| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
7. вад̇т̇асуд̇д̇аван̣н̣анаа
7. Vatthasuttavaṇṇanā
70. звам̣ мз суд̇анд̇и вад̇т̇асуд̇д̇ам̣. д̇ад̇т̇а сзяяат̇ааби, бхигкавз, вад̇т̇анд̇и убамааважанамзвзд̇ам̣. убамам̣ гаронд̇о жа бхаг̇аваа гад̇т̇ажи батамам̣язва убамам̣ д̣̇ассзд̇ваа бажчаа ад̇т̇ам̣ д̣̇ассзд̇и, гад̇т̇ажи батамамад̇т̇ам̣ д̣̇ассзд̇ваа бажчаа убамам̣, гад̇т̇ажи убамааяа ад̇т̇ам̣ бариваарзд̇ваа д̣̇ассзд̇и, гад̇т̇ажи ад̇т̇зна убамам̣.
70.Evaṃme sutanti vatthasuttaṃ. Tattha seyyathāpi, bhikkhave, vatthanti upamāvacanamevetaṃ. Upamaṃ karonto ca bhagavā katthaci paṭhamaṃyeva upamaṃ dassetvā pacchā atthaṃ dasseti, katthaci paṭhamamatthaṃ dassetvā pacchā upamaṃ, katthaci upamāya atthaṃ parivāretvā dasseti, katthaci atthena upamaṃ.
д̇ат̇аа хзса – ‘‘сзяяат̇аабиссу, бхигкавз, д̣̇вз аг̇аараа сад̣̇ваараа, д̇ад̇т̇а жагкумаа бурисо маж̇жхз тид̇о бассзяяаа’’д̇и (ма. ни. 3.261) сагаламби д̣̇звад̣̇ууд̇асуд̇д̇ам̣ убамам̣ батамам̣ д̣̇ассзд̇ваа бажчаа ад̇т̇ам̣ д̣̇ассзнд̇о ааха. ‘‘д̇ирогуддам̣ д̇иробаагаарам̣ д̇иробаб̣б̣ад̇ам̣ асаж̇ж̇амаано г̇ажчад̇и, сзяяат̇ааби аагаасз’’д̇иаад̣̇инаа (д̣̇ий. ни. 1.238; бади. ма. 1.102) бана наязна сагаламби ид̣̇д̇хивид̇хамад̇т̇ам̣ батамам̣ д̣̇ассзд̇ваа бажчаа убамам̣ д̣̇ассзнд̇о ааха. ‘‘сзяяат̇ааби б̣раахман̣абурисо саарад̇т̇иго саараг̇авзсий’’д̇иаад̣̇инаава (ма. ни. 1.318) наязна сагаламби жуул̣асааробамасуд̇д̇ам̣ убамааяа ад̇т̇ам̣ бариваарзд̇ваа д̣̇ассзнд̇о ааха. ‘‘ид̇ха бана, бхигкавз, згажжз гулабуд̇д̇аа д̇хаммам̣ барияаабун̣анд̇и суд̇д̇ам̣…бз… сзяяат̇ааби, бхигкавз, бурисо алаг̇ад̣̇д̣̇ад̇т̇иго’’д̇иаад̣̇инаа (ма. ни. 1.238) наязна сагаламби алаг̇ад̣̇д̣̇асуд̇д̇ам̣ махаасааробамасуд̇д̇анд̇и звамаад̣̇ийни суд̇д̇аани ад̇т̇зна убамам̣ бариваарзд̇ваа д̣̇ассзнд̇о ааха.
Tathā hesa – ‘‘seyyathāpissu, bhikkhave, dve agārā sadvārā, tattha cakkhumā puriso majjhe ṭhito passeyyā’’ti (ma. ni. 3.261) sakalampi devadūtasuttaṃ upamaṃ paṭhamaṃ dassetvā pacchā atthaṃ dassento āha. ‘‘Tirokuṭṭaṃ tiropākāraṃ tiropabbataṃ asajjamāno gacchati, seyyathāpi ākāse’’tiādinā (dī. ni. 1.238; paṭi. ma. 1.102) pana nayena sakalampi iddhividhamatthaṃ paṭhamaṃ dassetvā pacchā upamaṃ dassento āha. ‘‘Seyyathāpi brāhmaṇapuriso sāratthiko sāragavesī’’tiādināva (ma. ni. 1.318) nayena sakalampi cūḷasāropamasuttaṃ upamāya atthaṃ parivāretvā dassento āha. ‘‘Idha pana, bhikkhave, ekacce kulaputtā dhammaṃ pariyāpuṇanti suttaṃ…pe… seyyathāpi, bhikkhave, puriso alagaddatthiko’’tiādinā (ma. ni. 1.238) nayena sakalampi alagaddasuttaṃ mahāsāropamasuttanti evamādīni suttāni atthena upamaṃ parivāretvā dassento āha.
свааяам̣ ид̇ха батамам̣ убамам̣ д̣̇ассзд̇ваа бажчаа ад̇т̇ам̣ д̣̇ассзд̇и. гасмаа банзвам̣ бхаг̇аваа д̣̇ассзд̇ийд̇и? буг̇г̇алаж̇жхаасаязна ваа д̣̇зсанаавилаасзна ваа. яз хи буг̇г̇алаа батамам̣ убамам̣ д̣̇ассзд̇ваа вужжамаанамад̇т̇ам̣ сукзна бадивиж̇жханд̇и, д̇зсам̣ батамам̣ убамам̣ д̣̇ассзд̇и. зса наяо саб̣б̣ад̇т̇а. яассаа жа д̇хаммад̇хаад̇уяаа суббадивид̣̇д̇хад̇д̇аа д̣̇зсанаавилаасам̣ бад̇д̇о ход̇и, д̇ассаа суббадивид̣̇д̇хаа. д̇асмаа зса д̣̇зсанаавилаасамбад̇д̇о д̇хаммиссаро д̇хаммарааж̇аа, со яат̇аа яат̇аа ижчад̇и, д̇ат̇аа д̇ат̇аа д̇хаммам̣ д̣̇зсзд̇ийд̇и звам̣ иминаа буг̇г̇алаж̇жхаасаязна ваа д̣̇зсанаавилаасзна ваа звам̣ д̣̇ассзд̇ийд̇и взд̣̇ид̇аб̣б̣о.
Svāyaṃ idha paṭhamaṃ upamaṃ dassetvā pacchā atthaṃ dasseti. Kasmā panevaṃ bhagavā dassetīti? Puggalajjhāsayena vā desanāvilāsena vā. Ye hi puggalā paṭhamaṃ upamaṃ dassetvā vuccamānamatthaṃ sukhena paṭivijjhanti, tesaṃ paṭhamaṃ upamaṃ dasseti. Esa nayo sabbattha. Yassā ca dhammadhātuyā suppaṭividdhattā desanāvilāsaṃ patto hoti, tassā suppaṭividdhā. Tasmā esa desanāvilāsampatto dhammissaro dhammarājā, so yathā yathā icchati, tathā tathā dhammaṃ desetīti evaṃ iminā puggalajjhāsayena vā desanāvilāsena vā evaṃ dassetīti veditabbo.
д̇ад̇т̇а вад̇т̇анд̇и багад̇ибарисуд̣̇д̇хам̣ вад̇т̇ам̣. сам̣гилидтам̣ малаг̇г̇ахид̇анд̇и ааг̇анд̇угзна бам̣сураж̇аад̣̇инаа сам̣гилзсзна сам̣гилидтам̣, сзд̣̇аж̇аллигаад̣̇инаа малзна г̇ахид̇ад̇д̇аа малаг̇г̇ахид̇ам̣. ран̇г̇аж̇аад̇зд̇и зд̇т̇а ран̇г̇амзва ран̇г̇аж̇аад̇ам̣. убасам̣харзяяаад̇и убанаамзяяа. яад̣̇и нийлагааяаад̇и нийлагааяа ваа, нийлагад̇т̇ааяа ваад̇и вуд̇д̇ам̣ ход̇и. звам̣ саб̣б̣ад̇т̇а. раж̇аго хи нийлагад̇т̇ааяа убасам̣харанд̇о гам̣санийлабалаасанийлаад̣̇игз нийларан̇г̇з убасам̣харад̇и. бийд̇агад̇т̇ааяа убасам̣харанд̇о ган̣игаарабубпасад̣̇исз бийд̇агаран̇г̇з. лохид̇агад̇т̇ааяа убасам̣харанд̇о б̣анд̇хуж̇ийвагабубпасад̣̇исз лохид̇агаран̇г̇з. ман̃ж̇идтагад̇т̇ааяа убасам̣харанд̇о ган̣авийрабубпасад̣̇исз манд̣̇арад̇д̇аран̇г̇з. д̇зна вуд̇д̇ам̣ ‘‘яад̣̇и нийлагааяа…бз… яад̣̇и ман̃ж̇идтагааяаа’’д̇и.
Tattha vatthanti pakatiparisuddhaṃ vatthaṃ. Saṃkiliṭṭhaṃ malaggahitanti āgantukena paṃsurajādinā saṃkilesena saṃkiliṭṭhaṃ, sedajallikādinā malena gahitattā malaggahitaṃ. Raṅgajāteti ettha raṅgameva raṅgajātaṃ. Upasaṃhareyyāti upanāmeyya. Yadi nīlakāyāti nīlakāya vā, nīlakatthāya vāti vuttaṃ hoti. Evaṃ sabbattha. Rajako hi nīlakatthāya upasaṃharanto kaṃsanīlapalāsanīlādike nīlaraṅge upasaṃharati. Pītakatthāya upasaṃharanto kaṇikārapupphasadise pītakaraṅge. Lohitakatthāya upasaṃharanto bandhujīvakapupphasadise lohitakaraṅge. Mañjiṭṭhakatthāya upasaṃharanto kaṇavīrapupphasadise mandarattaraṅge. Tena vuttaṃ ‘‘yadi nīlakāya…pe… yadi mañjiṭṭhakāyā’’ti.
д̣̇урад̇д̇аван̣н̣амзвассаад̇и д̣̇удту ран̃ж̇ид̇аван̣н̣амзва асса. абарисуд̣̇д̇хаван̣н̣амзвассаад̇и нийлаван̣н̣обисса барисуд̣̇д̇хо на бхавзяяа, сзсаван̣н̣оби. д̇аад̣̇исан̃хи вад̇т̇ам̣ нийлагумбхияаа багкид̇д̇амби сунийлам̣ на ход̇и, сзсагумбхийсу багкид̇д̇амби бийд̇агаад̣̇иван̣н̣ам̣ на ход̇и, милаад̇анийла гуран̣д̣а-ган̣игаара-б̣анд̇хуж̇ийвага-ган̣авийрабубпаван̣н̣амзва ход̇и. д̇ам̣ гисса хзд̇ууд̇и д̇ам̣ вад̇т̇ам̣ гисса хзд̇у гим̣ гааран̣аа ийд̣̇исам̣ ход̇и, д̇асмим̣ ваа вад̇т̇з ран̇г̇аж̇аад̇ам̣ гисса хзд̇у ийд̣̇исам̣ д̣̇урад̇д̇аван̣н̣ам̣ абарисуд̣̇д̇хаван̣н̣ам̣ ход̇ийд̇и? яасмаа банасса вад̇т̇асса сам̣гилидтабхаавоязвзд̇т̇а гааран̣ам̣, на ан̃н̃ам̣ гин̃жи, д̇асмаа ‘‘абарисуд̣̇д̇хад̇д̇аа, бхигкавз, вад̇т̇ассаа’’д̇и ааха.
Durattavaṇṇamevassāti duṭṭhu rañjitavaṇṇameva assa. Aparisuddhavaṇṇamevassāti nīlavaṇṇopissa parisuddho na bhaveyya, sesavaṇṇopi. Tādisañhi vatthaṃ nīlakumbhiyā pakkhittampi sunīlaṃ na hoti, sesakumbhīsu pakkhittampi pītakādivaṇṇaṃ na hoti, milātanīla kuraṇḍa-kaṇikāra-bandhujīvaka-kaṇavīrapupphavaṇṇameva hoti. Taṃ kissa hetūti taṃ vatthaṃ kissa hetu kiṃ kāraṇā īdisaṃ hoti, tasmiṃ vā vatthe raṅgajātaṃ kissa hetu īdisaṃ durattavaṇṇaṃ aparisuddhavaṇṇaṃ hotīti? Yasmā panassa vatthassa saṃkiliṭṭhabhāvoyevettha kāraṇaṃ, na aññaṃ kiñci, tasmā ‘‘aparisuddhattā, bhikkhave, vatthassā’’ti āha.
звамзва код̇и убамаасамбадибаад̣̇анам̣. жид̇д̇з сам̣гилидтзд̇и жид̇д̇амхи сам̣гилидтамхи. гасмаа бана бхаг̇аваа сам̣гилидтавад̇т̇зна обаммам̣ агаасийд̇и жз, вааяаамамахабпалад̣̇ассанад̇т̇ам̣. яат̇аа хи ааг̇анд̇угзхи малзхи сам̣гилидтам̣ вад̇т̇ам̣ багад̇ияаа бан̣д̣арад̇д̇аа буна д̇ховийяамаанам̣ бан̣д̣арам̣ ход̇и, на д̇ад̇т̇а ж̇аад̇игаал̣агз вияа зл̣агаломз вааяаамо нибпало ход̇и, звам̣ жид̇д̇амби ааг̇анд̇угзхи гилзсзхи сам̣гилидтам̣. багад̇ияаа бана д̇ам̣ сагалзби бадисанд̇хибхаван̇г̇аваарз бан̣д̣арамзва. яат̇ааха – ‘‘бабхассарамид̣̇ам̣, бхигкавз, жид̇д̇ам̣, д̇ан̃жа ко ааг̇анд̇угзхи убаггилзсзхи убаггилидта’’нд̇и (а. ни. 1.51). д̇ам̣ висод̇хийяамаанам̣ саггаа бабхассарад̇арам̣ гаад̇ум̣, на д̇ад̇т̇а вааяаамо нибпалод̇и звам̣ вааяаамамахабпалад̣̇ассанад̇т̇ам̣ сам̣гилидтавад̇т̇зна обаммам̣ агаасийд̇и взд̣̇ид̇аб̣б̣о.
