| Library / Tipiṭaka / திபிடக • Tipiṭaka / சரியாபிடக-அட்ட²கதா² • Cariyāpiṭaka-aṭṭhakathā |
9. வட்டபோதகசரியாவண்ணனா
9. Vaṭṭapotakacariyāvaṇṇanā
72. நவமே மக³தே⁴ வட்டபோதகோதிஆதீ³ஸு அயங் ஸங்கே²பத்தோ² – மக³த⁴ரட்டே² அஞ்ஞதரஸ்மிங் அரஞ்ஞப்பதே³ஸே வட்டகயோனியங் நிப்³ப³த்தித்வா அண்ட³கோஸங் பதா³லெத்வா அசிரனிக்க²ந்ததாய தருணோ மங்ஸபேஸிபூ⁴தோ, ததோ ஏவ அஜாதபக்கோ² வட்டகச்சா²பகோ யதா³ அஹங் குலாவகேயேவ ஹோமி.
72. Navame magadhe vaṭṭapotakotiādīsu ayaṃ saṅkhepattho – magadharaṭṭhe aññatarasmiṃ araññappadese vaṭṭakayoniyaṃ nibbattitvā aṇḍakosaṃ padāletvā aciranikkhantatāya taruṇo maṃsapesibhūto, tato eva ajātapakkho vaṭṭakacchāpako yadā ahaṃ kulāvakeyeva homi.
73. முக²துண்ட³கேனாஹரித்வாதி மய்ஹங் மாதா அத்தனோ முக²துண்ட³கேன காலேன காலங் கோ³சரங் ஆஹரித்வா மங் போஸேதி. தஸ்ஸா ப²ஸ்ஸேன ஜீவாமீதி பரிஸேத³னத்த²ஞ்சேவ பரிபா⁴வனத்த²ஞ்ச ஸம்மதே³வ காலேன காலங் மமங் அதி⁴ஸயனவஸேன பு²ஸந்தியா தஸ்ஸா மம மாதுயா ஸரீரஸம்ப²ஸ்ஸேன ஜீவாமி விஹராமி அத்தபா⁴வங் பவத்தேமி. நத்தி² மே காயிகங் ப³லந்தி மய்ஹங் பன அதிதருணதாய காயஸன்னிஸ்ஸிதங் ப³லங் நத்தி².
73.Mukhatuṇḍakenāharitvāti mayhaṃ mātā attano mukhatuṇḍakena kālena kālaṃ gocaraṃ āharitvā maṃ poseti. Tassā phassena jīvāmīti parisedanatthañceva paribhāvanatthañca sammadeva kālena kālaṃ mamaṃ adhisayanavasena phusantiyā tassā mama mātuyā sarīrasamphassena jīvāmi viharāmi attabhāvaṃ pavattemi. Natthi me kāyikaṃ balanti mayhaṃ pana atitaruṇatāya kāyasannissitaṃ balaṃ natthi.
74. ஸங்வச்ச²ரேதி ஸங்வச்ச²ரே ஸங்வச்ச²ரே. கி³ம்ஹஸமயேதி கி³ம்ஹகாலே. ஸுக்க²ருக்க²ஸாகா²னங் அஞ்ஞமஞ்ஞங் ஸங்க⁴ட்டனஸமுப்பன்னேன அக்³கி³னா தஸ்மிங் பதே³ஸே த³வடா³ஹோ பதி³ப்பதி பஜ்ஜலதி, ஸோ ததா² பதீ³பிதோ. உபக³ச்ச²தி அம்ஹாகந்தி மய்ஹங் மாதாபிதூனஞ்சாதி அம்ஹாகங் வஸனட்டா²னப்பதே³ஸங் அத்தனோ பதிட்டா²னஸ்ஸ அஸுத்³த⁴ஸ்ஸாபி ஸுத்³த⁴பா⁴வகரணேன பாவனதோ பாவகோதி ச க³தமக்³கே³ இந்த⁴னஸ்ஸ ப⁴ஸ்மபா⁴வாவஹனதோ கண்ஹவத்தனீதி ச லத்³த⁴னாமோ அக்³கி³ வனருக்க²க³ச்சே² த³ஹந்தோ காலேன காலங் உபக³ச்ச²தி.
