| Library / Tipiṭaka / д̇ибидага • Tipiṭaka / жарияаабидага-адтагат̇аа • Cariyāpiṭaka-aṭṭhakathā |
9. ваддабод̇агажарияааван̣н̣анаа
9. Vaṭṭapotakacariyāvaṇṇanā
72. навамз маг̇ад̇хз ваддабод̇агод̇иаад̣̇ийсу аяам̣ сан̇кзбад̇т̇о – маг̇ад̇харадтз ан̃н̃ад̇арасмим̣ аран̃н̃аббад̣̇зсз ваддагаяонияам̣ ниб̣б̣ад̇д̇ид̇ваа ан̣д̣агосам̣ бад̣̇аалзд̇ваа ажиранигканд̇ад̇ааяа д̇арун̣о мам̣сабзсибхууд̇о, д̇ад̇о зва аж̇аад̇абагко ваддагажчаабаго яад̣̇аа ахам̣ гулаавагзязва хоми.
72. Navame magadhe vaṭṭapotakotiādīsu ayaṃ saṅkhepattho – magadharaṭṭhe aññatarasmiṃ araññappadese vaṭṭakayoniyaṃ nibbattitvā aṇḍakosaṃ padāletvā aciranikkhantatāya taruṇo maṃsapesibhūto, tato eva ajātapakkho vaṭṭakacchāpako yadā ahaṃ kulāvakeyeva homi.
73. мукад̇ун̣д̣агзнаахарид̇ваад̇и маяхам̣ маад̇аа ад̇д̇ано мукад̇ун̣д̣агзна гаалзна гаалам̣ г̇ожарам̣ аахарид̇ваа мам̣ босзд̇и. д̇ассаа пассзна ж̇ийваамийд̇и барисзд̣̇анад̇т̇ан̃жзва барибхааванад̇т̇ан̃жа саммад̣̇зва гаалзна гаалам̣ мамам̣ ад̇хисаяанавасзна пусанд̇ияаа д̇ассаа мама маад̇уяаа сарийрасампассзна ж̇ийваами вихараами ад̇д̇абхаавам̣ бавад̇д̇зми. над̇т̇и мз гааяигам̣ б̣аланд̇и маяхам̣ бана ад̇ид̇арун̣ад̇ааяа гааяасанниссид̇ам̣ б̣алам̣ над̇т̇и.
73.Mukhatuṇḍakenāharitvāti mayhaṃ mātā attano mukhatuṇḍakena kālena kālaṃ gocaraṃ āharitvā maṃ poseti. Tassā phassena jīvāmīti parisedanatthañceva paribhāvanatthañca sammadeva kālena kālaṃ mamaṃ adhisayanavasena phusantiyā tassā mama mātuyā sarīrasamphassena jīvāmi viharāmi attabhāvaṃ pavattemi. Natthi me kāyikaṃ balanti mayhaṃ pana atitaruṇatāya kāyasannissitaṃ balaṃ natthi.
74. сам̣важчарзд̇и сам̣важчарз сам̣важчарз. г̇имхасамаязд̇и г̇имхагаалз. сугкаругкасаакаанам̣ ан̃н̃аман̃н̃ам̣ сан̇гхадданасамуббаннзна аг̇г̇инаа д̇асмим̣ бад̣̇зсз д̣̇авад̣аахо бад̣̇иббад̇и баж̇ж̇алад̇и, со д̇ат̇аа бад̣̇ийбид̇о. убаг̇ажчад̇и амхааганд̇и маяхам̣ маад̇аабид̇уунан̃жаад̇и амхаагам̣ васанадтаанаббад̣̇зсам̣ ад̇д̇ано бад̇идтаанасса асуд̣̇д̇хассааби суд̣̇д̇хабхаавагаран̣зна бааванад̇о баавагод̇и жа г̇ад̇амаг̇г̇з инд̇ханасса бхасмабхаавааваханад̇о ган̣хавад̇д̇анийд̇и жа лад̣̇д̇ханаамо аг̇г̇и ванаругкаг̇ажчз д̣̇аханд̇о гаалзна гаалам̣ убаг̇ажчад̇и.