Evameva khoti upamāsampaṭipādanaṃ. Citte saṃkiliṭṭheti cittamhi saṃkiliṭṭhamhi. Kasmā pana bhagavā saṃkiliṭṭhavatthena opammaṃ akāsīti ce, vāyāmamahapphaladassanatthaṃ. Yathā hi āgantukehi malehi saṃkiliṭṭhaṃ vatthaṃ pakatiyā paṇḍarattā puna dhovīyamānaṃ paṇḍaraṃ hoti, na tattha jātikāḷake viya eḷakalome vāyāmo nipphalo hoti, evaṃ cittampi āgantukehi kilesehi saṃkiliṭṭhaṃ. Pakatiyā pana taṃ sakalepi paṭisandhibhavaṅgavāre paṇḍarameva. Yathāha – ‘‘pabhassaramidaṃ, bhikkhave, cittaṃ, tañca kho āgantukehi upakkilesehi upakkiliṭṭha’’nti (a. ni. 1.51). Taṃ visodhīyamānaṃ sakkā pabhassarataraṃ kātuṃ, na tattha vāyāmo nipphaloti evaṃ vāyāmamahapphaladassanatthaṃ saṃkiliṭṭhavatthena opammaṃ akāsīti veditabbo.
д̣̇уг̇г̇ад̇и баадиган̇каад̇и ийд̣̇исз жид̇д̇з д̣̇уг̇г̇ад̇и баадиган̇кид̇аб̣б̣аа, д̣̇уг̇г̇ад̇им̣ зва зса баабун̣иссад̇и , наан̃н̃анд̇и звам̣ д̣̇уг̇г̇ад̇и ижчид̇аб̣б̣аа, авассам̣ бхаавийд̇и вуд̇д̇ам̣ ход̇и. саа жааяам̣ д̣̇уг̇г̇ад̇и наама бадибад̇д̇ид̣̇уг̇г̇ад̇и, г̇ад̇ид̣̇уг̇г̇ад̇ийд̇и д̣̇увид̇хаа ход̇и. бадибад̇д̇ид̣̇уг̇г̇ад̇иби аг̇аарияабадибад̇д̇ид̣̇уг̇г̇ад̇и, анаг̇аарияабадибад̇д̇ид̣̇уг̇г̇ад̇ийд̇и д̣̇увид̇хаа ход̇и.
Duggati pāṭikaṅkhāti īdise citte duggati pāṭikaṅkhitabbā, duggatiṃ eva esa pāpuṇissati , nāññanti evaṃ duggati icchitabbā, avassaṃ bhāvīti vuttaṃ hoti. Sā cāyaṃ duggati nāma paṭipattiduggati, gatiduggatīti duvidhā hoti. Paṭipattiduggatipi agāriyapaṭipattiduggati, anagāriyapaṭipattiduggatīti duvidhā hoti.
аг̇аарияо хи сам̣гилидтажид̇д̇о баан̣амби ханад̇и, ад̣̇иннамби аад̣̇ияад̇и, сагалзби д̣̇аса агусалагаммабат̇з буурзд̇и, аяамасса аг̇аарияабадибад̇д̇ид̣̇уг̇г̇ад̇и. со д̇ад̇т̇а тид̇о гааяасса бхзд̣̇аа нираяамби г̇ажчад̇и, д̇иражчаанаяонимби, бзд̇д̇ивисаяамби г̇ажчад̇и, аяамасса г̇ад̇ид̣̇уг̇г̇ад̇и.
Agāriyo hi saṃkiliṭṭhacitto pāṇampi hanati, adinnampi ādiyati, sakalepi dasa akusalakammapathe pūreti, ayamassa agāriyapaṭipattiduggati. So tattha ṭhito kāyassa bhedā nirayampi gacchati, tiracchānayonimpi, pettivisayampi gacchati, ayamassa gatiduggati.
анаг̇аарияоби имасмим̣ саасанз баб̣б̣аж̇ид̇о сам̣гилидтажид̇д̇о д̣̇ууд̇зяяабахин̣аг̇аманам̣ г̇ажчад̇и, взж̇ж̇агаммам̣ гарод̇и, сан̇гхабхзд̣̇ааяа жзд̇ияабхзд̣̇ааяа бараггамад̇и, взл̣уд̣̇аанаад̣̇ийхи ж̇ийвигам̣ габбзд̇и, сагаламби анаажаарам̣ аг̇ожаран̃жа барибуурзд̇и, аяамасса анаг̇аарияабадибад̇д̇ид̣̇уг̇г̇ад̇и.со д̇ад̇т̇а тид̇о гааяасса бхзд̣̇аа нираяамби г̇ажчад̇и, д̇иражчаанаяонимби, бзд̇д̇ивисаяамби г̇ажчад̇и саман̣аяагко наама ход̇и саман̣абзд̇о, аад̣̇ид̇д̇зхи сан̇гхаадиаад̣̇ийхи самбаж̇ж̇алид̇агааяо аддассарам̣ гаронд̇о вижарад̇и, аяамасса г̇ад̇ид̣̇уг̇г̇ад̇и.
Anagāriyopi imasmiṃ sāsane pabbajito saṃkiliṭṭhacitto dūteyyapahiṇagamanaṃ gacchati, vejjakammaṃ karoti, saṅghabhedāya cetiyabhedāya parakkamati, veḷudānādīhi jīvikaṃ kappeti, sakalampi anācāraṃ agocarañca paripūreti, ayamassa anagāriyapaṭipattiduggati.So tattha ṭhito kāyassa bhedā nirayampi gacchati, tiracchānayonimpi, pettivisayampi gacchati samaṇayakkho nāma hoti samaṇapeto, ādittehi saṅghāṭiādīhi sampajjalitakāyo aṭṭassaraṃ karonto vicarati, ayamassa gatiduggati.
сзяяат̇аабийд̇и суггабагкам̣ д̣̇ассзд̇умаарад̣̇д̇хо, д̇ассад̇т̇о ган̣хабагкз вуд̇д̇абажжанийгзнзва взд̣̇ид̇аб̣б̣о. зд̇т̇ааби жа суг̇ад̇и наама бадибад̇д̇исуг̇ад̇и г̇ад̇исуг̇ад̇ийд̇и д̣̇увид̇хаа ход̇и. бадибад̇д̇исуг̇ад̇иби аг̇аарияабадибад̇д̇исуг̇ад̇и анаг̇аарияабадибад̇д̇исуг̇ад̇ийд̇и д̣̇увид̇хаа ход̇и. аг̇аарияо хи барисуд̣̇д̇хажид̇д̇о баан̣аад̇ибаад̇ааби вирамад̇и, ад̣̇иннаад̣̇аанааби, сагалзби д̣̇аса гусалагаммабат̇з барибуурзд̇и, аяамасса аг̇аарияабадибад̇д̇исуг̇ад̇и. со д̇ад̇т̇а тид̇о гааяасса бхзд̣̇аа мануссамаханд̇ад̇амби д̣̇звамаханд̇ад̇амби убабаж̇ж̇ад̇и, аяамасса г̇ад̇исуг̇ад̇и.
Seyyathāpīti sukkapakkhaṃ dassetumāraddho, tassattho kaṇhapakkhe vuttapaccanīkeneva veditabbo. Etthāpi ca sugati nāma paṭipattisugati gatisugatīti duvidhā hoti. Paṭipattisugatipi agāriyapaṭipattisugati anagāriyapaṭipattisugatīti duvidhā hoti. Agāriyo hi parisuddhacitto pāṇātipātāpi viramati, adinnādānāpi, sakalepi dasa kusalakammapathe paripūreti, ayamassa agāriyapaṭipattisugati. So tattha ṭhito kāyassa bhedā manussamahantatampi devamahantatampi upapajjati, ayamassa gatisugati.
анаг̇аарияоби имасмим̣ саасанз баб̣б̣аж̇ид̇ваа барисуд̣̇д̇хажид̇д̇о жад̇убаарисуд̣̇д̇хисийлам̣ сод̇хзд̇и, д̇зраса д̇худ̇ан̇г̇аани самаад̣̇ияад̇и, адтад̇им̣саарамман̣зсу ад̇д̇ано анугуулагаммадтаанам̣ г̇ахзд̇ваа банд̇асзнаасанз бадисзвамаано гасин̣абаригаммам̣ гад̇ваа жхаанасамаабад̇д̇ияо ниб̣б̣ад̇д̇зд̇и, сод̇аабад̇д̇имаг̇г̇ам̣ бхаавзд̇и…бз… анааг̇аамимаг̇г̇ам̣ бхаавзд̇и, аяамасса анаг̇аарияабадибад̇д̇исуг̇ад̇и. со д̇ад̇т̇а тид̇о гааяасса бхзд̣̇аа мануссалогз ваа д̇ийсу махаагулзсу, часу ваа гаамааважарад̣̇звзсу, д̣̇асасу ваа б̣рахмабхаванзсу , бан̃жасу ваа суд̣̇д̇хааваасзсу, жад̇уусу ваа ааруббзсу убабаж̇ж̇ад̇и, аяамасса г̇ад̇исуг̇ад̇ийд̇и.
Anagāriyopi imasmiṃ sāsane pabbajitvā parisuddhacitto catupārisuddhisīlaṃ sodheti, terasa dhutaṅgāni samādiyati, aṭṭhatiṃsārammaṇesu attano anukūlakammaṭṭhānaṃ gahetvā pantasenāsane paṭisevamāno kasiṇaparikammaṃ katvā jhānasamāpattiyo nibbatteti, sotāpattimaggaṃ bhāveti…pe… anāgāmimaggaṃ bhāveti, ayamassa anagāriyapaṭipattisugati. So tattha ṭhito kāyassa bhedā manussaloke vā tīsu mahākulesu, chasu vā kāmāvacaradevesu, dasasu vā brahmabhavanesu , pañcasu vā suddhāvāsesu, catūsu vā āruppesu upapajjati, ayamassa gatisugatīti.
71. звам̣ сам̣гилидтз жид̇д̇з д̣̇уг̇г̇ад̇и баадиган̇каа, асам̣гилидтз жа суг̇ад̇ийд̇и вад̇ваа ид̣̇аани язхи убаггилзсзхи жид̇д̇ам̣ сам̣гилидтам̣ ход̇и, д̇з д̣̇ассзнд̇о гад̇амз жа, бхигкавз, жид̇д̇асса убаггилзсаа ? абхиж̇жхаа висамалобход̇иаад̣̇имааха.
71. Evaṃ saṃkiliṭṭhe citte duggati pāṭikaṅkhā, asaṃkiliṭṭhe ca sugatīti vatvā idāni yehi upakkilesehi cittaṃ saṃkiliṭṭhaṃ hoti, te dassento katame ca, bhikkhave, cittassa upakkilesā? Abhijjhā visamalobhotiādimāha.
д̇ад̇т̇а сагабхан̣д̣з чанд̣̇арааг̇о абхиж̇жхаа, барабхан̣д̣з висамалобхо. ат̇а ваа сагабхан̣д̣з ваа барабхан̣д̣з ваа ход̇у, яуд̇д̇абад̇д̇адтаанз чанд̣̇арааг̇о абхиж̇жхаа, аяуд̇д̇аабад̇д̇адтаанз висамалобхо. т̇зро банааха ‘‘гисса виниб̣бхог̇ам̣ гарот̇а, яуд̇д̇з ваа аяуд̇д̇з ваа ход̇у, ‘рааг̇о висамам̣ д̣̇осо висамам̣ мохо висама’нд̇и (вибха. 924) важанад̇о на гожи лобхо ависамо наама, д̇асмаа лобхоязва абхиж̇жхааяанадтзна абхиж̇жхаа, висамадтзна висамам̣, згад̇т̇амзд̇ам̣ б̣яан̃ж̇анамзва наана’’нд̇и. со банзса абхиж̇жхаависамалобхо уббаж̇ж̇ид̇ваа жид̇д̇ам̣ д̣̇уусзд̇и, обхаасид̇ум̣ на д̣̇зд̇и. д̇асмаа ‘‘жид̇д̇асса убаггилзсо’’д̇и вужжад̇и.
Tattha sakabhaṇḍe chandarāgo abhijjhā, parabhaṇḍe visamalobho. Atha vā sakabhaṇḍe vā parabhaṇḍe vā hotu, yuttapattaṭṭhāne chandarāgo abhijjhā, ayuttāpattaṭṭhāne visamalobho. Thero panāha ‘‘kissa vinibbhogaṃ karotha, yutte vā ayutte vā hotu, ‘rāgo visamaṃ doso visamaṃ moho visama’nti (vibha. 924) vacanato na koci lobho avisamo nāma, tasmā lobhoyeva abhijjhāyanaṭṭhena abhijjhā, visamaṭṭhena visamaṃ, ekatthametaṃ byañjanameva nāna’’nti. So panesa abhijjhāvisamalobho uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
яат̇аа жзса, звам̣ нававид̇хааагхаад̇авад̇т̇усамбхаво б̣яаабаад̣̇о. д̣̇асавид̇хааагхаад̇авад̇т̇усамбхаво год̇хо. бунаббунам̣ жид̇д̇абарияонанд̇хано убанаахо. аг̇аарияасса ваа анаг̇аарияасса ваа сугад̇агаран̣авинаасано магко. аг̇аарияоби хи гзнажи анугамбагзна д̣̇алид̣̇д̣̇о самаано ужжз таанз табид̇о, абарзна самаязна ‘‘гим̣ д̇аяаа маяхам̣ гад̇а’’нд̇и д̇асса сугад̇агаран̣ам̣ винаасзд̇и. анаг̇аарияоби сааман̣зрагаалад̇о бабхуд̇и аажариязна ваа убаж̇жхааязна ваа жад̇уухи бажжаязхи уд̣̇д̣̇зсабарибужчаахи жа ануг̇г̇ахзд̇ваа д̇хаммагат̇аанаяабагаран̣агосаллаад̣̇ийни сигкаабид̇о, абарзна самаязна рааж̇арааж̇амахаамад̇д̇аад̣̇ийхи саггад̇о г̇аругад̇о аажарияубаж̇жхааязсу ажид̇д̇ийгад̇о жарамаано ‘‘аяам̣ амхзхи д̣̇ахарагаалз звам̣ ануг̇г̇ахид̇о сам̣вад̣дхид̇о жа, ат̇а банид̣̇аани ниссинзхо ж̇аад̇о’’д̇и вужжамаано ‘‘гим̣ маяхам̣ д̇умхзхи гад̇а’’нд̇и д̇зсам̣ сугад̇агаран̣ам̣ винаасзд̇и, д̇асса со сугад̇агаран̣авинаасано магко уббаж̇ж̇ид̇ваа жид̇д̇ам̣ д̣̇уусзд̇и, обхаасид̇ум̣ на д̣̇зд̇и. д̇асмаа ‘‘жид̇д̇асса убаггилзсо’’д̇и вужжад̇и.
