| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೩೦. ವತ್ತನಿದ್ದೇಸವಣ್ಣನಾ
30. Vattaniddesavaṇṇanā
೨೧೩. ಇದಾನಿ ಆಗನ್ತುಕವತ್ತಾದೀನಿ ದಸ್ಸೇತುಂ ‘‘ವತ್ತ’’ನ್ತಿ ಮಾತಿಕಾಪದಂ ಉದ್ಧಟಂ। ಪರಿಕ್ಖಿತ್ತಸ್ಸ (ಚೂಳವ॰ ೩೫೬ ಆದಯೋ; ಚೂಳವ॰ ಅಟ್ಠ॰ ೩೫೭ ಆದಯೋ) ವಿಹಾರಸ್ಸ ಪರಿಕ್ಖೇಪಂ, ಅಪರಿಕ್ಖಿತ್ತಸ್ಸ ದ್ವೀಹಿ ಲೇಡ್ಡುಪಾತೇಹಿ ಪರಿಚ್ಛಿನ್ನಟ್ಠಾನಂ ಪತ್ವಾ ಉಪಾಹನಂ ಓಮುಞ್ಚಿತ್ವಾ ನೀಚಂ ಕತ್ವಾ ಪಪ್ಫೋಟೇತ್ವಾ ಉಪಾಹನಂ ದಣ್ಡಕೇನ ಗಹೇತ್ವಾ ಛತ್ತಂ ಅಪನಾಮೇತ್ವಾ ಸೀಸಂ ವಿವರಿತ್ವಾ ಸೀಸೇ ಚೀವರಂ ಖನ್ಧೇ ಕರಿತ್ವಾ ಸಾಧುಕಂ ಅತರಮಾನೇನ ಆರಾಮೋ ಪವಿಸಿತಬ್ಬೋತಿ ಅತ್ಥೋ।
213. Idāni āgantukavattādīni dassetuṃ ‘‘vatta’’nti mātikāpadaṃ uddhaṭaṃ. Parikkhittassa (cūḷava. 356 ādayo; cūḷava. aṭṭha. 357 ādayo) vihārassa parikkhepaṃ, aparikkhittassa dvīhi leḍḍupātehi paricchinnaṭṭhānaṃ patvā upāhanaṃ omuñcitvā nīcaṃ katvā papphoṭetvā upāhanaṃ daṇḍakena gahetvā chattaṃ apanāmetvā sīsaṃ vivaritvā sīse cīvaraṃ khandhe karitvā sādhukaṃ ataramānena ārāmo pavisitabboti attho.
೨೧೪. ಪುಚ್ಛೇಯ್ಯ ಸಯನಾಸನನ್ತಿ ‘‘ಕತಮಂ ಮೇ ಸೇನಾಸನಂ ಪಾಪುಣಾತಿ, ಕಿಂ ಅಜ್ಝಾವುತ್ಥಂ ವಾ ಅನಜ್ಝಾವುತ್ಥಂ ವಾ’’ತಿ ಏವಂ ಪುಚ್ಛಿತಬ್ಬನ್ತಿ ಅತ್ಥೋ।
214.Puccheyyasayanāsananti ‘‘katamaṃ me senāsanaṃ pāpuṇāti, kiṃ ajjhāvutthaṃ vā anajjhāvutthaṃ vā’’ti evaṃ pucchitabbanti attho.
೨೧೫-೬. ಮಞ್ಚಪೀಠಾದಿದಾರುಭಣ್ಡಞ್ಚ (ಚೂಳವ॰ ೩೬೦; ಚೂಳವ॰ ಅಟ್ಠ॰ ೩೬೦) ರಜನಭಾಜನಾದಿಮತ್ತಿಕಾಭಣ್ಡಞ್ಚ। ಆಪುಚ್ಛಾತಿ ಭಿಕ್ಖುಸ್ಸ ವಾ ಸಾಮಣೇರಸ್ಸ ವಾ ಆರಾಮಿಕಸ್ಸ ವಾ ‘‘ಆವುಸೋ ಇಮಂ ಜಗ್ಗಾಹೀ’’ತಿ ಆರೋಚೇತ್ವಾತಿ ಅತ್ಥೋ। ಅಞ್ಞಥಾತಿ ಏವಂ ಅಕತ್ವಾತಿ ಅತ್ಥೋ।
215-6. Mañcapīṭhādidārubhaṇḍañca (cūḷava. 360; cūḷava. aṭṭha. 360) rajanabhājanādimattikābhaṇḍañca. Āpucchāti bhikkhussa vā sāmaṇerassa vā ārāmikassa vā ‘‘āvuso imaṃ jaggāhī’’ti ārocetvāti attho. Aññathāti evaṃ akatvāti attho.