74.Saṃvacchareti saṃvacchare saṃvacchare. Gimhasamayeti gimhakāle. Sukkharukkhasākhānaṃ aññamaññaṃ saṅghaṭṭanasamuppannena agginā tasmiṃ padese davaḍāho padippati pajjalati, so tathā padīpito. Upagacchati amhākanti mayhaṃ mātāpitūnañcāti amhākaṃ vasanaṭṭhānappadesaṃ attano patiṭṭhānassa asuddhassāpi suddhabhāvakaraṇena pāvanato pāvakoti ca gatamagge indhanassa bhasmabhāvāvahanato kaṇhavattanīti ca laddhanāmo aggi vanarukkhagacche dahanto kālena kālaṃ upagacchati.
75. звам̣ убаг̇аманад̇о д̇ад̣̇ааби сад̣̇д̣̇ааяанд̇од̇и ‘‘д̇хамад̇хама’’ид̇и звам̣ сад̣̇д̣̇ам̣ гаронд̇о, ануравад̣̇ассанан̃хзд̇ам̣ д̣̇ааваг̇г̇ино. махаасикийд̇и баб̣б̣ад̇агуудасад̣̇исаанам̣ инд̇ханаанам̣ васзна махад̇ияо сикаа зд̇ассаад̇и махаасикий. анубуб̣б̣зна ануггамзна д̇ам̣ аран̃н̃аббад̣̇зсам̣ жхаабзнд̇о д̣̇аханд̇о аг̇г̇и мама самийбадтаанам̣ убааг̇ами.
75. Evaṃ upagamanato tadāpi saddāyantoti ‘‘dhamadhama’’iti evaṃ saddaṃ karonto, anuravadassanañhetaṃ dāvaggino. Mahāsikhīti pabbatakūṭasadisānaṃ indhanānaṃ vasena mahatiyo sikhā etassāti mahāsikhī. Anupubbena anukkamena taṃ araññappadesaṃ jhāpento dahanto aggi mama samīpaṭṭhānaṃ upāgami.
76. аг̇г̇ивзг̇абхаяаад̇и взг̇зна ааг̇ажчад̇о аг̇г̇ино бхаязна бхийд̇аа. д̇асид̇аад̇и жид̇д̇уд̇раасасамудтид̇зна гааяасса чамбхид̇ад̇д̇зна жа уд̇раасаа. маад̇аабид̇аад̇и маад̇аабид̇аро. ад̇д̇аанам̣ бариможаяунд̇и аг̇г̇инаа анубад̣̇д̣̇уд̇адтаанаг̇аманзна ад̇д̇ано сод̇т̇ибхаавамагам̣су. махаасад̇д̇о хи д̇ад̣̇аа махааг̇зн̣д̣угаббамаан̣о махаасарийро ахоси. д̇ам̣ маад̇аабид̇аро гзнажи убааязна г̇ахзд̇ваа г̇анд̇ум̣ асаггун̣анд̇аа ад̇д̇асинзхзна жа абхибхуяяамаанаа буд̇д̇асинзхам̣ чад̣д̣зд̇ваа балааяим̣су.
76.Aggivegabhayāti vegena āgacchato aggino bhayena bhītā. Tasitāti cittutrāsasamuṭṭhitena kāyassa chambhitattena ca utrāsā. Mātāpitāti mātāpitaro. Attānaṃ parimocayunti agginā anupaddutaṭṭhānagamanena attano sotthibhāvamakaṃsu. Mahāsatto hi tadā mahāgeṇḍukappamāṇo mahāsarīro ahosi. Taṃ mātāpitaro kenaci upāyena gahetvā gantuṃ asakkuṇantā attasinehena ca abhibhuyyamānā puttasinehaṃ chaḍḍetvā palāyiṃsu.
