| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৭. ৰত্থসুত্তৰণ্ণনা
7. Vatthasuttavaṇṇanā
৭০. এৰং মে সুতন্তি ৰত্থসুত্তং। তত্থ সেয্যথাপি, ভিক্খৰে, ৰত্থন্তি উপমাৰচনমেৰেতং। উপমং করোন্তো চ ভগৰা কত্থচি পঠমংযেৰ উপমং দস্সেত্ৰা পচ্ছা অত্থং দস্সেতি, কত্থচি পঠমমত্থং দস্সেত্ৰা পচ্ছা উপমং, কত্থচি উপমায অত্থং পরিৰারেত্ৰা দস্সেতি, কত্থচি অত্থেন উপমং।
70.Evaṃme sutanti vatthasuttaṃ. Tattha seyyathāpi, bhikkhave, vatthanti upamāvacanamevetaṃ. Upamaṃ karonto ca bhagavā katthaci paṭhamaṃyeva upamaṃ dassetvā pacchā atthaṃ dasseti, katthaci paṭhamamatthaṃ dassetvā pacchā upamaṃ, katthaci upamāya atthaṃ parivāretvā dasseti, katthaci atthena upamaṃ.
তথা হেস – ‘‘সেয্যথাপিস্সু, ভিক্খৰে, দ্ৰে অগারা সদ্ৰারা, তত্থ চক্খুমা পুরিসো মজ্ঝে ঠিতো পস্সেয্যা’’তি (ম॰ নি॰ ৩.২৬১) সকলম্পি দেৰদূতসুত্তং উপমং পঠমং দস্সেত্ৰা পচ্ছা অত্থং দস্সেন্তো আহ। ‘‘তিরোকুট্টং তিরোপাকারং তিরোপব্বতং অসজ্জমানো গচ্ছতি, সেয্যথাপি আকাসে’’তিআদিনা (দী॰ নি॰ ১.২৩৮; পটি॰ ম॰ ১.১০২) পন নযেন সকলম্পি ইদ্ধিৰিধমত্থং পঠমং দস্সেত্ৰা পচ্ছা উপমং দস্সেন্তো আহ। ‘‘সেয্যথাপি ব্রাহ্মণপুরিসো সারত্থিকো সারগৰেসী’’তিআদিনাৰ (ম॰ নি॰ ১.৩১৮) নযেন সকলম্পি চূল়সারোপমসুত্তং উপমায অত্থং পরিৰারেত্ৰা দস্সেন্তো আহ। ‘‘ইধ পন, ভিক্খৰে, একচ্চে কুলপুত্তা ধম্মং পরিযাপুণন্তি সুত্তং…পে॰… সেয্যথাপি, ভিক্খৰে, পুরিসো অলগদ্দত্থিকো’’তিআদিনা (ম॰ নি॰ ১.২৩৮) নযেন সকলম্পি অলগদ্দসুত্তং মহাসারোপমসুত্তন্তি এৰমাদীনি সুত্তানি অত্থেন উপমং পরিৰারেত্ৰা দস্সেন্তো আহ।
Tathā hesa – ‘‘seyyathāpissu, bhikkhave, dve agārā sadvārā, tattha cakkhumā puriso majjhe ṭhito passeyyā’’ti (ma. ni. 3.261) sakalampi devadūtasuttaṃ upamaṃ paṭhamaṃ dassetvā pacchā atthaṃ dassento āha. ‘‘Tirokuṭṭaṃ tiropākāraṃ tiropabbataṃ asajjamāno gacchati, seyyathāpi ākāse’’tiādinā (dī. ni. 1.238; paṭi. ma. 1.102) pana nayena sakalampi iddhividhamatthaṃ paṭhamaṃ dassetvā pacchā upamaṃ dassento āha. ‘‘Seyyathāpi brāhmaṇapuriso sāratthiko sāragavesī’’tiādināva (ma. ni. 1.318) nayena sakalampi cūḷasāropamasuttaṃ upamāya atthaṃ parivāretvā dassento āha. ‘‘Idha pana, bhikkhave, ekacce kulaputtā dhammaṃ pariyāpuṇanti suttaṃ…pe… seyyathāpi, bhikkhave, puriso alagaddatthiko’’tiādinā (ma. ni. 1.238) nayena sakalampi alagaddasuttaṃ mahāsāropamasuttanti evamādīni suttāni atthena upamaṃ parivāretvā dassento āha.
স্ৰাযং ইধ পঠমং উপমং দস্সেত্ৰা পচ্ছা অত্থং দস্সেতি। কস্মা পনেৰং ভগৰা দস্সেতীতি? পুগ্গলজ্ঝাসযেন ৰা দেসনাৰিলাসেন ৰা। যে হি পুগ্গলা পঠমং উপমং দস্সেত্ৰা ৰুচ্চমানমত্থং সুখেন পটিৰিজ্ঝন্তি, তেসং পঠমং উপমং দস্সেতি। এস নযো সব্বত্থ। যস্সা চ ধম্মধাতুযা সুপ্পটিৰিদ্ধত্তা দেসনাৰিলাসং পত্তো হোতি, তস্সা সুপ্পটিৰিদ্ধা। তস্মা এস দেসনাৰিলাসম্পত্তো ধম্মিস্সরো ধম্মরাজা, সো যথা যথা ইচ্ছতি, তথা তথা ধম্মং দেসেতীতি এৰং ইমিনা পুগ্গলজ্ঝাসযেন ৰা দেসনাৰিলাসেন ৰা এৰং দস্সেতীতি ৰেদিতব্বো।
Svāyaṃ idha paṭhamaṃ upamaṃ dassetvā pacchā atthaṃ dasseti. Kasmā panevaṃ bhagavā dassetīti? Puggalajjhāsayena vā desanāvilāsena vā. Ye hi puggalā paṭhamaṃ upamaṃ dassetvā vuccamānamatthaṃ sukhena paṭivijjhanti, tesaṃ paṭhamaṃ upamaṃ dasseti. Esa nayo sabbattha. Yassā ca dhammadhātuyā suppaṭividdhattā desanāvilāsaṃ patto hoti, tassā suppaṭividdhā. Tasmā esa desanāvilāsampatto dhammissaro dhammarājā, so yathā yathā icchati, tathā tathā dhammaṃ desetīti evaṃ iminā puggalajjhāsayena vā desanāvilāsena vā evaṃ dassetīti veditabbo.
তত্থ ৰত্থন্তি পকতিপরিসুদ্ধং ৰত্থং। সংকিলিট্ঠং মলগ্গহিতন্তি আগন্তুকেন পংসুরজাদিনা সংকিলেসেন সংকিলিট্ঠং, সেদজল্লিকাদিনা মলেন গহিতত্তা মলগ্গহিতং। রঙ্গজাতেতি এত্থ রঙ্গমেৰ রঙ্গজাতং। উপসংহরেয্যাতি উপনামেয্য। যদি নীলকাযাতি নীলকায ৰা, নীলকত্থায ৰাতি ৰুত্তং হোতি। এৰং সব্বত্থ। রজকো হি নীলকত্থায উপসংহরন্তো কংসনীলপলাসনীলাদিকে নীলরঙ্গে উপসংহরতি। পীতকত্থায উপসংহরন্তো কণিকারপুপ্ফসদিসে পীতকরঙ্গে। লোহিতকত্থায উপসংহরন্তো বন্ধুজীৰকপুপ্ফসদিসে লোহিতকরঙ্গে। মঞ্জিট্ঠকত্থায উপসংহরন্তো কণৰীরপুপ্ফসদিসে মন্দরত্তরঙ্গে। তেন ৰুত্তং ‘‘যদি নীলকায…পে॰… যদি মঞ্জিট্ঠকাযা’’তি।
Tattha vatthanti pakatiparisuddhaṃ vatthaṃ. Saṃkiliṭṭhaṃ malaggahitanti āgantukena paṃsurajādinā saṃkilesena saṃkiliṭṭhaṃ, sedajallikādinā malena gahitattā malaggahitaṃ. Raṅgajāteti ettha raṅgameva raṅgajātaṃ. Upasaṃhareyyāti upanāmeyya. Yadi nīlakāyāti nīlakāya vā, nīlakatthāya vāti vuttaṃ hoti. Evaṃ sabbattha. Rajako hi nīlakatthāya upasaṃharanto kaṃsanīlapalāsanīlādike nīlaraṅge upasaṃharati. Pītakatthāya upasaṃharanto kaṇikārapupphasadise pītakaraṅge. Lohitakatthāya upasaṃharanto bandhujīvakapupphasadise lohitakaraṅge. Mañjiṭṭhakatthāya upasaṃharanto kaṇavīrapupphasadise mandarattaraṅge. Tena vuttaṃ ‘‘yadi nīlakāya…pe… yadi mañjiṭṭhakāyā’’ti.
দুরত্তৰণ্ণমেৰস্সাতি দুট্ঠু রঞ্জিতৰণ্ণমেৰ অস্স। অপরিসুদ্ধৰণ্ণমেৰস্সাতি নীলৰণ্ণোপিস্স পরিসুদ্ধো ন ভৰেয্য, সেসৰণ্ণোপি। তাদিসঞ্হি ৰত্থং নীলকুম্ভিযা পক্খিত্তম্পি সুনীলং ন হোতি, সেসকুম্ভীসু পক্খিত্তম্পি পীতকাদিৰণ্ণং ন হোতি, মিলাতনীল কুরণ্ড-কণিকার-বন্ধুজীৰক-কণৰীরপুপ্ফৰণ্ণমেৰ হোতি। তং কিস্স হেতূতি তং ৰত্থং কিস্স হেতু কিং কারণা ঈদিসং হোতি, তস্মিং ৰা ৰত্থে রঙ্গজাতং কিস্স হেতু ঈদিসং দুরত্তৰণ্ণং অপরিসুদ্ধৰণ্ণং হোতীতি? যস্মা পনস্স ৰত্থস্স সংকিলিট্ঠভাৰোযেৰেত্থ কারণং, ন অঞ্ঞং কিঞ্চি, তস্মা ‘‘অপরিসুদ্ধত্তা, ভিক্খৰে, ৰত্থস্সা’’তি আহ।
Durattavaṇṇamevassāti duṭṭhu rañjitavaṇṇameva assa. Aparisuddhavaṇṇamevassāti nīlavaṇṇopissa parisuddho na bhaveyya, sesavaṇṇopi. Tādisañhi vatthaṃ nīlakumbhiyā pakkhittampi sunīlaṃ na hoti, sesakumbhīsu pakkhittampi pītakādivaṇṇaṃ na hoti, milātanīla kuraṇḍa-kaṇikāra-bandhujīvaka-kaṇavīrapupphavaṇṇameva hoti. Taṃ kissa hetūti taṃ vatthaṃ kissa hetu kiṃ kāraṇā īdisaṃ hoti, tasmiṃ vā vatthe raṅgajātaṃ kissa hetu īdisaṃ durattavaṇṇaṃ aparisuddhavaṇṇaṃ hotīti? Yasmā panassa vatthassa saṃkiliṭṭhabhāvoyevettha kāraṇaṃ, na aññaṃ kiñci, tasmā ‘‘aparisuddhattā, bhikkhave, vatthassā’’ti āha.
এৰমেৰ খোতি উপমাসম্পটিপাদনং। চিত্তে সংকিলিট্ঠেতি চিত্তম্হি সংকিলিট্ঠম্হি। কস্মা পন ভগৰা সংকিলিট্ঠৰত্থেন ওপম্মং অকাসীতি চে, ৰাযামমহপ্ফলদস্সনত্থং। যথা হি আগন্তুকেহি মলেহি সংকিলিট্ঠং ৰত্থং পকতিযা পণ্ডরত্তা পুন ধোৰীযমানং পণ্ডরং হোতি, ন তত্থ জাতিকাল়কে ৰিয এল়কলোমে ৰাযামো নিপ্ফলো হোতি, এৰং চিত্তম্পি আগন্তুকেহি কিলেসেহি সংকিলিট্ঠং। পকতিযা পন তং সকলেপি পটিসন্ধিভৰঙ্গৰারে পণ্ডরমেৰ। যথাহ – ‘‘পভস্সরমিদং, ভিক্খৰে, চিত্তং, তঞ্চ খো আগন্তুকেহি উপক্কিলেসেহি উপক্কিলিট্ঠ’’ন্তি (অ॰ নি॰ ১.৫১)। তং ৰিসোধীযমানং সক্কা পভস্সরতরং কাতুং, ন তত্থ ৰাযামো নিপ্ফলোতি এৰং ৰাযামমহপ্ফলদস্সনত্থং সংকিলিট্ঠৰত্থেন ওপম্মং অকাসীতি ৰেদিতব্বো।
Evameva khoti upamāsampaṭipādanaṃ. Citte saṃkiliṭṭheti cittamhi saṃkiliṭṭhamhi. Kasmā pana bhagavā saṃkiliṭṭhavatthena opammaṃ akāsīti ce, vāyāmamahapphaladassanatthaṃ. Yathā hi āgantukehi malehi saṃkiliṭṭhaṃ vatthaṃ pakatiyā paṇḍarattā puna dhovīyamānaṃ paṇḍaraṃ hoti, na tattha jātikāḷake viya eḷakalome vāyāmo nipphalo hoti, evaṃ cittampi āgantukehi kilesehi saṃkiliṭṭhaṃ. Pakatiyā pana taṃ sakalepi paṭisandhibhavaṅgavāre paṇḍarameva. Yathāha – ‘‘pabhassaramidaṃ, bhikkhave, cittaṃ, tañca kho āgantukehi upakkilesehi upakkiliṭṭha’’nti (a. ni. 1.51). Taṃ visodhīyamānaṃ sakkā pabhassarataraṃ kātuṃ, na tattha vāyāmo nipphaloti evaṃ vāyāmamahapphaladassanatthaṃ saṃkiliṭṭhavatthena opammaṃ akāsīti veditabbo.