Yathā cesa, evaṃ navavidhaāghātavatthusambhavo byāpādo. Dasavidhaāghātavatthusambhavo kodho. Punappunaṃ cittapariyonandhano upanāho. Agāriyassa vā anagāriyassa vā sukatakaraṇavināsano makkho. Agāriyopi hi kenaci anukampakena daliddo samāno ucce ṭhāne ṭhapito, aparena samayena ‘‘kiṃ tayā mayhaṃ kata’’nti tassa sukatakaraṇaṃ vināseti. Anagāriyopi sāmaṇerakālato pabhuti ācariyena vā upajjhāyena vā catūhi paccayehi uddesaparipucchāhi ca anuggahetvā dhammakathānayapakaraṇakosallādīni sikkhāpito, aparena samayena rājarājamahāmattādīhi sakkato garukato ācariyupajjhāyesu acittīkato caramāno ‘‘ayaṃ amhehi daharakāle evaṃ anuggahito saṃvaḍḍhito ca, atha panidāni nissineho jāto’’ti vuccamāno ‘‘kiṃ mayhaṃ tumhehi kata’’nti tesaṃ sukatakaraṇaṃ vināseti, tassa so sukatakaraṇavināsano makkho uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
яат̇аа жааяам̣, звам̣ б̣ахуссуд̇зби буг̇г̇алз аж̇жход̇т̇арид̇ваа ‘‘ийд̣̇исасса жзва б̣ахуссуд̇асса анияад̇аа г̇ад̇и, д̇ава ваа мама ваа го висзсо’’д̇иаад̣̇инаа наязна уббаж̇ж̇амаано яуг̇аг̇г̇аахаг̇аахий бал̣аасо. барзсам̣ саггаараад̣̇ийни кийяанаа иссаа. ад̇д̇ано самбад̇д̇ияаа барзхи саад̇хааран̣абхаавам̣ асахамаанам̣ мажчарияам̣. ван̃жанигажарияабхууд̇аа мааяаа. гзраадигабхаавзна уббаж̇ж̇амаанам̣ саатзяяам̣. гзраадиго хи ааяад̇анамажчо вияа ход̇и. ааяад̇анамажчо наама гира мажчаанам̣ нан̇г̇удтам̣ д̣̇ассзд̇и саббаанам̣ сийсам̣ , ‘‘д̇умхзхи сад̣̇исо аха’’нд̇и ж̇аанаабзд̇ум̣. звамзва гзраадиго буг̇г̇ало яам̣ яам̣ суд̇д̇анд̇игам̣ ваа аабхид̇хаммигам̣ ваа убасан̇гамад̇и, д̇ам̣ д̇ам̣ звам̣ вад̣̇ад̇и ‘‘ахам̣ д̇умхаагам̣ б̣ад̣̇д̇хажаро, д̇умхз маяхам̣ анугамбагаа, наахам̣ д̇умхз мун̃жаамий’’д̇и ‘‘звамзд̇з ‘саг̇аараво аяам̣ амхзсу саббад̇иссо’д̇и ман̃н̃иссанд̇ий’’д̇и. д̇ассзд̇ам̣ гзраадигабхаавзна уббаж̇ж̇амаанам̣ саатзяяам̣ уббаж̇ж̇ид̇ваа жид̇д̇ам̣ д̣̇уусзд̇и, обхаасид̇ум̣ на д̣̇зд̇и. д̇асмаа ‘‘жид̇д̇асса убаггилзсо’’д̇и вужжад̇и.
Yathā cāyaṃ, evaṃ bahussutepi puggale ajjhottharitvā ‘‘īdisassa ceva bahussutassa aniyatā gati, tava vā mama vā ko viseso’’tiādinā nayena uppajjamāno yugaggāhagāhī paḷāso. Paresaṃ sakkārādīni khīyanā issā. Attano sampattiyā parehi sādhāraṇabhāvaṃ asahamānaṃ macchariyaṃ. Vañcanikacariyabhūtā māyā. Kerāṭikabhāvena uppajjamānaṃ sāṭheyyaṃ. Kerāṭiko hi āyatanamaccho viya hoti. Āyatanamaccho nāma kira macchānaṃ naṅguṭṭhaṃ dasseti sappānaṃ sīsaṃ , ‘‘tumhehi sadiso aha’’nti jānāpetuṃ. Evameva kerāṭiko puggalo yaṃ yaṃ suttantikaṃ vā ābhidhammikaṃ vā upasaṅkamati, taṃ taṃ evaṃ vadati ‘‘ahaṃ tumhākaṃ baddhacaro, tumhe mayhaṃ anukampakā, nāhaṃ tumhe muñcāmī’’ti ‘‘evamete ‘sagāravo ayaṃ amhesu sappatisso’ti maññissantī’’ti. Tassetaṃ kerāṭikabhāvena uppajjamānaṃ sāṭheyyaṃ uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
яат̇аа жзд̇ам̣, звам̣ ваад̇абхарид̇абхасд̇асад̣̇исат̇ад̣̇д̇хабхаавабаг̇г̇ахид̇асирааниваад̇авуд̇д̇игаарагаран̣о т̇амбхо. д̇ад̣̇уд̇д̇аригаран̣о саарамбхо. со д̣̇увид̇хзна лаб̣бхад̇и агусалавасзна жзва гусалавасзна жа. д̇ад̇т̇а аг̇аарияасса барзна гад̇ам̣ алан̇гаараад̣̇им̣ д̣̇исваа д̇ад̣̇д̣̇иг̇ун̣агаран̣зна уббаж̇ж̇амаано, анаг̇аарияасса жа яад̇д̇агам̣ яад̇д̇агам̣ баро барияаабун̣аад̇и ваа гат̇зд̇и ваа, маанавасзна д̇ад̣̇д̣̇иг̇ун̣ад̇ад̣̇д̣̇иг̇ун̣агаран̣зна уббаж̇ж̇амаано агусало. аг̇аарияасса бана барам̣ згам̣ салаагабхад̇д̇ам̣ д̣̇знд̇ам̣ д̣̇исваа ад̇д̇анаа д̣̇вз ваа д̇ийн̣и ваа д̣̇аад̇угаамад̇ааяа уббаж̇ж̇амаано, анаг̇аарияасса жа барзна зганигааяз г̇ахид̇з маанам̣ аниссааяа гзвалам̣ д̇ам̣ д̣̇исваа ад̇д̇анаа ааласияам̣ абхибхуяяа д̣̇вз нигааяз г̇ахзд̇угаамад̇ааяа уббаж̇ж̇амаано гусало. ид̇ха бана агусало ад̇хиббзд̇о. аяан̃хи уббаж̇ж̇ид̇ваа жид̇д̇ам̣ д̣̇уусзд̇и, обхаасид̇ум̣ на д̣̇зд̇и. д̇асмаа ‘‘жид̇д̇асса убаггилзсо’’д̇и вужжад̇и.
Yathā cetaṃ, evaṃ vātabharitabhastasadisathaddhabhāvapaggahitasiraanivātavuttikārakaraṇo thambho. Taduttarikaraṇo sārambho. So duvidhena labbhati akusalavasena ceva kusalavasena ca. Tattha agāriyassa parena kataṃ alaṅkārādiṃ disvā taddiguṇakaraṇena uppajjamāno, anagāriyassa ca yattakaṃ yattakaṃ paro pariyāpuṇāti vā katheti vā, mānavasena taddiguṇataddiguṇakaraṇena uppajjamāno akusalo. Agāriyassa pana paraṃ ekaṃ salākabhattaṃ dentaṃ disvā attanā dve vā tīṇi vā dātukāmatāya uppajjamāno, anagāriyassa ca parena ekanikāye gahite mānaṃ anissāya kevalaṃ taṃ disvā attanā ālasiyaṃ abhibhuyya dve nikāye gahetukāmatāya uppajjamāno kusalo. Idha pana akusalo adhippeto. Ayañhi uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
яат̇аа жааяам̣, звам̣ ж̇аад̇иаад̣̇ийни ниссааяа жид̇д̇асса ун̣н̣ад̇ивасзна бавад̇д̇амаано маано, ажжун̣н̣ад̇ивасзна ад̇имаано, мад̣̇аг̇г̇ахан̣аагааро мад̣̇о, гаамаг̇ун̣зсу жид̇д̇авоссаг̇г̇авасзна уббаж̇ж̇амаано бамаад̣̇о уббаж̇ж̇ид̇ваа жид̇д̇ам̣ д̣̇уусзд̇и, обхаасид̇ум̣ на д̣̇зд̇и. д̇асмаа ‘‘жид̇д̇асса убаггилзсо’’д̇и вужжад̇и.
Yathā cāyaṃ, evaṃ jātiādīni nissāya cittassa uṇṇativasena pavattamāno māno, accuṇṇativasena atimāno, madaggahaṇākāro mado, kāmaguṇesu cittavossaggavasena uppajjamāno pamādo uppajjitvā cittaṃ dūseti, obhāsituṃ na deti. Tasmā ‘‘cittassa upakkileso’’ti vuccati.
гасмаа бана бхаг̇аваа убаггилзсам̣ д̣̇ассзнд̇о лобхамаад̣̇им̣ гад̇ваа д̣̇ассзд̇ийд̇и? д̇асса батамуббад̇д̇ид̇о. саб̣б̣асад̇д̇аанан̃хи яад̇т̇а гад̇т̇ажи убабаннаанам̣ анд̇амасо суд̣̇д̇хааваасабхуумияамби саб̣б̣абатамам̣ бхаваниганд̇ивасзна лобхо уббаж̇ж̇ад̇и, д̇ад̇о ад̇д̇ано ад̇д̇ано ануруубабажжаяам̣ бадижжа яат̇аасамбхавам̣ ид̇арз, на жа зд̇з сол̣асзва жид̇д̇асса убаггилзсаа, зд̇зна бана наязна саб̣б̣зби гилзсаа г̇ахид̇ааязва хонд̇ийд̇и взд̣̇ид̇аб̣б̣аа.
Kasmā pana bhagavā upakkilesaṃ dassento lobhamādiṃ katvā dassetīti? Tassa paṭhamuppattito. Sabbasattānañhi yattha katthaci upapannānaṃ antamaso suddhāvāsabhūmiyampi sabbapaṭhamaṃ bhavanikantivasena lobho uppajjati, tato attano attano anurūpapaccayaṃ paṭicca yathāsambhavaṃ itare, na ca ete soḷaseva cittassa upakkilesā, etena pana nayena sabbepi kilesā gahitāyeva hontīti veditabbā.
72. зд̇д̇аавад̇аа сам̣гилзсам̣ д̣̇ассзд̇ваа ид̣̇аани вод̣̇аанам̣ д̣̇ассзнд̇о са ко со, бхигкавзд̇иаад̣̇имааха. д̇ад̇т̇а ид̇и вид̣̇ид̇ваад̇и звам̣ ж̇аанид̇ваа. баж̇ахад̇ийд̇и самужчзд̣̇аббахаанавасзна арияамаг̇г̇зна баж̇ахад̇и. д̇ад̇т̇а гилзсабадибаадияаа маг̇г̇абадибаадияаад̇и д̣̇вид̇хаа бахаанам̣ взд̣̇ид̇аб̣б̣ам̣. гилзсабадибаадияаа д̇аава абхиж̇жхаависамалобхо т̇амбхо саарамбхо маано ад̇имаано мад̣̇од̇и имз ча гилзсаа арахад̇д̇амаг̇г̇зна бахийяанд̇и. б̣яаабаад̣̇о год̇хо убанаахо бамаад̣̇од̇и имз жад̇д̇ааро гилзсаа анааг̇аамимаг̇г̇зна бахийяанд̇и. магко бал̣аасо иссаа мажчарияам̣ мааяаа саатзяяанд̇и имз ча сод̇аабад̇д̇имаг̇г̇зна бахийяанд̇ийд̇и. маг̇г̇абадибаадияаа бана, сод̇аабад̇д̇имаг̇г̇зна магко бал̣аасо иссаа мажчарияам̣ мааяаа саатзяяанд̇и имз ча бахийяанд̇и. анааг̇аамимаг̇г̇зна б̣яаабаад̣̇о год̇хо убанаахо бамаад̣̇од̇и имз жад̇д̇ааро. арахад̇д̇амаг̇г̇зна абхиж̇жхаависамалобхо т̇амбхо саарамбхо маано ад̇имаано мад̣̇од̇и имз ча бахийяанд̇ийд̇и.
72. Ettāvatā saṃkilesaṃ dassetvā idāni vodānaṃ dassento sa kho so, bhikkhavetiādimāha. Tattha iti viditvāti evaṃ jānitvā. Pajahatīti samucchedappahānavasena ariyamaggena pajahati. Tattha kilesapaṭipāṭiyā maggapaṭipāṭiyāti dvidhā pahānaṃ veditabbaṃ. Kilesapaṭipāṭiyā tāva abhijjhāvisamalobho thambho sārambho māno atimāno madoti ime cha kilesā arahattamaggena pahīyanti. Byāpādo kodho upanāho pamādoti ime cattāro kilesā anāgāmimaggena pahīyanti. Makkho paḷāso issā macchariyaṃ māyā sāṭheyyanti ime cha sotāpattimaggena pahīyantīti. Maggapaṭipāṭiyā pana, sotāpattimaggena makkho paḷāso issā macchariyaṃ māyā sāṭheyyanti ime cha pahīyanti. Anāgāmimaggena byāpādo kodho upanāho pamādoti ime cattāro. Arahattamaggena abhijjhāvisamalobho thambho sārambho māno atimāno madoti ime cha pahīyantīti.