74.Saṃvacchareti saṃvacchare saṃvacchare. Gimhasamayeti gimhakāle. Sukkharukkhasākhānaṃ aññamaññaṃ saṅghaṭṭanasamuppannena agginā tasmiṃ padese davaḍāho padippati pajjalati, so tathā padīpito. Upagacchati amhākanti mayhaṃ mātāpitūnañcāti amhākaṃ vasanaṭṭhānappadesaṃ attano patiṭṭhānassa asuddhassāpi suddhabhāvakaraṇena pāvanato pāvakoti ca gatamagge indhanassa bhasmabhāvāvahanato kaṇhavattanīti ca laddhanāmo aggi vanarukkhagacche dahanto kālena kālaṃ upagacchati.
75. ஏவங் உபக³மனதோ ததா³பி ஸத்³தா³யந்தோதி ‘‘த⁴மத⁴ம’’இதி ஏவங் ஸத்³த³ங் கரொந்தோ, அனுரவத³ஸ்ஸனஞ்ஹேதங் தா³வக்³கி³னோ. மஹாஸிகீ²தி பப்³ப³தகூடஸதி³ஸானங் இந்த⁴னானங் வஸேன மஹதியோ ஸிகா² ஏதஸ்ஸாதி மஹாஸிகீ². அனுபுப்³பே³ன அனுக்கமேன தங் அரஞ்ஞப்பதே³ஸங் ஜா²பெந்தோ த³ஹந்தோ அக்³கி³ மம ஸமீபட்டா²னங் உபாக³மி.
75. Evaṃ upagamanato tadāpi saddāyantoti ‘‘dhamadhama’’iti evaṃ saddaṃ karonto, anuravadassanañhetaṃ dāvaggino. Mahāsikhīti pabbatakūṭasadisānaṃ indhanānaṃ vasena mahatiyo sikhā etassāti mahāsikhī. Anupubbena anukkamena taṃ araññappadesaṃ jhāpento dahanto aggi mama samīpaṭṭhānaṃ upāgami.
76. அக்³கி³வேக³ப⁴யாதி வேகே³ன ஆக³ச்ச²தோ அக்³கி³னோ ப⁴யேன பீ⁴தா. தஸிதாதி சித்துத்ராஸஸமுட்டி²தேன காயஸ்ஸ ச²ம்பி⁴தத்தேன ச உத்ராஸா. மாதாபிதாதி மாதாபிதரோ. அத்தானங் பரிமோசயுந்தி அக்³கி³னா அனுபத்³து³தட்டா²னக³மனேன அத்தனோ ஸொத்தி²பா⁴வமகங்ஸு. மஹாஸத்தோ ஹி ததா³ மஹாகெ³ண்டு³கப்பமாணோ மஹாஸரீரோ அஹோஸி. தங் மாதாபிதரோ கேனசி உபாயேன க³ஹெத்வா க³ந்துங் அஸக்குணந்தா அத்தஸினேஹேன ச அபி⁴பு⁴ய்யமானா புத்தஸினேஹங் ச²ட்³டெ³த்வா பலாயிங்ஸு.
76.Aggivegabhayāti vegena āgacchato aggino bhayena bhītā. Tasitāti cittutrāsasamuṭṭhitena kāyassa chambhitattena ca utrāsā. Mātāpitāti mātāpitaro. Attānaṃ parimocayunti agginā anupaddutaṭṭhānagamanena attano sotthibhāvamakaṃsu. Mahāsatto hi tadā mahāgeṇḍukappamāṇo mahāsarīro ahosi. Taṃ mātāpitaro kenaci upāyena gahetvā gantuṃ asakkuṇantā attasinehena ca abhibhuyyamānā puttasinehaṃ chaḍḍetvā palāyiṃsu.