দুগ্গতি পাটিকঙ্খাতি ঈদিসে চিত্তে দুগ্গতি পাটিকঙ্খিতব্বা, দুগ্গতিং এৰ এস পাপুণিস্সতি , নাঞ্ঞন্তি এৰং দুগ্গতি ইচ্ছিতব্বা, অৰস্সং ভাৰীতি ৰুত্তং হোতি। সা চাযং দুগ্গতি নাম পটিপত্তিদুগ্গতি, গতিদুগ্গতীতি দুৰিধা হোতি। পটিপত্তিদুগ্গতিপি অগারিযপটিপত্তিদুগ্গতি, অনগারিযপটিপত্তিদুগ্গতীতি দুৰিধা হোতি।
Duggati pāṭikaṅkhāti īdise citte duggati pāṭikaṅkhitabbā, duggatiṃ eva esa pāpuṇissati , nāññanti evaṃ duggati icchitabbā, avassaṃ bhāvīti vuttaṃ hoti. Sā cāyaṃ duggati nāma paṭipattiduggati, gatiduggatīti duvidhā hoti. Paṭipattiduggatipi agāriyapaṭipattiduggati, anagāriyapaṭipattiduggatīti duvidhā hoti.
অগারিযো হি সংকিলিট্ঠচিত্তো পাণম্পি হনতি, অদিন্নম্পি আদিযতি, সকলেপি দস অকুসলকম্মপথে পূরেতি, অযমস্স অগারিযপটিপত্তিদুগ্গতি। সো তত্থ ঠিতো কাযস্স ভেদা নিরযম্পি গচ্ছতি, তিরচ্ছানযোনিম্পি, পেত্তিৰিসযম্পি গচ্ছতি, অযমস্স গতিদুগ্গতি।
Agāriyo hi saṃkiliṭṭhacitto pāṇampi hanati, adinnampi ādiyati, sakalepi dasa akusalakammapathe pūreti, ayamassa agāriyapaṭipattiduggati. So tattha ṭhito kāyassa bhedā nirayampi gacchati, tiracchānayonimpi, pettivisayampi gacchati, ayamassa gatiduggati.
অনগারিযোপি ইমস্মিং সাসনে পব্বজিতো সংকিলিট্ঠচিত্তো দূতেয্যপহিণগমনং গচ্ছতি, ৰেজ্জকম্মং করোতি, সঙ্ঘভেদায চেতিযভেদায পরক্কমতি, ৰেল়ুদানাদীহি জীৰিকং কপ্পেতি, সকলম্পি অনাচারং অগোচরঞ্চ পরিপূরেতি, অযমস্স অনগারিযপটিপত্তিদুগ্গতি।সো তত্থ ঠিতো কাযস্স ভেদা নিরযম্পি গচ্ছতি, তিরচ্ছানযোনিম্পি, পেত্তিৰিসযম্পি গচ্ছতি সমণযক্খো নাম হোতি সমণপেতো, আদিত্তেহি সঙ্ঘাটিআদীহি সম্পজ্জলিতকাযো অট্টস্সরং করোন্তো ৰিচরতি, অযমস্স গতিদুগ্গতি।
Anagāriyopi imasmiṃ sāsane pabbajito saṃkiliṭṭhacitto dūteyyapahiṇagamanaṃ gacchati, vejjakammaṃ karoti, saṅghabhedāya cetiyabhedāya parakkamati, veḷudānādīhi jīvikaṃ kappeti, sakalampi anācāraṃ agocarañca paripūreti, ayamassa anagāriyapaṭipattiduggati.So tattha ṭhito kāyassa bhedā nirayampi gacchati, tiracchānayonimpi, pettivisayampi gacchati samaṇayakkho nāma hoti samaṇapeto, ādittehi saṅghāṭiādīhi sampajjalitakāyo aṭṭassaraṃ karonto vicarati, ayamassa gatiduggati.
সেয্যথাপীতি সুক্কপক্খং দস্সেতুমারদ্ধো, তস্সত্থো কণ্হপক্খে ৰুত্তপচ্চনীকেনেৰ ৰেদিতব্বো। এত্থাপি চ সুগতি নাম পটিপত্তিসুগতি গতিসুগতীতি দুৰিধা হোতি। পটিপত্তিসুগতিপি অগারিযপটিপত্তিসুগতি অনগারিযপটিপত্তিসুগতীতি দুৰিধা হোতি। অগারিযো হি পরিসুদ্ধচিত্তো পাণাতিপাতাপি ৰিরমতি, অদিন্নাদানাপি, সকলেপি দস কুসলকম্মপথে পরিপূরেতি, অযমস্স অগারিযপটিপত্তিসুগতি। সো তত্থ ঠিতো কাযস্স ভেদা মনুস্সমহন্ততম্পি দেৰমহন্ততম্পি উপপজ্জতি, অযমস্স গতিসুগতি।
Seyyathāpīti sukkapakkhaṃ dassetumāraddho, tassattho kaṇhapakkhe vuttapaccanīkeneva veditabbo. Etthāpi ca sugati nāma paṭipattisugati gatisugatīti duvidhā hoti. Paṭipattisugatipi agāriyapaṭipattisugati anagāriyapaṭipattisugatīti duvidhā hoti. Agāriyo hi parisuddhacitto pāṇātipātāpi viramati, adinnādānāpi, sakalepi dasa kusalakammapathe paripūreti, ayamassa agāriyapaṭipattisugati. So tattha ṭhito kāyassa bhedā manussamahantatampi devamahantatampi upapajjati, ayamassa gatisugati.
অনগারিযোপি ইমস্মিং সাসনে পব্বজিত্ৰা পরিসুদ্ধচিত্তো চতুপারিসুদ্ধিসীলং সোধেতি, তেরস ধুতঙ্গানি সমাদিযতি, অট্ঠতিংসারম্মণেসু অত্তনো অনুকূলকম্মট্ঠানং গহেত্ৰা পন্তসেনাসনে পটিসেৰমানো কসিণপরিকম্মং কত্ৰা ঝানসমাপত্তিযো নিব্বত্তেতি, সোতাপত্তিমগ্গং ভাৰেতি…পে॰… অনাগামিমগ্গং ভাৰেতি, অযমস্স অনগারিযপটিপত্তিসুগতি। সো তত্থ ঠিতো কাযস্স ভেদা মনুস্সলোকে ৰা তীসু মহাকুলেসু, ছসু ৰা কামাৰচরদেৰেসু, দসসু ৰা ব্রহ্মভৰনেসু , পঞ্চসু ৰা সুদ্ধাৰাসেসু, চতূসু ৰা আরুপ্পেসু উপপজ্জতি, অযমস্স গতিসুগতীতি।
Anagāriyopi imasmiṃ sāsane pabbajitvā parisuddhacitto catupārisuddhisīlaṃ sodheti, terasa dhutaṅgāni samādiyati, aṭṭhatiṃsārammaṇesu attano anukūlakammaṭṭhānaṃ gahetvā pantasenāsane paṭisevamāno kasiṇaparikammaṃ katvā jhānasamāpattiyo nibbatteti, sotāpattimaggaṃ bhāveti…pe… anāgāmimaggaṃ bhāveti, ayamassa anagāriyapaṭipattisugati. So tattha ṭhito kāyassa bhedā manussaloke vā tīsu mahākulesu, chasu vā kāmāvacaradevesu, dasasu vā brahmabhavanesu , pañcasu vā suddhāvāsesu, catūsu vā āruppesu upapajjati, ayamassa gatisugatīti.
৭১. এৰং সংকিলিট্ঠে চিত্তে দুগ্গতি পাটিকঙ্খা, অসংকিলিট্ঠে চ সুগতীতি ৰত্ৰা ইদানি যেহি উপক্কিলেসেহি চিত্তং সংকিলিট্ঠং হোতি, তে দস্সেন্তো কতমে চ, ভিক্খৰে, চিত্তস্স উপক্কিলেসা ? অভিজ্ঝা ৰিসমলোভোতিআদিমাহ।
71. Evaṃ saṃkiliṭṭhe citte duggati pāṭikaṅkhā, asaṃkiliṭṭhe ca sugatīti vatvā idāni yehi upakkilesehi cittaṃ saṃkiliṭṭhaṃ hoti, te dassento katame ca, bhikkhave, cittassa upakkilesā? Abhijjhā visamalobhotiādimāha.
