| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. ཝཏྠགུཡ྄ཧནིདསྶནཔཉྷོ
3. Vatthaguyhanidassanapañho
༣. ‘‘བྷནྟེ ནཱགསེན, བྷཱསིཏམྤེཏཾ ཏཐཱགཏེན –
3. ‘‘Bhante nāgasena, bhāsitampetaṃ tathāgatena –
མནསཱ སཾཝརོ སཱདྷུ, སཱདྷུ སབྦཏྠ སཾཝརོ’ཏི༎
Manasā saṃvaro sādhu, sādhu sabbattha saṃvaro’ti.
‘‘པུན ཙ ཏཐཱགཏོ ཙཏུནྣཾ པརིསཱནཾ མཛ྄ཛྷེ ནིསཱིདིཏྭཱ པུརཏོ དེཝམནུསྶཱནཾ སེལསྶ བྲཱཧྨཎསྶ ཀོསོཧིཏཾ ཝཏྠགུཡ྄ཧཾ དསྶེསི། ཡདི, བྷནྟེ ནཱགསེན, བྷགཝཏཱ བྷཎིཏཾ ‘ཀཱཡེན སཾཝརོ སཱདྷཱུ’ཏི, ཏེན ཧི སེལསྶ བྲཱཧྨཎསྶ ཀོསོཧིཏཾ ཝཏྠགུཡ྄ཧཾ དསྶེསཱིཏི ཡཾ ཝཙནཾ, ཏཾ མིཙྪཱ། ཡདི སེལསྶ བྲཱཧྨཎསྶ ཀོསོཧིཏཾ ཝཏྠགུཡ྄ཧཾ དསྶེཏི, ཏེན ཧི ‘ཀཱཡེན སཾཝརོ སཱདྷཱུ’ཏི ཏམྤི ཝཙནཾ མིཙྪཱ། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
‘‘Puna ca tathāgato catunnaṃ parisānaṃ majjhe nisīditvā purato devamanussānaṃ selassa brāhmaṇassa kosohitaṃ vatthaguyhaṃ dassesi. Yadi, bhante nāgasena, bhagavatā bhaṇitaṃ ‘kāyena saṃvaro sādhū’ti, tena hi selassa brāhmaṇassa kosohitaṃ vatthaguyhaṃ dassesīti yaṃ vacanaṃ, taṃ micchā. Yadi selassa brāhmaṇassa kosohitaṃ vatthaguyhaṃ dasseti, tena hi ‘kāyena saṃvaro sādhū’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ཀཱཡེན སཾཝརོ སཱདྷཱུ’ཏི, སེལསྶ ཙ བྲཱཧྨཎསྶ ཀོསོཧིཏཾ ཝཏྠགུཡ྄ཧཾ དསྶིཏཾ། ཡསྶ ཁོ, མཧཱརཱཛ, ཏཐཱགཏེ ཀངྑཱ ཨུཔྤནྣཱ, ཏསྶ བོདྷནཏྠཱཡ བྷགཝཱ ཨིདྡྷིཡཱ ཏཔྤཊིབྷཱགཾ ཀཱཡཾ དསྶེཏི, སོ ཡེཝ ཏཾ པཱཊིཧཱརིཡཾ པསྶཏཱི’’ཏི།
‘‘Bhāsitampetaṃ, mahārāja, bhagavatā ‘kāyena saṃvaro sādhū’ti, selassa ca brāhmaṇassa kosohitaṃ vatthaguyhaṃ dassitaṃ. Yassa kho, mahārāja, tathāgate kaṅkhā uppannā, tassa bodhanatthāya bhagavā iddhiyā tappaṭibhāgaṃ kāyaṃ dasseti, so yeva taṃ pāṭihāriyaṃ passatī’’ti.
