| Library / Tipiṭaka / তিপিটক • Tipiṭaka / চরিযাপিটক-অট্ঠকথা • Cariyāpiṭaka-aṭṭhakathā |
৯. ৰট্টপোতকচরিযাৰণ্ণনা
9. Vaṭṭapotakacariyāvaṇṇanā
৭২. নৰমে মগধে ৰট্টপোতকোতিআদীসু অযং সঙ্খেপত্থো – মগধরট্ঠে অঞ্ঞতরস্মিং অরঞ্ঞপ্পদেসে ৰট্টকযোনিযং নিব্বত্তিত্ৰা অণ্ডকোসং পদালেত্ৰা অচিরনিক্খন্ততায তরুণো মংসপেসিভূতো, ততো এৰ অজাতপক্খো ৰট্টকচ্ছাপকো যদা অহং কুলাৰকেযেৰ হোমি।
72. Navame magadhe vaṭṭapotakotiādīsu ayaṃ saṅkhepattho – magadharaṭṭhe aññatarasmiṃ araññappadese vaṭṭakayoniyaṃ nibbattitvā aṇḍakosaṃ padāletvā aciranikkhantatāya taruṇo maṃsapesibhūto, tato eva ajātapakkho vaṭṭakacchāpako yadā ahaṃ kulāvakeyeva homi.
৭৩. মুখতুণ্ডকেনাহরিত্ৰাতি ময্হং মাতা অত্তনো মুখতুণ্ডকেন কালেন কালং গোচরং আহরিত্ৰা মং পোসেতি। তস্সা ফস্সেন জীৰামীতি পরিসেদনত্থঞ্চেৰ পরিভাৰনত্থঞ্চ সম্মদেৰ কালেন কালং মমং অধিসযনৰসেন ফুসন্তিযা তস্সা মম মাতুযা সরীরসম্ফস্সেন জীৰামি ৰিহরামি অত্তভাৰং পৰত্তেমি। নত্থি মে কাযিকং বলন্তি ময্হং পন অতিতরুণতায কাযসন্নিস্সিতং বলং নত্থি।
73.Mukhatuṇḍakenāharitvāti mayhaṃ mātā attano mukhatuṇḍakena kālena kālaṃ gocaraṃ āharitvā maṃ poseti. Tassā phassena jīvāmīti parisedanatthañceva paribhāvanatthañca sammadeva kālena kālaṃ mamaṃ adhisayanavasena phusantiyā tassā mama mātuyā sarīrasamphassena jīvāmi viharāmi attabhāvaṃ pavattemi. Natthi me kāyikaṃ balanti mayhaṃ pana atitaruṇatāya kāyasannissitaṃ balaṃ natthi.
৭৪. সংৰচ্ছরেতি সংৰচ্ছরে সংৰচ্ছরে। গিম্হসমযেতি গিম্হকালে। সুক্খরুক্খসাখানং অঞ্ঞমঞ্ঞং সঙ্ঘট্টনসমুপ্পন্নেন অগ্গিনা তস্মিং পদেসে দৰডাহো পদিপ্পতি পজ্জলতি, সো তথা পদীপিতো। উপগচ্ছতি অম্হাকন্তি ময্হং মাতাপিতূনঞ্চাতি অম্হাকং ৰসনট্ঠানপ্পদেসং অত্তনো পতিট্ঠানস্স অসুদ্ধস্সাপি সুদ্ধভাৰকরণেন পাৰনতো পাৰকোতি চ গতমগ্গে ইন্ধনস্স ভস্মভাৰাৰহনতো কণ্হৰত্তনীতি চ লদ্ধনামো অগ্গি ৰনরুক্খগচ্ছে দহন্তো কালেন কালং উপগচ্ছতি।
74.Saṃvacchareti saṃvacchare saṃvacchare. Gimhasamayeti gimhakāle. Sukkharukkhasākhānaṃ aññamaññaṃ saṅghaṭṭanasamuppannena agginā tasmiṃ padese davaḍāho padippati pajjalati, so tathā padīpito. Upagacchati amhākanti mayhaṃ mātāpitūnañcāti amhākaṃ vasanaṭṭhānappadesaṃ attano patiṭṭhānassa asuddhassāpi suddhabhāvakaraṇena pāvanato pāvakoti ca gatamagge indhanassa bhasmabhāvāvahanato kaṇhavattanīti ca laddhanāmo aggi vanarukkhagacche dahanto kālena kālaṃ upagacchati.