তত্থ সকভণ্ডে ছন্দরাগো অভিজ্ঝা, পরভণ্ডে ৰিসমলোভো। অথ ৰা সকভণ্ডে ৰা পরভণ্ডে ৰা হোতু, যুত্তপত্তট্ঠানে ছন্দরাগো অভিজ্ঝা, অযুত্তাপত্তট্ঠানে ৰিসমলোভো। থেরো পনাহ ‘‘কিস্স ৰিনিব্ভোগং করোথ, যুত্তে ৰা অযুত্তে ৰা হোতু, ‘রাগো ৰিসমং দোসো ৰিসমং মোহো ৰিসম’ন্তি (ৰিভ॰ ৯২৪) ৰচনতো ন কোচি লোভো অৰিসমো নাম, তস্মা লোভোযেৰ অভিজ্ঝাযনট্ঠেন অভিজ্ঝা, ৰিসমট্ঠেন ৰিসমং, একত্থমেতং ব্যঞ্জনমেৰ নান’’ন্তি। সো পনেস অভিজ্ঝাৰিসমলোভো উপ্পজ্জিত্ৰা চিত্তং দূসেতি, ওভাসিতুং ন দেতি। তস্মা ‘‘চিত্তস্স উপক্কিলেসো’’তি ৰুচ্চতি।
Tattha sakabhaṇḍe chandarāgo abhijjhā, parabhaṇḍe visamalobho. Atha vā sakabhaṇḍe vā parabhaṇḍe vā hotu, yuttapattaṭṭhāne chandarāgo abhijjhā, ayuttāpattaṭṭhāne visamalobho. Thero panāha ‘‘kissa vinibbhogaṃ karotha, yutte vā ayutte vā hotu, ‘rāgo visamaṃ doso visamaṃ moho visama’nti (vibha. 924) vacanato na koci lobho avisamo nāma, tasmā lobhoyeva abhijjhāyanaṭṭhena abhijjhā, visamaṭṭhena visamaṃ, ekatthametaṃ byañjanameva nāna’’nti. So panesa abhijjhāvisamalobho uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
যথা চেস, এৰং নৰৰিধআঘাতৰত্থুসম্ভৰো ব্যাপাদো। দসৰিধআঘাতৰত্থুসম্ভৰো কোধো। পুনপ্পুনং চিত্তপরিযোনন্ধনো উপনাহো। অগারিযস্স ৰা অনগারিযস্স ৰা সুকতকরণৰিনাসনো মক্খো। অগারিযোপি হি কেনচি অনুকম্পকেন দলিদ্দো সমানো উচ্চে ঠানে ঠপিতো, অপরেন সমযেন ‘‘কিং তযা ময্হং কত’’ন্তি তস্স সুকতকরণং ৰিনাসেতি। অনগারিযোপি সামণেরকালতো পভুতি আচরিযেন ৰা উপজ্ঝাযেন ৰা চতূহি পচ্চযেহি উদ্দেসপরিপুচ্ছাহি চ অনুগ্গহেত্ৰা ধম্মকথানযপকরণকোসল্লাদীনি সিক্খাপিতো, অপরেন সমযেন রাজরাজমহামত্তাদীহি সক্কতো গরুকতো আচরিযুপজ্ঝাযেসু অচিত্তীকতো চরমানো ‘‘অযং অম্হেহি দহরকালে এৰং অনুগ্গহিতো সংৰড্ঢিতো চ, অথ পনিদানি নিস্সিনেহো জাতো’’তি ৰুচ্চমানো ‘‘কিং ময্হং তুম্হেহি কত’’ন্তি তেসং সুকতকরণং ৰিনাসেতি, তস্স সো সুকতকরণৰিনাসনো মক্খো উপ্পজ্জিত্ৰা চিত্তং দূসেতি, ওভাসিতুং ন দেতি। তস্মা ‘‘চিত্তস্স উপক্কিলেসো’’তি ৰুচ্চতি।
Yathā cesa, evaṃ navavidhaāghātavatthusambhavo byāpādo. Dasavidhaāghātavatthusambhavo kodho. Punappunaṃ cittapariyonandhano upanāho. Agāriyassa vā anagāriyassa vā sukatakaraṇavināsano makkho. Agāriyopi hi kenaci anukampakena daliddo samāno ucce ṭhāne ṭhapito, aparena samayena ‘‘kiṃ tayā mayhaṃ kata’’nti tassa sukatakaraṇaṃ vināseti. Anagāriyopi sāmaṇerakālato pabhuti ācariyena vā upajjhāyena vā catūhi paccayehi uddesaparipucchāhi ca anuggahetvā dhammakathānayapakaraṇakosallādīni sikkhāpito, aparena samayena rājarājamahāmattādīhi sakkato garukato ācariyupajjhāyesu acittīkato caramāno ‘‘ayaṃ amhehi daharakāle evaṃ anuggahito saṃvaḍḍhito ca, atha panidāni nissineho jāto’’ti vuccamāno ‘‘kiṃ mayhaṃ tumhehi kata’’nti tesaṃ sukatakaraṇaṃ vināseti, tassa so sukatakaraṇavināsano makkho uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
যথা চাযং, এৰং বহুস্সুতেপি পুগ্গলে অজ্ঝোত্থরিত্ৰা ‘‘ঈদিসস্স চেৰ বহুস্সুতস্স অনিযতা গতি, তৰ ৰা মম ৰা কো ৰিসেসো’’তিআদিনা নযেন উপ্পজ্জমানো যুগগ্গাহগাহী পল়াসো। পরেসং সক্কারাদীনি খীযনা ইস্সা। অত্তনো সম্পত্তিযা পরেহি সাধারণভাৰং অসহমানং মচ্ছরিযং। ৰঞ্চনিকচরিযভূতা মাযা। কেরাটিকভাৰেন উপ্পজ্জমানং সাঠেয্যং। কেরাটিকো হি আযতনমচ্ছো ৰিয হোতি। আযতনমচ্ছো নাম কির মচ্ছানং নঙ্গুট্ঠং দস্সেতি সপ্পানং সীসং , ‘‘তুম্হেহি সদিসো অহ’’ন্তি জানাপেতুং। এৰমেৰ কেরাটিকো পুগ্গলো যং যং সুত্তন্তিকং ৰা আভিধম্মিকং ৰা উপসঙ্কমতি, তং তং এৰং ৰদতি ‘‘অহং তুম্হাকং বদ্ধচরো, তুম্হে ময্হং অনুকম্পকা, নাহং তুম্হে মুঞ্চামী’’তি ‘‘এৰমেতে ‘সগারৰো অযং অম্হেসু সপ্পতিস্সো’তি মঞ্ঞিস্সন্তী’’তি। তস্সেতং কেরাটিকভাৰেন উপ্পজ্জমানং সাঠেয্যং উপ্পজ্জিত্ৰা চিত্তং দূসেতি, ওভাসিতুং ন দেতি। তস্মা ‘‘চিত্তস্স উপক্কিলেসো’’তি ৰুচ্চতি।
Yathā cāyaṃ, evaṃ bahussutepi puggale ajjhottharitvā ‘‘īdisassa ceva bahussutassa aniyatā gati, tava vā mama vā ko viseso’’tiādinā nayena uppajjamāno yugaggāhagāhī paḷāso. Paresaṃ sakkārādīni khīyanā issā. Attano sampattiyā parehi sādhāraṇabhāvaṃ asahamānaṃ macchariyaṃ. Vañcanikacariyabhūtā māyā. Kerāṭikabhāvena uppajjamānaṃ sāṭheyyaṃ. Kerāṭiko hi āyatanamaccho viya hoti. Āyatanamaccho nāma kira macchānaṃ naṅguṭṭhaṃ dasseti sappānaṃ sīsaṃ , ‘‘tumhehi sadiso aha’’nti jānāpetuṃ. Evameva kerāṭiko puggalo yaṃ yaṃ suttantikaṃ vā ābhidhammikaṃ vā upasaṅkamati, taṃ taṃ evaṃ vadati ‘‘ahaṃ tumhākaṃ baddhacaro, tumhe mayhaṃ anukampakā, nāhaṃ tumhe muñcāmī’’ti ‘‘evamete ‘sagāravo ayaṃ amhesu sappatisso’ti maññissantī’’ti. Tassetaṃ kerāṭikabhāvena uppajjamānaṃ sāṭheyyaṃ uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
যথা চেতং, এৰং ৰাতভরিতভস্তসদিসথদ্ধভাৰপগ্গহিতসিরঅনিৰাতৰুত্তিকারকরণো থম্ভো। তদুত্তরিকরণো সারম্ভো। সো দুৰিধেন লব্ভতি অকুসলৰসেন চেৰ কুসলৰসেন চ। তত্থ অগারিযস্স পরেন কতং অলঙ্কারাদিং দিস্ৰা তদ্দিগুণকরণেন উপ্পজ্জমানো, অনগারিযস্স চ যত্তকং যত্তকং পরো পরিযাপুণাতি ৰা কথেতি ৰা, মানৰসেন তদ্দিগুণতদ্দিগুণকরণেন উপ্পজ্জমানো অকুসলো। অগারিযস্স পন পরং একং সলাকভত্তং দেন্তং দিস্ৰা অত্তনা দ্ৰে ৰা তীণি ৰা দাতুকামতায উপ্পজ্জমানো, অনগারিযস্স চ পরেন একনিকাযে গহিতে মানং অনিস্সায কেৰলং তং দিস্ৰা অত্তনা আলসিযং অভিভুয্য দ্ৰে নিকাযে গহেতুকামতায উপ্পজ্জমানো কুসলো। ইধ পন অকুসলো অধিপ্পেতো। অযঞ্হি উপ্পজ্জিত্ৰা চিত্তং দূসেতি, ওভাসিতুং ন দেতি। তস্মা ‘‘চিত্তস্স উপক্কিলেসো’’তি ৰুচ্চতি।
Yathā cetaṃ, evaṃ vātabharitabhastasadisathaddhabhāvapaggahitasiraanivātavuttikārakaraṇo thambho. Taduttarikaraṇo sārambho. So duvidhena labbhati akusalavasena ceva kusalavasena ca. Tattha agāriyassa parena kataṃ alaṅkārādiṃ disvā taddiguṇakaraṇena uppajjamāno, anagāriyassa ca yattakaṃ yattakaṃ paro pariyāpuṇāti vā katheti vā, mānavasena taddiguṇataddiguṇakaraṇena uppajjamāno akusalo. Agāriyassa pana paraṃ ekaṃ salākabhattaṃ dentaṃ disvā attanā dve vā tīṇi vā dātukāmatāya uppajjamāno, anagāriyassa ca parena ekanikāye gahite mānaṃ anissāya kevalaṃ taṃ disvā attanā ālasiyaṃ abhibhuyya dve nikāye gahetukāmatāya uppajjamāno kusalo. Idha pana akusalo adhippeto. Ayañhi uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
যথা চাযং, এৰং জাতিআদীনি নিস্সায চিত্তস্স উণ্ণতিৰসেন পৰত্তমানো মানো, অচ্চুণ্ণতিৰসেন অতিমানো, মদগ্গহণাকারো মদো, কামগুণেসু চিত্তৰোস্সগ্গৰসেন উপ্পজ্জমানো পমাদো উপ্পজ্জিত্ৰা চিত্তং দূসেতি, ওভাসিতুং ন দেতি। তস্মা ‘‘চিত্তস্স উপক্কিলেসো’’তি ৰুচ্চতি।
Yathā cāyaṃ, evaṃ jātiādīni nissāya cittassa uṇṇativasena pavattamāno māno, accuṇṇativasena atimāno, madaggahaṇākāro mado, kāmaguṇesu cittavossaggavasena uppajjamāno pamādo uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
কস্মা পন ভগৰা উপক্কিলেসং দস্সেন্তো লোভমাদিং কত্ৰা দস্সেতীতি? তস্স পঠমুপ্পত্তিতো। সব্বসত্তানঞ্হি যত্থ কত্থচি উপপন্নানং অন্তমসো সুদ্ধাৰাসভূমিযম্পি সব্বপঠমং ভৰনিকন্তিৰসেন লোভো উপ্পজ্জতি, ততো অত্তনো অত্তনো অনুরূপপচ্চযং পটিচ্চ যথাসম্ভৰং ইতরে, ন চ এতে সোল়সেৰ চিত্তস্স উপক্কিলেসা, এতেন পন নযেন সব্বেপি কিলেসা গহিতাযেৰ হোন্তীতি ৰেদিতব্বা।
Kasmā pana bhagavā upakkilesaṃ dassento lobhamādiṃ katvā dassetīti? Tassa paṭhamuppattito. Sabbasattānañhi yattha katthaci upapannānaṃ antamaso suddhāvāsabhūmiyampi sabbapaṭhamaṃ bhavanikantivasena lobho uppajjati, tato attano attano anurūpapaccayaṃ paṭicca yathāsambhavaṃ itare, na ca ete soḷaseva cittassa upakkilesā, etena pana nayena sabbepi kilesā gahitāyeva hontīti veditabbā.
৭২. এত্তাৰতা সংকিলেসং দস্সেত্ৰা ইদানি ৰোদানং দস্সেন্তো স খো সো, ভিক্খৰেতিআদিমাহ। তত্থ ইতি ৰিদিত্ৰাতি এৰং জানিত্ৰা। পজহতীতি সমুচ্ছেদপ্পহানৰসেন অরিযমগ্গেন পজহতি। তত্থ কিলেসপটিপাটিযা মগ্গপটিপাটিযাতি দ্ৰিধা পহানং ৰেদিতব্বং। কিলেসপটিপাটিযা তাৰ অভিজ্ঝাৰিসমলোভো থম্ভো সারম্ভো মানো অতিমানো মদোতি ইমে ছ কিলেসা অরহত্তমগ্গেন পহীযন্তি। ব্যাপাদো কোধো উপনাহো পমাদোতি ইমে চত্তারো কিলেসা অনাগামিমগ্গেন পহীযন্তি। মক্খো পল়াসো ইস্সা মচ্ছরিযং মাযা সাঠেয্যন্তি ইমে ছ সোতাপত্তিমগ্গেন পহীযন্তীতি। মগ্গপটিপাটিযা পন, সোতাপত্তিমগ্গেন মক্খো পল়াসো ইস্সা মচ্ছরিযং মাযা সাঠেয্যন্তি ইমে ছ পহীযন্তি। অনাগামিমগ্গেন ব্যাপাদো কোধো উপনাহো পমাদোতি ইমে চত্তারো। অরহত্তমগ্গেন অভিজ্ঝাৰিসমলোভো থম্ভো সারম্ভো মানো অতিমানো মদোতি ইমে ছ পহীযন্তীতি।
72. Ettāvatā saṃkilesaṃ dassetvā idāni vodānaṃ dassento sa kho so, bhikkhavetiādimāha. Tattha iti viditvāti evaṃ jānitvā. Pajahatīti samucchedappahānavasena ariyamaggena pajahati. Tattha kilesapaṭipāṭiyā maggapaṭipāṭiyāti dvidhā pahānaṃ veditabbaṃ. Kilesapaṭipāṭiyā tāva abhijjhāvisamalobho thambho sārambho māno atimāno madoti ime cha kilesā arahattamaggena pahīyanti. Byāpādo kodho upanāho pamādoti ime cattāro kilesā anāgāmimaggena pahīyanti. Makkho paḷāso issā macchariyaṃ māyā sāṭheyyanti ime cha sotāpattimaggena pahīyantīti. Maggapaṭipāṭiyā pana, sotāpattimaggena makkho paḷāso issā macchariyaṃ māyā sāṭheyyanti ime cha pahīyanti. Anāgāmimaggena byāpādo kodho upanāho pamādoti ime cattāro. Arahattamaggena abhijjhāvisamalobho thambho sārambho māno atimāno madoti ime cha pahīyantīti.