77. баад̣̇з багкз баж̇ахаамийд̇и ад̇д̇ано убхо баад̣̇з убхо багкз жа бхуумияам̣ аагаасз жа г̇аманасаж̇ж̇з гаронд̇о басаарзми ирияаами вааяамаами. ‘‘бадийхаамий’’д̇иби баато, взхаасаг̇аманаяог̇г̇з гаад̇ум̣ ийхаамийд̇и ад̇т̇о. ‘‘бад̇ийхаамий’’д̇иби батанд̇и. д̇ассад̇т̇о – баад̣̇з багкз жа бад̇и висум̣ ийхаами, г̇аманад̇т̇ам̣ вааяамаами, д̇ам̣ бана вааяаамагаран̣ад̇т̇амзва. гасмаа? яасмаа над̇т̇и мз гааяигам̣ б̣алам̣. сохам̣ аг̇ад̇иго д̇ад̇т̇аад̇и со ахам̣ звам̣бхууд̇о баад̣̇абагкавзгаллзна г̇аманавирахид̇о маад̇аабид̇уунам̣ абаг̇аманзна ваа аббадисаран̣о, д̇ад̇т̇а д̣̇ааваг̇г̇иубад̣̇д̣̇уд̇з ванз, д̇асмим̣ ваа гулаавагз тид̇ова звам̣ ид̣̇аани вад̇д̇аб̣б̣аагаарзна д̇ад̣̇аа жинд̇зсим̣. д̣̇уд̇ияан̃жзд̇т̇а аханд̇и нибаад̇амад̇д̇ам̣ д̣̇адтаб̣б̣ам̣.
77.Pāde pakkhe pajahāmīti attano ubho pāde ubho pakkhe ca bhūmiyaṃ ākāse ca gamanasajje karonto pasāremi iriyāmi vāyamāmi. ‘‘Paṭīhāmī’’tipi pāṭho, vehāsagamanayogge kātuṃ īhāmīti attho. ‘‘Patīhāmī’’tipi paṭhanti. Tassattho – pāde pakkhe ca pati visuṃ īhāmi, gamanatthaṃ vāyamāmi, taṃ pana vāyāmakaraṇatthameva. Kasmā? Yasmā natthi me kāyikaṃ balaṃ. Sohaṃ agatiko tatthāti so ahaṃ evaṃbhūto pādapakkhavekallena gamanavirahito mātāpitūnaṃ apagamanena vā appaṭisaraṇo, tattha dāvaggiupaddute vane, tasmiṃ vā kulāvake ṭhitova evaṃ idāni vattabbākārena tadā cintesiṃ. Dutiyañcettha ahanti nipātamattaṃ daṭṭhabbaṃ.
78.
78.
ид̣̇аани д̇ад̣̇аа ад̇д̇ано жинд̇ид̇аагаарам̣ д̣̇ассзд̇ум̣ ‘‘язсааха’’нд̇иаад̣̇имааха;
Idāni tadā attano cintitākāraṃ dassetuṃ ‘‘yesāha’’ntiādimāha;
д̇ад̇т̇а язсаахам̣ убад̇хаавзяяам̣, бхийд̇о д̇асид̇авзд̇хид̇од̇и маран̣абхаязна бхийд̇о д̇ад̇о зва жид̇д̇уд̇раасзна д̇асид̇о сарийрагамбанзна взд̇хид̇о язсамахам̣ багканд̇арам̣ зд̇арахи д̣̇ааваг̇г̇иубад̣̇д̣̇уд̇о ж̇алад̣̇уг̇г̇ам̣ вияа ман̃н̃амаано бависид̇ум̣ убад̇хаавзяяам̣ д̇з мама маад̇аабид̇аро мам̣ згагам̣ зва охааяа ж̇ахид̇ваа багганд̇аа. гат̇ам̣ мз аж̇ж̇а гаад̇авзд̇и гат̇ам̣ ну ко маяаа аж̇ж̇а гаад̇аб̣б̣ам̣, бадибаж̇ж̇ид̇аб̣б̣анд̇и ад̇т̇о.
Tattha yesāhaṃ upadhāveyyaṃ, bhīto tasitavedhitoti maraṇabhayena bhīto tato eva cittutrāsena tasito sarīrakampanena vedhito yesamahaṃ pakkhantaraṃ etarahi dāvaggiupadduto jaladuggaṃ viya maññamāno pavisituṃ upadhāveyyaṃ te mama mātāpitaro maṃ ekakaṃ eva ohāya jahitvā pakkantā. Kathaṃ me ajja kātaveti kathaṃ nu kho mayā ajja kātabbaṃ, paṭipajjitabbanti attho.
