| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೭. ವತ್ಥದಾಯಕತ್ಥೇರಅಪದಾನವಣ್ಣನಾ
7. Vatthadāyakattheraapadānavaṇṇanā
ಪಕ್ಖಿಜಾತೋ ತದಾ ಆಸಿನ್ತಿಆದಿಕಂ ಆಯಸ್ಮತೋ ವತ್ಥದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅತ್ಥದಸ್ಸಿಸ್ಸ ಭಗವತೋ ಕಾಲೇ ಸುಪಣ್ಣಯೋನಿಯಂ ನಿಬ್ಬತ್ತೋ ಗನ್ಧಮಾದನಪಬ್ಬತಂ ಗಚ್ಛನ್ತಂ ಅತ್ಥದಸ್ಸಿಂ ಭಗವನ್ತಂ ದಿಸ್ವಾ ಪಸನ್ನಮಾನಸೋ ಸುಪಣ್ಣವಣ್ಣಂ ವಿಜಹಿತ್ವಾ ಮಾಣವಕವಣ್ಣಂ ನಿಮ್ಮಿನಿತ್ವಾ ಮಹಗ್ಘಂ ದಿಬ್ಬವತ್ಥಂ ಆದಾಯ ಭಗವನ್ತಂ ಪೂಜೇಸಿ। ಸೋಪಿ ಭಗವಾ ಪಟಿಗ್ಗಹೇತ್ವಾ ಅನುಮೋದನಂ ವತ್ವಾ ಪಕ್ಕಾಮಿ। ಸೋ ತೇನೇವ ಸೋಮನಸ್ಸೇನ ವೀತಿನಾಮೇತ್ವಾ ಯಾವತಾಯುಕಂ ಠತ್ವಾ ತತೋ ಚುತೋ ದೇವಲೋಕೇ ನಿಬ್ಬತ್ತೋ ತತ್ಥ ಅಪರಾಪರಂ ಸಂಸರನ್ತೋ ಪುಞ್ಞಾನಿ ಅನುಭವಿತ್ವಾ ತತೋ ಮನುಸ್ಸೇಸು ಮನುಸ್ಸಸಮ್ಪತ್ತಿನ್ತಿ ಸಬ್ಬತ್ಥ ಮಹಗ್ಘಂ ವತ್ಥಾಭರಣಂ ಲದ್ಧಂ, ತತೋ ಉಪ್ಪನ್ನುಪ್ಪನ್ನಭವೇ ವತ್ಥಚ್ಛಾಯಾಯ ಗತಗತಟ್ಠಾನೇ ವಸನ್ತೋ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವಿಞ್ಞುತಂ ಪತ್ತೋ ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಛಳಭಿಞ್ಞಪ್ಪತ್ತಖೀಣಾಸವೋ ಅಹೋಸಿ, ಪುಬ್ಬೇ ಕತಪುಞ್ಞನಾಮೇನ ವತ್ಥದಾಯಕತ್ಥೇರೋತಿ ಪಾಕಟೋ।
Pakkhijātotadā āsintiādikaṃ āyasmato vatthadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle supaṇṇayoniyaṃ nibbatto gandhamādanapabbataṃ gacchantaṃ atthadassiṃ bhagavantaṃ disvā pasannamānaso supaṇṇavaṇṇaṃ vijahitvā māṇavakavaṇṇaṃ nimminitvā mahagghaṃ dibbavatthaṃ ādāya bhagavantaṃ pūjesi. Sopi bhagavā paṭiggahetvā anumodanaṃ vatvā pakkāmi. So teneva somanassena vītināmetvā yāvatāyukaṃ ṭhatvā tato cuto devaloke nibbatto tattha aparāparaṃ saṃsaranto puññāni anubhavitvā tato manussesu manussasampattinti sabbattha mahagghaṃ vatthābharaṇaṃ laddhaṃ, tato uppannuppannabhave vatthacchāyāya gatagataṭṭhāne vasanto imasmiṃ buddhuppāde ekasmiṃ kulagehe nibbatto viññutaṃ patto satthari pasīditvā pabbajito nacirasseva chaḷabhiññappattakhīṇāsavo ahosi, pubbe katapuññanāmena vatthadāyakattheroti pākaṭo.
೪೫. ಸೋ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪಕ್ಖಿಜಾತೋ ತದಾ ಆಸಿನ್ತಿಆದಿಮಾಹ। ತತ್ಥ ಪಕ್ಖಿಜಾತೋತಿ ಪಕ್ಖನ್ದತಿ ಉಪಲವತಿ ಸಕುಣೋ ಏತೇನಾತಿ ಪಕ್ಖಂ, ಪಕ್ಖಮಸ್ಸ ಅತ್ಥೀತಿ ಪಕ್ಖೀ, ಪಕ್ಖಿಯೋನಿಯಂ ಜಾತೋ ನಿಬ್ಬತ್ತೋತಿ ಅತ್ಥೋ। ಸುಪಣ್ಣೋತಿ ಸುನ್ದರಂ ಪಣ್ಣಂ ಪತ್ತಂ ಯಸ್ಸ ಸೋ ಸುಪಣ್ಣೋ, ವಾತಗ್ಗಾಹಸುವಣ್ಣವಣ್ಣಜಲಮಾನಪತ್ತಮಹಾಭಾರೋತಿ ಅತ್ಥೋ। ಗರುಳಾಧಿಪೋತಿ ನಾಗೇ ಗಣ್ಹನತ್ಥಾಯ ಗರುಂ ಭಾರಂ ಪಾಸಾಣಂ ಗಿಳನ್ತೀತಿ ಗರುಳಾ, ಗರುಳಾನಂ ಅಧಿಪೋ ರಾಜಾತಿ ಗರುಳಾಧಿಪೋ, ವಿರಜಂ ಬುದ್ಧಂ ಅದ್ದಸಾಹನ್ತಿ ಸಮ್ಬನ್ಧೋ।
45. So attano pubbakammaṃ saritvā somanassajāto pubbacaritāpadānaṃ pakāsento pakkhijāto tadā āsintiādimāha. Tattha pakkhijātoti pakkhandati upalavati sakuṇo etenāti pakkhaṃ, pakkhamassa atthīti pakkhī, pakkhiyoniyaṃ jāto nibbattoti attho. Supaṇṇoti sundaraṃ paṇṇaṃ pattaṃ yassa so supaṇṇo, vātaggāhasuvaṇṇavaṇṇajalamānapattamahābhāroti attho. Garuḷādhipoti nāge gaṇhanatthāya garuṃ bhāraṃ pāsāṇaṃ giḷantīti garuḷā, garuḷānaṃ adhipo rājāti garuḷādhipo, virajaṃ buddhaṃ addasāhanti sambandho.
ವತ್ಥದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Vatthadāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೭. ವತ್ಥದಾಯಕತ್ಥೇರಅಪದಾನಂ • 7. Vatthadāyakattheraapadānaṃ