77. பாதே³ பக்கே² பஜஹாமீதி அத்தனோ உபோ⁴ பாதே³ உபோ⁴ பக்கே² ச பூ⁴மியங் ஆகாஸே ச க³மனஸஜ்ஜே கரொந்தோ பஸாரேமி இரியாமி வாயமாமி. ‘‘படீஹாமீ’’திபி பாடோ², வேஹாஸக³மனயொக்³கே³ காதுங் ஈஹாமீதி அத்தோ². ‘‘பதீஹாமீ’’திபி பட²ந்தி. தஸ்ஸத்தோ² – பாதே³ பக்கே² ச பதி விஸுங் ஈஹாமி, க³மனத்த²ங் வாயமாமி, தங் பன வாயாமகரணத்த²மேவ. கஸ்மா? யஸ்மா நத்தி² மே காயிகங் ப³லங். ஸோஹங் அக³திகோ தத்தா²தி ஸோ அஹங் ஏவங்பூ⁴தோ பாத³பக்க²வேகல்லேன க³மனவிரஹிதோ மாதாபிதூனங் அபக³மனேன வா அப்படிஸரணோ, தத்த² தா³வக்³கி³உபத்³து³தே வனே, தஸ்மிங் வா குலாவகே டி²தோவ ஏவங் இதா³னி வத்தப்³பா³காரேன ததா³ சிந்தேஸிங். து³தியஞ்செத்த² அஹந்தி நிபாதமத்தங் த³ட்ட²ப்³ப³ங்.
77.Pāde pakkhe pajahāmīti attano ubho pāde ubho pakkhe ca bhūmiyaṃ ākāse ca gamanasajje karonto pasāremi iriyāmi vāyamāmi. ‘‘Paṭīhāmī’’tipi pāṭho, vehāsagamanayogge kātuṃ īhāmīti attho. ‘‘Patīhāmī’’tipi paṭhanti. Tassattho – pāde pakkhe ca pati visuṃ īhāmi, gamanatthaṃ vāyamāmi, taṃ pana vāyāmakaraṇatthameva. Kasmā? Yasmā natthi me kāyikaṃ balaṃ. Sohaṃ agatiko tatthāti so ahaṃ evaṃbhūto pādapakkhavekallena gamanavirahito mātāpitūnaṃ apagamanena vā appaṭisaraṇo, tattha dāvaggiupaddute vane, tasmiṃ vā kulāvake ṭhitova evaṃ idāni vattabbākārena tadā cintesiṃ. Dutiyañcettha ahanti nipātamattaṃ daṭṭhabbaṃ.
78.
78.
இதா³னி ததா³ அத்தனோ சிந்திதாகாரங் த³ஸ்ஸேதுங் ‘‘யேஸாஹ’’ந்திஆதி³மாஹ;
Idāni tadā attano cintitākāraṃ dassetuṃ ‘‘yesāha’’ntiādimāha;
தத்த² யேஸாஹங் உபதா⁴வெய்யங், பீ⁴தோ தஸிதவேதி⁴தோதி மரணப⁴யேன பீ⁴தோ ததோ ஏவ சித்துத்ராஸேன தஸிதோ ஸரீரகம்பனேன வேதி⁴தோ யேஸமஹங் பக்க²ந்தரங் ஏதரஹி தா³வக்³கி³உபத்³து³தோ ஜலது³க்³க³ங் விய மஞ்ஞமானோ பவிஸிதுங் உபதா⁴வெய்யங் தே மம மாதாபிதரோ மங் ஏககங் ஏவ ஓஹாய ஜஹித்வா பக்கந்தா. கத²ங் மே அஜ்ஜ காதவேதி கத²ங் நு கோ² மயா அஜ்ஜ காதப்³ப³ங், படிபஜ்ஜிதப்³ப³ந்தி அத்தோ².
Tattha yesāhaṃ upadhāveyyaṃ, bhīto tasitavedhitoti maraṇabhayena bhīto tato eva cittutrāsena tasito sarīrakampanena vedhito yesamahaṃ pakkhantaraṃ etarahi dāvaggiupadduto jaladuggaṃ viya maññamāno pavisituṃ upadhāveyyaṃ te mama mātāpitaro maṃ ekakaṃ eva ohāya jahitvā pakkantā. Kathaṃ me ajja kātaveti kathaṃ nu kho mayā ajja kātabbaṃ, paṭipajjitabbanti attho.