‘‘ཀོ པནེཏཾ, བྷནྟེ ནཱགསེན, སདྡཧིསྶཏི, ཡཾ པརིསགཏོ ཨེཀོ ཡེཝ ཏཾ གུཡ྄ཧཾ པསྶཏི, ཨཝསེསཱ ཏཏྠེཝ ཝསནྟཱ ན པསྶནྟཱིཏི། ཨིངྒྷ མེ ཏྭཾ ཏཏྠ ཀཱརཎཾ ཨུཔདིས, ཀཱརཎེན མཾ སཉྙཱཔེཧཱི’’ཏི། ‘‘དིཊྛཔུབྦོ པན ཏཡཱ, མཧཱརཱཛ, ཀོཙི བྱཱདྷིཏོ པུརིསོ པརིཀིཎྞོ ཉཱཏིམིཏྟེཧཱི’’ཏི། ‘‘ཨཱམ བྷནྟེ’’ཏི། ‘‘ཨཔི ནུ ཁོ སཱ, མཧཱརཱཛ, པརིསཱ པསྶཏེཏཾ ཝེདནཾ, ཡཱཡ སོ པུརིསོ ཝེདནཱཡ ཝེདཡཏཱི’’ཏི། ‘‘ན ཧི བྷནྟེ, ཨཏྟནཱ ཡེཝ སོ, བྷནྟེ, པུརིསོ ཝེདཡཏཱི’’ཏི། ‘‘ཨེཝམེཝ ཁོ, མཧཱརཱཛ, ཡསྶེཝ ཏཐཱགཏེ ཀངྑཱ ཨུཔྤནྣཱ, ཏསྶེཝ ཏཐཱགཏོ བོདྷནཏྠཱཡ ཨིདྡྷིཡཱ ཏཔྤཊིབྷཱགཾ ཀཱཡཾ དསྶེཏི, སོ ཡེཝ ཏཾ པཱཊིཧཱརིཡཾ པསྶཏི།
‘‘Ko panetaṃ, bhante nāgasena, saddahissati, yaṃ parisagato eko yeva taṃ guyhaṃ passati, avasesā tattheva vasantā na passantīti. Iṅgha me tvaṃ tattha kāraṇaṃ upadisa, kāraṇena maṃ saññāpehī’’ti. ‘‘Diṭṭhapubbo pana tayā, mahārāja, koci byādhito puriso parikiṇṇo ñātimittehī’’ti. ‘‘Āma bhante’’ti. ‘‘Api nu kho sā, mahārāja, parisā passatetaṃ vedanaṃ, yāya so puriso vedanāya vedayatī’’ti. ‘‘Na hi bhante, attanā yeva so, bhante, puriso vedayatī’’ti. ‘‘Evameva kho, mahārāja, yasseva tathāgate kaṅkhā uppannā, tasseva tathāgato bodhanatthāya iddhiyā tappaṭibhāgaṃ kāyaṃ dasseti, so yeva taṃ pāṭihāriyaṃ passati.
‘‘ཡཐཱ ཝཱ པན, མཧཱརཱཛ, ཀཉྩིདེཝ པུརིསཾ བྷཱུཏོ ཨཱཝིསེཡྻ, ཨཔི ནུ ཁོ སཱ, མཧཱརཱཛ, པརིསཱ པསྶཏི ཏཾ བྷཱུཏཱགམན’’ནྟི? ‘‘ན ཧི, བྷནྟེ, སོ ཡེཝ ཨཱཏུརོ ཏསྶ བྷཱུཏསྶ ཨཱགམནཾ པསྶཏཱི’’ཏི། ‘‘ཨེཝམེཝ ཁོ, མཧཱརཱཛ, ཡསྶེཝ ཏཐཱགཏེ ཀངྑཱ ཨུཔྤནྣཱ, ཏསྶེཝ ཏཐཱགཏོ བོདྷནཏྠཱཡ ཨིདྡྷིཡཱ ཏཔྤཊིབྷཱགཾ ཀཱཡཾ དསྶེཏི, སོ ཡེཝ ཏཾ པཱཊིཧཱརིཡཾ པསྶཏཱི’’ཏི།
‘‘Yathā vā pana, mahārāja, kañcideva purisaṃ bhūto āviseyya, api nu kho sā, mahārāja, parisā passati taṃ bhūtāgamana’’nti? ‘‘Na hi, bhante, so yeva āturo tassa bhūtassa āgamanaṃ passatī’’ti. ‘‘Evameva kho, mahārāja, yasseva tathāgate kaṅkhā uppannā, tasseva tathāgato bodhanatthāya iddhiyā tappaṭibhāgaṃ kāyaṃ dasseti, so yeva taṃ pāṭihāriyaṃ passatī’’ti.