೨೧೭-೮. ವುಡ್ಢಾಗನ್ತುಕಸ್ಸಾತಿ ಏತ್ಥ (ಚೂಳವ॰ ೩೫೮ ಆದಯೋ; ಚೂಳವ॰ ಅಟ್ಠ॰ ೩೫೯ ಆದಯೋ) ದೂರತೋವ ದಿಸ್ವಾ ಯದಿ ‘‘ವುಡ್ಢೋ’’ತಿ ಜಾನಾತಿ, ತಸ್ಮಿಂ ಅನಾಗತೇ ಏವ ಆಸನಪಞ್ಞಾಪನಾದಿವತ್ತಂ ಕಾತಬ್ಬನ್ತಿ ಅತ್ಥೋ। ಪಾದೋದಪ್ಪಭುತಿನ್ತಿ ಪಾದೋದಕಂ ಪಾದಪೀಠಂ ಪಾದಕಥಲಿಕಂ ಉಪನಿಕ್ಖಿಪಿತಬ್ಬನ್ತಿ ಅತ್ಥೋ। ಪಾನೀಯೇನ ಆಪುಚ್ಛನ್ತೇನ ಸಚೇ ಸಕಿಂ ಆನೀತಂ ಪಾನೀಯಂ ಸಬ್ಬಂ ಪಿವತಿ, ಪುನಪಿ ಆಪುಚ್ಛಿತಬ್ಬೋ ಏವ। ಪಞ್ಞಪೇತಿ ‘‘ಏತಂ ತುಮ್ಹಾಕಂ ಸೇನಾಸನಂ ಪಾಪುಣಾತೀ’’ತಿ ಏವಂ ಆಚಿಕ್ಖಿತಬ್ಬನ್ತಿ ಅತ್ಥೋ।
217-8.Vuḍḍhāgantukassāti ettha (cūḷava. 358 ādayo; cūḷava. aṭṭha. 359 ādayo) dūratova disvā yadi ‘‘vuḍḍho’’ti jānāti, tasmiṃ anāgate eva āsanapaññāpanādivattaṃ kātabbanti attho. Pādodappabhutinti pādodakaṃ pādapīṭhaṃ pādakathalikaṃ upanikkhipitabbanti attho. Pānīyena āpucchantena sace sakiṃ ānītaṃ pānīyaṃ sabbaṃ pivati, punapi āpucchitabbo eva. Paññapeti ‘‘etaṃ tumhākaṃ senāsanaṃ pāpuṇātī’’ti evaṃ ācikkhitabbanti attho.
೨೧೯-೨೦. ‘‘ಭಿಕ್ಖಾಚಾರಗಾಮೋ ಇತೋ ದೂರೇ’’ತಿ ವಾ ‘‘ಸನ್ತಿಕೇ’’ತಿ ವಾ ‘‘ಕಾಲಸ್ಸೇವ ಪಿಣ್ಡಾಯ ಚರಿತಬ್ಬ’’ನ್ತಿ ವಾ ‘‘ಉಪಟ್ಠಾಕೇ ಚರಿತಬ್ಬ’’ನ್ತಿ ವಾ ಗೋಚರೋ ಆಚಿಕ್ಖಿತಬ್ಬೋ। ಅಗೋಚರೋತಿ ಮಿಚ್ಛಾದಿಟ್ಠಿಕಾನಂ ವಾ ಗಾಮೋ, ಪರಿಚ್ಛಿನ್ನಭಿಕ್ಖಕೋ ವಾ ಗಾಮೋ, ಯತ್ಥ ಏಕಸ್ಸ ವಾ ದ್ವಿನ್ನಂ ವಾ ಭಿಕ್ಖಾ ದೀಯತಿ, ಸೋ ಆಚಿಕ್ಖಿತಬ್ಬೋತಿ ಅತ್ಥೋ। ಕತಿಕನ್ತಿ ಸಙ್ಘಸ್ಸ ಕತಿಕಟ್ಠಾನಂ। ‘‘ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬ’’ನ್ತಿ ಏವಂ ಪವೇಸನನಿಕ್ಖಮನಕಾಲಂ ಆಚಿಕ್ಖಿತಬ್ಬಂ। ಕೇಸುಚಿ ಠಾನೇಸು ಅಮನುಸ್ಸಾ ವಾ ವಾಳಾ ವಾ ಹೋನ್ತಿ, ತಸ್ಮಾ ಏವಂ ಆಚಿಕ್ಖಿತಬ್ಬಮೇವ। ನಿಸಿನ್ನೋವಾತಿ ಇದಂ ಆಪತ್ತಿಅಭಾವಮತ್ತದೀಪಕಂ, ಉಟ್ಠಹಿತ್ವಾಪಿ ಸಬ್ಬಂ ಕಾತುಂ ವಟ್ಟತೇವ। ವತ್ತವಿನಿಚ್ಛಯೋ।
219-20. ‘‘Bhikkhācāragāmo ito dūre’’ti vā ‘‘santike’’ti vā ‘‘kālasseva piṇḍāya caritabba’’nti vā ‘‘upaṭṭhāke caritabba’’nti vā gocaro ācikkhitabbo. Agocaroti micchādiṭṭhikānaṃ vā gāmo, paricchinnabhikkhako vā gāmo, yattha ekassa vā dvinnaṃ vā bhikkhā dīyati, so ācikkhitabboti attho. Katikanti saṅghassa katikaṭṭhānaṃ. ‘‘Imaṃ kālaṃ pavisitabbaṃ, imaṃ kālaṃ nikkhamitabba’’nti evaṃ pavesananikkhamanakālaṃ ācikkhitabbaṃ. Kesuci ṭhānesu amanussā vā vāḷā vā honti, tasmā evaṃ ācikkhitabbameva. Nisinnovāti idaṃ āpattiabhāvamattadīpakaṃ, uṭṭhahitvāpi sabbaṃ kātuṃ vaṭṭateva. Vattavinicchayo.
ವತ್ತನಿದ್ದೇಸವಣ್ಣನಾ ನಿಟ್ಠಿತಾ।
Vattaniddesavaṇṇanā niṭṭhitā.