имасмим̣ бана таанз имз гилзсаа сод̇аабад̇д̇имаг̇г̇аваж̇жхаа ваа хонд̇у, сзсамаг̇г̇аваж̇жхаа ваа, ат̇а ко анааг̇аамимаг̇г̇знзва бахаанам̣ санд̇хааяа ‘‘абхиж̇жхаависамалобхам̣ жид̇д̇асса убаггилзсам̣ баж̇ахад̇ий’’д̇иаад̣̇имаахаад̇и взд̣̇ид̇аб̣б̣аа. аяамзд̇т̇а бавзн̣имаг̇г̇ааг̇ад̇о самбхаво, со жа убари жад̇уд̇т̇амаг̇г̇ассзва нид̣̇д̣̇идтад̇д̇аа яуж̇ж̇ад̇и, д̇ад̇ияамаг̇г̇зна бахийнаавасзсаанан̃хи висамалобхаад̣̇ийнам̣ д̇зна бахаанам̣ ход̇и, сзсаанам̣ иминаава. язби хи сод̇аабад̇д̇имаг̇г̇зна бахийяанд̇и, д̇зби д̇ам̣самудтаабагажид̇д̇аанам̣ аббахийнад̇д̇аа анааг̇аамимаг̇г̇знзва суббахийнаа хонд̇ийд̇и. гзжи бана батамамаг̇г̇зна жзд̇т̇а бахаанам̣ ван̣н̣аяанд̇и, д̇ам̣ буб̣б̣аабарзна на санд̇хияад̇и. гзжи вигкамбханаббахаанамби, д̇ам̣ д̇зсам̣ ижчаамад̇д̇амзва.
Imasmiṃ pana ṭhāne ime kilesā sotāpattimaggavajjhā vā hontu, sesamaggavajjhā vā, atha kho anāgāmimaggeneva pahānaṃ sandhāya ‘‘abhijjhāvisamalobhaṃ cittassa upakkilesaṃ pajahatī’’tiādimāhāti veditabbā. Ayamettha paveṇimaggāgato sambhavo, so ca upari catutthamaggasseva niddiṭṭhattā yujjati, tatiyamaggena pahīnāvasesānañhi visamalobhādīnaṃ tena pahānaṃ hoti, sesānaṃ imināva. Yepi hi sotāpattimaggena pahīyanti, tepi taṃsamuṭṭhāpakacittānaṃ appahīnattā anāgāmimaggeneva suppahīnā hontīti. Keci pana paṭhamamaggena cettha pahānaṃ vaṇṇayanti, taṃ pubbāparena na sandhiyati. Keci vikkhambhanappahānampi, taṃ tesaṃ icchāmattameva.
73. яад̇о ко, бхигкавзд̇и зд̇т̇а яад̇од̇и яамхи гаалз. бахийно ход̇ийд̇и анааг̇аамимаг̇г̇агкан̣з бахаанам̣ санд̇хааязвааха.
73.Yatokho, bhikkhaveti ettha yatoti yamhi kāle. Pahīno hotīti anāgāmimaggakkhaṇe pahānaṃ sandhāyevāha.
74. со б̣уд̣̇д̇хз авзжжаббасаад̣̇знаад̇и зд̇ам̣ ‘‘яад̇о ко, бхигкавз, абхиж̇жхаависамалобхо бахийно ход̇и, со б̣уд̣̇д̇хз авзжжаббасаад̣̇зна саманнааг̇ад̇о ход̇ий’’д̇и звам̣ згамзгзна бад̣̇зна яож̇зд̇аб̣б̣ам̣. имасса хи бхигкуно анааг̇аамимаг̇г̇зна логуд̇д̇араббасаад̣̇о ааг̇ад̇о, ат̇асса абарзна самаязна б̣уд̣̇д̇хаг̇ун̣з д̇хаммаг̇ун̣з сан̇гхаг̇ун̣з жа ануссарад̇о логияо уббаж̇ж̇ад̇и, д̇амасса саб̣б̣амби логияалогуд̇д̇арамиссагам̣ басаад̣̇ам̣ д̣̇ассзнд̇о бхаг̇аваа ‘‘б̣уд̣̇д̇хз авзжжаббасаад̣̇знаа’’д̇иаад̣̇имааха.
74.So buddhe aveccappasādenāti etaṃ ‘‘yato kho, bhikkhave, abhijjhāvisamalobho pahīno hoti, so buddhe aveccappasādena samannāgato hotī’’ti evaṃ ekamekena padena yojetabbaṃ. Imassa hi bhikkhuno anāgāmimaggena lokuttarappasādo āgato, athassa aparena samayena buddhaguṇe dhammaguṇe saṅghaguṇe ca anussarato lokiyo uppajjati, tamassa sabbampi lokiyalokuttaramissakaṃ pasādaṃ dassento bhagavā ‘‘buddhe aveccappasādenā’’tiādimāha.
д̇ад̇т̇а авзжжаббасаад̣̇знаад̇и б̣уд̣̇д̇хад̇хаммасан̇гхаг̇ун̣аанам̣ яаат̇аавад̇о н̃аад̇ад̇д̇аа ажалзна ажжуд̇зна басаад̣̇зна. ид̣̇аани яат̇аа д̇асса бхигкуно ануссарад̇о со авзжжаббасаад̣̇о уббанно, д̇ам̣ вид̇хим̣ д̣̇ассзнд̇о ‘‘ид̇иби со бхаг̇аваа’’д̇иаад̣̇инаа наязна д̇ийн̣и ануссад̇идтаанаани вид̇т̇аарзси. д̇зсам̣ ад̇т̇аван̣н̣анаа саб̣б̣аагаарзна висуд̣̇д̇химаг̇г̇з ануссад̇игат̇ааяам̣ вуд̇д̇аа.
Tattha aveccappasādenāti buddhadhammasaṅghaguṇānaṃ yāthāvato ñātattā acalena accutena pasādena. Idāni yathā tassa bhikkhuno anussarato so aveccappasādo uppanno, taṃ vidhiṃ dassento ‘‘itipi so bhagavā’’tiādinā nayena tīṇi anussatiṭṭhānāni vitthāresi. Tesaṃ atthavaṇṇanā sabbākārena visuddhimagge anussatikathāyaṃ vuttā.
75. звамасса логияалогуд̇д̇арамиссагам̣ басаад̣̇ам̣ д̣̇ассзд̇ваа ид̣̇аани гилзсаббахаанам̣ авзжжаббасаад̣̇асаманнааг̇ад̇ан̃жа бажжавзгкад̇о уббаж̇ж̇амаанам̣ соманассаад̣̇иаанисам̣сам̣ д̣̇ассзнд̇о яат̇од̇хи ко банассаад̇иаад̣̇имааха. анааг̇аамисса хи бажжанд̇з вудтид̇ам̣ жорубад̣̇д̣̇авам̣ вуубасамзд̇ваа д̇ам̣ бажжавзгкад̇о махаанаг̇арз васанд̇асса ран̃н̃о вияа имз жимз жа мама гилзсаа бахийнаад̇и ад̇д̇ано гилзсаббахаанам̣ бажжавзгкад̇о б̣алавасоманассам̣ уббаж̇ж̇ад̇и. д̇ам̣ д̣̇ассзнд̇о бхаг̇аваа ‘‘яат̇од̇хи ко банассаа’’д̇иаад̣̇имааха.
75. Evamassa lokiyalokuttaramissakaṃ pasādaṃ dassetvā idāni kilesappahānaṃ aveccappasādasamannāgatañca paccavekkhato uppajjamānaṃ somanassādiānisaṃsaṃ dassento yathodhi kho panassātiādimāha. Anāgāmissa hi paccante vuṭṭhitaṃ corupaddavaṃ vūpasametvā taṃ paccavekkhato mahānagare vasantassa rañño viya ime cime ca mama kilesā pahīnāti attano kilesappahānaṃ paccavekkhato balavasomanassaṃ uppajjati. Taṃ dassento bhagavā ‘‘yathodhi kho panassā’’tiādimāha.
д̇ассад̇т̇о – явааяам̣ анааг̇аамий бхигку звам̣ ‘‘б̣уд̣̇д̇хз авзжжаббасаад̣̇зна саманнааг̇ад̇о ход̇и…бз… д̇хаммз…бз… сан̇гхз…бз… ануд̇д̇арам̣ бун̃н̃агкзд̇д̇ам̣ логассаа’’д̇и, д̇асса яат̇од̇хи ко жад̇д̇ам̣ ход̇и бадиниссадтам̣, сагасагаод̇хивасзна жад̇д̇амзва ход̇и, д̇ам̣ д̇ам̣ гилзсаж̇аад̇ам̣ ванд̇ам̣ муд̇д̇ам̣ бахийнам̣ бадиниссадтам̣. сагасагаод̇хивасзнаад̇и д̣̇вз од̇хий гилзсод̇хи жа маг̇г̇од̇хи жа. д̇ад̇т̇а гилзсод̇хивасзнааби яз гилзсаа яам̣ маг̇г̇аваж̇жхаа, д̇з ан̃н̃амаг̇г̇аваж̇жхзхи амиссаа худ̇ваа сагзнзва од̇хинаа бахийнаа. маг̇г̇од̇хивасзнааби яз гилзсаа язна маг̇г̇зна бахаад̇аб̣б̣аа, д̇зна д̇зязва бахийнаа хонд̇и. звам̣ сагасагаод̇хивасзна д̇ам̣ д̇ам̣ гилзсаж̇аад̇ам̣ жад̇д̇амзва ход̇и бадиниссадтам̣, д̇ам̣ бажжавзгкид̇ваа жа лад̣̇д̇хасоманассо д̇ад̇уд̇д̇ариби со ‘‘б̣уд̣̇д̇хз авзжжаббасаад̣̇зна саманнааг̇ад̇омхий’’д̇и лабхад̇и ад̇т̇авзд̣̇анд̇и самб̣анд̇хо.
Tassattho – yvāyaṃ anāgāmī bhikkhu evaṃ ‘‘buddhe aveccappasādena samannāgato hoti…pe… dhamme…pe… saṅghe…pe… anuttaraṃ puññakkhettaṃ lokassā’’ti, tassa yathodhi kho cattaṃ hoti paṭinissaṭṭhaṃ, sakasakaodhivasena cattameva hoti, taṃ taṃ kilesajātaṃ vantaṃ muttaṃ pahīnaṃ paṭinissaṭṭhaṃ. Sakasakaodhivasenāti dve odhī kilesodhi ca maggodhi ca. Tattha kilesodhivasenāpi ye kilesā yaṃ maggavajjhā, te aññamaggavajjhehi amissā hutvā sakeneva odhinā pahīnā. Maggodhivasenāpi ye kilesā yena maggena pahātabbā, tena teyeva pahīnā honti. Evaṃ sakasakaodhivasena taṃ taṃ kilesajātaṃ cattameva hoti paṭinissaṭṭhaṃ, taṃ paccavekkhitvā ca laddhasomanasso tatuttaripi so ‘‘buddhe aveccappasādena samannāgatomhī’’ti labhati atthavedanti sambandho.
яад̇од̇хи код̇иби баато. д̇асса васзна аяамад̇т̇о, асса бхигкуно яад̇од̇хи ко бана жад̇д̇ам̣ ход̇и бадиниссадтам̣. д̇ад̇т̇а яад̇од̇и гааран̣аважанам̣, яасмаад̇и вуд̇д̇ам̣ ход̇и. од̇хийд̇и хздтаа д̇аяо маг̇г̇аа вужжанд̇и. гасмаа? д̇з хи од̇хим̣ гад̇ваа годтаасам̣ гад̇ваа убаримаг̇г̇зна бахаад̇аб̣б̣агилзсз табзд̇ваа баж̇аханд̇и, д̇асмаа од̇хийд̇и вужжанд̇и. арахад̇д̇амаг̇г̇о бана гин̃жи гилзсам̣ анавасзсзд̇ваа баж̇ахад̇и, д̇асмаа анод̇хийд̇и вужжад̇и. имасса жа бхигкуно хздтаамаг̇г̇ад̇д̇аязна жад̇д̇ам̣. д̇зна вуд̇д̇ам̣ ‘‘яад̇од̇хи ко банасса жад̇д̇ам̣ ход̇ий’’д̇и. д̇ад̇т̇а ко банаад̇и нибаад̇амад̇д̇ам̣. аяам̣ бана бин̣д̣ад̇т̇о. яасмаа асса од̇хи жад̇д̇ам̣ ход̇и бадиниссадтам̣, д̇асмаа д̇ам̣ бажжавзгкид̇ваа жа лад̣̇д̇хасоманассо д̇ад̇уд̇д̇ариби со ‘‘б̣уд̣̇д̇хз авзжжаббасаад̣̇зна саманнааг̇ад̇омхий’’д̇и лабхад̇и ад̇т̇авзд̣̇анд̇и яат̇аабаал̣и нзд̇аб̣б̣ам̣.
Yatodhi khotipi pāṭho. Tassa vasena ayamattho, assa bhikkhuno yatodhi kho pana cattaṃ hoti paṭinissaṭṭhaṃ. Tattha yatoti kāraṇavacanaṃ, yasmāti vuttaṃ hoti. Odhīti heṭṭhā tayo maggā vuccanti. Kasmā? Te hi odhiṃ katvā koṭṭhāsaṃ katvā uparimaggena pahātabbakilese ṭhapetvā pajahanti, tasmā odhīti vuccanti. Arahattamaggo pana kiñci kilesaṃ anavasesetvā pajahati, tasmā anodhīti vuccati. Imassa ca bhikkhuno heṭṭhāmaggattayena cattaṃ. Tena vuttaṃ ‘‘yatodhi kho panassa cattaṃ hotī’’ti. Tattha kho panāti nipātamattaṃ. Ayaṃ pana piṇḍattho. Yasmā assa odhi cattaṃ hoti paṭinissaṭṭhaṃ, tasmā taṃ paccavekkhitvā ca laddhasomanasso tatuttaripi so ‘‘buddhe aveccappasādena samannāgatomhī’’ti labhati atthavedanti yathāpāḷi netabbaṃ.
