| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. ৰত্থদাযকত্থেরঅপদানৰণ্ণনা
7. Vatthadāyakattheraapadānavaṇṇanā
পক্খিজাতো তদা আসিন্তিআদিকং আযস্মতো ৰত্থদাযকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে সুপণ্ণযোনিযং নিব্বত্তো গন্ধমাদনপব্বতং গচ্ছন্তং অত্থদস্সিং ভগৰন্তং দিস্ৰা পসন্নমানসো সুপণ্ণৰণ্ণং ৰিজহিত্ৰা মাণৰকৰণ্ণং নিম্মিনিত্ৰা মহগ্ঘং দিব্বৰত্থং আদায ভগৰন্তং পূজেসি। সোপি ভগৰা পটিগ্গহেত্ৰা অনুমোদনং ৰত্ৰা পক্কামি। সো তেনেৰ সোমনস্সেন ৰীতিনামেত্ৰা যাৰতাযুকং ঠত্ৰা ততো চুতো দেৰলোকে নিব্বত্তো তত্থ অপরাপরং সংসরন্তো পুঞ্ঞানি অনুভৰিত্ৰা ততো মনুস্সেসু মনুস্সসম্পত্তিন্তি সব্বত্থ মহগ্ঘং ৰত্থাভরণং লদ্ধং, ততো উপ্পন্নুপ্পন্নভৰে ৰত্থচ্ছাযায গতগতট্ঠানে ৰসন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিতো নচিরস্সেৰ ছল়ভিঞ্ঞপ্পত্তখীণাসৰো অহোসি, পুব্বে কতপুঞ্ঞনামেন ৰত্থদাযকত্থেরোতি পাকটো।
Pakkhijātotadā āsintiādikaṃ āyasmato vatthadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle supaṇṇayoniyaṃ nibbatto gandhamādanapabbataṃ gacchantaṃ atthadassiṃ bhagavantaṃ disvā pasannamānaso supaṇṇavaṇṇaṃ vijahitvā māṇavakavaṇṇaṃ nimminitvā mahagghaṃ dibbavatthaṃ ādāya bhagavantaṃ pūjesi. Sopi bhagavā paṭiggahetvā anumodanaṃ vatvā pakkāmi. So teneva somanassena vītināmetvā yāvatāyukaṃ ṭhatvā tato cuto devaloke nibbatto tattha aparāparaṃ saṃsaranto puññāni anubhavitvā tato manussesu manussasampattinti sabbattha mahagghaṃ vatthābharaṇaṃ laddhaṃ, tato uppannuppannabhave vatthacchāyāya gatagataṭṭhāne vasanto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva chaḷabhiññappattakhīṇāsavo ahosi, pubbe katapuññanāmena vatthadāyakattheroti pākaṭo.
৪৫. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পক্খিজাতো তদা আসিন্তিআদিমাহ। তত্থ পক্খিজাতোতি পক্খন্দতি উপলৰতি সকুণো এতেনাতি পক্খং, পক্খমস্স অত্থীতি পক্খী, পক্খিযোনিযং জাতো নিব্বত্তোতি অত্থো। সুপণ্ণোতি সুন্দরং পণ্ণং পত্তং যস্স সো সুপণ্ণো, ৰাতগ্গাহসুৰণ্ণৰণ্ণজলমানপত্তমহাভারোতি অত্থো। গরুল়াধিপোতি নাগে গণ্হনত্থায গরুং ভারং পাসাণং গিল়ন্তীতি গরুল়া, গরুল়ানং অধিপো রাজাতি গরুল়াধিপো, ৰিরজং বুদ্ধং অদ্দসাহন্তি সম্বন্ধো।
45. So attano pubbakammaṃ saritvā somanassajāto pubbacaritāpadānaṃ pakāsento pakkhijāto tadā āsintiādimāha. Tattha pakkhijātoti pakkhandati upalavati sakuṇo etenāti pakkhaṃ, pakkhamassa atthīti pakkhī, pakkhiyoniyaṃ jāto nibbattoti attho. Supaṇṇoti sundaraṃ paṇṇaṃ pattaṃ yassa so supaṇṇo, vātaggāhasuvaṇṇavaṇṇajalamānapattamahābhāroti attho. Garuḷādhipoti nāge gaṇhanatthāya garuṃ bhāraṃ pāsāṇaṃ giḷantīti garuḷā, garuḷānaṃ adhipo rājāti garuḷādhipo, virajaṃ buddhaṃ addasāhanti sambandho.
ৰত্থদাযকত্থেরঅপদানৰণ্ণনা সমত্তা।
Vatthadāyakattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. ৰত্থদাযকত্থেরঅপদানং • 7. Vatthadāyakattheraapadānaṃ