звам̣ махаасад̇д̇о ид̇игад̇д̇аб̣б̣ад̇аасаммуул̣хо худ̇ваа тид̇о буна жинд̇зси – ‘‘имасмим̣ логз сийлаг̇ун̣о наама ад̇т̇и, сажжаг̇ун̣о наама ад̇т̇и, ад̇ийд̇з баарамияо буурзд̇ваа б̣од̇хид̇алз нисийд̣̇ид̇ваа абхисамб̣уд̣̇д̇хаа сийласамаад̇хибан̃н̃аавимуд̇д̇ивимуд̇д̇ин̃аан̣ад̣̇ассанасамбаннаа сажжаануд̣̇аяагаарун̃н̃аканд̇исаманнааг̇ад̇аа саб̣б̣асад̇д̇зсу самаббавад̇д̇амзд̇д̇аабхааванаа саб̣б̣ан̃н̃уб̣уд̣̇д̇хаа наама ад̇т̇и, д̇зхи жа бадивид̣̇д̇хо зганд̇анияяаанаг̇ун̣о д̇хаммо ад̇т̇и, маяи жааби згам̣ сажжам̣ ад̇т̇и. сам̣виж̇ж̇амаано зго сабхаавад̇хаммо бан̃н̃ааяад̇и, д̇асмаа ад̇ийд̇аб̣уд̣̇д̇хз жзва д̇зхи бадивид̣̇д̇хаг̇ун̣з жа ааваж̇ж̇зд̇ваа маяи виж̇ж̇амаанам̣ сажжам̣ сабхаавад̇хаммам̣ г̇ахзд̇ваа сажжагирияам̣ гад̇ваа аг̇г̇им̣ бадиггамаабзд̇ваа аж̇ж̇а маяаа ад̇д̇ано жзва ид̇ха ваасийнам̣ сзсабаан̣ийнан̃жа сод̇т̇ибхаавам̣ гаад̇ум̣ ваддад̇ий’’д̇и. звам̣ бана жинд̇зд̇ваа махаасад̇д̇о ад̇д̇ано аанубхаавз тад̇ваа яат̇аажинд̇ид̇ам̣ бадибаж̇ж̇и. д̇зна вуд̇д̇ам̣ –
Evaṃ mahāsatto itikattabbatāsammūḷho hutvā ṭhito puna cintesi – ‘‘imasmiṃ loke sīlaguṇo nāma atthi, saccaguṇo nāma atthi, atīte pāramiyo pūretvā bodhitale nisīditvā abhisambuddhā sīlasamādhipaññāvimuttivimuttiñāṇadassanasampannā saccānudayakāruññakhantisamannāgatā sabbasattesu samappavattamettābhāvanā sabbaññubuddhā nāma atthi, tehi ca paṭividdho ekantaniyyānaguṇo dhammo atthi, mayi cāpi ekaṃ saccaṃ atthi. Saṃvijjamāno eko sabhāvadhammo paññāyati, tasmā atītabuddhe ceva tehi paṭividdhaguṇe ca āvajjetvā mayi vijjamānaṃ saccaṃ sabhāvadhammaṃ gahetvā saccakiriyaṃ katvā aggiṃ paṭikkamāpetvā ajja mayā attano ceva idha vāsīnaṃ sesapāṇīnañca sotthibhāvaṃ kātuṃ vaṭṭatī’’ti. Evaṃ pana cintetvā mahāsatto attano ānubhāve ṭhatvā yathācintitaṃ paṭipajji. Tena vuttaṃ –
79.
79.
‘‘ад̇т̇и логз сийлаг̇ун̣о, сажжам̣ сожзяяануд̣̇д̣̇аяаа;
‘‘Atthi loke sīlaguṇo, saccaṃ soceyyanuddayā;
д̇зна сажжзна гаахаами, сажжагирияамуд̇д̇амам̣.
Tena saccena kāhāmi, saccakiriyamuttamaṃ.
80.
80.
‘‘ааваж̇ж̇зд̇ваа д̇хаммаб̣алам̣, сарид̇ваа буб̣б̣агз ж̇инз;
‘‘Āvajjetvā dhammabalaṃ, saritvā pubbake jine;
сажжаб̣аламавассааяа, сажжагирияамагаасаха’’нд̇и.
Saccabalamavassāya, saccakiriyamakāsaha’’nti.
81. д̇ад̇т̇а махаасад̇д̇о ад̇ийд̇з бариниб̣б̣уд̇аанам̣ б̣уд̣̇д̇хаанам̣ г̇ун̣з ааваж̇ж̇зд̇ваа ад̇д̇ани виж̇ж̇амаанам̣ сажжасабхаавам̣ аараб̣бха яам̣ г̇аат̇ам̣ вад̇ваа д̇ад̣̇аа сажжагирияамагааси, д̇ам̣ д̣̇ассзд̇ум̣ ‘‘санд̇и багкаа’’д̇иаад̣̇и вуд̇д̇ам̣.