ஏவங் மஹாஸத்தோ இதிகத்தப்³ப³தாஸம்மூள்ஹோ ஹுத்வா டி²தோ புன சிந்தேஸி – ‘‘இமஸ்மிங் லோகே ஸீலகு³ணோ நாம அத்தி², ஸச்சகு³ணோ நாம அத்தி², அதீதே பாரமியோ பூரெத்வா போ³தி⁴தலே நிஸீதி³த்வா அபி⁴ஸம்பு³த்³தா⁴ ஸீலஸமாதி⁴பஞ்ஞாவிமுத்திவிமுத்திஞாணத³ஸ்ஸனஸம்பன்னா ஸச்சானுத³யகாருஞ்ஞக²ந்திஸமன்னாக³தா ஸப்³ப³ஸத்தேஸு ஸமப்பவத்தமெத்தாபா⁴வனா ஸப்³ப³ஞ்ஞுபு³த்³தா⁴ நாம அத்தி², தேஹி ச படிவித்³தோ⁴ ஏகந்தனிய்யானகு³ணோ த⁴ம்மோ அத்தி², மயி சாபி ஏகங் ஸச்சங் அத்தி². ஸங்விஜ்ஜமானோ ஏகோ ஸபா⁴வத⁴ம்மோ பஞ்ஞாயதி, தஸ்மா அதீதபு³த்³தே⁴ சேவ தேஹி படிவித்³த⁴கு³ணே ச ஆவஜ்ஜெத்வா மயி விஜ்ஜமானங் ஸச்சங் ஸபா⁴வத⁴ம்மங் க³ஹெத்வா ஸச்சகிரியங் கத்வா அக்³கி³ங் படிக்கமாபெத்வா அஜ்ஜ மயா அத்தனோ சேவ இத⁴ வாஸீனங் ஸேஸபாணீனஞ்ச ஸொத்தி²பா⁴வங் காதுங் வட்டதீ’’தி. ஏவங் பன சிந்தெத்வா மஹாஸத்தோ அத்தனோ ஆனுபா⁴வே ட²த்வா யதா²சிந்திதங் படிபஜ்ஜி. தேன வுத்தங் –
Evaṃ mahāsatto itikattabbatāsammūḷho hutvā ṭhito puna cintesi – ‘‘imasmiṃ loke sīlaguṇo nāma atthi, saccaguṇo nāma atthi, atīte pāramiyo pūretvā bodhitale nisīditvā abhisambuddhā sīlasamādhipaññāvimuttivimuttiñāṇadassanasampannā saccānudayakāruññakhantisamannāgatā sabbasattesu samappavattamettābhāvanā sabbaññubuddhā nāma atthi, tehi ca paṭividdho ekantaniyyānaguṇo dhammo atthi, mayi cāpi ekaṃ saccaṃ atthi. Saṃvijjamāno eko sabhāvadhammo paññāyati, tasmā atītabuddhe ceva tehi paṭividdhaguṇe ca āvajjetvā mayi vijjamānaṃ saccaṃ sabhāvadhammaṃ gahetvā saccakiriyaṃ katvā aggiṃ paṭikkamāpetvā ajja mayā attano ceva idha vāsīnaṃ sesapāṇīnañca sotthibhāvaṃ kātuṃ vaṭṭatī’’ti. Evaṃ pana cintetvā mahāsatto attano ānubhāve ṭhatvā yathācintitaṃ paṭipajji. Tena vuttaṃ –
79.
79.
‘‘அத்தி² லோகே ஸீலகு³ணோ, ஸச்சங் ஸோசெய்யனுத்³த³யா;
‘‘Atthi loke sīlaguṇo, saccaṃ soceyyanuddayā;
தேன ஸச்சேன காஹாமி, ஸச்சகிரியமுத்தமங்.
Tena saccena kāhāmi, saccakiriyamuttamaṃ.
80.
80.
‘‘ஆவஜ்ஜெத்வா த⁴ம்மப³லங், ஸரித்வா புப்³ப³கே ஜினே;
‘‘Āvajjetvā dhammabalaṃ, saritvā pubbake jine;
ஸச்சப³லமவஸ்ஸாய, ஸச்சகிரியமகாஸஹ’’ந்தி.
Saccabalamavassāya, saccakiriyamakāsaha’’nti.
81. தத்த² மஹாஸத்தோ அதீதே பரினிப்³பு³தானங் பு³த்³தா⁴னங் கு³ணே ஆவஜ்ஜெத்வா அத்தனி விஜ்ஜமானங் ஸச்சஸபா⁴வங் ஆரப்³ப⁴ யங் கா³த²ங் வத்வா ததா³ ஸச்சகிரியமகாஸி, தங் த³ஸ்ஸேதுங் ‘‘ஸந்தி பக்கா²’’திஆதி³ வுத்தங்.