‘‘དུཀྐརཾ, བྷནྟེ ནཱགསེན, བྷགཝཏཱ ཀཏཾ, ཡཾ ཨེཀསྶཔི ཨདསྶནཱིཡཾ, ཏཾ དསྶེནྟེནཱ’’ཏི། ‘‘ན, མཧཱརཱཛ, བྷགཝཱ གུཡ྄ཧཾ དསྶེསི , ཨིདྡྷིཡཱ པན ཚཱཡཾ དསྶེསཱི’’ཏི། ‘‘ཚཱཡཱཡཔི, བྷནྟེ, དིཊྛཱཡ དིཊྛཾ ཡེཝ ཧོཏི གུཡ྄ཧཾ, ཡཾ དིསྭཱ ནིཊྛཾ གཏོ’’ཏི། ‘‘དུཀྐརཉྩཱཔི, མཧཱརཱཛ, ཏཐཱགཏོ ཀརོཏི བོདྷནེཡྻེ སཏྟེ བོདྷེཏུཾ། ཡདི, མཧཱརཱཛ, ཏཐཱགཏོ ཀིརིཡཾ ཧཱཔེཡྻ, བོདྷནེཡྻཱ སཏྟཱ ན བུཛ྄ཛྷེཡྻུཾ། ཡསྨཱ ཙ ཁོ, མཧཱརཱཛ, ཡོགཉྙཱུ ཏཐཱགཏོ བོདྷནེཡྻེ སཏྟེ བོདྷེཏུཾ, ཏསྨཱ ཏཐཱགཏོ ཡེན ཡེན ཡོགེན བོདྷནེཡྻཱ བུཛ྄ཛྷནྟི, ཏེན ཏེན ཡོགེན བོདྷནེཡྻེ བོདྷེཏི།
‘‘Dukkaraṃ, bhante nāgasena, bhagavatā kataṃ, yaṃ ekassapi adassanīyaṃ, taṃ dassentenā’’ti. ‘‘Na, mahārāja, bhagavā guyhaṃ dassesi , iddhiyā pana chāyaṃ dassesī’’ti. ‘‘Chāyāyapi, bhante, diṭṭhāya diṭṭhaṃ yeva hoti guyhaṃ, yaṃ disvā niṭṭhaṃ gato’’ti. ‘‘Dukkarañcāpi, mahārāja, tathāgato karoti bodhaneyye satte bodhetuṃ. Yadi, mahārāja, tathāgato kiriyaṃ hāpeyya, bodhaneyyā sattā na bujjheyyuṃ. Yasmā ca kho, mahārāja, yogaññū tathāgato bodhaneyye satte bodhetuṃ, tasmā tathāgato yena yena yogena bodhaneyyā bujjhanti, tena tena yogena bodhaneyye bodheti.
‘‘ཡཐཱ, མཧཱརཱཛ, བྷིསཀྐོ སལླཀཏྟོ ཡེན ཡེན བྷེསཛྫེན ཨཱཏུརོ ཨརོགོ ཧོཏི, ཏེན ཏེན བྷེསཛྫེན ཨཱཏུརཾ ཨུཔསངྐམཏི, ཝམནཱིཡཾ ཝམེཏི, ཝིརེཙནཱིཡཾ ཝིརེཙེཏི, ཨནུལེཔནཱིཡཾ ཨནུལིམྤེཏི, ཨནུཝཱསནཱིཡཾ ཨནུཝཱསེཏི། ཨེཝམེཝ ཁོ, མཧཱརཱཛ, ཏཐཱགཏོ ཡེན ཡེན ཡོགེན བོདྷནེཡྻཱ སཏྟཱ བུཛ྄ཛྷནྟི, ཏེན ཏེན ཡོགེན བོདྷེཏི།
‘‘Yathā, mahārāja, bhisakko sallakatto yena yena bhesajjena āturo arogo hoti, tena tena bhesajjena āturaṃ upasaṅkamati, vamanīyaṃ vameti, virecanīyaṃ vireceti, anulepanīyaṃ anulimpeti, anuvāsanīyaṃ anuvāseti. Evameva kho, mahārāja, tathāgato yena yena yogena bodhaneyyā sattā bujjhanti, tena tena yogena bodheti.