81. Tattha mahāsatto atīte parinibbutānaṃ buddhānaṃ guṇe āvajjetvā attani vijjamānaṃ saccasabhāvaṃ ārabbha yaṃ gāthaṃ vatvā tadā saccakiriyamakāsi, taṃ dassetuṃ ‘‘santi pakkhā’’tiādi vuttaṃ.
д̇ад̇т̇а санд̇и багкаа абад̇анаад̇и маяхам̣ багкаа наама ад̇т̇и убалаб̣бханд̇и, но жа ко саггаа зд̇зхи уббад̇ид̇ум̣ аагаасзна г̇анд̇унд̇и абад̇анаа. санд̇и баад̣̇аа аван̃жанаад̇и баад̣̇ааби мз ад̇т̇и, д̇зхи бана ван̃жид̇ум̣ бад̣̇аваараг̇аманзна г̇анд̇ум̣ на саггаад̇и аван̃жанаа. маад̇аабид̇аа жа нигканд̇аад̇и яз мам̣ ан̃н̃ад̇т̇а нзяяум̣, д̇зби маран̣абхаязна мама маад̇аабид̇аро нигканд̇аа. ж̇аад̇авзд̣̇аад̇и аг̇г̇им̣ аалабад̇и. со хи ж̇аад̇ова взд̣̇ияад̇и, д̇хуумаж̇аалудтаанзна бан̃н̃ааяад̇и, д̇асмаа ‘‘ж̇аад̇авзд̣̇о’’д̇и вужжад̇и. бадиггамаад̇и бадиг̇ажча нивад̇д̇аад̇и ж̇аад̇авзд̣̇ам̣ аан̣аабзд̇и.
Tattha santi pakkhā apatanāti mayhaṃ pakkhā nāma atthi upalabbhanti, no ca kho sakkā etehi uppatituṃ ākāsena gantunti apatanā. Santi pādā avañcanāti pādāpi me atthi, tehi pana vañcituṃ padavāragamanena gantuṃ na sakkāti avañcanā. Mātāpitā ca nikkhantāti ye maṃ aññattha neyyuṃ, tepi maraṇabhayena mama mātāpitaro nikkhantā. Jātavedāti aggiṃ ālapati. So hi jātova vediyati, dhūmajāluṭṭhānena paññāyati, tasmā ‘‘jātavedo’’ti vuccati. Paṭikkamāti paṭigaccha nivattāti jātavedaṃ āṇāpeti.
ид̇и махаасад̇д̇о ‘‘сажз маяхам̣ багкаанам̣ ад̇т̇ибхааво, д̇з жа басаарзд̇ваа аагаасз абад̇анабхааво, баад̣̇аанам̣ ад̇т̇ибхааво, д̇з жа угкибид̇ваа аван̃жанабхааво, маад̇аабид̇уунам̣ мам̣ гулаавагзязва чад̣д̣зд̇ваа балаад̇абхааво жа сажжасабхаавабхууд̇о зва, ж̇аад̇авзд̣̇а, зд̇зна сажжзна д̇вам̣ ид̇о бадиггамаа’’д̇и гулаавагз нибаннова сажжагирияам̣ агааси. д̇асса саха сажжагирияааяа сол̣асагарийсамад̇д̇з таанз ж̇аад̇авзд̣̇о бадиггами. бадиггаманд̇о жа на жхааяамаанова аран̃н̃ам̣ г̇ад̇о, уд̣̇агз бана обилаабид̇ауггаа вияа д̇ад̇т̇зва ниб̣б̣ааяи. д̇зна вуд̇д̇ам̣ –
Iti mahāsatto ‘‘sace mayhaṃ pakkhānaṃ atthibhāvo, te ca pasāretvā ākāse apatanabhāvo, pādānaṃ atthibhāvo, te ca ukkhipitvā avañcanabhāvo, mātāpitūnaṃ maṃ kulāvakeyeva chaḍḍetvā palātabhāvo ca saccasabhāvabhūto eva, jātaveda, etena saccena tvaṃ ito paṭikkamā’’ti kulāvake nipannova saccakiriyaṃ akāsi. Tassa saha saccakiriyāya soḷasakarīsamatte ṭhāne jātavedo paṭikkami. Paṭikkamanto ca na jhāyamānova araññaṃ gato, udake pana opilāpitaukkā viya tattheva nibbāyi. Tena vuttaṃ –
82.