д̇ад̇т̇а жад̇д̇анд̇и ид̣̇ам̣ сагабхаавабарижжаж̇анавасзна вуд̇д̇ам̣. ванд̇анд̇и ид̣̇ам̣ бана анаад̣̇ияанабхаавад̣̇ассанавасзна. муд̇д̇анд̇и ид̣̇ам̣ санд̇ад̇ид̇о виниможанавасзна. бахийнанд̇и ид̣̇ам̣ муд̇д̇ассаби гважи анавадтаанад̣̇ассанавасзна. бадиниссадтанд̇и ид̣̇ам̣ буб̣б̣з аад̣̇иннабуб̣б̣асса бадиниссаг̇г̇ад̣̇ассанавасзна бадимукам̣ ваа ниссадтабхаавад̣̇ассанавасзна бхааванааб̣алзна абхибхуяяа ниссадтабхаавад̣̇ассанавасзнаад̇и вуд̇д̇ам̣ ход̇и. лабхад̇и ад̇т̇авзд̣̇ам̣ лабхад̇и д̇хаммавзд̣̇анд̇и зд̇т̇а б̣уд̣̇д̇хаад̣̇ийсу авзжжаббасаад̣̇оязва аран̣ийяад̇о ад̇т̇о, убаг̇анд̇аб̣б̣ад̇од̇и вуд̇д̇ам̣ ход̇и. д̇хааран̣ад̇о д̇хаммо, винибад̇ид̇ум̣ аббад̣̇аанад̇од̇и вуд̇д̇ам̣ ход̇и. взд̣̇од̇и г̇ант̇оби н̃аан̣амби соманассамби. ‘‘д̇ин̣н̣ам̣ взд̣̇аанам̣ баараг̇уу’’д̇иаад̣̇ийсу (д̣̇ий. ни. 1.256) хи г̇ант̇о ‘‘взд̣̇о’’д̇и вужжад̇и. ‘‘яам̣ б̣раахман̣ам̣ взд̣̇аг̇умаабхиж̇ан̃н̃аа, агин̃жанам̣ гаамабхаавз асад̇д̇а’’нд̇иаад̣̇ийсу (су. ни. 1065) н̃аан̣ам̣. ‘‘яз взд̣̇аж̇аад̇аа вижаранд̇и логз’’д̇иаад̣̇ийсу соманассам̣. ид̇ха бана соманассан̃жа соманассасамбаяуд̇д̇ан̃аан̣ан̃жа ад̇хиббзд̇ам̣, д̇асмаа ‘‘лабхад̇и ад̇т̇авзд̣̇ам̣ лабхад̇и д̇хаммавзд̣̇анд̇и авзжжаббасаад̣̇аарамман̣асоманассан̃жа соманассамаяан̃аан̣ан̃жа лабхад̇ий’’д̇и звамзд̇т̇а ад̇т̇о взд̣̇ид̇аб̣б̣о.
Tattha cattanti idaṃ sakabhāvapariccajanavasena vuttaṃ. Vantanti idaṃ pana anādiyanabhāvadassanavasena. Muttanti idaṃ santatito vinimocanavasena. Pahīnanti idaṃ muttassapi kvaci anavaṭṭhānadassanavasena. Paṭinissaṭṭhanti idaṃ pubbe ādinnapubbassa paṭinissaggadassanavasena paṭimukhaṃ vā nissaṭṭhabhāvadassanavasena bhāvanābalena abhibhuyya nissaṭṭhabhāvadassanavasenāti vuttaṃ hoti. Labhati atthavedaṃ labhati dhammavedanti ettha buddhādīsu aveccappasādoyeva araṇīyato attho, upagantabbatoti vuttaṃ hoti. Dhāraṇato dhammo, vinipatituṃ appadānatoti vuttaṃ hoti. Vedoti ganthopi ñāṇampi somanassampi. ‘‘Tiṇṇaṃ vedānaṃ pāragū’’tiādīsu (dī. ni. 1.256) hi gantho ‘‘vedo’’ti vuccati. ‘‘Yaṃ brāhmaṇaṃ vedagumābhijaññā, akiñcanaṃ kāmabhāve asatta’’ntiādīsu (su. ni. 1065) ñāṇaṃ. ‘‘Ye vedajātā vicaranti loke’’tiādīsu somanassaṃ. Idha pana somanassañca somanassasampayuttañāṇañca adhippetaṃ, tasmā ‘‘labhati atthavedaṃ labhati dhammavedanti aveccappasādārammaṇasomanassañca somanassamayañāṇañca labhatī’’ti evamettha attho veditabbo.
ат̇а ваа ад̇т̇авзд̣̇анд̇и авзжжаббасаад̣̇ам̣ бажжавзгкад̇о уббаннам̣ вуд̇д̇аббагаарамзва взд̣̇ам̣. д̇хаммавзд̣̇анд̇и авзжжаббасаад̣̇асса хзд̇ум̣ од̇хисо гилзсаббахаанам̣ бажжавзгкад̇о уббаннам̣ вуд̇д̇аббагаарамзва взд̣̇анд̇и звамби зд̇т̇а ад̇т̇о взд̣̇ид̇аб̣б̣о. вуд̇д̇ан̃хзд̇ам̣ ‘‘хзд̇умхи н̃аан̣ам̣ д̇хаммабадисамбхид̣̇аа, хзд̇упалз н̃аан̣ам̣ ад̇т̇абадисамбхид̣̇аа’’д̇и (вибха. 718-719). д̇хаммуубасам̣хид̇ам̣ баамож̇ж̇анд̇и д̇амзва ад̇т̇ан̃жа д̇хамман̃жа ад̇т̇ад̇хаммаанисам̣сабхууд̇ам̣ взд̣̇ан̃жа бажжавзгкад̇о уббаннам̣ баамож̇ж̇ам̣. д̇ан̃хи анаваж̇ж̇алагкан̣зна бажжавзгкан̣аагаараббавад̇д̇зна д̇хаммзна убасан̃хид̇анд̇и вужжад̇и. бамуд̣̇ид̇асса бийд̇и ж̇ааяад̇ийд̇и иминаа баамож̇ж̇зна бамуд̣̇ид̇асса нираамисаа бийд̇и ж̇ааяад̇и. бийд̇иманассаад̇и д̇ааяа бийд̇ияаа бийн̣ид̇аманасса. гааяо бассамбхад̇ийд̇и гааяоби бассад̣̇д̇хо ход̇и вуубасанд̇ад̣̇арат̇о. бассад̣̇д̇хагааяо суканд̇и звам̣ вуубасанд̇агааяад̣̇арат̇о жзд̇асигам̣ сукам̣ бадисам̣взд̣̇зд̇и. жид̇д̇ам̣ самаад̇хияад̇ийд̇и жид̇д̇ам̣ саммаа аад̇хияад̇и аббид̇ам̣ вияа ажалам̣ д̇идтад̇и.
Atha vā atthavedanti aveccappasādaṃ paccavekkhato uppannaṃ vuttappakārameva vedaṃ. Dhammavedanti aveccappasādassa hetuṃ odhiso kilesappahānaṃ paccavekkhato uppannaṃ vuttappakārameva vedanti evampi ettha attho veditabbo. Vuttañhetaṃ ‘‘hetumhi ñāṇaṃ dhammapaṭisambhidā, hetuphale ñāṇaṃ atthapaṭisambhidā’’ti (vibha. 718-719). Dhammūpasaṃhitaṃ pāmojjanti tameva atthañca dhammañca atthadhammānisaṃsabhūtaṃ vedañca paccavekkhato uppannaṃ pāmojjaṃ. Tañhi anavajjalakkhaṇena paccavekkhaṇākārappavattena dhammena upasañhitanti vuccati. Pamuditassa pīti jāyatīti iminā pāmojjena pamuditassa nirāmisā pīti jāyati. Pītimanassāti tāya pītiyā pīṇitamanassa. Kāyo passambhatīti kāyopi passaddho hoti vūpasantadaratho. Passaddhakāyo sukhanti evaṃ vūpasantakāyadaratho cetasikaṃ sukhaṃ paṭisaṃvedeti. Cittaṃ samādhiyatīti cittaṃ sammā ādhiyati appitaṃ viya acalaṃ tiṭṭhati.
76. звамасса гилзсаббахаанам̣ авзжжаббасаад̣̇асаманнааг̇ад̇ам̣ бажжавзгкад̇о уббаж̇ж̇амаанам̣ соманассаад̣̇иаанисам̣сам̣ д̣̇ассзд̇ваа ид̣̇аани ‘‘яат̇од̇хи ко бана мз’’д̇и ваарзна д̇асса бажжавзгкан̣ааяа бавад̇д̇аагаарам̣ багаасзд̇ваа д̇ассзва анааг̇аамимаг̇г̇аанубхаавасуужагам̣ палам̣ д̣̇ассзнд̇о са ко со, бхигкавзд̇иаад̣̇имааха.
76. Evamassa kilesappahānaṃ aveccappasādasamannāgataṃ paccavekkhato uppajjamānaṃ somanassādiānisaṃsaṃ dassetvā idāni ‘‘yathodhi kho pana me’’ti vārena tassa paccavekkhaṇāya pavattākāraṃ pakāsetvā tasseva anāgāmimaggānubhāvasūcakaṃ phalaṃ dassento sa kho so, bhikkhavetiādimāha.
д̇ад̇т̇а звам̣сийлод̇и д̇асса анааг̇аамимаг̇г̇асамбаяуд̇д̇ам̣ сийлагканд̇хам̣ д̣̇ассзд̇и. звам̣д̇хаммо звам̣бан̃н̃од̇и д̇ам̣самбаяуд̇д̇амзва самаад̇хигканд̇хам̣ бан̃н̃аагканд̇хан̃жа д̣̇ассзд̇и. саалийнанд̇и лохид̇асаалиг̇анд̇хасаалиаад̣̇ийнам̣ анзгаруубаанам̣. бин̣д̣абаад̇анд̇и од̣̇анам̣. вижид̇агаал̣аганд̇и абанийд̇агаал̣агам̣. нзвасса д̇ам̣ ход̇и анд̇арааяааяаад̇и д̇асса звам̣вид̇хасса бхигкуно д̇ам̣ вуд̇д̇аббагаарабин̣д̣абаад̇абхож̇анам̣ маг̇г̇асса ваа паласса ваа нзва анд̇арааяааяа ход̇и, бадилад̣̇д̇хаг̇ун̣асса хи д̇ам̣ гиманд̇арааяам̣ гариссад̇и? яобисса аббадилад̣̇д̇хо жад̇уд̇т̇амаг̇г̇о жа палам̣ жа д̇аббадилаабхааяа вибассанам̣ аарабхад̇оби нзвасса д̇ам̣ ход̇и анд̇арааяааяа, анд̇арааяам̣ гаад̇ум̣ асамад̇т̇амзва ход̇и. гасмаа? вуд̇д̇аббагаарасийлад̇хаммабан̃н̃аасан̇г̇ахзна маг̇г̇зна висуд̣̇д̇хажид̇д̇ад̇д̇аа.
Tattha evaṃsīloti tassa anāgāmimaggasampayuttaṃ sīlakkhandhaṃ dasseti. Evaṃdhammo evaṃpaññoti taṃsampayuttameva samādhikkhandhaṃ paññākkhandhañca dasseti. Sālīnanti lohitasāligandhasāliādīnaṃ anekarūpānaṃ. Piṇḍapātanti odanaṃ. Vicitakāḷakanti apanītakāḷakaṃ. Nevassa taṃ hoti antarāyāyāti tassa evaṃvidhassa bhikkhuno taṃ vuttappakārapiṇḍapātabhojanaṃ maggassa vā phalassa vā neva antarāyāya hoti, paṭiladdhaguṇassa hi taṃ kimantarāyaṃ karissati? Yopissa appaṭiladdho catutthamaggo ca phalaṃ ca tappaṭilābhāya vipassanaṃ ārabhatopi nevassa taṃ hoti antarāyāya, antarāyaṃ kātuṃ asamatthameva hoti. Kasmā? Vuttappakārasīladhammapaññāsaṅgahena maggena visuddhacittattā.
яасмаа жзд̇т̇а зд̇ад̣̇зва гааран̣ам̣, д̇асмаа д̇ад̣̇ануруубам̣ убамам̣ д̣̇ассзнд̇о сзяяат̇аабийд̇иаад̣̇имааха.
Yasmā cettha etadeva kāraṇaṃ, tasmā tadanurūpaṃ upamaṃ dassento seyyathāpītiādimāha.
д̇ад̇т̇а ажчанд̇и виббасаннам̣. барисуд̣̇д̇хам̣ малавиг̇амзна. барияод̣̇аад̇ам̣ бабхассарад̇ааяа. уггаамуканд̇и суван̣н̣агаараанам̣ муусаамукам̣. суван̣н̣агаараанам̣ муусаа хи ид̇ха уггаа, ан̃н̃ад̇т̇а бана д̣̇ийбигаад̣̇аяоби вужжанд̇и. ‘‘уггаасу д̇хаарийяамаанаасуу’’д̇и (д̣̇ий. ни. 1.159) хи ааг̇ад̇адтаанз д̣̇ийбигаа ‘‘уггаа’’д̇и вужжад̇и. ‘‘уггам̣ б̣анд̇хзяяа, уггам̣ б̣анд̇хид̇ваа уггаамукам̣ аалимбзяяаа’’д̇и (ма. ни. 3.360) ааг̇ад̇адтаанз ан̇г̇аарагабаллам̣. ‘‘гаммаараанам̣ яат̇аа уггаа, анд̇о жхааяад̇и но б̣ахий’’д̇и (ж̇аа. 2.22.649) ааг̇ад̇адтаанз гаммааруд̣̇д̇ханам̣. ‘‘звам̣вибааго уггаабаад̇о бхависсад̇ий’’д̇и (д̣̇ий. ни. 1.24) ааг̇ад̇адтаанз ваад̇авзг̇о ‘‘уггаа’’д̇и вужжад̇и. имасмим̣ бана таанз ан̃н̃зсу жа зваруубзсу ‘‘сан̣д̣аасзна ж̇аад̇аруубам̣ г̇ахзд̇ваа уггаамукз багкибад̇ий’’д̇и ааг̇ад̇адтаанзсу суван̣н̣агаараанам̣ муусаа ‘‘уггаа’’д̇и взд̣̇ид̇аб̣б̣аа.
Tattha acchanti vippasannaṃ. Parisuddhaṃ malavigamena. Pariyodātaṃ pabhassaratāya. Ukkāmukhanti suvaṇṇakārānaṃ mūsāmukhaṃ. Suvaṇṇakārānaṃ mūsā hi idha ukkā, aññattha pana dīpikādayopi vuccanti. ‘‘Ukkāsu dhārīyamānāsū’’ti (dī. ni. 1.159) hi āgataṭṭhāne dīpikā ‘‘ukkā’’ti vuccati. ‘‘Ukkaṃ bandheyya, ukkaṃ bandhitvā ukkāmukhaṃ ālimpeyyā’’ti (ma. ni. 3.360) āgataṭṭhāne aṅgārakapallaṃ. ‘‘Kammārānaṃ yathā ukkā, anto jhāyati no bahī’’ti (jā. 2.22.649) āgataṭṭhāne kammāruddhanaṃ. ‘‘Evaṃvipāko ukkāpāto bhavissatī’’ti (dī. ni. 1.24) āgataṭṭhāne vātavego ‘‘ukkā’’ti vuccati. Imasmiṃ pana ṭhāne aññesu ca evarūpesu ‘‘saṇḍāsena jātarūpaṃ gahetvā ukkāmukhe pakkhipatī’’ti āgataṭṭhānesu suvaṇṇakārānaṃ mūsā ‘‘ukkā’’ti veditabbā.