৭৫. এৰং উপগমনতো তদাপি সদ্দাযন্তোতি ‘‘ধমধম’’ইতি এৰং সদ্দং করোন্তো, অনুরৰদস্সনঞ্হেতং দাৰগ্গিনো। মহাসিখীতি পব্বতকূটসদিসানং ইন্ধনানং ৰসেন মহতিযো সিখা এতস্সাতি মহাসিখী। অনুপুব্বেন অনুক্কমেন তং অরঞ্ঞপ্পদেসং ঝাপেন্তো দহন্তো অগ্গি মম সমীপট্ঠানং উপাগমি।
75. Evaṃ upagamanato tadāpi saddāyantoti ‘‘dhamadhama’’iti evaṃ saddaṃ karonto, anuravadassanañhetaṃ dāvaggino. Mahāsikhīti pabbatakūṭasadisānaṃ indhanānaṃ vasena mahatiyo sikhā etassāti mahāsikhī. Anupubbena anukkamena taṃ araññappadesaṃ jhāpento dahanto aggi mama samīpaṭṭhānaṃ upāgami.
৭৬. অগ্গিৰেগভযাতি ৰেগেন আগচ্ছতো অগ্গিনো ভযেন ভীতা। তসিতাতি চিত্তুত্রাসসমুট্ঠিতেন কাযস্স ছম্ভিতত্তেন চ উত্রাসা। মাতাপিতাতি মাতাপিতরো। অত্তানং পরিমোচযুন্তি অগ্গিনা অনুপদ্দুতট্ঠানগমনেন অত্তনো সোত্থিভাৰমকংসু। মহাসত্তো হি তদা মহাগেণ্ডুকপ্পমাণো মহাসরীরো অহোসি। তং মাতাপিতরো কেনচি উপাযেন গহেত্ৰা গন্তুং অসক্কুণন্তা অত্তসিনেহেন চ অভিভুয্যমানা পুত্তসিনেহং ছড্ডেত্ৰা পলাযিংসু।
76.Aggivegabhayāti vegena āgacchato aggino bhayena bhītā. Tasitāti cittutrāsasamuṭṭhitena kāyassa chambhitattena ca utrāsā. Mātāpitāti mātāpitaro. Attānaṃ parimocayunti agginā anupaddutaṭṭhānagamanena attano sotthibhāvamakaṃsu. Mahāsatto hi tadā mahāgeṇḍukappamāṇo mahāsarīro ahosi. Taṃ mātāpitaro kenaci upāyena gahetvā gantuṃ asakkuṇantā attasinehena ca abhibhuyyamānā puttasinehaṃ chaḍḍetvā palāyiṃsu.
৭৭. পাদে পক্খে পজহামীতি অত্তনো উভো পাদে উভো পক্খে চ ভূমিযং আকাসে চ গমনসজ্জে করোন্তো পসারেমি ইরিযামি ৰাযমামি। ‘‘পটীহামী’’তিপি পাঠো, ৰেহাসগমনযোগ্গে কাতুং ঈহামীতি অত্থো। ‘‘পতীহামী’’তিপি পঠন্তি। তস্সত্থো – পাদে পক্খে চ পতি ৰিসুং ঈহামি, গমনত্থং ৰাযমামি, তং পন ৰাযামকরণত্থমেৰ। কস্মা? যস্মা নত্থি মে কাযিকং বলং। সোহং অগতিকো তত্থাতি সো অহং এৰংভূতো পাদপক্খৰেকল্লেন গমনৰিরহিতো মাতাপিতূনং অপগমনেন ৰা অপ্পটিসরণো, তত্থ দাৰগ্গিউপদ্দুতে ৰনে, তস্মিং ৰা কুলাৰকে ঠিতোৰ এৰং ইদানি ৰত্তব্বাকারেন তদা চিন্তেসিং। দুতিযঞ্চেত্থ অহন্তি নিপাতমত্তং দট্ঠব্বং।
77.Pāde pakkhe pajahāmīti attano ubho pāde ubho pakkhe ca bhūmiyaṃ ākāse ca gamanasajje karonto pasāremi iriyāmi vāyamāmi. ‘‘Paṭīhāmī’’tipi pāṭho, vehāsagamanayogge kātuṃ īhāmīti attho. ‘‘Patīhāmī’’tipi paṭhanti. Tassattho – pāde pakkhe ca pati visuṃ īhāmi, gamanatthaṃ vāyamāmi, taṃ pana vāyāmakaraṇatthameva. Kasmā? Yasmā natthi me kāyikaṃ balaṃ. Sohaṃ agatiko tatthāti so ahaṃ evaṃbhūto pādapakkhavekallena gamanavirahito mātāpitūnaṃ apagamanena vā appaṭisaraṇo, tattha dāvaggiupaddute vane, tasmiṃ vā kulāvake ṭhitova evaṃ idāni vattabbākārena tadā cintesiṃ. Dutiyañcettha ahanti nipātamattaṃ daṭṭhabbaṃ.