82.
‘‘саха сажжз гад̇з маяхам̣, махаабаж̇ж̇алид̇о сикий;
‘‘Saha sacce kate mayhaṃ, mahāpajjalito sikhī;
важ̇ж̇зси сол̣асагарийсаани, уд̣̇агам̣ бад̇ваа яат̇аа сикий’’д̇и.
Vajjesi soḷasakarīsāni, udakaṃ patvā yathā sikhī’’ti.
саа банзсаа б̣од̇хисад̇д̇асса ваддагаяонияам̣ д̇асмим̣ самаяз б̣уд̣̇д̇хаг̇ун̣аанам̣ ааваж̇ж̇анабуб̣б̣игаа сажжагирияаа анан̃н̃асаад̇хааран̣аад̇и ааха ‘‘сажжзна мз само над̇т̇и, зсаа мз сажжабаарамий’’д̇и. д̇знзва хи д̇асса таанасса сагалзби имасмим̣ габбз аг̇г̇инаа анабхибхаванийяад̇д̇аа д̇ам̣ габбадтияабаадихаарияам̣ наама ж̇аад̇ам̣.
Sā panesā bodhisattassa vaṭṭakayoniyaṃ tasmiṃ samaye buddhaguṇānaṃ āvajjanapubbikā saccakiriyā anaññasādhāraṇāti āha ‘‘saccena me samo natthi, esā me saccapāramī’’ti. Teneva hi tassa ṭhānassa sakalepi imasmiṃ kappe agginā anabhibhavanīyattā taṃ kappaṭṭhiyapāṭihāriyaṃ nāma jātaṃ.
звам̣ махаасад̇д̇о сажжагирияавасзна ад̇д̇ано д̇ад̇т̇а ваасийнам̣ сад̇д̇аанан̃жа сод̇т̇им̣ гад̇ваа ж̇ийвид̇абарияосаанз яат̇аагаммам̣ г̇ад̇о.
Evaṃ mahāsatto saccakiriyavasena attano tattha vāsīnaṃ sattānañca sotthiṃ katvā jīvitapariyosāne yathākammaṃ gato.
д̇ад̣̇аа маад̇аабид̇аро зд̇арахи маад̇аабид̇аро ахзсум̣, ваддагарааж̇аа бана логанаат̇о.
Tadā mātāpitaro etarahi mātāpitaro ahesuṃ, vaṭṭakarājā pana lokanātho.
д̇асса хздтаа вуд̇д̇анаязнзва сзсабаарамияоби яат̇аарахам̣ нид̣̇д̇хаарзд̇аб̣б̣аа. д̇ат̇аа д̣̇ааваг̇г̇имхи д̇ат̇аа бхзраваагаарзна авад̇т̇арид̇ваа ааг̇ажчанд̇з д̇асмим̣ ваяз згаго худ̇вааби саарад̣̇ам̣ анаабаж̇ж̇ид̇ваа сажжаад̣̇ид̇хаммаг̇ун̣з б̣уд̣̇д̇хаг̇ун̣з жа ануссарид̇ваа ад̇д̇ано зва аанубхаавам̣ ниссааяа сажжагирияааяа д̇ад̇т̇а ваасийнамби сад̇д̇аанам̣ сод̇т̇ибхааваабаад̣̇анаад̣̇аяо аанубхааваа вибхаавзд̇аб̣б̣аа.
Tassa heṭṭhā vuttanayeneva sesapāramiyopi yathārahaṃ niddhāretabbā. Tathā dāvaggimhi tathā bheravākārena avattharitvā āgacchante tasmiṃ vaye ekako hutvāpi sāradaṃ anāpajjitvā saccādidhammaguṇe buddhaguṇe ca anussaritvā attano eva ānubhāvaṃ nissāya saccakiriyāya tattha vāsīnampi sattānaṃ sotthibhāvāpādanādayo ānubhāvā vibhāvetabbā.
ваддабод̇агажарияааван̣н̣анаа нидтид̇аа.
Vaṭṭapotakacariyāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / жарияаабидагабаал̣и • Cariyāpiṭakapāḷi / 9. ваддабод̇агажарияаа • 9. Vaṭṭapotakacariyā