д̇ад̇рааяам̣ убамаасам̣санд̣̇анаа – сам̣гилидтавад̇т̇ам̣ вияа хи сам̣гилидтаж̇аад̇аруубам̣ вияа жа имасса бхигкуно бут̇уж̇ж̇анагаалз гаамарааг̇аад̣̇ималаануг̇ад̇ам̣ жид̇д̇ам̣ д̣̇адтаб̣б̣ам̣. ажчод̣̇агам̣ вияа уггаамукам̣ вияа жа анааг̇аамимаг̇г̇о. д̇ам̣ уд̣̇агам̣ уггаамукан̃жа ааг̇амма вад̇т̇асуван̣н̣аанам̣ барисуд̣̇д̇хад̇аа вияа д̇асса бхигкуно вуд̇д̇аббагаарасийлад̇хаммабан̃н̃аасан̇г̇ахам̣ анааг̇аамимаг̇г̇ам̣ ааг̇амма висуд̣̇д̇хажид̇д̇ад̇аад̇и.
Tatrāyaṃ upamāsaṃsandanā – saṃkiliṭṭhavatthaṃ viya hi saṃkiliṭṭhajātarūpaṃ viya ca imassa bhikkhuno puthujjanakāle kāmarāgādimalānugataṃ cittaṃ daṭṭhabbaṃ. Acchodakaṃ viya ukkāmukhaṃ viya ca anāgāmimaggo. Taṃ udakaṃ ukkāmukhañca āgamma vatthasuvaṇṇānaṃ parisuddhatā viya tassa bhikkhuno vuttappakārasīladhammapaññāsaṅgahaṃ anāgāmimaggaṃ āgamma visuddhacittatāti.
77. со мзд̇д̇аасахаг̇ад̇зна жзд̇асаад̇и яат̇аанусанд̇хивасзна д̣̇зсанаа ааг̇ад̇аа. д̇аяо хи анусанд̇хий бужчаанусанд̇хи аж̇жхаасаяаанусанд̇хи яат̇аанусанд̇хийд̇и. д̇ад̇т̇а ‘‘звам̣ вуд̇д̇з ан̃н̃ад̇аро бхигку бхаг̇аванд̇ам̣ зд̇ад̣̇авожа ‘сияаа ну ко, бханд̇з, б̣ахид̣̇д̇хаа асад̇и барид̇ассанаа’д̇и? ‘сияаа бхигкуу’д̇и бхаг̇аваа авожаа’’д̇и (ма. ни. 1.242). звам̣ бужчанд̇аанам̣ виссаж̇ж̇ид̇асуд̇д̇авасзна бужчаанусанд̇хи взд̣̇ид̇аб̣б̣о. ‘‘сияаа ко бана д̇з б̣раахман̣а звамасса, аж̇ж̇ааби нууна саман̣о г̇од̇амо авийд̇арааг̇о’’д̇и (ма. ни. 1.55) звам̣ барзсам̣ аж̇жхаасаяам̣ вид̣̇ид̇ваа вуд̇д̇асса суд̇д̇асса васзна аж̇жхаасаяаанусанд̇хи взд̣̇ид̇аб̣б̣о. язна бана д̇хаммзна аад̣̇имхи д̣̇зсанаа удтид̇аа, д̇асса д̇хаммасса ануруубад̇хаммавасзна ваа бадибагкавасзна ваа язсу суд̇д̇зсу убари д̣̇зсанаа ааг̇ажчад̇и, д̇зсам̣ васзна яат̇аанусанд̇хи взд̣̇ид̇аб̣б̣о . сзяяат̇ид̣̇ам̣, ааган̇кзяяасуд̇д̇з хздтаа сийлзна д̣̇зсанаа удтид̇аа, убари ча абхин̃н̃аа ааг̇ад̇аа. гагажуубамз хздтаа агканд̇ияаа удтид̇аа, убари гагажуубамоваад̣̇о ааг̇ад̇о. алаг̇ад̣̇д̣̇з хздтаа д̣̇идтибарид̣̇ийбанзна удтид̇аа, убари д̇ибариваддасун̃н̃ад̇аабагаасанаа ааг̇ад̇аа, жуул̣аассабурз хздтаа гилзсабарид̣̇ийбанзна удтид̇аа, убари б̣рахмавихаараа ааг̇ад̇аа. госамб̣ияасуд̇д̇з хздтаа бхан̣д̣анзна удтид̇аа, убари сааран̣ийяад̇хаммаа ааг̇ад̇аа. имасмимби вад̇т̇асуд̇д̇з хздтаа гилзсабарид̣̇ийбанзна удтид̇аа, убари б̣рахмавихаараа ааг̇ад̇аа. д̇зна вуд̇д̇ам̣ ‘‘яат̇аанусанд̇хивасзна д̣̇зсанаа ааг̇ад̇аа’’д̇и. б̣рахмавихаарзсу бана анубад̣̇аван̣н̣анаа жа бхааванаанаяо жа саб̣б̣о саб̣б̣аагаарзна висуд̣̇д̇химаг̇г̇з вуд̇д̇о.
77.So mettāsahagatena cetasāti yathānusandhivasena desanā āgatā. Tayo hi anusandhī pucchānusandhi ajjhāsayānusandhi yathānusandhīti. Tattha ‘‘evaṃ vutte aññataro bhikkhu bhagavantaṃ etadavoca ‘siyā nu kho, bhante, bahiddhā asati paritassanā’ti? ‘Siyā bhikkhū’ti bhagavā avocā’’ti (ma. ni. 1.242). Evaṃ pucchantānaṃ vissajjitasuttavasena pucchānusandhi veditabbo. ‘‘Siyā kho pana te brāhmaṇa evamassa, ajjāpi nūna samaṇo gotamo avītarāgo’’ti (ma. ni. 1.55) evaṃ paresaṃ ajjhāsayaṃ viditvā vuttassa suttassa vasena ajjhāsayānusandhi veditabbo. Yena pana dhammena ādimhi desanā uṭṭhitā, tassa dhammassa anurūpadhammavasena vā paṭipakkhavasena vā yesu suttesu upari desanā āgacchati, tesaṃ vasena yathānusandhi veditabbo . Seyyathidaṃ, ākaṅkheyyasutte heṭṭhā sīlena desanā uṭṭhitā, upari cha abhiññā āgatā. Kakacūpame heṭṭhā akkhantiyā uṭṭhitā, upari kakacūpamovādo āgato. Alagadde heṭṭhā diṭṭhiparidīpanena uṭṭhitā, upari tiparivaṭṭasuññatāpakāsanā āgatā, cūḷaassapure heṭṭhā kilesaparidīpanena uṭṭhitā, upari brahmavihārā āgatā. Kosambiyasutte heṭṭhā bhaṇḍanena uṭṭhitā, upari sāraṇīyadhammā āgatā. Imasmimpi vatthasutte heṭṭhā kilesaparidīpanena uṭṭhitā, upari brahmavihārā āgatā. Tena vuttaṃ ‘‘yathānusandhivasena desanā āgatā’’ti. Brahmavihāresu pana anupadavaṇṇanā ca bhāvanānayo ca sabbo sabbākārena visuddhimagge vutto.
78. звам̣ бхаг̇аваа абхиж̇жхаад̣̇ийнам̣ убаггилзсаанам̣ бадибагкабхууд̇ам̣ саб̣б̣асо жа гаамарааг̇аб̣яаабаад̣̇аббахаанзна вихад̇абажжад̇т̇игад̇д̇аа лад̣̇д̇хабад̣̇адтаанам̣ д̇асса анааг̇аамино б̣рахмавихаарабхааванам̣ д̣̇ассзд̇ваа ид̣̇аанисса арахад̇д̇ааяа вибассанам̣ д̣̇ассзд̇ваа арахад̇д̇аббад̇д̇им̣ д̣̇ассзд̇ум̣ со ад̇т̇и ид̣̇анд̇иаад̣̇имааха.
78. Evaṃ bhagavā abhijjhādīnaṃ upakkilesānaṃ paṭipakkhabhūtaṃ sabbaso ca kāmarāgabyāpādappahānena vihatapaccatthikattā laddhapadaṭṭhānaṃ tassa anāgāmino brahmavihārabhāvanaṃ dassetvā idānissa arahattāya vipassanaṃ dassetvā arahattappattiṃ dassetuṃ so atthi idantiādimāha.
д̇ассад̇т̇о – со анааг̇аамий звам̣ бхаавид̇аб̣рахмавихааро зд̇зсам̣ б̣рахмавихаараанам̣ яад̇о гуд̇ожи вудтааяа д̇з зва б̣рахмавихаарад̇хаммз наамавасзна д̇зсам̣ ниссаяам̣ хад̣̇аяавад̇т̇ум̣ вад̇т̇униссаяаани бхууд̇аанийд̇и иминаа наязна бхууд̇убаад̣̇ааяад̇хаммз руубавасзна жа вавад̇т̇абзд̇ваа ад̇т̇и ид̣̇анд̇и баж̇аанаад̇и, зд̇д̇аавад̇аанзна д̣̇угкасажжававад̇т̇аанам̣ гад̇ам̣ ход̇и. д̇ад̇о д̇асса д̣̇угкасса самуд̣̇аяам̣ бадивиж̇жханд̇о ад̇т̇и хийнанд̇и баж̇аанаад̇и, зд̇д̇аавад̇аанзна самуд̣̇аяасажжававад̇т̇аанам̣ гад̇ам̣ ход̇и. д̇ад̇о д̇асса бахаанубааяам̣ вижинанд̇о ад̇т̇и бан̣ийд̇анд̇и баж̇аанаад̇и, зд̇д̇аавад̇аанзна маг̇г̇асажжававад̇т̇аанам̣ гад̇ам̣ ход̇и. д̇ад̇о д̇зна маг̇г̇зна ад̇хиг̇анд̇аб̣б̣адтаанам̣ вижинанд̇о ад̇т̇и уд̇д̇ари имасса сан̃н̃ааг̇ад̇асса ниссаран̣анд̇и баж̇аанаад̇и, имасса маяаа ад̇хиг̇ад̇асса б̣рахмавихаарасан̃н̃ааг̇ад̇асса уд̇д̇ари ниссаран̣ам̣ ниб̣б̣аанам̣ ад̇т̇ийд̇и звам̣ баж̇аанаад̇ийд̇и ад̇хиббааяо, зд̇д̇аавад̇аанзна нирод̇хасажжававад̇т̇аанам̣ гад̇ам̣ ход̇и. д̇асса звам̣ ж̇аанад̇о звам̣ бассад̇од̇и д̇асса вибассанаабан̃н̃ааяа звам̣ жад̇уухи аагаарзхи жад̇д̇аари сажжаани ж̇аанад̇о, маг̇г̇абан̃н̃ааяа звам̣ бассад̇о, бхаяабхзравз вуд̇д̇анаязнзва гаамаасавааби жид̇д̇ам̣ вимужжад̇и…бз… ид̇т̇ад̇д̇ааяаад̇и баж̇аанаад̇ийд̇и.
Tassattho – so anāgāmī evaṃ bhāvitabrahmavihāro etesaṃ brahmavihārānaṃ yato kutoci vuṭṭhāya te eva brahmavihāradhamme nāmavasena tesaṃ nissayaṃ hadayavatthuṃ vatthunissayāni bhūtānīti iminā nayena bhūtupādāyadhamme rūpavasena ca vavatthapetvā atthi idanti pajānāti, ettāvatānena dukkhasaccavavatthānaṃ kataṃ hoti. Tato tassa dukkhassa samudayaṃ paṭivijjhanto atthi hīnanti pajānāti, ettāvatānena samudayasaccavavatthānaṃ kataṃ hoti. Tato tassa pahānupāyaṃ vicinanto atthi paṇītanti pajānāti, ettāvatānena maggasaccavavatthānaṃ kataṃ hoti. Tato tena maggena adhigantabbaṭṭhānaṃ vicinanto atthi uttari imassa saññāgatassa nissaraṇanti pajānāti, imassa mayā adhigatassa brahmavihārasaññāgatassa uttari nissaraṇaṃ nibbānaṃ atthīti evaṃ pajānātīti adhippāyo, ettāvatānena nirodhasaccavavatthānaṃ kataṃ hoti. Tassa evaṃ jānato evaṃ passatoti tassa vipassanāpaññāya evaṃ catūhi ākārehi cattāri saccāni jānato, maggapaññāya evaṃ passato, bhayabherave vuttanayeneva kāmāsavāpi cittaṃ vimuccati…pe… itthattāyāti pajānātīti.
звам̣ яаава арахад̇д̇аа д̣̇зсанам̣ баабзд̇ваа ид̣̇аани яасмаа д̇ассам̣ барисад̇и нхаанасуд̣̇д̇хиго б̣раахман̣о нисинно, со звам̣ нхаанасуд̣̇д̇хияаа ван̣н̣ам̣ вужжамаанам̣ суд̇ваа баб̣б̣аж̇ид̇ваа арахад̇д̇ам̣ баабун̣иссад̇ийд̇и бхаг̇авад̇аа вид̣̇ид̇о, д̇асмаа д̇асса жод̣̇анад̇т̇ааяа ‘‘аяам̣ вужжад̇и, бхигкавз, бхигку синаад̇о анд̇арзна синаанзнаа’’д̇и имам̣ баадиязггам̣ анусанд̇химааха. д̇ад̇т̇а анд̇арзна синаанзнаад̇и аб̣бханд̇арзна гилзсавудтаанасинаанзна.
Evaṃ yāva arahattā desanaṃ pāpetvā idāni yasmā tassaṃ parisati nhānasuddhiko brāhmaṇo nisinno, so evaṃ nhānasuddhiyā vaṇṇaṃ vuccamānaṃ sutvā pabbajitvā arahattaṃ pāpuṇissatīti bhagavatā vidito, tasmā tassa codanatthāya ‘‘ayaṃ vuccati, bhikkhave, bhikkhu sināto antarena sinānenā’’ti imaṃ pāṭiyekkaṃ anusandhimāha. Tattha antarena sinānenāti abbhantarena kilesavuṭṭhānasinānena.