৭৮.
78.
ইদানি তদা অত্তনো চিন্তিতাকারং দস্সেতুং ‘‘যেসাহ’’ন্তিআদিমাহ।
Idāni tadā attano cintitākāraṃ dassetuṃ ‘‘yesāha’’ntiādimāha;
তত্থ যেসাহং উপধাৰেয্যং, ভীতো তসিতৰেধিতোতি মরণভযেন ভীতো ততো এৰ চিত্তুত্রাসেন তসিতো সরীরকম্পনেন ৰেধিতো যেসমহং পক্খন্তরং এতরহি দাৰগ্গিউপদ্দুতো জলদুগ্গং ৰিয মঞ্ঞমানো পৰিসিতুং উপধাৰেয্যং তে মম মাতাপিতরো মং এককং এৰ ওহায জহিত্ৰা পক্কন্তা। কথং মে অজ্জ কাতৰেতি কথং নু খো মযা অজ্জ কাতব্বং, পটিপজ্জিতব্বন্তি অত্থো।
Tattha yesāhaṃ upadhāveyyaṃ, bhīto tasitavedhitoti maraṇabhayena bhīto tato eva cittutrāsena tasito sarīrakampanena vedhito yesamahaṃ pakkhantaraṃ etarahi dāvaggiupadduto jaladuggaṃ viya maññamāno pavisituṃ upadhāveyyaṃ te mama mātāpitaro maṃ ekakaṃ eva ohāya jahitvā pakkantā. Kathaṃ me ajja kātaveti kathaṃ nu kho mayā ajja kātabbaṃ, paṭipajjitabbanti attho.
এৰং মহাসত্তো ইতিকত্তব্বতাসম্মূল়্হো হুত্ৰা ঠিতো পুন চিন্তেসি – ‘‘ইমস্মিং লোকে সীলগুণো নাম অত্থি, সচ্চগুণো নাম অত্থি, অতীতে পারমিযো পূরেত্ৰা বোধিতলে নিসীদিত্ৰা অভিসম্বুদ্ধা সীলসমাধিপঞ্ঞাৰিমুত্তিৰিমুত্তিঞাণদস্সনসম্পন্না সচ্চানুদযকারুঞ্ঞখন্তিসমন্নাগতা সব্বসত্তেসু সমপ্পৰত্তমেত্তাভাৰনা সব্বঞ্ঞুবুদ্ধা নাম অত্থি, তেহি চ পটিৰিদ্ধো একন্তনিয্যানগুণো ধম্মো অত্থি, মযি চাপি একং সচ্চং অত্থি। সংৰিজ্জমানো একো সভাৰধম্মো পঞ্ঞাযতি, তস্মা অতীতবুদ্ধে চেৰ তেহি পটিৰিদ্ধগুণে চ আৰজ্জেত্ৰা মযি ৰিজ্জমানং সচ্চং সভাৰধম্মং গহেত্ৰা সচ্চকিরিযং কত্ৰা অগ্গিং পটিক্কমাপেত্ৰা অজ্জ মযা অত্তনো চেৰ ইধ ৰাসীনং সেসপাণীনঞ্চ সোত্থিভাৰং কাতুং ৰট্টতী’’তি। এৰং পন চিন্তেত্ৰা মহাসত্তো অত্তনো আনুভাৰে ঠত্ৰা যথাচিন্তিতং পটিপজ্জি। তেন ৰুত্তং –
Evaṃ mahāsatto itikattabbatāsammūḷho hutvā ṭhito puna cintesi – ‘‘imasmiṃ loke sīlaguṇo nāma atthi, saccaguṇo nāma atthi, atīte pāramiyo pūretvā bodhitale nisīditvā abhisambuddhā sīlasamādhipaññāvimuttivimuttiñāṇadassanasampannā saccānudayakāruññakhantisamannāgatā sabbasattesu samappavattamettābhāvanā sabbaññubuddhā nāma atthi, tehi ca paṭividdho ekantaniyyānaguṇo dhammo atthi, mayi cāpi ekaṃ saccaṃ atthi. Saṃvijjamāno eko sabhāvadhammo paññāyati, tasmā atītabuddhe ceva tehi paṭividdhaguṇe ca āvajjetvā mayi vijjamānaṃ saccaṃ sabhāvadhammaṃ gahetvā saccakiriyaṃ katvā aggiṃ paṭikkamāpetvā ajja mayā attano ceva idha vāsīnaṃ sesapāṇīnañca sotthibhāvaṃ kātuṃ vaṭṭatī’’ti. Evaṃ pana cintetvā mahāsatto attano ānubhāve ṭhatvā yathācintitaṃ paṭipajji. Tena vuttaṃ –
৭৯.
