| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. வத்த²தா³யகத்தே²ரஅபதா³னவண்ணனா
7. Vatthadāyakattheraapadānavaṇṇanā
பக்கி²ஜாதோ ததா³ ஆஸிந்திஆதி³கங் ஆயஸ்மதோ வத்த²தா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே ஸுபண்ணயோனியங் நிப்³ப³த்தோ க³ந்த⁴மாத³னபப்³ப³தங் க³ச்ச²ந்தங் அத்த²த³ஸ்ஸிங் ப⁴க³வந்தங் தி³ஸ்வா பஸன்னமானஸோ ஸுபண்ணவண்ணங் விஜஹித்வா மாணவகவண்ணங் நிம்மினித்வா மஹக்³க⁴ங் தி³ப்³ப³வத்த²ங் ஆதா³ய ப⁴க³வந்தங் பூஜேஸி. ஸோபி ப⁴க³வா படிக்³க³ஹெத்வா அனுமோத³னங் வத்வா பக்காமி. ஸோ தேனேவ ஸோமனஸ்ஸேன வீதினாமெத்வா யாவதாயுகங் ட²த்வா ததோ சுதோ தே³வலோகே நிப்³ப³த்தோ தத்த² அபராபரங் ஸங்ஸரந்தோ புஞ்ஞானி அனுப⁴வித்வா ததோ மனுஸ்ஸேஸு மனுஸ்ஸஸம்பத்திந்தி ஸப்³ப³த்த² மஹக்³க⁴ங் வத்தா²ப⁴ரணங் லத்³த⁴ங், ததோ உப்பன்னுப்பன்னப⁴வே வத்த²ச்சா²யாய க³தக³தட்டா²னே வஸந்தோ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ ச²ளபி⁴ஞ்ஞப்பத்தகீ²ணாஸவோ அஹோஸி, புப்³பே³ கதபுஞ்ஞனாமேன வத்த²தா³யகத்தே²ரோதி பாகடோ.
Pakkhijātotadā āsintiādikaṃ āyasmato vatthadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle supaṇṇayoniyaṃ nibbatto gandhamādanapabbataṃ gacchantaṃ atthadassiṃ bhagavantaṃ disvā pasannamānaso supaṇṇavaṇṇaṃ vijahitvā māṇavakavaṇṇaṃ nimminitvā mahagghaṃ dibbavatthaṃ ādāya bhagavantaṃ pūjesi. Sopi bhagavā paṭiggahetvā anumodanaṃ vatvā pakkāmi. So teneva somanassena vītināmetvā yāvatāyukaṃ ṭhatvā tato cuto devaloke nibbatto tattha aparāparaṃ saṃsaranto puññāni anubhavitvā tato manussesu manussasampattinti sabbattha mahagghaṃ vatthābharaṇaṃ laddhaṃ, tato uppannuppannabhave vatthacchāyāya gatagataṭṭhāne vasanto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva chaḷabhiññappattakhīṇāsavo ahosi, pubbe katapuññanāmena vatthadāyakattheroti pākaṭo.
45. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பக்கி²ஜாதோ ததா³ ஆஸிந்திஆதி³மாஹ. தத்த² பக்கி²ஜாதோதி பக்க²ந்த³தி உபலவதி ஸகுணோ ஏதேனாதி பக்க²ங், பக்க²மஸ்ஸ அத்தீ²தி பக்கீ², பக்கி²யோனியங் ஜாதோ நிப்³ப³த்தோதி அத்தோ². ஸுபண்ணோதி ஸுந்த³ரங் பண்ணங் பத்தங் யஸ்ஸ ஸோ ஸுபண்ணோ, வாதக்³கா³ஹஸுவண்ணவண்ணஜலமானபத்தமஹாபா⁴ரோதி அத்தோ². க³ருளாதி⁴போதி நாகே³ க³ண்ஹனத்தா²ய க³ருங் பா⁴ரங் பாஸாணங் கி³ளந்தீதி க³ருளா, க³ருளானங் அதி⁴போ ராஜாதி க³ருளாதி⁴போ, விரஜங் பு³த்³த⁴ங் அத்³த³ஸாஹந்தி ஸம்ப³ந்தோ⁴.
45. So attano pubbakammaṃ saritvā somanassajāto pubbacaritāpadānaṃ pakāsento pakkhijāto tadā āsintiādimāha. Tattha pakkhijātoti pakkhandati upalavati sakuṇo etenāti pakkhaṃ, pakkhamassa atthīti pakkhī, pakkhiyoniyaṃ jāto nibbattoti attho. Supaṇṇoti sundaraṃ paṇṇaṃ pattaṃ yassa so supaṇṇo, vātaggāhasuvaṇṇavaṇṇajalamānapattamahābhāroti attho. Garuḷādhipoti nāge gaṇhanatthāya garuṃ bhāraṃ pāsāṇaṃ giḷantīti garuḷā, garuḷānaṃ adhipo rājāti garuḷādhipo, virajaṃ buddhaṃ addasāhanti sambandho.
வத்த²தா³யகத்தே²ரஅபதா³னவண்ணனா ஸமத்தா.
Vatthadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. வத்த²தா³யகத்தே²ரஅபதா³னங் • 7. Vatthadāyakattheraapadānaṃ