79. сунд̣̇аригабхаарад̣̇вааж̇од̇и бхаарад̣̇вааж̇о наама со б̣раахман̣о ад̇д̇ано г̇од̇д̇авасзна, сунд̣̇аригааяа бана над̣̇ияаа синаад̇асса баабаббахаанам̣ ход̇ийд̇и аяамасса д̣̇идти, д̇асмаа ‘‘сунд̣̇аригабхаарад̣̇вааж̇о’’д̇и вужжад̇и. со д̇ам̣ бхаг̇авад̇о важанам̣ суд̇ваа жинд̇зси ‘‘маяам̣ синаанасуд̣̇д̇хим̣ ван̣н̣зма, саман̣оби г̇од̇амо д̇ат̇зва ван̣н̣зд̇и, самаанажчанд̣̇о д̣̇аани зса амхзхий’’д̇и. ат̇а бхаг̇аванд̇ам̣ б̣аахугам̣ над̣̇им̣ г̇анд̇ваа д̇ам̣ д̇ад̇т̇а баабам̣ баваахзд̇ваа ааг̇ад̇ам̣ вияа ман̃н̃амаано ааха ‘‘г̇ажчад̇и бана бхавам̣ г̇од̇амо б̣аахугам̣ над̣̇им̣ синааяид̇у’’нд̇и? бхаг̇аваа д̇асса г̇ажчаамийд̇и ваа на г̇ажчаамийд̇и ваа авад̇вааязва б̣раахман̣асса д̣̇идтисамуг̇гхаад̇ам̣ гад̇д̇угаамо ‘‘гим̣ б̣раахман̣а б̣аахугааяа над̣̇ияаа , гим̣ б̣аахугаа над̣̇ий гариссад̇ий’’д̇и ааха. д̇ассад̇т̇о гим̣ баяож̇анам̣ б̣аахугааяа, гим̣ саа гариссад̇и? асамад̇т̇аа саа гассажи ад̇т̇ааяа, гим̣ д̇ад̇т̇а г̇амиссаамийд̇и?
79.Sundarikabhāradvājoti bhāradvājo nāma so brāhmaṇo attano gottavasena, sundarikāya pana nadiyā sinātassa pāpappahānaṃ hotīti ayamassa diṭṭhi, tasmā ‘‘sundarikabhāradvājo’’ti vuccati. So taṃ bhagavato vacanaṃ sutvā cintesi ‘‘mayaṃ sinānasuddhiṃ vaṇṇema, samaṇopi gotamo tatheva vaṇṇeti, samānacchando dāni esa amhehī’’ti. Atha bhagavantaṃ bāhukaṃ nadiṃ gantvā taṃ tattha pāpaṃ pavāhetvā āgataṃ viya maññamāno āha ‘‘gacchati pana bhavaṃ gotamo bāhukaṃ nadiṃ sināyitu’’nti? Bhagavā tassa gacchāmīti vā na gacchāmīti vā avatvāyeva brāhmaṇassa diṭṭhisamugghātaṃ kattukāmo ‘‘kiṃ brāhmaṇa bāhukāya nadiyā , kiṃ bāhukā nadī karissatī’’ti āha. Tassattho kiṃ payojanaṃ bāhukāya, kiṃ sā karissati? Asamatthā sā kassaci atthāya, kiṃ tattha gamissāmīti?
ат̇а б̣раахман̣о д̇ам̣ басам̣санд̇о логкасаммад̇аад̇иаад̣̇имааха. д̇ад̇т̇а логкасаммад̇аад̇и луукабхаавасаммад̇аа, луукабхааванд̇и жогкабхаавам̣, висуд̣̇д̇хибхаавам̣ д̣̇зд̇ийд̇и звам̣ саммад̇аад̇и вуд̇д̇ам̣ ход̇и. логяасаммад̇аад̇иби баато. д̇ассад̇т̇о, сздтам̣ логам̣ г̇амаяад̇ийд̇и звам̣ саммад̇аад̇и. бун̃н̃асаммад̇аад̇и бун̃н̃анд̇и саммад̇аа. баваахзд̇ийд̇и г̇амаяад̇и висод̇хзд̇и. г̇аат̇аахи аж̇жхабхаасийд̇и г̇аат̇аахи абхааси. г̇аат̇аа жа вужжамаанаа д̇ад̣̇ад̇т̇ад̣̇ийбанад̇т̇амзва ваа г̇аат̇ааружигаанам̣ вужжад̇и, висзсад̇т̇ад̣̇ийбанад̇т̇ам̣ ваа. ид̇ха банзд̇аа убхаяад̇т̇ад̣̇ийбанад̇т̇ам̣ вуд̇д̇аад̇и взд̣̇ид̇аб̣б̣аа.
Atha brāhmaṇo taṃ pasaṃsanto lokkhasammatātiādimāha. Tattha lokkhasammatāti lūkhabhāvasammatā, lūkhabhāvanti cokkhabhāvaṃ, visuddhibhāvaṃ detīti evaṃ sammatāti vuttaṃ hoti. Lokyasammatātipi pāṭho. Tassattho, seṭṭhaṃ lokaṃ gamayatīti evaṃ sammatāti. Puññasammatāti puññanti sammatā. Pavāhetīti gamayati visodheti. Gāthāhi ajjhabhāsīti gāthāhi abhāsi. Gāthā ca vuccamānā tadatthadīpanatthameva vā gāthārucikānaṃ vuccati, visesatthadīpanatthaṃ vā. Idha panetā ubhayatthadīpanatthaṃ vuttāti veditabbā.
б̣аахуганд̇и ид̣̇амзва хи зд̇т̇а важанам̣ д̇ад̣̇ад̇т̇ад̣̇ийбагам̣, сзсаани висзсад̇т̇ад̣̇ийбагаани. яат̇зва хи б̣аахугам̣, звам̣ ад̇хигаггаад̣̇ийниби лого г̇ажчад̇и нхаанзна баабам̣ баваахзд̇ум̣. д̇ад̇т̇а яз д̇зсам̣ таанаанам̣ аасаннаа хонд̇и, д̇з д̣̇ивасасса д̇игкад̇д̇ум̣ нхааяанд̇и. яз д̣̇уураа, д̇з яат̇ааггамам̣ д̣̇вигкад̇д̇ум̣ сагим̣ згад̣̇ивасанд̇арам̣, звам̣ яаава сам̣важчаранд̇арам̣ нхааяанд̇и. яз бана саб̣б̣ат̇ааби г̇анд̇ум̣ на саггонд̇и, д̇з гхадзхиби д̇ад̇о уд̣̇агам̣ аахараабзд̇ваа нхааяанд̇и. саб̣б̣ан̃жзд̇ам̣ нирад̇т̇агам̣, д̇асмаа имам̣ висзсад̇т̇ам̣ д̣̇ийбзд̇ум̣ ад̇хигаггаад̣̇ийнибийд̇и ааха.
Bāhukanti idameva hi ettha vacanaṃ tadatthadīpakaṃ, sesāni visesatthadīpakāni. Yatheva hi bāhukaṃ, evaṃ adhikakkādīnipi loko gacchati nhānena pāpaṃ pavāhetuṃ. Tattha ye tesaṃ ṭhānānaṃ āsannā honti, te divasassa tikkhattuṃ nhāyanti. Ye dūrā, te yathākkamaṃ dvikkhattuṃ sakiṃ ekadivasantaraṃ, evaṃ yāva saṃvaccharantaraṃ nhāyanti. Ye pana sabbathāpi gantuṃ na sakkonti, te ghaṭehipi tato udakaṃ āharāpetvā nhāyanti. Sabbañcetaṃ niratthakaṃ, tasmā imaṃ visesatthaṃ dīpetuṃ adhikakkādīnipīti āha.
д̇ад̇т̇а ад̇хигагганд̇и нхаанасамбхааравасзна лад̣̇д̇хавохаарам̣ згам̣ д̇ид̇т̇ам̣ вужжад̇и. г̇аяаад̇иби ман̣д̣алаваабисан̣таанам̣ д̇ид̇т̇амзва вужжад̇и. баяааг̇аад̇и зд̇амби г̇ан̇г̇ааяа згам̣ д̇ид̇т̇амзва махаабанаад̣̇асса ран̃н̃о г̇ан̇г̇ааяам̣ нимуг̇г̇абаасаад̣̇асса собаанасаммукадтаанам̣, б̣аахугаа сунд̣̇аригаа сарассад̇ий б̣аахумад̇ийд̇и имаа бана жад̇ассо над̣̇ияо. б̣аалод̇и д̣̇уббан̃н̃о. багканд̣̇од̇и бависанд̇о. на суж̇жхад̇ийд̇и гилзсасуд̣̇д̇хим̣ на баабун̣аад̇и, гзвалам̣ раж̇ож̇алламзва баваахзд̇и.
Tattha adhikakkanti nhānasambhāravasena laddhavohāraṃ ekaṃ titthaṃ vuccati. Gayātipi maṇḍalavāpisaṇṭhānaṃ titthameva vuccati. Payāgāti etampi gaṅgāya ekaṃ titthameva mahāpanādassa rañño gaṅgāyaṃ nimuggapāsādassa sopānasammukhaṭṭhānaṃ, bāhukā sundarikā sarassatī bāhumatīti imā pana catasso nadiyo. Bāloti duppañño. Pakkhandoti pavisanto. Na sujjhatīti kilesasuddhiṃ na pāpuṇāti, kevalaṃ rajojallameva pavāheti.
гим̣ сунд̣̇аригаа гариссад̇ийд̇и сунд̣̇аригаа гилзсависод̇ханз гим̣ гариссад̇и? на гин̃жи гаад̇ум̣ самад̇т̇аад̇и ад̇хиббааяо. зса наяо баяааг̇аб̣аахугаасу. имзхи жа д̇ийхи бад̣̇зхи вуд̇д̇зхи ид̇арааниби жад̇д̇аари лагкан̣аахааранаязна вуд̇д̇аанзва хонд̇и, д̇асмаа яат̇зва сунд̣̇аригаа баяааг̇аа б̣аахугаа на гин̃жи гаронд̇и, д̇ат̇аа ад̇хигаггаад̣̇аяобийд̇и взд̣̇ид̇аб̣б̣аа.
Kiṃ sundarikā karissatīti sundarikā kilesavisodhane kiṃ karissati? Na kiñci kātuṃ samatthāti adhippāyo. Esa nayo payāgabāhukāsu. Imehi ca tīhi padehi vuttehi itarānipi cattāri lakkhaṇāhāranayena vuttāneva honti, tasmā yatheva sundarikā payāgā bāhukā na kiñci karonti, tathā adhikakkādayopīti veditabbā.
взринд̇и баан̣аад̇ибаад̇аад̣̇ибан̃жавзрасаманнааг̇ад̇ам̣. гад̇агиб̣б̣исанд̇и гад̇алуд̣̇д̣̇агаммам̣. на хи нам̣ сод̇хаязд̇и сунд̣̇аригаа ваа баяааг̇аа ваа б̣аахугаа ваа на сод̇хаяз, на сод̇хзд̇ийд̇и вуд̇д̇ам̣ ход̇и. баабагамминанд̇и баабагзхи взрагиб̣б̣исагаммзхи яуд̇д̇ам̣, лаамагагаммз яуд̇д̇ам̣ ваа взрагиб̣б̣исабхаавам̣ аббад̇д̇зхи куд̣̇д̣̇агзхиби баабзхи яуд̇д̇анд̇и вуд̇д̇ам̣ ход̇и.
Verinti pāṇātipātādipañcaverasamannāgataṃ. Katakibbisanti kataluddakammaṃ. Na hi naṃ sodhayeti sundarikā vā payāgā vā bāhukā vā na sodhaye, na sodhetīti vuttaṃ hoti. Pāpakamminanti pāpakehi verakibbisakammehi yuttaṃ, lāmakakamme yuttaṃ vā verakibbisabhāvaṃ appattehi khuddakehipi pāpehi yuttanti vuttaṃ hoti.
суд̣̇д̇хассаад̇и ниггилзсасса. сад̣̇аа паг̇г̇ууд̇и нижжамби паг̇г̇унийнагкад̇д̇амзва. паг̇г̇унамаасз гира ‘‘уд̇д̇арапаг̇г̇унад̣̇ивасз яо нхааяад̇и, со сам̣важчарам̣ гад̇абаабам̣ сод̇хзд̇ий’’д̇и звам̣ д̣̇идтиго со б̣раахман̣о, д̇знасса бхаг̇аваа д̇ам̣ д̣̇идтим̣ бадихананд̇о ааха ‘‘суд̣̇д̇хасса вз сад̣̇аа паг̇г̇уу’’д̇и. ниггилзсасса нижжам̣ паг̇г̇унийнагкад̇д̇ам̣, ид̇аро гим̣ суж̇жхад̇ийд̇и? убосат̇о сад̣̇аад̇и суд̣̇д̇хасса жа жаад̇уд̣̇д̣̇асабаннарасаад̣̇ийсу убосат̇ан̇г̇аани асамаад̣̇ияад̇оби нижжамзва убосат̇о. суд̣̇д̇хасса сужигаммассаад̇и ниггилзсад̇ааяа суд̣̇д̇хасса сужийхи жа гааяагаммаад̣̇ийхи саманнааг̇ад̇асса. сад̣̇аа самбаж̇ж̇ад̇з вад̇анд̇и ийд̣̇исасса жа гусалуубасан̃хид̇ам̣ вад̇асамаад̣̇аанамби нижжам̣ самбаннамзва ход̇ийд̇и. ид̇хзва синаахийд̇и имасмим̣язва мама саасанз синаахи. гим̣ вуд̇д̇ам̣ ход̇и? ‘‘сажз аж̇жхад̇д̇игагилзсамалаббавааханам̣ ижчаси, ид̇хзва мама саасанз адтан̇г̇игамаг̇г̇асалилзна синаахи, ан̃н̃ад̇ра хи ид̣̇ам̣ над̇т̇ий’’д̇и.
Suddhassāti nikkilesassa. Sadā phaggūti niccampi phaggunīnakkhattameva. Phaggunamāse kira ‘‘uttaraphaggunadivase yo nhāyati, so saṃvaccharaṃ katapāpaṃ sodhetī’’ti evaṃ diṭṭhiko so brāhmaṇo, tenassa bhagavā taṃ diṭṭhiṃ paṭihananto āha ‘‘suddhassa ve sadā phaggū’’ti. Nikkilesassa niccaṃ phaggunīnakkhattaṃ, itaro kiṃ sujjhatīti? Uposatho sadāti suddhassa ca cātuddasapannarasādīsu uposathaṅgāni asamādiyatopi niccameva uposatho. Suddhassa sucikammassāti nikkilesatāya suddhassa sucīhi ca kāyakammādīhi samannāgatassa. Sadā sampajjate vatanti īdisassa ca kusalūpasañhitaṃ vatasamādānampi niccaṃ sampannameva hotīti. Idheva sināhīti imasmiṃyeva mama sāsane sināhi. Kiṃ vuttaṃ hoti? ‘‘Sace ajjhattikakilesamalappavāhanaṃ icchasi, idheva mama sāsane aṭṭhaṅgikamaggasalilena sināhi, aññatra hi idaṃ natthī’’ti.