‘‘ཡཐཱ ཝཱ པན, མཧཱརཱཛ, ཨིཏྠཱི མཱུལ༹ྷགབྦྷཱ བྷིསཀྐསྶ ཨདསྶནཱིཡཾ གུཡ྄ཧཾ དསྶེཏི, ཨེཝམེཝ ཁོ, མཧཱརཱཛ, ཏཐཱགཏོ བོདྷནེཡྻེ སཏྟེ བོདྷེཏུཾ ཨདསྶནཱིཡཾ གུཡ྄ཧཾ ཨིདྡྷིཡཱ ཚཱཡཾ དསྶེསི། ནཏྠི, མཧཱརཱཛ, ཨདསྶནཱིཡོ ནཱམ ཨོཀཱསོ པུགྒལཾ ཨུཔཱདཱཡ། ཡདི, མཧཱརཱཛ, ཀོཙི བྷགཝཏོ ཧདཡཾ དིསྭཱ བུཛ྄ཛྷེཡྻ, ཏསྶཔི བྷགཝཱ ཡོགེན ཧདཡཾ དསྶེཡྻ, ཡོགཉྙཱུ, མཧཱརཱཛ, ཏཐཱགཏོ དེསནཱཀུསལོ།
‘‘Yathā vā pana, mahārāja, itthī mūḷhagabbhā bhisakkassa adassanīyaṃ guyhaṃ dasseti, evameva kho, mahārāja, tathāgato bodhaneyye satte bodhetuṃ adassanīyaṃ guyhaṃ iddhiyā chāyaṃ dassesi. Natthi, mahārāja, adassanīyo nāma okāso puggalaṃ upādāya. Yadi, mahārāja, koci bhagavato hadayaṃ disvā bujjheyya, tassapi bhagavā yogena hadayaṃ dasseyya, yogaññū, mahārāja, tathāgato desanākusalo.
‘‘ནནུ, མཧཱརཱཛ, ཏཐཱགཏོ ཐེརསྶ ནནྡསྶ ཨདྷིམུཏྟིཾ ཛཱནིཏྭཱ ཏཾ དེཝབྷཝནཾ ནེཏྭཱ དེཝཀཉྙཱཡོ དསྶེསི ‘ཨིམིནཱཡཾ ཀུལཔུཏྟོ བུཛ྄ཛྷིསྶཏཱི’ཏི, ཏེན ཙ སོ ཀུལཔུཏྟོ བུཛ྄ཛྷི། ཨིཏི ཁོ, མཧཱརཱཛ, ཏཐཱགཏོ ཨནེཀཔརིཡཱཡེན སུབྷནིམིཏྟཾ ཧཱིལེ༹ནྟོ གརཧནྟོ ཛིགུཙྪནྟོ ཏསྶ བོདྷནཧེཏུ ཀཀུཊཔཱདིནིཡོ ཨཙྪརཱཡོ དསྶེསི། ཨེཝམྤི ཏཐཱགཏོ ཡོགཉྙཱུ དེསནཱཀུསལོ།
‘‘Nanu, mahārāja, tathāgato therassa nandassa adhimuttiṃ jānitvā taṃ devabhavanaṃ netvā devakaññāyo dassesi ‘imināyaṃ kulaputto bujjhissatī’ti, tena ca so kulaputto bujjhi. Iti kho, mahārāja, tathāgato anekapariyāyena subhanimittaṃ hīḷento garahanto jigucchanto tassa bodhanahetu kakuṭapādiniyo accharāyo dassesi. Evampi tathāgato yogaññū desanākusalo.