ইমস্মিং পন ঠানে ইমে কিলেসা সোতাপত্তিমগ্গৰজ্ঝা ৰা হোন্তু, সেসমগ্গৰজ্ঝা ৰা, অথ খো অনাগামিমগ্গেনেৰ পহানং সন্ধায ‘‘অভিজ্ঝাৰিসমলোভং চিত্তস্স উপক্কিলেসং পজহতী’’তিআদিমাহাতি ৰেদিতব্বা। অযমেত্থ পৰেণিমগ্গাগতো সম্ভৰো, সো চ উপরি চতুত্থমগ্গস্সেৰ নিদ্দিট্ঠত্তা যুজ্জতি, ততিযমগ্গেন পহীনাৰসেসানঞ্হি ৰিসমলোভাদীনং তেন পহানং হোতি, সেসানং ইমিনাৰ। যেপি হি সোতাপত্তিমগ্গেন পহীযন্তি, তেপি তংসমুট্ঠাপকচিত্তানং অপ্পহীনত্তা অনাগামিমগ্গেনেৰ সুপ্পহীনা হোন্তীতি। কেচি পন পঠমমগ্গেন চেত্থ পহানং ৰণ্ণযন্তি, তং পুব্বাপরেন ন সন্ধিযতি। কেচি ৰিক্খম্ভনপ্পহানম্পি, তং তেসং ইচ্ছামত্তমেৰ।
Imasmiṃ pana ṭhāne ime kilesā sotāpattimaggavajjhā vā hontu, sesamaggavajjhā vā, atha kho anāgāmimaggeneva pahānaṃ sandhāya ‘‘abhijjhāvisamalobhaṃ cittassa upakkilesaṃ pajahatī’’tiādimāhāti veditabbā. Ayamettha paveṇimaggāgato sambhavo, so ca upari catutthamaggasseva niddiṭṭhattā yujjati, tatiyamaggena pahīnāvasesānañhi visamalobhādīnaṃ tena pahānaṃ hoti, sesānaṃ imināva. Yepi hi sotāpattimaggena pahīyanti, tepi taṃsamuṭṭhāpakacittānaṃ appahīnattā anāgāmimaggeneva suppahīnā hontīti. Keci pana paṭhamamaggena cettha pahānaṃ vaṇṇayanti, taṃ pubbāparena na sandhiyati. Keci vikkhambhanappahānampi, taṃ tesaṃ icchāmattameva.
৭৩. যতো খো, ভিক্খৰেতি এত্থ যতোতি যম্হি কালে। পহীনো হোতীতি অনাগামিমগ্গক্খণে পহানং সন্ধাযেৰাহ।
73.Yatokho, bhikkhaveti ettha yatoti yamhi kāle. Pahīno hotīti anāgāmimaggakkhaṇe pahānaṃ sandhāyevāha.
৭৪. সো বুদ্ধে অৰেচ্চপ্পসাদেনাতি এতং ‘‘যতো খো, ভিক্খৰে, অভিজ্ঝাৰিসমলোভো পহীনো হোতি, সো বুদ্ধে অৰেচ্চপ্পসাদেন সমন্নাগতো হোতী’’তি এৰং একমেকেন পদেন যোজেতব্বং। ইমস্স হি ভিক্খুনো অনাগামিমগ্গেন লোকুত্তরপ্পসাদো আগতো, অথস্স অপরেন সমযেন বুদ্ধগুণে ধম্মগুণে সঙ্ঘগুণে চ অনুস্সরতো লোকিযো উপ্পজ্জতি, তমস্স সব্বম্পি লোকিযলোকুত্তরমিস্সকং পসাদং দস্সেন্তো ভগৰা ‘‘বুদ্ধে অৰেচ্চপ্পসাদেনা’’তিআদিমাহ।
74.So buddhe aveccappasādenāti etaṃ ‘‘yato kho, bhikkhave, abhijjhāvisamalobho pahīno hoti, so buddhe aveccappasādena samannāgato hotī’’ti evaṃ ekamekena padena yojetabbaṃ. Imassa hi bhikkhuno anāgāmimaggena lokuttarappasādo āgato, athassa aparena samayena buddhaguṇe dhammaguṇe saṅghaguṇe ca anussarato lokiyo uppajjati, tamassa sabbampi lokiyalokuttaramissakaṃ pasādaṃ dassento bhagavā ‘‘buddhe aveccappasādenā’’tiādimāha.
তত্থ অৰেচ্চপ্পসাদেনাতি বুদ্ধধম্মসঙ্ঘগুণানং যাথাৰতো ঞাতত্তা অচলেন অচ্চুতেন পসাদেন। ইদানি যথা তস্স ভিক্খুনো অনুস্সরতো সো অৰেচ্চপ্পসাদো উপ্পন্নো, তং ৰিধিং দস্সেন্তো ‘‘ইতিপি সো ভগৰা’’তিআদিনা নযেন তীণি অনুস্সতিট্ঠানানি ৰিত্থারেসি। তেসং অত্থৰণ্ণনা সব্বাকারেন ৰিসুদ্ধিমগ্গে অনুস্সতিকথাযং ৰুত্তা।
Tattha aveccappasādenāti buddhadhammasaṅghaguṇānaṃ yāthāvato ñātattā acalena accutena pasādena. Idāni yathā tassa bhikkhuno anussarato so aveccappasādo uppanno, taṃ vidhiṃ dassento ‘‘itipi so bhagavā’’tiādinā nayena tīṇi anussatiṭṭhānāni vitthāresi. Tesaṃ atthavaṇṇanā sabbākārena visuddhimagge anussatikathāyaṃ vuttā.
৭৫. এৰমস্স লোকিযলোকুত্তরমিস্সকং পসাদং দস্সেত্ৰা ইদানি কিলেসপ্পহানং অৰেচ্চপ্পসাদসমন্নাগতঞ্চ পচ্চৰেক্খতো উপ্পজ্জমানং সোমনস্সাদিআনিসংসং দস্সেন্তো যথোধি খো পনস্সাতিআদিমাহ। অনাগামিস্স হি পচ্চন্তে ৰুট্ঠিতং চোরুপদ্দৰং ৰূপসমেত্ৰা তং পচ্চৰেক্খতো মহানগরে ৰসন্তস্স রঞ্ঞো ৰিয ইমে চিমে চ মম কিলেসা পহীনাতি অত্তনো কিলেসপ্পহানং পচ্চৰেক্খতো বলৰসোমনস্সং উপ্পজ্জতি। তং দস্সেন্তো ভগৰা ‘‘যথোধি খো পনস্সা’’তিআদিমাহ।
75. Evamassa lokiyalokuttaramissakaṃ pasādaṃ dassetvā idāni kilesappahānaṃ aveccappasādasamannāgatañca paccavekkhato uppajjamānaṃ somanassādiānisaṃsaṃ dassento yathodhi kho panassātiādimāha. Anāgāmissa hi paccante vuṭṭhitaṃ corupaddavaṃ vūpasametvā taṃ paccavekkhato mahānagare vasantassa rañño viya ime cime ca mama kilesā pahīnāti attano kilesappahānaṃ paccavekkhato balavasomanassaṃ uppajjati. Taṃ dassento bhagavā ‘‘yathodhi kho panassā’’tiādimāha.
তস্সত্থো – য্ৰাযং অনাগামী ভিক্খু এৰং ‘‘বুদ্ধে অৰেচ্চপ্পসাদেন সমন্নাগতো হোতি…পে॰… ধম্মে…পে॰… সঙ্ঘে…পে॰… অনুত্তরং পুঞ্ঞক্খেত্তং লোকস্সা’’তি, তস্স যথোধি খো চত্তং হোতি পটিনিস্সট্ঠং, সকসকওধিৰসেন চত্তমেৰ হোতি, তং তং কিলেসজাতং ৰন্তং মুত্তং পহীনং পটিনিস্সট্ঠং। সকসকওধিৰসেনাতি দ্ৰে ওধী কিলেসোধি চ মগ্গোধি চ। তত্থ কিলেসোধিৰসেনাপি যে কিলেসা যং মগ্গৰজ্ঝা, তে অঞ্ঞমগ্গৰজ্ঝেহি অমিস্সা হুত্ৰা সকেনেৰ ওধিনা পহীনা। মগ্গোধিৰসেনাপি যে কিলেসা যেন মগ্গেন পহাতব্বা, তেন তেযেৰ পহীনা হোন্তি। এৰং সকসকওধিৰসেন তং তং কিলেসজাতং চত্তমেৰ হোতি পটিনিস্সট্ঠং, তং পচ্চৰেক্খিত্ৰা চ লদ্ধসোমনস্সো ততুত্তরিপি সো ‘‘বুদ্ধে অৰেচ্চপ্পসাদেন সমন্নাগতোম্হী’’তি লভতি অত্থৰেদন্তি সম্বন্ধো।
Tassattho – yvāyaṃ anāgāmī bhikkhu evaṃ ‘‘buddhe aveccappasādena samannāgato hoti…pe… dhamme…pe… saṅghe…pe… anuttaraṃ puññakkhettaṃ lokassā’’ti, tassa yathodhi kho cattaṃ hoti paṭinissaṭṭhaṃ, sakasakaodhivasena cattameva hoti, taṃ taṃ kilesajātaṃ vantaṃ muttaṃ pahīnaṃ paṭinissaṭṭhaṃ. Sakasakaodhivasenāti dve odhī kilesodhi ca maggodhi ca. Tattha kilesodhivasenāpi ye kilesā yaṃ maggavajjhā, te aññamaggavajjhehi amissā hutvā sakeneva odhinā pahīnā. Maggodhivasenāpi ye kilesā yena maggena pahātabbā, tena teyeva pahīnā honti. Evaṃ sakasakaodhivasena taṃ taṃ kilesajātaṃ cattameva hoti paṭinissaṭṭhaṃ, taṃ paccavekkhitvā ca laddhasomanasso tatuttaripi so ‘‘buddhe aveccappasādena samannāgatomhī’’ti labhati atthavedanti sambandho.
যতোধি খোতিপি পাঠো। তস্স ৰসেন অযমত্থো, অস্স ভিক্খুনো যতোধি খো পন চত্তং হোতি পটিনিস্সট্ঠং। তত্থ যতোতি কারণৰচনং, যস্মাতি ৰুত্তং হোতি। ওধীতি হেট্ঠা তযো মগ্গা ৰুচ্চন্তি। কস্মা? তে হি ওধিং কত্ৰা কোট্ঠাসং কত্ৰা উপরিমগ্গেন পহাতব্বকিলেসে ঠপেত্ৰা পজহন্তি, তস্মা ওধীতি ৰুচ্চন্তি। অরহত্তমগ্গো পন কিঞ্চি কিলেসং অনৰসেসেত্ৰা পজহতি, তস্মা অনোধীতি ৰুচ্চতি। ইমস্স চ ভিক্খুনো হেট্ঠামগ্গত্তযেন চত্তং। তেন ৰুত্তং ‘‘যতোধি খো পনস্স চত্তং হোতী’’তি। তত্থ খো পনাতি নিপাতমত্তং। অযং পন পিণ্ডত্থো। যস্মা অস্স ওধি চত্তং হোতি পটিনিস্সট্ঠং, তস্মা তং পচ্চৰেক্খিত্ৰা চ লদ্ধসোমনস্সো ততুত্তরিপি সো ‘‘বুদ্ধে অৰেচ্চপ্পসাদেন সমন্নাগতোম্হী’’তি লভতি অত্থৰেদন্তি যথাপাল়ি নেতব্বং।
Yatodhi khotipi pāṭho. Tassa vasena ayamattho, assa bhikkhuno yatodhi kho pana cattaṃ hoti paṭinissaṭṭhaṃ. Tattha yatoti kāraṇavacanaṃ, yasmāti vuttaṃ hoti. Odhīti heṭṭhā tayo maggā vuccanti. Kasmā? Te hi odhiṃ katvā koṭṭhāsaṃ katvā uparimaggena pahātabbakilese ṭhapetvā pajahanti, tasmā odhīti vuccanti. Arahattamaggo pana kiñci kilesaṃ anavasesetvā pajahati, tasmā anodhīti vuccati. Imassa ca bhikkhuno heṭṭhāmaggattayena cattaṃ. Tena vuttaṃ ‘‘yatodhi kho panassa cattaṃ hotī’’ti. Tattha kho panāti nipātamattaṃ. Ayaṃ pana piṇḍattho. Yasmā assa odhi cattaṃ hoti paṭinissaṭṭhaṃ, tasmā taṃ paccavekkhitvā ca laddhasomanasso tatuttaripi so ‘‘buddhe aveccappasādena samannāgatomhī’’ti labhati atthavedanti yathāpāḷi netabbaṃ.