ид̣̇аанисса саббааяад̣̇зсанаавасзна д̇ийсуби д̣̇ваарзсу суд̣̇д̇хим̣ д̣̇ассзнд̇о саб̣б̣абхууд̇зсу гарохи кзмад̇анд̇иаад̣̇имааха. д̇ад̇т̇а кзмад̇анд̇и абхаяам̣ хид̇абхаавам̣, мзд̇д̇анд̇и вуд̇д̇ам̣ ход̇и. зд̇знасса манод̣̇ваарасуд̣̇д̇хи д̣̇ассид̇аа ход̇и.
Idānissa sappāyadesanāvasena tīsupi dvāresu suddhiṃ dassento sabbabhūtesu karohi khematantiādimāha. Tattha khematanti abhayaṃ hitabhāvaṃ, mettanti vuttaṃ hoti. Etenassa manodvārasuddhi dassitā hoti.
сажз мусаа на бхан̣асийд̇и зд̇знасса важийд̣̇ваарасуд̣̇д̇хи. сажз баан̣ам̣ на хим̣саси сажз ад̣̇иннам̣ наад̣̇ияасийд̇и зд̇зхи гааяад̣̇ваарасуд̣̇д̇хи. сад̣̇д̣̇ахаано амажчарийд̇и зд̇зхи бана нам̣ звам̣ барисуд̣̇д̇хад̣̇ваарам̣ сад̣̇д̇хаасамбад̣̇ааяа жааг̇асамбад̣̇ааяа жа нияож̇зси. гим̣ гаахаси г̇аяам̣ г̇анд̇ваа, уд̣̇абааноби д̇з г̇аяаад̇и аяам̣ бана убад̣дхаг̇аат̇аа, сажз саб̣б̣абхууд̇зсу кзмад̇ам̣ гариссаси, мусаа на бхан̣иссаси, баан̣ам̣ на ханиссаси, ад̣̇иннам̣ наад̣̇ияиссаси, сад̣̇д̇хахаано амажчарий бхависсаси, гим̣ гаахаси г̇аяам̣ г̇анд̇ваа уд̣̇абааноби д̇з г̇аяаа , г̇аяааяаби хи д̇з нхааяанд̇асса уд̣̇абаанзби имааяа зва бадибад̇д̇ияаа гилзсасуд̣̇д̇хи, сарийрамаласуд̣̇д̇хи бана убхаяад̇т̇а самаад̇и звам̣ яож̇зд̇аб̣б̣ам̣. яасмаа жа логз г̇аяаа саммад̇ад̇араа, д̇асмаа д̇асса бхаг̇аваа ‘‘г̇ажчад̇и бана бхавам̣ г̇од̇амо б̣аахуга’’нд̇и будтоби ‘‘гим̣ гаахаси б̣аахугам̣ г̇анд̇ваа’’д̇и авад̇ваа ‘‘гим̣ гаахаси г̇аяам̣ г̇анд̇ваа’’д̇и аахаад̇и взд̣̇ид̇аб̣б̣о.
Sace musā na bhaṇasīti etenassa vacīdvārasuddhi. Sace pāṇaṃ na hiṃsasi sace adinnaṃ nādiyasīti etehi kāyadvārasuddhi. Saddahāno amaccharīti etehi pana naṃ evaṃ parisuddhadvāraṃ saddhāsampadāya cāgasampadāya ca niyojesi. Kiṃ kāhasi gayaṃ gantvā, udapānopi te gayāti ayaṃ pana upaḍḍhagāthā, sace sabbabhūtesu khemataṃ karissasi, musā na bhaṇissasi, pāṇaṃ na hanissasi, adinnaṃ nādiyissasi, saddhahāno amaccharī bhavissasi, kiṃ kāhasi gayaṃ gantvā udapānopi te gayā , gayāyapi hi te nhāyantassa udapānepi imāya eva paṭipattiyā kilesasuddhi, sarīramalasuddhi pana ubhayattha samāti evaṃ yojetabbaṃ. Yasmā ca loke gayā sammatatarā, tasmā tassa bhagavā ‘‘gacchati pana bhavaṃ gotamo bāhuka’’nti puṭṭhopi ‘‘kiṃ kāhasi bāhukaṃ gantvā’’ti avatvā ‘‘kiṃ kāhasi gayaṃ gantvā’’ti āhāti veditabbo.
80. звам̣ вуд̇д̇зд̇и звамаад̣̇и бхаяабхзравз вуд̇д̇ад̇д̇аа баагадамзва. зго вуубагадтод̇иаад̣̇ийсу бана зго гааяавивзгзна . вуубагадто жид̇д̇авивзгзна. аббамад̇д̇о гаммадтаанз сад̇и авиж̇аханзна. аад̇аабий гааяигажзд̇асигавийрияасан̇каад̇зна аад̇аабзна. бахид̇ад̇д̇о гааяз жа ж̇ийвид̇з жа анабзгкад̇ааяа. вихаранд̇о ан̃н̃ад̇араирияаабат̇авихаарзна. нажирассзваад̇и баб̣б̣аж̇ж̇ам̣ убаад̣̇ааяа вужжад̇и. гулабуд̇д̇аад̇и д̣̇увид̇хаа гулабуд̇д̇аа ж̇аад̇игулабуд̇д̇аа жа аажаарагулабуд̇д̇аа жа, аяам̣ бана убхаяат̇ааби гулабуд̇д̇о. аг̇аарасмаад̇и гхараа. аг̇аарасса хид̇ам̣ аг̇аарияам̣, гасиг̇орагкаад̣̇игудумб̣абосанагаммам̣ вужжад̇и, над̇т̇и зд̇т̇а аг̇аарияанд̇и анаг̇аарияам̣, баб̣б̣аж̇ж̇ааязд̇ам̣ ад̇хиважанам̣. баб̣б̣аж̇анд̇ийд̇и убаг̇ажчанд̇и убасан̇гаманд̇и. д̇ад̣̇ануд̇д̇аранд̇и д̇ам̣ ануд̇д̇арам̣. б̣рахмажарияабарияосаананд̇и маг̇г̇аб̣рахмажарияасса барияосаанам̣, арахад̇д̇апаланд̇и вуд̇д̇ам̣ ход̇и. д̇асса хи ад̇т̇ааяа гулабуд̇д̇аа баб̣б̣аж̇анд̇и. д̣̇идтзва д̇хаммзд̇и д̇асмим̣язва ад̇д̇абхаавз. саяам̣ абхин̃н̃аа сажчигад̇ваад̇и ад̇д̇анааязва бан̃н̃ааяа бажжагкам̣ гад̇ваа, абараббажжаяам̣ гад̇ваад̇и ад̇т̇о. убасамбаж̇ж̇а вихаасийд̇и баабун̣ид̇ваа самбаад̣̇зд̇ваа вихаасийд̇и, звам̣ вихаранд̇о жа кийн̣аа ж̇аад̇и…бз… аб̣бхан̃н̃ааси. зд̇знасса бажжавзгкан̣абхуумим̣ д̣̇ассзд̇и.
80.Evaṃ vutteti evamādi bhayabherave vuttattā pākaṭameva. Eko vūpakaṭṭhotiādīsu pana eko kāyavivekena . Vūpakaṭṭho cittavivekena. Appamatto kammaṭṭhāne sati avijahanena. Ātāpī kāyikacetasikavīriyasaṅkhātena ātāpena. Pahitatto kāye ca jīvite ca anapekkhatāya. Viharanto aññatarairiyāpathavihārena. Nacirassevāti pabbajjaṃ upādāya vuccati. Kulaputtāti duvidhā kulaputtā jātikulaputtā ca ācārakulaputtā ca, ayaṃ pana ubhayathāpi kulaputto. Agārasmāti gharā. Agārassa hitaṃ agāriyaṃ, kasigorakkhādikuṭumbaposanakammaṃ vuccati, natthi ettha agāriyanti anagāriyaṃ, pabbajjāyetaṃ adhivacanaṃ. Pabbajantīti upagacchanti upasaṅkamanti. Tadanuttaranti taṃ anuttaraṃ. Brahmacariyapariyosānanti maggabrahmacariyassa pariyosānaṃ, arahattaphalanti vuttaṃ hoti. Tassa hi atthāya kulaputtā pabbajanti. Diṭṭheva dhammeti tasmiṃyeva attabhāve. Sayaṃ abhiññā sacchikatvāti attanāyeva paññāya paccakkhaṃ katvā, aparappaccayaṃ katvāti attho. Upasampajja vihāsīti pāpuṇitvā sampādetvā vihāsīti, evaṃ viharanto ca khīṇā jāti…pe… abbhaññāsi. Etenassa paccavekkhaṇabhūmiṃ dasseti.
гад̇амаа банасса ж̇аад̇и кийн̣аа? гат̇ан̃жа нам̣ аб̣бхан̃н̃аасийд̇и? вужжад̇з, гааман̃жзд̇ам̣ бхаяабхзравзби вуд̇д̇ам̣, д̇ат̇ааби нам̣ ид̇ха батамабурисавасзна яож̇анаанаяасса д̣̇ассанад̇т̇ам̣ буна сан̇кзбад̇о бхан̣аама. на д̇аавасса ад̇ийд̇аа ж̇аад̇и кийн̣аа, буб̣б̣зва кийн̣ад̇д̇аа. на анааг̇ад̇аа, д̇ад̇т̇а вааяаамаабхаавад̇о. на бажжуббаннаа, виж̇ж̇амаанад̇д̇аа. маг̇г̇асса бана абхаавид̇ад̇д̇аа яаа уббаж̇ж̇зяяа згажад̇убан̃жавогаарабхавзсу згажад̇убан̃жагканд̇хаббабхзд̣̇аа ж̇аад̇и, саа маг̇г̇асса бхаавид̇ад̇д̇аа ануббаад̣̇ад̇хаммад̇ам̣ аабаж̇ж̇анзна кийн̣аа, д̇ам̣ со маг̇г̇абхааванааяа бахийнагилзсз бажжавзгкид̇ваа гилзсаабхаавз виж̇ж̇амаанамби гаммам̣ ааяад̇им̣ аббадисанд̇хигам̣ ход̇ийд̇и ж̇аананд̇о ж̇аанаад̇и.
Katamā panassa jāti khīṇā? Kathañca naṃ abbhaññāsīti? Vuccate, kāmañcetaṃ bhayabheravepi vuttaṃ, tathāpi naṃ idha paṭhamapurisavasena yojanānayassa dassanatthaṃ puna saṅkhepato bhaṇāma. Na tāvassa atītā jāti khīṇā, pubbeva khīṇattā. Na anāgatā, tattha vāyāmābhāvato. Na paccuppannā, vijjamānattā. Maggassa pana abhāvitattā yā uppajjeyya ekacatupañcavokārabhavesu ekacatupañcakkhandhappabhedā jāti, sā maggassa bhāvitattā anuppādadhammataṃ āpajjanena khīṇā, taṃ so maggabhāvanāya pahīnakilese paccavekkhitvā kilesābhāve vijjamānampi kammaṃ āyatiṃ appaṭisandhikaṃ hotīti jānanto jānāti.
вусид̇анд̇и вуд̇т̇ам̣ баривуд̇т̇ам̣, гад̇ам̣ жарид̇ам̣ нидтаабид̇анд̇и ад̇т̇о. б̣рахмажарияанд̇и маг̇г̇аб̣рахмажарияам̣. гад̇ам̣ гаран̣ийяанд̇и жад̇уусу сажжзсу жад̇уухи маг̇г̇зхи барин̃н̃аабахаанасажчигирияабхааванаавасзна сол̣асавид̇хамби гижжам̣ нидтаабид̇анд̇и ад̇т̇о. наабарам̣ ид̇т̇ад̇д̇ааяаад̇и ид̣̇аани бунаид̇т̇абхаавааяа звам̣сол̣асагижжабхаавааяа, гилзсагкаяааяа ваа маг̇г̇абхааванаа над̇т̇ийд̇и. ат̇а ваа, ид̇т̇ад̇д̇ааяаад̇и ид̇т̇абхаавад̇о имасмаа звам̣багаараа ид̣̇аани вад̇д̇амаанагканд̇хасанд̇аанаа абарам̣ канд̇хасанд̇аанам̣ над̇т̇и. имз бана бан̃жагканд̇хаа барин̃н̃аад̇аа д̇идтанд̇и, чиннамуулаго ругко вияаад̇и аб̣бхан̃н̃ааси. ан̃н̃ад̇арод̇и зго. арахад̇анд̇и араханд̇аанам̣, бхаг̇авад̇о саавагаанам̣ арахад̇ам̣ аб̣бханд̇аро ахосийд̇и.
Vusitanti vutthaṃ parivutthaṃ, kataṃ caritaṃ niṭṭhāpitanti attho. Brahmacariyanti maggabrahmacariyaṃ. Kataṃ karaṇīyanti catūsu saccesu catūhi maggehi pariññāpahānasacchikiriyabhāvanāvasena soḷasavidhampi kiccaṃ niṭṭhāpitanti attho. Nāparaṃ itthattāyāti idāni punaitthabhāvāya evaṃsoḷasakiccabhāvāya, kilesakkhayāya vā maggabhāvanā natthīti. Atha vā, itthattāyāti itthabhāvato imasmā evaṃpakārā idāni vattamānakkhandhasantānā aparaṃ khandhasantānaṃ natthi. Ime pana pañcakkhandhā pariññātā tiṭṭhanti, chinnamūlako rukkho viyāti abbhaññāsi. Aññataroti eko. Arahatanti arahantānaṃ, bhagavato sāvakānaṃ arahataṃ abbhantaro ahosīti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
вад̇т̇асуд̇д̇аван̣н̣анаа нидтид̇аа.
Vatthasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 7. вад̇т̇асуд̇д̇ам̣ • 7. Vatthasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 7. вад̇т̇асуд̇д̇аван̣н̣анаа • 7. Vatthasuttavaṇṇanā