81. Tattha mahāsatto atīte parinibbutānaṃ buddhānaṃ guṇe āvajjetvā attani vijjamānaṃ saccasabhāvaṃ ārabbha yaṃ gāthaṃ vatvā tadā saccakiriyamakāsi, taṃ dassetuṃ ‘‘santi pakkhā’’tiādi vuttaṃ.
தத்த² ஸந்தி பக்கா² அபதனாதி மய்ஹங் பக்கா² நாம அத்தி² உபலப்³ப⁴ந்தி, நோ ச கோ² ஸக்கா ஏதேஹி உப்பதிதுங் ஆகாஸேன க³ந்துந்தி அபதனா. ஸந்தி பாதா³ அவஞ்சனாதி பாதா³பி மே அத்தி², தேஹி பன வஞ்சிதுங் பத³வாரக³மனேன க³ந்துங் ந ஸக்காதி அவஞ்சனா. மாதாபிதா ச நிக்க²ந்தாதி யே மங் அஞ்ஞத்த² நெய்யுங், தேபி மரணப⁴யேன மம மாதாபிதரோ நிக்க²ந்தா. ஜாதவேதா³தி அக்³கி³ங் ஆலபதி. ஸோ ஹி ஜாதோவ வேதி³யதி, தூ⁴மஜாலுட்டா²னேன பஞ்ஞாயதி, தஸ்மா ‘‘ஜாதவேதோ³’’தி வுச்சதி. படிக்கமாதி படிக³ச்ச² நிவத்தாதி ஜாதவேத³ங் ஆணாபேதி.
Tattha santi pakkhā apatanāti mayhaṃ pakkhā nāma atthi upalabbhanti, no ca kho sakkā etehi uppatituṃ ākāsena gantunti apatanā. Santi pādā avañcanāti pādāpi me atthi, tehi pana vañcituṃ padavāragamanena gantuṃ na sakkāti avañcanā. Mātāpitā ca nikkhantāti ye maṃ aññattha neyyuṃ, tepi maraṇabhayena mama mātāpitaro nikkhantā. Jātavedāti aggiṃ ālapati. So hi jātova vediyati, dhūmajāluṭṭhānena paññāyati, tasmā ‘‘jātavedo’’ti vuccati. Paṭikkamāti paṭigaccha nivattāti jātavedaṃ āṇāpeti.
இதி மஹாஸத்தோ ‘‘ஸசே மய்ஹங் பக்கா²னங் அத்தி²பா⁴வோ, தே ச பஸாரெத்வா ஆகாஸே அபதனபா⁴வோ, பாதா³னங் அத்தி²பா⁴வோ, தே ச உக்கி²பித்வா அவஞ்சனபா⁴வோ, மாதாபிதூனங் மங் குலாவகேயேவ ச²ட்³டெ³த்வா பலாதபா⁴வோ ச ஸச்சஸபா⁴வபூ⁴தோ ஏவ, ஜாதவேத³, ஏதேன ஸச்சேன த்வங் இதோ படிக்கமா’’தி குலாவகே நிபன்னோவ ஸச்சகிரியங் அகாஸி. தஸ்ஸ ஸஹ ஸச்சகிரியாய ஸோளஸகரீஸமத்தே டா²னே ஜாதவேதோ³ படிக்கமி. படிக்கமந்தோ ச ந ஜா²யமானோவ அரஞ்ஞங் க³தோ, உத³கே பன ஓபிலாபிதஉக்கா விய தத்தே²வ நிப்³பா³யி. தேன வுத்தங் –
Iti mahāsatto ‘‘sace mayhaṃ pakkhānaṃ atthibhāvo, te ca pasāretvā ākāse apatanabhāvo, pādānaṃ atthibhāvo, te ca ukkhipitvā avañcanabhāvo, mātāpitūnaṃ maṃ kulāvakeyeva chaḍḍetvā palātabhāvo ca saccasabhāvabhūto eva, jātaveda, etena saccena tvaṃ ito paṭikkamā’’ti kulāvake nipannova saccakiriyaṃ akāsi. Tassa saha saccakiriyāya soḷasakarīsamatte ṭhāne jātavedo paṭikkami. Paṭikkamanto ca na jhāyamānova araññaṃ gato, udake pana opilāpitaukkā viya tattheva nibbāyi. Tena vuttaṃ –
82.
