா பவிஸிதப்³ப³ங், நாதிஸஹஸா நிக்க²மிதப்³ப³ங், நாதிதூ³ரே நச்சாஸன்னே டா²தப்³ப³ங், நாதிசிரங் டா²தப்³ப³ங், நாதிலஹுகங் நிவத்திதப்³ப³ங், தா³துகாமதாகாரங் ஞத்வா டா²தப்³ப³ங், யோ பட²மங் கா³மதோ படிக்கமதி, தேன ஆஸனபஞ்ஞபனாதி³ ஸப்³ப³ங் காதப்³ப³ங், யோ பச்சா², தேன ஆஸனுத்³த⁴ரணாதி³ ஸப்³ப³ங் காதப்³ப³ந்தி ஏவமாதி³கஞ்ச தத³னுரூபங் ஸேகி²யவத்தஞ்ச ஸம்பாதே³தப்³ப³ந்தி இத³ங் பிண்ட³சாரிகவத்தஞ்ச காதப்³ப³ங்.
‘‘Vatta’’nti pana sāmaññena niddiṭṭhattā na there bhikkhū atiallīyitvā nisīditabbaṃ, mahātherassa nisinnāsanato ekaṃ dve āsanāni ṭhapetvā ‘‘nisīdā’’ti vutte nisīditabbaṃ, na navāpi bhikkhū āsanena paṭibāhitabbā, na saṅghāṭiṃ ottharitvā nisīditabbaṃ, saddaṃ akatvā udakakiccaṃ kātabbaṃ, yathā sūpassa okāso hoti, evamattāya odano gaṇhitabbo, therena bhikkhunā ‘‘ṭhapetvā appakaṃ odanādikaṃ sabbaṃ sabbesaṃ samakaṃ sampādehī’’ti vattabbaṃ, na tāva therena bhuñjitabbaṃ, bhuttāvinā na tāva udakaṃ paṭiggahetabbaṃ, bhattaggato nivattantehi yathānurūpaṃ nikkhamitvā viraḷāya pāḷiyā gantabbanti evamādikañca tadanurūpaṃ sekhiyavattañca sampādetabbanti idaṃ bhattaggavattañca sādhukaṃ ataramānena gāmo pavisitabbo, ‘‘iminā pavisissāmi, iminā nikkhamissāmī’’ti nivesanaṃ pavisantena sallakkhetabbaṃ, nātisahasā pavisitabbaṃ, nātisahasā nikkhamitabbaṃ, nātidūre naccāsanne ṭhātabbaṃ, nāticiraṃ ṭhātabbaṃ, nātilahukaṃ nivattitabbaṃ, dātukāmatākāraṃ ñatvā ṭhātabbaṃ, yo paṭhamaṃ gāmato paṭikkamati, tena āsanapaññapanādi sabbaṃ kātabbaṃ, yo pacchā, tena āsanuddharaṇādi sabbaṃ kātabbanti evamādikañca tadanurūpaṃ sekhiyavattañca sampādetabbanti idaṃ piṇḍacārikavattañca kātabbaṃ.
ஸேனாஸனட்டா²னே ஸப்³ப³ங் வத்தஞ்ச ஸம்பாதெ³த்வா ததோ நிக்க²மித்வா ஸாது⁴கங் நிவாஸெத்வா பாருபித்வா ச அதரமானேன கா³மோ பவிஸிதப்³போ³திஆதி³ ஸப்³ப³ங் பிண்ட³சாரிகவத்தங் காதப்³ப³ங். பானீயபரிபோ⁴ஜனீயஅக்³கி³அரணிஸஹிதகத்தரத³ண்டா³ உபட்ட²பேதப்³பா³, நக்க²த்தபதா³னி ஸகலானி வா ஏகதே³ஸானி வா உக்³க³ஹேதப்³பா³னி, தி³ஸாகுஸலேன ப⁴விதப்³ப³ந்தி இத³ங் ஆரஞ்ஞிகவத்தஞ்ச உத்³தி³ட்ட²ங்யேவ ஹோதீதி அவக³ந்தப்³ப³ந்தி.
Senāsanaṭṭhāne sabbaṃ vattañca sampādetvā tato nikkhamitvā sādhukaṃ nivāsetvā pārupitvā ca ataramānena gāmo pavisitabbotiādi sabbaṃ piṇḍacārikavattaṃ kātabbaṃ. Pānīyaparibhojanīyaaggiaraṇisahitakattaradaṇḍā upaṭṭhapetabbā, nakkhattapadāni sakalāni vā ekadesāni vā uggahetabbāni, disākusalena bhavitabbanti idaṃ āraññikavattañca uddiṭṭhaṃyeva hotīti avagantabbanti.
வத்தனித்³தே³ஸவண்ணனா நிட்டி²தா.
Vattaniddesavaṇṇanā niṭṭhitā.