‘‘པུན ཙཔརཾ, མཧཱརཱཛ, ཏཐཱགཏོ ཐེརསྶ ཙཱུལ༹པནྠཀསྶ བྷཱཏརཱ ནིཀྐཌྜྷིཏསྶ དུཀྑིཏསྶ དུམྨནསྶ ཨུཔགནྟྭཱ སུཁུམཾ ཙོལ༹ཁཎྜཾ ཨདཱསི ‘ཨིམིནཱཡཾ ཀུལཔུཏྟོ བུཛ྄ཛྷིསྶཏཱི’ཏི , སོ ཙ ཀུལཔུཏྟོ ཏེན ཀཱརཎེན ཛིནསཱསནེ ཝསཱིབྷཱཝཾ པཱཔུཎི། ཨེཝམྤི, མཧཱརཱཛ, ཏཐཱགཏོ ཡོགཉྙཱུ དེསནཱཀུསལོ།
‘‘Puna caparaṃ, mahārāja, tathāgato therassa cūḷapanthakassa bhātarā nikkaḍḍhitassa dukkhitassa dummanassa upagantvā sukhumaṃ coḷakhaṇḍaṃ adāsi ‘imināyaṃ kulaputto bujjhissatī’ti , so ca kulaputto tena kāraṇena jinasāsane vasībhāvaṃ pāpuṇi. Evampi, mahārāja, tathāgato yogaññū desanākusalo.
‘‘པུན ཙཔརཾ, མཧཱརཱཛ, ཏཐཱགཏོ བྲཱཧྨཎསྶ མོགྷརཱཛསྶ ཡཱཝ ཏཏིཡཾ པཉྷཾ པུཊྛོ ན བྱཱཀཱསི ‘ཨེཝམིམསྶ ཀུལཔུཏྟསྶ མཱནོ ཨུཔསམིསྶཏི, མཱནཱུཔསམཱ ཨབྷིསམཡོ བྷཝིསྶཏཱི’ཏི, ཏེན ཙ ཏསྶ ཀུལཔུཏྟསྶ མཱནོ ཨུཔསམི, མཱནཱུཔསམཱ སོ བྲཱཧྨཎོ ཚསུ ཨབྷིཉྙཱསུ ཝསཱིབྷཱཝཾ པཱཔུཎི། ཨེཝམྤི, མཧཱརཱཛ, ཏཐཱགཏོ ཡོགཉྙཱུ དེསནཱཀུསལོ’’ཏི།
‘‘Puna caparaṃ, mahārāja, tathāgato brāhmaṇassa mogharājassa yāva tatiyaṃ pañhaṃ puṭṭho na byākāsi ‘evamimassa kulaputtassa māno upasamissati, mānūpasamā abhisamayo bhavissatī’ti, tena ca tassa kulaputtassa māno upasami, mānūpasamā so brāhmaṇo chasu abhiññāsu vasībhāvaṃ pāpuṇi. Evampi, mahārāja, tathāgato yogaññū desanākusalo’’ti.
‘‘སཱདྷུ, བྷནྟེ ནཱགསེན, སུནིབྦེཋིཏོ པཉྷོ བཧུཝིདྷེཧི ཀཱརཎེཧི, གཧནཾ ཨགཧནཾ ཀཏཾ, ཨནྡྷཀཱརོ ཨཱལོཀོ ཀཏོ, གཎྛི བྷིནྣོ, བྷགྒཱ པརཝཱདཱ, ཛིནཔུཏྟཱནཾ ཙཀྑུཾ ཏཡཱ ཨུཔྤཱདིཏཾ, ནིཔྤཊིབྷཱནཱ ཏིཏྠིཡཱ, ཏྭཾ གཎིཝརཔཝརམཱསཛྫཱ’’ཏི།
‘‘Sādhu, bhante nāgasena, sunibbeṭhito pañho bahuvidhehi kāraṇehi, gahanaṃ agahanaṃ kataṃ, andhakāro āloko kato, gaṇṭhi bhinno, bhaggā paravādā, jinaputtānaṃ cakkhuṃ tayā uppāditaṃ, nippaṭibhānā titthiyā, tvaṃ gaṇivarapavaramāsajjā’’ti.
ཝཏྠགུཡ྄ཧནིདསྶནཔཉྷོ ཏཏིཡོ།
Vatthaguyhanidassanapañho tatiyo.
Footnotes:
