| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၄. ဝတ္ထသုတ္တဝဏ္ဏနာ
4. Vatthasuttavaṇṇanā
၁၈၅. စတုတ္ထေ သတိသမ္ဗောဇ္ဈင္ဂော ဣတိ စေ မေ ဟောတီတိ သတိသမ္ဗောဇ္ဈင္ဂောတိ ဧဝံ စေ မယ္ဟံ ဟောတိ။ အပ္ပမာဏောတိ မေ ဟောတီတိ အပ္ပမာဏောတိ ဧဝံ မေ ဟောတိ။ သုသမာရဒ္ဓောတိ သုပရိပုဏ္ဏော။ တိဋ္ဌတီတိ ဧတ္ထ အဋ္ဌဟာကာရေဟိ သတိသမ္ဗောဇ္ဈင္ဂော တိဋ္ဌတိ – ဥပ္ပာဒံ အနာဝဇ္ဇိတတ္တာ အနုပ္ပာဒံ အာဝဇ္ဇိတတ္တာ သတိသမ္ဗောဇ္ဈင္ဂော တိဋ္ဌတိ, ပဝတ္တံ, အပ္ပဝတ္တံ, နိမိတ္တံ, အနိမိတ္တံ သင္ခာရေ အနာဝဇ္ဇိတတ္တာ, ဝိသင္ခာရံ အာဝဇ္ဇိတတ္တာ သတိသမ္ဗောဇ္ဈင္ဂော တိဋ္ဌတီတိ။ ဣမေဟိ အဋ္ဌဟာကာရေဟိ တိဋ္ဌတီတိ ထေရော ဇာနာတိ, ဝုတ္တာကာရဝိပရီတေဟေဝ အဋ္ဌဟာကာရေဟိ စဝန္တံ စဝတီတိ ပဇာနာတိ။ သေသဗောဇ္ဈင္ဂေသုပိ ဧသေဝ နယော။
185. Catutthe satisambojjhaṅgo iti ce me hotīti satisambojjhaṅgoti evaṃ ce mayhaṃ hoti. Appamāṇoti me hotīti appamāṇoti evaṃ me hoti. Susamāraddhoti suparipuṇṇo. Tiṭṭhatīti ettha aṭṭhahākārehi satisambojjhaṅgo tiṭṭhati – uppādaṃ anāvajjitattā anuppādaṃ āvajjitattā satisambojjhaṅgo tiṭṭhati, pavattaṃ, appavattaṃ, nimittaṃ, animittaṃ saṅkhāre anāvajjitattā, visaṅkhāraṃ āvajjitattā satisambojjhaṅgo tiṭṭhatīti. Imehi aṭṭhahākārehi tiṭṭhatīti thero jānāti, vuttākāraviparīteheva aṭṭhahākārehi cavantaṃ cavatīti pajānāti. Sesabojjhaṅgesupi eseva nayo.
ဣတိ ဣမသ္မိံ သုတ္တေ ထေရသ္သ ဖလဗောဇ္ဈင္ဂာ ကထိတာ။ ယဒာ ဟိ ထေရော သတိသမ္ဗောဇ္ဈင္ဂံ သီသံ ကတ္ဝာ ဖလသမာပတ္တိံ သမာပဇ္ဇတိ, တဒာ ဣတရေ ဆ တဒန္ဝယာ ဟောန္တိ။ ယဒာ ဓမ္မဝိစယာဒီသု အညတရံ, တဒာပိ သေသာ တဒန္ဝယာ ဟောန္တီတိ ဧဝံ ဖလသမာပတ္တိယံ အတ္တနော စိဏ္ဏဝသိတံ ဒသ္သေန္တော ထေရော ဣမံ သုတ္တံ ကထေသီတိ။
Iti imasmiṃ sutte therassa phalabojjhaṅgā kathitā. Yadā hi thero satisambojjhaṅgaṃ sīsaṃ katvā phalasamāpattiṃ samāpajjati, tadā itare cha tadanvayā honti. Yadā dhammavicayādīsu aññataraṃ, tadāpi sesā tadanvayā hontīti evaṃ phalasamāpattiyaṃ attano ciṇṇavasitaṃ dassento thero imaṃ suttaṃ kathesīti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၄. ဝတ္ထသုတ္တံ • 4. Vatthasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄. ဝတ္ထသုတ္တဝဏ္ဏနာ • 4. Vatthasuttavaṇṇanā