82.
‘‘ஸஹ ஸச்சே கதே மய்ஹங், மஹாபஜ்ஜலிதோ ஸிகீ²;
‘‘Saha sacce kate mayhaṃ, mahāpajjalito sikhī;
வஜ்ஜேஸி ஸோளஸகரீஸானி, உத³கங் பத்வா யதா² ஸிகீ²’’தி.
Vajjesi soḷasakarīsāni, udakaṃ patvā yathā sikhī’’ti.
ஸா பனேஸா போ³தி⁴ஸத்தஸ்ஸ வட்டகயோனியங் தஸ்மிங் ஸமயே பு³த்³த⁴கு³ணானங் ஆவஜ்ஜனபுப்³பி³கா ஸச்சகிரியா அனஞ்ஞஸாதா⁴ரணாதி ஆஹ ‘‘ஸச்சேன மே ஸமோ நத்தி², ஏஸா மே ஸச்சபாரமீ’’தி. தேனேவ ஹி தஸ்ஸ டா²னஸ்ஸ ஸகலேபி இமஸ்மிங் கப்பே அக்³கி³னா அனபி⁴ப⁴வனீயத்தா தங் கப்பட்டி²யபாடிஹாரியங் நாம ஜாதங்.
Sā panesā bodhisattassa vaṭṭakayoniyaṃ tasmiṃ samaye buddhaguṇānaṃ āvajjanapubbikā saccakiriyā anaññasādhāraṇāti āha ‘‘saccena me samo natthi, esā me saccapāramī’’ti. Teneva hi tassa ṭhānassa sakalepi imasmiṃ kappe agginā anabhibhavanīyattā taṃ kappaṭṭhiyapāṭihāriyaṃ nāma jātaṃ.
ஏவங் மஹாஸத்தோ ஸச்சகிரியவஸேன அத்தனோ தத்த² வாஸீனங் ஸத்தானஞ்ச ஸொத்தி²ங் கத்வா ஜீவிதபரியோஸானே யதா²கம்மங் க³தோ.
Evaṃ mahāsatto saccakiriyavasena attano tattha vāsīnaṃ sattānañca sotthiṃ katvā jīvitapariyosāne yathākammaṃ gato.
ததா³ மாதாபிதரோ ஏதரஹி மாதாபிதரோ அஹேஸுங், வட்டகராஜா பன லோகனாதோ².
Tadā mātāpitaro etarahi mātāpitaro ahesuṃ, vaṭṭakarājā pana lokanātho.
தஸ்ஸ ஹெட்டா² வுத்தனயேனேவ ஸேஸபாரமியோபி யதா²ரஹங் நித்³தா⁴ரேதப்³பா³. ததா² தா³வக்³கி³ம்ஹி ததா² பே⁴ரவாகாரேன அவத்த²ரித்வா ஆக³ச்ச²ந்தே தஸ்மிங் வயே ஏககோ ஹுத்வாபி ஸாரத³ங் அனாபஜ்ஜித்வா ஸச்சாதி³த⁴ம்மகு³ணே பு³த்³த⁴கு³ணே ச அனுஸ்ஸரித்வா அத்தனோ ஏவ ஆனுபா⁴வங் நிஸ்ஸாய ஸச்சகிரியாய தத்த² வாஸீனம்பி ஸத்தானங் ஸொத்தி²பா⁴வாபாத³னாத³யோ ஆனுபா⁴வா விபா⁴வேதப்³பா³.
Tassa heṭṭhā vuttanayeneva sesapāramiyopi yathārahaṃ niddhāretabbā. Tathā dāvaggimhi tathā bheravākārena avattharitvā āgacchante tasmiṃ vaye ekako hutvāpi sāradaṃ anāpajjitvā saccādidhammaguṇe buddhaguṇe ca anussaritvā attano eva ānubhāvaṃ nissāya saccakiriyāya tattha vāsīnampi sattānaṃ sotthibhāvāpādanādayo ānubhāvā vibhāvetabbā.
வட்டபோதகசரியாவண்ணனா நிட்டி²தா.
Vaṭṭapotakacariyāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சரியாபிடகபாளி • Cariyāpiṭakapāḷi / 9. வட்டபோதகசரியா • 9. Vaṭṭapotakacariyā