তত্থ চত্তন্তি ইদং সকভাৰপরিচ্চজনৰসেন ৰুত্তং। ৰন্তন্তি ইদং পন অনাদিযনভাৰদস্সনৰসেন। মুত্তন্তি ইদং সন্ততিতো ৰিনিমোচনৰসেন। পহীনন্তি ইদং মুত্তস্সপি ক্ৰচি অনৰট্ঠানদস্সনৰসেন। পটিনিস্সট্ঠন্তি ইদং পুব্বে আদিন্নপুব্বস্স পটিনিস্সগ্গদস্সনৰসেন পটিমুখং ৰা নিস্সট্ঠভাৰদস্সনৰসেন ভাৰনাবলেন অভিভুয্য নিস্সট্ঠভাৰদস্সনৰসেনাতি ৰুত্তং হোতি। লভতি অত্থৰেদং লভতি ধম্মৰেদন্তি এত্থ বুদ্ধাদীসু অৰেচ্চপ্পসাদোযেৰ অরণীযতো অত্থো, উপগন্তব্বতোতি ৰুত্তং হোতি। ধারণতো ধম্মো, ৰিনিপতিতুং অপ্পদানতোতি ৰুত্তং হোতি। ৰেদোতি গন্থোপি ঞাণম্পি সোমনস্সম্পি। ‘‘তিণ্ণং ৰেদানং পারগূ’’তিআদীসু (দী॰ নি॰ ১.২৫৬) হি গন্থো ‘‘ৰেদো’’তি ৰুচ্চতি। ‘‘যং ব্রাহ্মণং ৰেদগুমাভিজঞ্ঞা, অকিঞ্চনং কামভাৰে অসত্ত’’ন্তিআদীসু (সু॰ নি॰ ১০৬৫) ঞাণং। ‘‘যে ৰেদজাতা ৰিচরন্তি লোকে’’তিআদীসু সোমনস্সং। ইধ পন সোমনস্সঞ্চ সোমনস্সসম্পযুত্তঞাণঞ্চ অধিপ্পেতং, তস্মা ‘‘লভতি অত্থৰেদং লভতি ধম্মৰেদন্তি অৰেচ্চপ্পসাদারম্মণসোমনস্সঞ্চ সোমনস্সমযঞাণঞ্চ লভতী’’তি এৰমেত্থ অত্থো ৰেদিতব্বো।
Tattha cattanti idaṃ sakabhāvapariccajanavasena vuttaṃ. Vantanti idaṃ pana anādiyanabhāvadassanavasena. Muttanti idaṃ santatito vinimocanavasena. Pahīnanti idaṃ muttassapi kvaci anavaṭṭhānadassanavasena. Paṭinissaṭṭhanti idaṃ pubbe ādinnapubbassa paṭinissaggadassanavasena paṭimukhaṃ vā nissaṭṭhabhāvadassanavasena bhāvanābalena abhibhuyya nissaṭṭhabhāvadassanavasenāti vuttaṃ hoti. Labhati atthavedaṃ labhati dhammavedanti ettha buddhādīsu aveccappasādoyeva araṇīyato attho, upagantabbatoti vuttaṃ hoti. Dhāraṇato dhammo, vinipatituṃ appadānatoti vuttaṃ hoti. Vedoti ganthopi ñāṇampi somanassampi. ‘‘Tiṇṇaṃ vedānaṃ pāragū’’tiādīsu (dī. ni. 1.256) hi gantho ‘‘vedo’’ti vuccati. ‘‘Yaṃ brāhmaṇaṃ vedagumābhijaññā, akiñcanaṃ kāmabhāve asatta’’ntiādīsu (su. ni. 1065) ñāṇaṃ. ‘‘Ye vedajātā vicaranti loke’’tiādīsu somanassaṃ. Idha pana somanassañca somanassasampayuttañāṇañca adhippetaṃ, tasmā ‘‘labhati atthavedaṃ labhati dhammavedanti aveccappasādārammaṇasomanassañca somanassamayañāṇañca labhatī’’ti evamettha attho veditabbo.
অথ ৰা অত্থৰেদন্তি অৰেচ্চপ্পসাদং পচ্চৰেক্খতো উপ্পন্নং ৰুত্তপ্পকারমেৰ ৰেদং। ধম্মৰেদন্তি অৰেচ্চপ্পসাদস্স হেতুং ওধিসো কিলেসপ্পহানং পচ্চৰেক্খতো উপ্পন্নং ৰুত্তপ্পকারমেৰ ৰেদন্তি এৰম্পি এত্থ অত্থো ৰেদিতব্বো। ৰুত্তঞ্হেতং ‘‘হেতুম্হি ঞাণং ধম্মপটিসম্ভিদা, হেতুফলে ঞাণং অত্থপটিসম্ভিদা’’তি (ৰিভ॰ ৭১৮-৭১৯)। ধম্মূপসংহিতং পামোজ্জন্তি তমেৰ অত্থঞ্চ ধম্মঞ্চ অত্থধম্মানিসংসভূতং ৰেদঞ্চ পচ্চৰেক্খতো উপ্পন্নং পামোজ্জং। তঞ্হি অনৰজ্জলক্খণেন পচ্চৰেক্খণাকারপ্পৰত্তেন ধম্মেন উপসঞ্হিতন্তি ৰুচ্চতি। পমুদিতস্স পীতি জাযতীতি ইমিনা পামোজ্জেন পমুদিতস্স নিরামিসা পীতি জাযতি। পীতিমনস্সাতি তায পীতিযা পীণিতমনস্স। কাযো পস্সম্ভতীতি কাযোপি পস্সদ্ধো হোতি ৰূপসন্তদরথো। পস্সদ্ধকাযো সুখন্তি এৰং ৰূপসন্তকাযদরথো চেতসিকং সুখং পটিসংৰেদেতি। চিত্তং সমাধিযতীতি চিত্তং সম্মা আধিযতি অপ্পিতং ৰিয অচলং তিট্ঠতি।
Atha vā atthavedanti aveccappasādaṃ paccavekkhato uppannaṃ vuttappakārameva vedaṃ. Dhammavedanti aveccappasādassa hetuṃ odhiso kilesappahānaṃ paccavekkhato uppannaṃ vuttappakārameva vedanti evampi ettha attho veditabbo. Vuttañhetaṃ ‘‘hetumhi ñāṇaṃ dhammapaṭisambhidā, hetuphale ñāṇaṃ atthapaṭisambhidā’’ti (vibha. 718-719). Dhammūpasaṃhitaṃ pāmojjanti tameva atthañca dhammañca atthadhammānisaṃsabhūtaṃ vedañca paccavekkhato uppannaṃ pāmojjaṃ. Tañhi anavajjalakkhaṇena paccavekkhaṇākārappavattena dhammena upasañhitanti vuccati. Pamuditassa pīti jāyatīti iminā pāmojjena pamuditassa nirāmisā pīti jāyati. Pītimanassāti tāya pītiyā pīṇitamanassa. Kāyo passambhatīti kāyopi passaddho hoti vūpasantadaratho. Passaddhakāyo sukhanti evaṃ vūpasantakāyadaratho cetasikaṃ sukhaṃ paṭisaṃvedeti. Cittaṃ samādhiyatīti cittaṃ sammā ādhiyati appitaṃ viya acalaṃ tiṭṭhati.
৭৬. এৰমস্স কিলেসপ্পহানং অৰেচ্চপ্পসাদসমন্নাগতং পচ্চৰেক্খতো উপ্পজ্জমানং সোমনস্সাদিআনিসংসং দস্সেত্ৰা ইদানি ‘‘যথোধি খো পন মে’’তি ৰারেন তস্স পচ্চৰেক্খণায পৰত্তাকারং পকাসেত্ৰা তস্সেৰ অনাগামিমগ্গানুভাৰসূচকং ফলং দস্সেন্তো স খো সো, ভিক্খৰেতিআদিমাহ।
76. Evamassa kilesappahānaṃ aveccappasādasamannāgataṃ paccavekkhato uppajjamānaṃ somanassādiānisaṃsaṃ dassetvā idāni ‘‘yathodhi kho pana me’’ti vārena tassa paccavekkhaṇāya pavattākāraṃ pakāsetvā tasseva anāgāmimaggānubhāvasūcakaṃ phalaṃ dassento sa kho so, bhikkhavetiādimāha.
তত্থ এৰংসীলোতি তস্স অনাগামিমগ্গসম্পযুত্তং সীলক্খন্ধং দস্সেতি। এৰংধম্মো এৰংপঞ্ঞোতি তংসম্পযুত্তমেৰ সমাধিক্খন্ধং পঞ্ঞাক্খন্ধঞ্চ দস্সেতি। সালীনন্তি লোহিতসালিগন্ধসালিআদীনং অনেকরূপানং। পিণ্ডপাতন্তি ওদনং। ৰিচিতকাল়কন্তি অপনীতকাল়কং। নেৰস্স তং হোতি অন্তরাযাযাতি তস্স এৰংৰিধস্স ভিক্খুনো তং ৰুত্তপ্পকারপিণ্ডপাতভোজনং মগ্গস্স ৰা ফলস্স ৰা নেৰ অন্তরাযায হোতি, পটিলদ্ধগুণস্স হি তং কিমন্তরাযং করিস্সতি? যোপিস্স অপ্পটিলদ্ধো চতুত্থমগ্গো চ ফলং চ তপ্পটিলাভায ৰিপস্সনং আরভতোপি নেৰস্স তং হোতি অন্তরাযায, অন্তরাযং কাতুং অসমত্থমেৰ হোতি। কস্মা? ৰুত্তপ্পকারসীলধম্মপঞ্ঞাসঙ্গহেন মগ্গেন ৰিসুদ্ধচিত্তত্তা।
Tattha evaṃsīloti tassa anāgāmimaggasampayuttaṃ sīlakkhandhaṃ dasseti. Evaṃdhammo evaṃpaññoti taṃsampayuttameva samādhikkhandhaṃ paññākkhandhañca dasseti. Sālīnanti lohitasāligandhasāliādīnaṃ anekarūpānaṃ. Piṇḍapātanti odanaṃ. Vicitakāḷakanti apanītakāḷakaṃ. Nevassa taṃ hoti antarāyāyāti tassa evaṃvidhassa bhikkhuno taṃ vuttappakārapiṇḍapātabhojanaṃ maggassa vā phalassa vā neva antarāyāya hoti, paṭiladdhaguṇassa hi taṃ kimantarāyaṃ karissati? Yopissa appaṭiladdho catutthamaggo ca phalaṃ ca tappaṭilābhāya vipassanaṃ ārabhatopi nevassa taṃ hoti antarāyāya, antarāyaṃ kātuṃ asamatthameva hoti. Kasmā? Vuttappakārasīladhammapaññāsaṅgahena maggena visuddhacittattā.
যস্মা চেত্থ এতদেৰ কারণং, তস্মা তদনুরূপং উপমং দস্সেন্তো সেয্যথাপীতিআদিমাহ।
Yasmā cettha etadeva kāraṇaṃ, tasmā tadanurūpaṃ upamaṃ dassento seyyathāpītiādimāha.
তত্থ অচ্ছন্তি ৰিপ্পসন্নং। পরিসুদ্ধং মলৰিগমেন। পরিযোদাতং পভস্সরতায। উক্কামুখন্তি সুৰণ্ণকারানং মূসামুখং। সুৰণ্ণকারানং মূসা হি ইধ উক্কা, অঞ্ঞত্থ পন দীপিকাদযোপি ৰুচ্চন্তি। ‘‘উক্কাসু ধারীযমানাসূ’’তি (দী॰ নি॰ ১.১৫৯) হি আগতট্ঠানে দীপিকা ‘‘উক্কা’’তি ৰুচ্চতি। ‘‘উক্কং বন্ধেয্য, উক্কং বন্ধিত্ৰা উক্কামুখং আলিম্পেয্যা’’তি (ম॰ নি॰ ৩.৩৬০) আগতট্ঠানে অঙ্গারকপল্লং। ‘‘কম্মারানং যথা উক্কা, অন্তো ঝাযতি নো বহী’’তি (জা॰ ২.২২.৬৪৯) আগতট্ঠানে কম্মারুদ্ধনং। ‘‘এৰংৰিপাকো উক্কাপাতো ভৰিস্সতী’’তি (দী॰ নি॰ ১.২৪) আগতট্ঠানে ৰাতৰেগো ‘‘উক্কা’’তি ৰুচ্চতি। ইমস্মিং পন ঠানে অঞ্ঞেসু চ এৰরূপেসু ‘‘সণ্ডাসেন জাতরূপং গহেত্ৰা উক্কামুখে পক্খিপতী’’তি আগতট্ঠানেসু সুৰণ্ণকারানং মূসা ‘‘উক্কা’’তি ৰেদিতব্বা।
Tattha acchanti vippasannaṃ. Parisuddhaṃ malavigamena. Pariyodātaṃ pabhassaratāya. Ukkāmukhanti suvaṇṇakārānaṃ mūsāmukhaṃ. Suvaṇṇakārānaṃ mūsā hi idha ukkā, aññattha pana dīpikādayopi vuccanti. ‘‘Ukkāsu dhārīyamānāsū’’ti (dī. ni. 1.159) hi āgataṭṭhāne dīpikā ‘‘ukkā’’ti vuccati. ‘‘Ukkaṃ bandheyya, ukkaṃ bandhitvā ukkāmukhaṃ ālimpeyyā’’ti (ma. ni. 3.360) āgataṭṭhāne aṅgārakapallaṃ. ‘‘Kammārānaṃ yathā ukkā, anto jhāyati no bahī’’ti (jā. 2.22.649) āgataṭṭhāne kammāruddhanaṃ. ‘‘Evaṃvipāko ukkāpāto bhavissatī’’ti (dī. ni. 1.24) āgataṭṭhāne vātavego ‘‘ukkā’’ti vuccati. Imasmiṃ pana ṭhāne aññesu ca evarūpesu ‘‘saṇḍāsena jātarūpaṃ gahetvā ukkāmukhe pakkhipatī’’ti āgataṭṭhānesu suvaṇṇakārānaṃ mūsā ‘‘ukkā’’ti veditabbā.