79.
‘‘অত্থি লোকে সীলগুণো, সচ্চং সোচেয্যনুদ্দযা।
‘‘Atthi loke sīlaguṇo, saccaṃ soceyyanuddayā;
তেন সচ্চেন কাহামি, সচ্চকিরিযমুত্তমং॥
Tena saccena kāhāmi, saccakiriyamuttamaṃ.
৮০.
80.
‘‘আৰজ্জেত্ৰা ধম্মবলং, সরিত্ৰা পুব্বকে জিনে।
‘‘Āvajjetvā dhammabalaṃ, saritvā pubbake jine;
সচ্চবলমৰস্সায, সচ্চকিরিযমকাসহ’’ন্তি॥
Saccabalamavassāya, saccakiriyamakāsaha’’nti.
৮১. তত্থ মহাসত্তো অতীতে পরিনিব্বুতানং বুদ্ধানং গুণে আৰজ্জেত্ৰা অত্তনি ৰিজ্জমানং সচ্চসভাৰং আরব্ভ যং গাথং ৰত্ৰা তদা সচ্চকিরিযমকাসি, তং দস্সেতুং ‘‘সন্তি পক্খা’’তিআদি ৰুত্তং।
81. Tattha mahāsatto atīte parinibbutānaṃ buddhānaṃ guṇe āvajjetvā attani vijjamānaṃ saccasabhāvaṃ ārabbha yaṃ gāthaṃ vatvā tadā saccakiriyamakāsi, taṃ dassetuṃ ‘‘santi pakkhā’’tiādi vuttaṃ.
তত্থ সন্তি পক্খা অপতনাতি ময্হং পক্খা নাম অত্থি উপলব্ভন্তি, নো চ খো সক্কা এতেহি উপ্পতিতুং আকাসেন গন্তুন্তি অপতনা। সন্তি পাদা অৰঞ্চনাতি পাদাপি মে অত্থি, তেহি পন ৰঞ্চিতুং পদৰারগমনেন গন্তুং ন সক্কাতি অৰঞ্চনা। মাতাপিতা চ নিক্খন্তাতি যে মং অঞ্ঞত্থ নেয্যুং, তেপি মরণভযেন মম মাতাপিতরো নিক্খন্তা। জাতৰেদাতি অগ্গিং আলপতি। সো হি জাতোৰ ৰেদিযতি, ধূমজালুট্ঠানেন পঞ্ঞাযতি, তস্মা ‘‘জাতৰেদো’’তি ৰুচ্চতি। পটিক্কমাতি পটিগচ্ছ নিৰত্তাতি জাতৰেদং আণাপেতি।
Tattha santi pakkhā apatanāti mayhaṃ pakkhā nāma atthi upalabbhanti, no ca kho sakkā etehi uppatituṃ ākāsena gantunti apatanā. Santi pādā avañcanāti pādāpi me atthi, tehi pana vañcituṃ padavāragamanena gantuṃ na sakkāti avañcanā. Mātāpitā ca nikkhantāti ye maṃ aññattha neyyuṃ, tepi maraṇabhayena mama mātāpitaro nikkhantā. Jātavedāti aggiṃ ālapati. So hi jātova vediyati, dhūmajāluṭṭhānena paññāyati, tasmā ‘‘jātavedo’’ti vuccati. Paṭikkamāti paṭigaccha nivattāti jātavedaṃ āṇāpeti.
ইতি মহাসত্তো ‘‘সচে ময্হং পক্খানং অত্থিভাৰো, তে চ পসারেত্ৰা আকাসে অপতনভাৰো, পাদানং অত্থিভাৰো, তে চ উক্খিপিত্ৰা অৰঞ্চনভাৰো, মাতাপিতূনং মং কুলাৰকেযেৰ ছড্ডেত্ৰা পলাতভাৰো চ সচ্চসভাৰভূতো এৰ, জাতৰেদ, এতেন সচ্চেন ত্ৰং ইতো পটিক্কমা’’তি কুলাৰকে নিপন্নোৰ সচ্চকিরিযং অকাসি। তস্স সহ সচ্চকিরিযায সোল়সকরীসমত্তে ঠানে জাতৰেদো পটিক্কমি। পটিক্কমন্তো চ ন ঝাযমানোৰ অরঞ্ঞং গতো, উদকে পন ওপিলাপিতউক্কা ৰিয তত্থেৰ নিব্বাযি। তেন ৰুত্তং –
Iti mahāsatto ‘‘sace mayhaṃ pakkhānaṃ atthibhāvo, te ca pasāretvā ākāse apatanabhāvo, pādānaṃ atthibhāvo, te ca ukkhipitvā avañcanabhāvo, mātāpitūnaṃ maṃ kulāvakeyeva chaḍḍetvā palātabhāvo ca saccasabhāvabhūto eva, jātaveda, etena saccena tvaṃ ito paṭikkamā’’ti kulāvake nipannova saccakiriyaṃ akāsi. Tassa saha saccakiriyāya soḷasakarīsamatte ṭhāne jātavedo paṭikkami. Paṭikkamanto ca na jhāyamānova araññaṃ gato, udake pana opilāpitaukkā viya tattheva nibbāyi. Tena vuttaṃ –
৮২.