তত্রাযং উপমাসংসন্দনা – সংকিলিট্ঠৰত্থং ৰিয হি সংকিলিট্ঠজাতরূপং ৰিয চ ইমস্স ভিক্খুনো পুথুজ্জনকালে কামরাগাদিমলানুগতং চিত্তং দট্ঠব্বং। অচ্ছোদকং ৰিয উক্কামুখং ৰিয চ অনাগামিমগ্গো। তং উদকং উক্কামুখঞ্চ আগম্ম ৰত্থসুৰণ্ণানং পরিসুদ্ধতা ৰিয তস্স ভিক্খুনো ৰুত্তপ্পকারসীলধম্মপঞ্ঞাসঙ্গহং অনাগামিমগ্গং আগম্ম ৰিসুদ্ধচিত্ততাতি।
Tatrāyaṃ upamāsaṃsandanā – saṃkiliṭṭhavatthaṃ viya hi saṃkiliṭṭhajātarūpaṃ viya ca imassa bhikkhuno puthujjanakāle kāmarāgādimalānugataṃ cittaṃ daṭṭhabbaṃ. Acchodakaṃ viya ukkāmukhaṃ viya ca anāgāmimaggo. Taṃ udakaṃ ukkāmukhañca āgamma vatthasuvaṇṇānaṃ parisuddhatā viya tassa bhikkhuno vuttappakārasīladhammapaññāsaṅgahaṃ anāgāmimaggaṃ āgamma visuddhacittatāti.
৭৭. সো মেত্তাসহগতেন চেতসাতি যথানুসন্ধিৰসেন দেসনা আগতা। তযো হি অনুসন্ধী পুচ্ছানুসন্ধি অজ্ঝাসযানুসন্ধি যথানুসন্ধীতি। তত্থ ‘‘এৰং ৰুত্তে অঞ্ঞতরো ভিক্খু ভগৰন্তং এতদৰোচ ‘সিযা নু খো, ভন্তে, বহিদ্ধা অসতি পরিতস্সনা’তি? ‘সিযা ভিক্খূ’তি ভগৰা অৰোচা’’তি (ম॰ নি॰ ১.২৪২)। এৰং পুচ্ছন্তানং ৰিস্সজ্জিতসুত্তৰসেন পুচ্ছানুসন্ধি ৰেদিতব্বো। ‘‘সিযা খো পন তে ব্রাহ্মণ এৰমস্স, অজ্জাপি নূন সমণো গোতমো অৰীতরাগো’’তি (ম॰ নি॰ ১.৫৫) এৰং পরেসং অজ্ঝাসযং ৰিদিত্ৰা ৰুত্তস্স সুত্তস্স ৰসেন অজ্ঝাসযানুসন্ধি ৰেদিতব্বো। যেন পন ধম্মেন আদিম্হি দেসনা উট্ঠিতা, তস্স ধম্মস্স অনুরূপধম্মৰসেন ৰা পটিপক্খৰসেন ৰা যেসু সুত্তেসু উপরি দেসনা আগচ্ছতি, তেসং ৰসেন যথানুসন্ধি ৰেদিতব্বো । সেয্যথিদং, আকঙ্খেয্যসুত্তে হেট্ঠা সীলেন দেসনা উট্ঠিতা, উপরি ছ অভিঞ্ঞা আগতা। ককচূপমে হেট্ঠা অক্খন্তিযা উট্ঠিতা, উপরি ককচূপমোৰাদো আগতো। অলগদ্দে হেট্ঠা দিট্ঠিপরিদীপনেন উট্ঠিতা, উপরি তিপরিৰট্টসুঞ্ঞতাপকাসনা আগতা, চূল়অস্সপুরে হেট্ঠা কিলেসপরিদীপনেন উট্ঠিতা, উপরি ব্রহ্মৰিহারা আগতা। কোসম্বিযসুত্তে হেট্ঠা ভণ্ডনেন উট্ঠিতা, উপরি সারণীযধম্মা আগতা। ইমস্মিম্পি ৰত্থসুত্তে হেট্ঠা কিলেসপরিদীপনেন উট্ঠিতা, উপরি ব্রহ্মৰিহারা আগতা। তেন ৰুত্তং ‘‘যথানুসন্ধিৰসেন দেসনা আগতা’’তি। ব্রহ্মৰিহারেসু পন অনুপদৰণ্ণনা চ ভাৰনানযো চ সব্বো সব্বাকারেন ৰিসুদ্ধিমগ্গে ৰুত্তো।
77.So mettāsahagatena cetasāti yathānusandhivasena desanā āgatā. Tayo hi anusandhī pucchānusandhi ajjhāsayānusandhi yathānusandhīti. Tattha ‘‘evaṃ vutte aññataro bhikkhu bhagavantaṃ etadavoca ‘siyā nu kho, bhante, bahiddhā asati paritassanā’ti? ‘Siyā bhikkhū’ti bhagavā avocā’’ti (ma. ni. 1.242). Evaṃ pucchantānaṃ vissajjitasuttavasena pucchānusandhi veditabbo. ‘‘Siyā kho pana te brāhmaṇa evamassa, ajjāpi nūna samaṇo gotamo avītarāgo’’ti (ma. ni. 1.55) evaṃ paresaṃ ajjhāsayaṃ viditvā vuttassa suttassa vasena ajjhāsayānusandhi veditabbo. Yena pana dhammena ādimhi desanā uṭṭhitā, tassa dhammassa anurūpadhammavasena vā paṭipakkhavasena vā yesu suttesu upari desanā āgacchati, tesaṃ vasena yathānusandhi veditabbo . Seyyathidaṃ, ākaṅkheyyasutte heṭṭhā sīlena desanā uṭṭhitā, upari cha abhiññā āgatā. Kakacūpame heṭṭhā akkhantiyā uṭṭhitā, upari kakacūpamovādo āgato. Alagadde heṭṭhā diṭṭhiparidīpanena uṭṭhitā, upari tiparivaṭṭasuññatāpakāsanā āgatā, cūḷaassapure heṭṭhā kilesaparidīpanena uṭṭhitā, upari brahmavihārā āgatā. Kosambiyasutte heṭṭhā bhaṇḍanena uṭṭhitā, upari sāraṇīyadhammā āgatā. Imasmimpi vatthasutte heṭṭhā kilesaparidīpanena uṭṭhitā, upari brahmavihārā āgatā. Tena vuttaṃ ‘‘yathānusandhivasena desanā āgatā’’ti. Brahmavihāresu pana anupadavaṇṇanā ca bhāvanānayo ca sabbo sabbākārena visuddhimagge vutto.
৭৮. এৰং ভগৰা অভিজ্ঝাদীনং উপক্কিলেসানং পটিপক্খভূতং সব্বসো চ কামরাগব্যাপাদপ্পহানেন ৰিহতপচ্চত্থিকত্তা লদ্ধপদট্ঠানং তস্স অনাগামিনো ব্রহ্মৰিহারভাৰনং দস্সেত্ৰা ইদানিস্স অরহত্তায ৰিপস্সনং দস্সেত্ৰা অরহত্তপ্পত্তিং দস্সেতুং সো অত্থি ইদন্তিআদিমাহ।
78. Evaṃ bhagavā abhijjhādīnaṃ upakkilesānaṃ paṭipakkhabhūtaṃ sabbaso ca kāmarāgabyāpādappahānena vihatapaccatthikattā laddhapadaṭṭhānaṃ tassa anāgāmino brahmavihārabhāvanaṃ dassetvā idānissa arahattāya vipassanaṃ dassetvā arahattappattiṃ dassetuṃ so atthi idantiādimāha.
তস্সত্থো – সো অনাগামী এৰং ভাৰিতব্রহ্মৰিহারো এতেসং ব্রহ্মৰিহারানং যতো কুতোচি ৰুট্ঠায তে এৰ ব্রহ্মৰিহারধম্মে নামৰসেন তেসং নিস্সযং হদযৰত্থুং ৰত্থুনিস্সযানি ভূতানীতি ইমিনা নযেন ভূতুপাদাযধম্মে রূপৰসেন চ ৰৰত্থপেত্ৰা অত্থি ইদন্তি পজানাতি, এত্তাৰতানেন দুক্খসচ্চৰৰত্থানং কতং হোতি। ততো তস্স দুক্খস্স সমুদযং পটিৰিজ্ঝন্তো অত্থি হীনন্তি পজানাতি, এত্তাৰতানেন সমুদযসচ্চৰৰত্থানং কতং হোতি। ততো তস্স পহানুপাযং ৰিচিনন্তো অত্থি পণীতন্তি পজানাতি, এত্তাৰতানেন মগ্গসচ্চৰৰত্থানং কতং হোতি। ততো তেন মগ্গেন অধিগন্তব্বট্ঠানং ৰিচিনন্তো অত্থি উত্তরি ইমস্স সঞ্ঞাগতস্স নিস্সরণন্তি পজানাতি, ইমস্স মযা অধিগতস্স ব্রহ্মৰিহারসঞ্ঞাগতস্স উত্তরি নিস্সরণং নিব্বানং অত্থীতি এৰং পজানাতীতি অধিপ্পাযো, এত্তাৰতানেন নিরোধসচ্চৰৰত্থানং কতং হোতি। তস্স এৰং জানতো এৰং পস্সতোতি তস্স ৰিপস্সনাপঞ্ঞায এৰং চতূহি আকারেহি চত্তারি সচ্চানি জানতো, মগ্গপঞ্ঞায এৰং পস্সতো, ভযভেরৰে ৰুত্তনযেনেৰ কামাসৰাপি চিত্তং ৰিমুচ্চতি…পে॰… ইত্থত্তাযাতি পজানাতীতি।
Tassattho – so anāgāmī evaṃ bhāvitabrahmavihāro etesaṃ brahmavihārānaṃ yato kutoci vuṭṭhāya te eva brahmavihāradhamme nāmavasena tesaṃ nissayaṃ hadayavatthuṃ vatthunissayāni bhūtānīti iminā nayena bhūtupādāyadhamme rūpavasena ca vavatthapetvā atthi idanti pajānāti, ettāvatānena dukkhasaccavavatthānaṃ kataṃ hoti. Tato tassa dukkhassa samudayaṃ paṭivijjhanto atthi hīnanti pajānāti, ettāvatānena samudayasaccavavatthānaṃ kataṃ hoti. Tato tassa pahānupāyaṃ vicinanto atthi paṇītanti pajānāti, ettāvatānena maggasaccavavatthānaṃ kataṃ hoti. Tato tena maggena adhigantabbaṭṭhānaṃ vicinanto atthi uttari imassa saññāgatassa nissaraṇanti pajānāti, imassa mayā adhigatassa brahmavihārasaññāgatassa uttari nissaraṇaṃ nibbānaṃ atthīti evaṃ pajānātīti adhippāyo, ettāvatānena nirodhasaccavavatthānaṃ kataṃ hoti. Tassa evaṃ jānato evaṃ passatoti tassa vipassanāpaññāya evaṃ catūhi ākārehi cattāri saccāni jānato, maggapaññāya evaṃ passato, bhayabherave vuttanayeneva kāmāsavāpi cittaṃ vimuccati…pe… itthattāyāti pajānātīti.
এৰং যাৰ অরহত্তা দেসনং পাপেত্ৰা ইদানি যস্মা তস্সং পরিসতি ন্হানসুদ্ধিকো ব্রাহ্মণো নিসিন্নো, সো এৰং ন্হানসুদ্ধিযা ৰণ্ণং ৰুচ্চমানং সুত্ৰা পব্বজিত্ৰা অরহত্তং পাপুণিস্সতীতি ভগৰতা ৰিদিতো, তস্মা তস্স চোদনত্থায ‘‘অযং ৰুচ্চতি, ভিক্খৰে, ভিক্খু সিনাতো অন্তরেন সিনানেনা’’তি ইমং পাটিযেক্কং অনুসন্ধিমাহ। তত্থ অন্তরেন সিনানেনাতি অব্ভন্তরেন কিলেসৰুট্ঠানসিনানেন।
Evaṃ yāva arahattā desanaṃ pāpetvā idāni yasmā tassaṃ parisati nhānasuddhiko brāhmaṇo nisinno, so evaṃ nhānasuddhiyā vaṇṇaṃ vuccamānaṃ sutvā pabbajitvā arahattaṃ pāpuṇissatīti bhagavatā vidito, tasmā tassa codanatthāya ‘‘ayaṃ vuccati, bhikkhave, bhikkhu sināto antarena sinānenā’’ti imaṃ pāṭiyekkaṃ anusandhimāha. Tattha antarena sinānenāti abbhantarena kilesavuṭṭhānasinānena.