82.
‘‘সহ সচ্চে কতে ময্হং, মহাপজ্জলিতো সিখী।
‘‘Saha sacce kate mayhaṃ, mahāpajjalito sikhī;
ৰজ্জেসি সোল়সকরীসানি, উদকং পত্ৰা যথা সিখী’’তি॥
Vajjesi soḷasakarīsāni, udakaṃ patvā yathā sikhī’’ti.
সা পনেসা বোধিসত্তস্স ৰট্টকযোনিযং তস্মিং সমযে বুদ্ধগুণানং আৰজ্জনপুব্বিকা সচ্চকিরিযা অনঞ্ঞসাধারণাতি আহ ‘‘সচ্চেন মে সমো নত্থি, এসা মে সচ্চপারমী’’তি। তেনেৰ হি তস্স ঠানস্স সকলেপি ইমস্মিং কপ্পে অগ্গিনা অনভিভৰনীযত্তা তং কপ্পট্ঠিযপাটিহারিযং নাম জাতং।
Sā panesā bodhisattassa vaṭṭakayoniyaṃ tasmiṃ samaye buddhaguṇānaṃ āvajjanapubbikā saccakiriyā anaññasādhāraṇāti āha ‘‘saccena me samo natthi, esā me saccapāramī’’ti. Teneva hi tassa ṭhānassa sakalepi imasmiṃ kappe agginā anabhibhavanīyattā taṃ kappaṭṭhiyapāṭihāriyaṃ nāma jātaṃ.
এৰং মহাসত্তো সচ্চকিরিযৰসেন অত্তনো তত্থ ৰাসীনং সত্তানঞ্চ সোত্থিং কত্ৰা জীৰিতপরিযোসানে যথাকম্মং গতো।
Evaṃ mahāsatto saccakiriyavasena attano tattha vāsīnaṃ sattānañca sotthiṃ katvā jīvitapariyosāne yathākammaṃ gato.
তদা মাতাপিতরো এতরহি মাতাপিতরো অহেসুং, ৰট্টকরাজা পন লোকনাথো।
Tadā mātāpitaro etarahi mātāpitaro ahesuṃ, vaṭṭakarājā pana lokanātho.
তস্স হেট্ঠা ৰুত্তনযেনেৰ সেসপারমিযোপি যথারহং নিদ্ধারেতব্বা। তথা দাৰগ্গিম্হি তথা ভেরৰাকারেন অৰত্থরিত্ৰা আগচ্ছন্তে তস্মিং ৰযে এককো হুত্ৰাপি সারদং অনাপজ্জিত্ৰা সচ্চাদিধম্মগুণে বুদ্ধগুণে চ অনুস্সরিত্ৰা অত্তনো এৰ আনুভাৰং নিস্সায সচ্চকিরিযায তত্থ ৰাসীনম্পি সত্তানং সোত্থিভাৰাপাদনাদযো আনুভাৰা ৰিভাৰেতব্বা।
Tassa heṭṭhā vuttanayeneva sesapāramiyopi yathārahaṃ niddhāretabbā. Tathā dāvaggimhi tathā bheravākārena avattharitvā āgacchante tasmiṃ vaye ekako hutvāpi sāradaṃ anāpajjitvā saccādidhammaguṇe buddhaguṇe ca anussaritvā attano eva ānubhāvaṃ nissāya saccakiriyāya tattha vāsīnampi sattānaṃ sotthibhāvāpādanādayo ānubhāvā vibhāvetabbā.
ৰট্টপোতকচরিযাৰণ্ণনা নিট্ঠিতা।
Vaṭṭapotakacariyāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / চরিযাপিটকপাল়ি • Cariyāpiṭakapāḷi / ৯. ৰট্টপোতকচরিযা • 9. Vaṭṭapotakacariyā