৭৯. সুন্দরিকভারদ্ৰাজোতি ভারদ্ৰাজো নাম সো ব্রাহ্মণো অত্তনো গোত্তৰসেন, সুন্দরিকায পন নদিযা সিনাতস্স পাপপ্পহানং হোতীতি অযমস্স দিট্ঠি, তস্মা ‘‘সুন্দরিকভারদ্ৰাজো’’তি ৰুচ্চতি। সো তং ভগৰতো ৰচনং সুত্ৰা চিন্তেসি ‘‘মযং সিনানসুদ্ধিং ৰণ্ণেম, সমণোপি গোতমো তথেৰ ৰণ্ণেতি, সমানচ্ছন্দো দানি এস অম্হেহী’’তি। অথ ভগৰন্তং বাহুকং নদিং গন্ত্ৰা তং তত্থ পাপং পৰাহেত্ৰা আগতং ৰিয মঞ্ঞমানো আহ ‘‘গচ্ছতি পন ভৰং গোতমো বাহুকং নদিং সিনাযিতু’’ন্তি? ভগৰা তস্স গচ্ছামীতি ৰা ন গচ্ছামীতি ৰা অৰত্ৰাযেৰ ব্রাহ্মণস্স দিট্ঠিসমুগ্ঘাতং কত্তুকামো ‘‘কিং ব্রাহ্মণ বাহুকায নদিযা , কিং বাহুকা নদী করিস্সতী’’তি আহ। তস্সত্থো কিং পযোজনং বাহুকায, কিং সা করিস্সতি? অসমত্থা সা কস্সচি অত্থায, কিং তত্থ গমিস্সামীতি?
79.Sundarikabhāradvājoti bhāradvājo nāma so brāhmaṇo attano gottavasena, sundarikāya pana nadiyā sinātassa pāpappahānaṃ hotīti ayamassa diṭṭhi, tasmā ‘‘sundarikabhāradvājo’’ti vuccati. So taṃ bhagavato vacanaṃ sutvā cintesi ‘‘mayaṃ sinānasuddhiṃ vaṇṇema, samaṇopi gotamo tatheva vaṇṇeti, samānacchando dāni esa amhehī’’ti. Atha bhagavantaṃ bāhukaṃ nadiṃ gantvā taṃ tattha pāpaṃ pavāhetvā āgataṃ viya maññamāno āha ‘‘gacchati pana bhavaṃ gotamo bāhukaṃ nadiṃ sināyitu’’nti? Bhagavā tassa gacchāmīti vā na gacchāmīti vā avatvāyeva brāhmaṇassa diṭṭhisamugghātaṃ kattukāmo ‘‘kiṃ brāhmaṇa bāhukāya nadiyā , kiṃ bāhukā nadī karissatī’’ti āha. Tassattho kiṃ payojanaṃ bāhukāya, kiṃ sā karissati? Asamatthā sā kassaci atthāya, kiṃ tattha gamissāmīti?
অথ ব্রাহ্মণো তং পসংসন্তো লোক্খসম্মতাতিআদিমাহ। তত্থ লোক্খসম্মতাতি লূখভাৰসম্মতা, লূখভাৰন্তি চোক্খভাৰং, ৰিসুদ্ধিভাৰং দেতীতি এৰং সম্মতাতি ৰুত্তং হোতি। লোক্যসম্মতাতিপি পাঠো। তস্সত্থো, সেট্ঠং লোকং গমযতীতি এৰং সম্মতাতি। পুঞ্ঞসম্মতাতি পুঞ্ঞন্তি সম্মতা। পৰাহেতীতি গমযতি ৰিসোধেতি। গাথাহি অজ্ঝভাসীতি গাথাহি অভাসি। গাথা চ ৰুচ্চমানা তদত্থদীপনত্থমেৰ ৰা গাথারুচিকানং ৰুচ্চতি, ৰিসেসত্থদীপনত্থং ৰা। ইধ পনেতা উভযত্থদীপনত্থং ৰুত্তাতি ৰেদিতব্বা।
Atha brāhmaṇo taṃ pasaṃsanto lokkhasammatātiādimāha. Tattha lokkhasammatāti lūkhabhāvasammatā, lūkhabhāvanti cokkhabhāvaṃ, visuddhibhāvaṃ detīti evaṃ sammatāti vuttaṃ hoti. Lokyasammatātipi pāṭho. Tassattho, seṭṭhaṃ lokaṃ gamayatīti evaṃ sammatāti. Puññasammatāti puññanti sammatā. Pavāhetīti gamayati visodheti. Gāthāhi ajjhabhāsīti gāthāhi abhāsi. Gāthā ca vuccamānā tadatthadīpanatthameva vā gāthārucikānaṃ vuccati, visesatthadīpanatthaṃ vā. Idha panetā ubhayatthadīpanatthaṃ vuttāti veditabbā.
বাহুকন্তি ইদমেৰ হি এত্থ ৰচনং তদত্থদীপকং, সেসানি ৰিসেসত্থদীপকানি। যথেৰ হি বাহুকং, এৰং অধিকক্কাদীনিপি লোকো গচ্ছতি ন্হানেন পাপং পৰাহেতুং। তত্থ যে তেসং ঠানানং আসন্না হোন্তি, তে দিৰসস্স তিক্খত্তুং ন্হাযন্তি। যে দূরা, তে যথাক্কমং দ্ৰিক্খত্তুং সকিং একদিৰসন্তরং, এৰং যাৰ সংৰচ্ছরন্তরং ন্হাযন্তি। যে পন সব্বথাপি গন্তুং ন সক্কোন্তি, তে ঘটেহিপি ততো উদকং আহরাপেত্ৰা ন্হাযন্তি। সব্বঞ্চেতং নিরত্থকং, তস্মা ইমং ৰিসেসত্থং দীপেতুং অধিকক্কাদীনিপীতি আহ।
Bāhukanti idameva hi ettha vacanaṃ tadatthadīpakaṃ, sesāni visesatthadīpakāni. Yatheva hi bāhukaṃ, evaṃ adhikakkādīnipi loko gacchati nhānena pāpaṃ pavāhetuṃ. Tattha ye tesaṃ ṭhānānaṃ āsannā honti, te divasassa tikkhattuṃ nhāyanti. Ye dūrā, te yathākkamaṃ dvikkhattuṃ sakiṃ ekadivasantaraṃ, evaṃ yāva saṃvaccharantaraṃ nhāyanti. Ye pana sabbathāpi gantuṃ na sakkonti, te ghaṭehipi tato udakaṃ āharāpetvā nhāyanti. Sabbañcetaṃ niratthakaṃ, tasmā imaṃ visesatthaṃ dīpetuṃ adhikakkādīnipīti āha.
তত্থ অধিকক্কন্তি ন্হানসম্ভারৰসেন লদ্ধৰোহারং একং তিত্থং ৰুচ্চতি। গযাতিপি মণ্ডলৰাপিসণ্ঠানং তিত্থমেৰ ৰুচ্চতি। পযাগাতি এতম্পি গঙ্গায একং তিত্থমেৰ মহাপনাদস্স রঞ্ঞো গঙ্গাযং নিমুগ্গপাসাদস্স সোপানসম্মুখট্ঠানং, বাহুকা সুন্দরিকা সরস্সতী বাহুমতীতি ইমা পন চতস্সো নদিযো। বালোতি দুপ্পঞ্ঞো। পক্খন্দোতি পৰিসন্তো। ন সুজ্ঝতীতি কিলেসসুদ্ধিং ন পাপুণাতি, কেৰলং রজোজল্লমেৰ পৰাহেতি।
Tattha adhikakkanti nhānasambhāravasena laddhavohāraṃ ekaṃ titthaṃ vuccati. Gayātipi maṇḍalavāpisaṇṭhānaṃ titthameva vuccati. Payāgāti etampi gaṅgāya ekaṃ titthameva mahāpanādassa rañño gaṅgāyaṃ nimuggapāsādassa sopānasammukhaṭṭhānaṃ, bāhukā sundarikā sarassatī bāhumatīti imā pana catasso nadiyo. Bāloti duppañño. Pakkhandoti pavisanto. Na sujjhatīti kilesasuddhiṃ na pāpuṇāti, kevalaṃ rajojallameva pavāheti.
কিং সুন্দরিকা করিস্সতীতি সুন্দরিকা কিলেসৰিসোধনে কিং করিস্সতি? ন কিঞ্চি কাতুং সমত্থাতি অধিপ্পাযো। এস নযো পযাগবাহুকাসু। ইমেহি চ তীহি পদেহি ৰুত্তেহি ইতরানিপি চত্তারি লক্খণাহারনযেন ৰুত্তানেৰ হোন্তি, তস্মা যথেৰ সুন্দরিকা পযাগা বাহুকা ন কিঞ্চি করোন্তি, তথা অধিকক্কাদযোপীতি ৰেদিতব্বা।
Kiṃ sundarikā karissatīti sundarikā kilesavisodhane kiṃ karissati? Na kiñci kātuṃ samatthāti adhippāyo. Esa nayo payāgabāhukāsu. Imehi ca tīhi padehi vuttehi itarānipi cattāri lakkhaṇāhāranayena vuttāneva honti, tasmā yatheva sundarikā payāgā bāhukā na kiñci karonti, tathā adhikakkādayopīti veditabbā.
ৰেরিন্তি পাণাতিপাতাদিপঞ্চৰেরসমন্নাগতং। কতকিব্বিসন্তি কতলুদ্দকম্মং। ন হি নং সোধযেতি সুন্দরিকা ৰা পযাগা ৰা বাহুকা ৰা ন সোধযে, ন সোধেতীতি ৰুত্তং হোতি। পাপকম্মিনন্তি পাপকেহি ৰেরকিব্বিসকম্মেহি যুত্তং, লামককম্মে যুত্তং ৰা ৰেরকিব্বিসভাৰং অপ্পত্তেহি খুদ্দকেহিপি পাপেহি যুত্তন্তি ৰুত্তং হোতি।
Verinti pāṇātipātādipañcaverasamannāgataṃ. Katakibbisanti kataluddakammaṃ. Na hi naṃ sodhayeti sundarikā vā payāgā vā bāhukā vā na sodhaye, na sodhetīti vuttaṃ hoti. Pāpakamminanti pāpakehi verakibbisakammehi yuttaṃ, lāmakakamme yuttaṃ vā verakibbisabhāvaṃ appattehi khuddakehipi pāpehi yuttanti vuttaṃ hoti.
সুদ্ধস্সাতি নিক্কিলেসস্স। সদা ফগ্গূতি নিচ্চম্পি ফগ্গুনীনক্খত্তমেৰ। ফগ্গুনমাসে কির ‘‘উত্তরফগ্গুনদিৰসে যো ন্হাযতি, সো সংৰচ্ছরং কতপাপং সোধেতী’’তি এৰং দিট্ঠিকো সো ব্রাহ্মণো, তেনস্স ভগৰা তং দিট্ঠিং পটিহনন্তো আহ ‘‘সুদ্ধস্স ৰে সদা ফগ্গূ’’তি। নিক্কিলেসস্স নিচ্চং ফগ্গুনীনক্খত্তং, ইতরো কিং সুজ্ঝতীতি? উপোসথো সদাতি সুদ্ধস্স চ চাতুদ্দসপন্নরসাদীসু উপোসথঙ্গানি অসমাদিযতোপি নিচ্চমেৰ উপোসথো। সুদ্ধস্স সুচিকম্মস্সাতি নিক্কিলেসতায সুদ্ধস্স সুচীহি চ কাযকম্মাদীহি সমন্নাগতস্স। সদা সম্পজ্জতে ৰতন্তি ঈদিসস্স চ কুসলূপসঞ্হিতং ৰতসমাদানম্পি নিচ্চং সম্পন্নমেৰ হোতীতি। ইধেৰ সিনাহীতি ইমস্মিংযেৰ মম সাসনে সিনাহি। কিং ৰুত্তং হোতি? ‘‘সচে অজ্ঝত্তিককিলেসমলপ্পৰাহনং ইচ্ছসি, ইধেৰ মম সাসনে অট্ঠঙ্গিকমগ্গসলিলেন সিনাহি, অঞ্ঞত্র হি ইদং নত্থী’’তি।
Suddhassāti nikkilesassa. Sadā phaggūti niccampi phaggunīnakkhattameva. Phaggunamāse kira ‘‘uttaraphaggunadivase yo nhāyati, so saṃvaccharaṃ katapāpaṃ sodhetī’’ti evaṃ diṭṭhiko so brāhmaṇo, tenassa bhagavā taṃ diṭṭhiṃ paṭihananto āha ‘‘suddhassa ve sadā phaggū’’ti. Nikkilesassa niccaṃ phaggunīnakkhattaṃ, itaro kiṃ sujjhatīti? Uposatho sadāti suddhassa ca cātuddasapannarasādīsu uposathaṅgāni asamādiyatopi niccameva uposatho. Suddhassa sucikammassāti nikkilesatāya suddhassa sucīhi ca kāyakammādīhi samannāgatassa. Sadā sampajjate vatanti īdisassa ca kusalūpasañhitaṃ vatasamādānampi niccaṃ sampannameva hotīti. Idheva sināhīti imasmiṃyeva mama sāsane sināhi. Kiṃ vuttaṃ hoti? ‘‘Sace ajjhattikakilesamalappavāhanaṃ icchasi, idheva mama sāsane aṭṭhaṅgikamaggasalilena sināhi, aññatra hi idaṃ natthī’’ti.
ইদানিস্স সপ্পাযদেসনাৰসেন তীসুপি দ্ৰারেসু সুদ্ধিং দস্সেন্তো সব্বভূতেসু করোহি খেমতন্তিআদিমাহ। তত্থ খেমতন্তি অভযং হিতভাৰং, মেত্তন্তি ৰুত্তং হোতি। এতেনস্স মনোদ্ৰারসুদ্ধি দস্সিতা হোতি।
Idānissa sappāyadesanāvasena tīsupi dvāresu suddhiṃ dassento sabbabhūtesu karohi khematantiādimāha. Tattha khematanti abhayaṃ hitabhāvaṃ, mettanti vuttaṃ hoti. Etenassa manodvārasuddhi dassitā hoti.
সচে মুসা ন ভণসীতি এতেনস্স ৰচীদ্ৰারসুদ্ধি। সচে পাণং ন হিংসসি সচে অদিন্নং নাদিযসীতি এতেহি কাযদ্ৰারসুদ্ধি। সদ্দহানো অমচ্ছরীতি এতেহি পন নং এৰং পরিসুদ্ধদ্ৰারং সদ্ধাসম্পদায চাগসম্পদায চ নিযোজেসি। কিং কাহসি গযং গন্ত্ৰা, উদপানোপি তে গযাতি অযং পন উপড্ঢগাথা, সচে সব্বভূতেসু খেমতং করিস্সসি, মুসা ন ভণিস্সসি, পাণং ন হনিস্সসি, অদিন্নং নাদিযিস্সসি, সদ্ধহানো অমচ্ছরী ভৰিস্সসি, কিং কাহসি গযং গন্ত্ৰা উদপানোপি তে গযা , গযাযপি হি তে ন্হাযন্তস্স উদপানেপি ইমায এৰ পটিপত্তিযা কিলেসসুদ্ধি, সরীরমলসুদ্ধি পন উভযত্থ সমাতি এৰং যোজেতব্বং। যস্মা চ লোকে গযা সম্মততরা, তস্মা তস্স ভগৰা ‘‘গচ্ছতি পন ভৰং গোতমো বাহুক’’ন্তি পুট্ঠোপি ‘‘কিং কাহসি বাহুকং গন্ত্ৰা’’তি অৰত্ৰা ‘‘কিং কাহসি গযং গন্ত্ৰা’’তি আহাতি ৰেদিতব্বো।
Sace musā na bhaṇasīti etenassa vacīdvārasuddhi. Sace pāṇaṃ na hiṃsasi sace adinnaṃ nādiyasīti etehi kāyadvārasuddhi. Saddahāno amaccharīti etehi pana naṃ evaṃ parisuddhadvāraṃ saddhāsampadāya cāgasampadāya ca niyojesi. Kiṃ kāhasi gayaṃ gantvā, udapānopi te gayāti ayaṃ pana upaḍḍhagāthā, sace sabbabhūtesu khemataṃ karissasi, musā na bhaṇissasi, pāṇaṃ na hanissasi, adinnaṃ nādiyissasi, saddhahāno amaccharī bhavissasi, kiṃ kāhasi gayaṃ gantvā udapānopi te gayā , gayāyapi hi te nhāyantassa udapānepi imāya eva paṭipattiyā kilesasuddhi, sarīramalasuddhi pana ubhayattha samāti evaṃ yojetabbaṃ. Yasmā ca loke gayā sammatatarā, tasmā tassa bhagavā ‘‘gacchati pana bhavaṃ gotamo bāhuka’’nti puṭṭhopi ‘‘kiṃ kāhasi bāhukaṃ gantvā’’ti avatvā ‘‘kiṃ kāhasi gayaṃ gantvā’’ti āhāti veditabbo.
৮০. এৰং ৰুত্তেতি এৰমাদি ভযভেরৰে ৰুত্তত্তা পাকটমেৰ। একো ৰূপকট্ঠোতিআদীসু পন একো কাযৰিৰেকেন । ৰূপকট্ঠো চিত্তৰিৰেকেন। অপ্পমত্তো কম্মট্ঠানে সতি অৰিজহনেন। আতাপী কাযিকচেতসিকৰীরিযসঙ্খাতেন আতাপেন। পহিতত্তো কাযে চ জীৰিতে চ অনপেক্খতায। ৰিহরন্তো অঞ্ঞতরইরিযাপথৰিহারেন। নচিরস্সেৰাতি পব্বজ্জং উপাদায ৰুচ্চতি। কুলপুত্তাতি দুৰিধা কুলপুত্তা জাতিকুলপুত্তা চ আচারকুলপুত্তা চ, অযং পন উভযথাপি কুলপুত্তো। অগারস্মাতি ঘরা। অগারস্স হিতং অগারিযং, কসিগোরক্খাদিকুটুম্বপোসনকম্মং ৰুচ্চতি, নত্থি এত্থ অগারিযন্তি অনগারিযং, পব্বজ্জাযেতং অধিৰচনং। পব্বজন্তীতি উপগচ্ছন্তি উপসঙ্কমন্তি। তদনুত্তরন্তি তং অনুত্তরং। ব্রহ্মচরিযপরিযোসানন্তি মগ্গব্রহ্মচরিযস্স পরিযোসানং, অরহত্তফলন্তি ৰুত্তং হোতি। তস্স হি অত্থায কুলপুত্তা পব্বজন্তি। দিট্ঠেৰ ধম্মেতি তস্মিংযেৰ অত্তভাৰে। সযং অভিঞ্ঞা সচ্ছিকত্ৰাতি অত্তনাযেৰ পঞ্ঞায পচ্চক্খং কত্ৰা, অপরপ্পচ্চযং কত্ৰাতি অত্থো। উপসম্পজ্জ ৰিহাসীতি পাপুণিত্ৰা সম্পাদেত্ৰা ৰিহাসীতি, এৰং ৰিহরন্তো চ খীণা জাতি…পে॰… অব্ভঞ্ঞাসি। এতেনস্স পচ্চৰেক্খণভূমিং দস্সেতি।
80.Evaṃ vutteti evamādi bhayabherave vuttattā pākaṭameva. Eko vūpakaṭṭhotiādīsu pana eko kāyavivekena . Vūpakaṭṭho cittavivekena. Appamatto kammaṭṭhāne sati avijahanena. Ātāpī kāyikacetasikavīriyasaṅkhātena ātāpena. Pahitatto kāye ca jīvite ca anapekkhatāya. Viharanto aññatarairiyāpathavihārena. Nacirassevāti pabbajjaṃ upādāya vuccati. Kulaputtāti duvidhā kulaputtā jātikulaputtā ca ācārakulaputtā ca, ayaṃ pana ubhayathāpi kulaputto. Agārasmāti gharā. Agārassa hitaṃ agāriyaṃ, kasigorakkhādikuṭumbaposanakammaṃ vuccati, natthi ettha agāriyanti anagāriyaṃ, pabbajjāyetaṃ adhivacanaṃ. Pabbajantīti upagacchanti upasaṅkamanti. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānaṃ, arahattaphalanti vuttaṃ hoti. Tassa hi atthāya kulaputtā pabbajanti. Diṭṭheva dhammeti tasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayaṃ katvāti attho. Upasampajja vihāsīti pāpuṇitvā sampādetvā vihāsīti, evaṃ viharanto ca khīṇā jāti…pe… abbhaññāsi. Etenassa paccavekkhaṇabhūmiṃ dasseti.
কতমা পনস্স জাতি খীণা? কথঞ্চ নং অব্ভঞ্ঞাসীতি? ৰুচ্চতে, কামঞ্চেতং ভযভেরৰেপি ৰুত্তং, তথাপি নং ইধ পঠমপুরিসৰসেন যোজনানযস্স দস্সনত্থং পুন সঙ্খেপতো ভণাম। ন তাৰস্স অতীতা জাতি খীণা, পুব্বেৰ খীণত্তা। ন অনাগতা, তত্থ ৰাযামাভাৰতো। ন পচ্চুপ্পন্না, ৰিজ্জমানত্তা। মগ্গস্স পন অভাৰিতত্তা যা উপ্পজ্জেয্য একচতুপঞ্চৰোকারভৰেসু একচতুপঞ্চক্খন্ধপ্পভেদা জাতি, সা মগ্গস্স ভাৰিতত্তা অনুপ্পাদধম্মতং আপজ্জনেন খীণা, তং সো মগ্গভাৰনায পহীনকিলেসে পচ্চৰেক্খিত্ৰা কিলেসাভাৰে ৰিজ্জমানম্পি কম্মং আযতিং অপ্পটিসন্ধিকং হোতীতি জানন্তো জানাতি।
Katamā panassa jāti khīṇā? Kathañca naṃ abbhaññāsīti? Vuccate, kāmañcetaṃ bhayabheravepi vuttaṃ, tathāpi naṃ idha paṭhamapurisavasena yojanānayassa dassanatthaṃ puna saṅkhepato bhaṇāma. Na tāvassa atītā jāti khīṇā, pubbeva khīṇattā. Na anāgatā, tattha vāyāmābhāvato. Na paccuppannā, vijjamānattā. Maggassa pana abhāvitattā yā uppajjeyya ekacatupañcavokārabhavesu ekacatupañcakkhandhappabhedā jāti, sā maggassa bhāvitattā anuppādadhammataṃ āpajjanena khīṇā, taṃ so maggabhāvanāya pahīnakilese paccavekkhitvā kilesābhāve vijjamānampi kammaṃ āyatiṃ appaṭisandhikaṃ hotīti jānanto jānāti.
ৰুসিতন্তি ৰুত্থং পরিৰুত্থং, কতং চরিতং নিট্ঠাপিতন্তি অত্থো। ব্রহ্মচরিযন্তি মগ্গব্রহ্মচরিযং। কতং করণীযন্তি চতূসু সচ্চেসু চতূহি মগ্গেহি পরিঞ্ঞাপহানসচ্ছিকিরিযভাৰনাৰসেন সোল়সৰিধম্পি কিচ্চং নিট্ঠাপিতন্তি অত্থো। নাপরং ইত্থত্তাযাতি ইদানি পুনইত্থভাৰায এৰংসোল়সকিচ্চভাৰায, কিলেসক্খযায ৰা মগ্গভাৰনা নত্থীতি। অথ ৰা, ইত্থত্তাযাতি ইত্থভাৰতো ইমস্মা এৰংপকারা ইদানি ৰত্তমানক্খন্ধসন্তানা অপরং খন্ধসন্তানং নত্থি। ইমে পন পঞ্চক্খন্ধা পরিঞ্ঞাতা তিট্ঠন্তি, ছিন্নমূলকো রুক্খো ৰিযাতি অব্ভঞ্ঞাসি। অঞ্ঞতরোতি একো। অরহতন্তি অরহন্তানং, ভগৰতো সাৰকানং অরহতং অব্ভন্তরো অহোসীতি।
Vusitanti vutthaṃ parivutthaṃ, kataṃ caritaṃ niṭṭhāpitanti attho. Brahmacariyanti maggabrahmacariyaṃ. Kataṃ karaṇīyanti catūsu saccesu catūhi maggehi pariññāpahānasacchikiriyabhāvanāvasena soḷasavidhampi kiccaṃ niṭṭhāpitanti attho. Nāparaṃ itthattāyāti idāni punaitthabhāvāya evaṃsoḷasakiccabhāvāya, kilesakkhayāya vā maggabhāvanā natthīti. Atha vā, itthattāyāti itthabhāvato imasmā evaṃpakārā idāni vattamānakkhandhasantānā aparaṃ khandhasantānaṃ natthi. Ime pana pañcakkhandhā pariññātā tiṭṭhanti, chinnamūlako rukkho viyāti abbhaññāsi. Aññataroti eko. Arahatanti arahantānaṃ, bhagavato sāvakānaṃ arahataṃ abbhantaro ahosīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
ৰত্থসুত্তৰণ্ণনা নিট্ঠিতা।
Vatthasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. ৰত্থসুত্তং • 7. Vatthasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. ৰত্থসুত্তৰণ্ণনা • 7. Vatthasuttavaṇṇanā
